Mazwi Akangwara
6 Mwana wangu, kudari wakafiyari ciro ku mudoni wako,
Kudari wakabatana nyara* no mundhu waucikazivi,
2 Kudari wakacengejwa ngo zvigondiso zvako kamare,
Kudari wakabathwa ngo magama akavha pa muromo wako,
3 Mwana wangu, unonga wawira munyara jo mudoni wako.
Kuti upone, unodikana kuita kudari:
Endai koojidodokesa, udeketerere mudoni wako.
5 Itai inga mbhwembhwe iri kutiza munyara jo muvhimisi,
Inga shiri iri kutiza munyara jo munyangi.
6 Iwewe mundhu ano umbhwa,* endai kojijiswa ngo usunji;
Sotesesai makwanja ahwo.
Ukadaro, unozova muzivi.
7 Pikija usunji hucina mutungamiriri, muvonereri kana mutongi,
8 Ihwona hunonasirira zvokuha zvawo pa mukuvo wo cirimo,*
Hwounganija mbeu yahwo pa mukuvo wo kukotora.
9 Iwewe mundhu ano umbhwa,*
Unozoenderera mberi wakavata mbhera rini?
Unozomuka rini mu hope jako?
10 Apa ukava no zvihope, apa woozira,
Wecigarira nyara kuti uzorore,
11 Urombo hwako, hunozokugumira inga mbavha,
Kutama kwako, kunozokugumira inga mundhu ano nvuti.
12 Mundhu wakashata no acikabesi ciro,
Anogara ecivereketa zvakashata basi;
13 Anoboira-boira,* anoita zvitatijo ecishandisa makumbo no kuvereketa ngo zvikunwe.
14 Ngo mwoyo wakashata,
Nguva jese ivona vanorura mazano akashata, vecibara kutama kuzwana.
15 Ndizvona zvinomuitisa kuti dambujiko rake rimugumire ngo civhumbu;
Iyena anozocangajwa mu kukopira* ko jiso.
Akuna mutombo umweni.
16 Kuno zviro zvitandhatu zvinonyenywa ndi Jehovha;
Hina, zviro zvinomwe zvaanonyenya.
Izvona nga izvi:
17 Majiso anojikuja, rurumi hunonyepa, nyara jinouraya mundhu acina ndava,
18 Mwoyo unorura mazano akashata, makumbo anogogoma ngo kukasika koita zvakashata,
19 Capupu cinovereketa zvokunyepa,
No mundhu wese anobara mapope pakati po hama.
20 Mwana wangu, zwirai mbhangiro ya baba wako,
Ucaramba zvaunojijiswa ndi* mai wako.
21 Zvinamirei mu mwoyo mako;
Uzvidire mu musipa mako.
22 Kudari ukafamba, izvona zvinozokutungamirira;
Ukavata, izvona zvinozokungwarira;
Kudari ukamuka, izvona zvinozobhuya na iwewe.*
23 Ngokuti mupango, wakaita inga rujhu,
Mutemo wakaita inga ruvheneko,
Kupangihwa ngo kusvuzvunuhwa, igwanja ro upenyu.
24 Izvona zvinozokujivirira ku mwanakaji wakashata,
Zvinozokujivirira ku rurumi hwo mwanakaji anohura.*
25 Mwoyo wako audikani kuemura kuseja* kwake,
Nee audikani kucengejwa ngo majiso ake anoemuja.*
26 Ngokuti hure, inoitisa kuti mwanarume ave murombo wokupejisira,
Zvokuti caanokwanisa kutenga, idimbu ro pau basi
Kuveni mwanakaji anoita upombo,* anopsaka upenyu hwako kamare.
27 Mundhu angaunganija masimbe o muriro pa diti rake, nguvo yake yotama kupsa here?
28 Mundhu angafamba ngo panyezuru po masimbe o muriro soka jake jotama kupsa weya?
29 Ndizvona zvinoitikavo no mundhu anovatana no mukaji wo mudoni wake;
Akuna anomupsasa wotama kusvuzvunuhwa.
30 Vandhu avashori mbavha
Kudari ikaba ngo kuda kupeja njara yayo.
31 Pikija zvakadaro, kudari akakhandika,
Iyena anozohwirija kupindirija runomwe;
Anozopekeja zviro zvese zvinosisira zvaanazvo pamuzi pake.
32 Mundhu anoita upombo, aana hwiru;*
Anoita zvondhozvo, ari kujikhuvaza pacake.
33 Iyena anozowana zvivonje basi no kushohwa,
Kupserujwa kwake akuzoperi.
34 Ngokuti ushanje hwo mwamuna wake, hunozobwaka;
Aazovi no unyasha paanozoda kumuhwirijira.
35 Iyena aazotenderi kuripihwa ngo ciri cese;
Nee kuti cive cipo cakakurisa kudini, iyena aazocitenderi.