Mazwi Akangwara
3 Mwana wangu, ucakanganwa zvandinokujijisa,*
Mwoyo wako ngauzwire mutemo jangu.
2 Ngokuti ijona, jinozokuengejera njiku jakawanda,
No makore akawanda o upenyu no runyararo.
3 Rudo ucikacinji no kugondeka,* azvidikani kukusiya.
Zvisungirei mu musipa mako.
Zvitarei mu mwoyo mako.
4 Ukadaro, unozowana unyasha,
No kuzwisisa pamberi pa Mwari no po vandhu.
5 Thembai Jehovha ngo mwoyo wako wese,
Audikani kuthemba* uzivi hwako.
6 Muthembei mu makwanja ako ese,
Iyena anozorungamisa makwanja ako.
7 Audikani kuva wakangwara mu mavonero ako,
Ithyai Jehovha, utize zvakashata.
8 Izvi zvinozorapa muviri wako,*
Zvovangisa maphondo ako.
9 Kujai Jehovha ngo upfumi hwaunahwo,
Ngo zviro zvokutanga* zvaunokotora.*
10 Ngo kudaro, zvitumba* zvako zvinozozara.
Mabasiya enyu okusvinira vhinyu imbza, anozosvejekera pasi.
11 Mwana wangu, ucaramba mbhangiro ya Jehovha,
Audikani kusiya mbhangiro yake.
12 Ngokuti Jehovha anopangira vaanoda,
Inga zvinoita baba vanopangira mwana wavanoda.
13 Anodakara mundhu anowana uzivi,
No mundhu ano ungwaru.
14 Kuwana uzivi, kuri nane maningi kupinda kuwana sirivha.
Kuhuwana, kuri nane maningi kupinda kuwana goridhi.
15 Ihwona hunosisira maningi kupinda mapuwe o mutengo mukuru,
Akuna caunoda cingaezaniswa na ihwona.
16 Ngo divi ro mukono muho waho,
Kuno upenyu wakareba.
Ngo divi ro mukono boshwe waho,
Kuno nduma, upfumi no rukujo.
17 Makwanja ahwo, anodakajisa,
Makwanja ahwo ese, ngo orunyararo.
18 Ihwona ndihona muti unopekeja upenyu
Kuna vayana vanohubatisisa,
Ivona vanozovoniwa kuva vandhu vakadakara.
19 Jehovha wakasika nyika ngo uzivi.
Wovangisa denga ngo ungwaru.
20 Ngo uzivi hwake,
Kumwa yakajika, yakabuda.*
Makore okudenga akawisa cando.
21 Mwana wangu, ucaruza zviro izvi* wakasota.
Ngwarirai uzivi no ungwaru.
22 Izvona zvinozokupekeja upenyu,
Zvinozova zviro zvokusejesa* mu musipa mako.
23 Ngo kudaro, iwewe unozofamba ucina ngozi iri yese mu makwanja ako.
Makumbo ako aazokhugunywi ngo ciri cese.
24 Iwewe ukavata, auzothyi ciro;
Unozovata, hope jako jodakajisa maningi.
25 Iwewe auzothyi ciri cese cinothyisa cinoguma ngo civhumbu
Nee auzothyi dutu* rinozoviira vandhu vakashata.
26 Ngokuti iwewe unozonasa kuthemba Jehovha;
Iyena anozojivirira soka jako kuti jitame kubathwa.
27 Ucaregera kuita zvakanaka ku mundhu anoda besero
Kudari wecikwanisa kumubesa.
28 Ucavhunja mudoni wako kudari:
“Hwirirai uviye mangwana! Ndinozokupekeja mangwanewo,”
Kuveni unaco munyara.
29 Ucarura mazano okuda kukhuvaza mudoni wako
Anogara na iwewe ecitokuthemba.
30 Ucanesana no mundhu acina ndava
Kudari iyena acizivi kukuitira cakashata.
31 Ucaitira thima mundhu wakashata
Audikani kukheta makwanja ake, nee rimwe haro,
32 Ngokuti Jehovha anonyenya vandhu vanonyepa,
Asi anoita ushamwari hwakavanga maningi no vandhu vakagondeka.
33 Kutuka kwa Jehovha, kuri pa muzi po mundhu wakashata,
Asi iyena anokomborera muzi wo mundhu wakanaka.
34 Ngokuti iyena anoshora vandhu vanoshora,
Asi anoitira unyasha vandhu vakapfava.
35 Vazivi vanozokujwa,
Asi mapenji anokuja zviro zvinopseruja.