Johani
16 “Ndamuvhunja zviro izvi kuti mutame kukhugunyika. 2 Vandhu vazinji vanozomugogomera mu masinagoga. Inozoguma nguva yo kuti mundhu wese anomuuraya anozorangarira kuti ari kuitira Mwari basa rakacena. 3 Asi ivona vanozoita zviro izvi ngokuti avazivi Baba wangu na inini. 4 Ngo kudaro, ndamuvhunja zviro izvi kuti ikazokwana nguva yazvinozoitika, muceukije kuti ndainga ndakamuvhunja zviro izvi.
“Andizivi kumuvhunja zviro izvi pakutanga ngokuti ndainga na imwimwi. 5 Asi wari ndiri kwenda ka Wiya wakandituma; pikija zvakadaro, apana na umwe wenyu wandivhunjisa kuti: ‘Muri kwenda kwapi?’ 6 Asi mwoyo jenyu jakasuruvara maningi ngokuti ndamuvhunja zviro izvi. 7 Ndiri kumuvhunja zvokadi kuti kupinda kwangu kunozomubesera. Ngokuti ndikatama kupinda, mubeseri aazoviyi kwamuri; asi ndikapinda, ndinozomutumira kwamuri. 8 Paanozoviya, iyena anozoita ucapupu ku nyika ngo pamusoro po cishaishi, ururami no kutongwa: 9 Kutanga ngo pamusoro po cishaishi, ngokuti avazivi kunditenda; 10 tevere, ngo pamusoro po ururami, ngokuti ndiri kwenda kuna Baba, imwimwi amucazondivonizve; 11 perapo ngo pamusoro po kutongwa, ngokuti mutongi wo nyika ino watongwa.
12 “Ndicino zviro zvakawanda zvokumuvhunja, asi wari imwimwi amukwanisi kuzvizwisisa. 13 Paanozoviya mubeseri, mujimu wo cokwadi, anozomutungamirira mu zvokadi zvese, ngokuti aazobhuyi ngo kuda kwake, asi anozobhuya zvese zvaakazwa no kumuzivisa zviro zvinozoviya. 14 Iyena anozondikuja ngokuti anozomuzivisa zviro zvaanozwa kwandiri. 15 Zviro zvese zvina Baba, ngo zvangu. Ngo zvinomuitisa kuti amuzivise zviro zvaanozwa kwandiri. 16 Mukati mo mukuvo mushomani amucazondivonizve, asi munozondivonazve mukati mo mukuvo mushomani.”
17 Vajiji vake vamweni, vakavhunjisana ngocavo kuti: “Anoda kunangenyi ngo masoko okuti: ‘Mukati mo mukuvo mushomani amucazondivoni, asi munozondivonazve mukati mo mukuvo mushomani,’ ‘ngokuti ndiri kwenda ka Baba wangu’?” 18 Ivona vainanga kuti: “Ari kuda kunangenyi ngo masoko okuti: ‘Mukati mo mukuvo mushomani’? Atiripi kuzvibata zvaari kuda kunanga.” 19 Jesu wakaziva kuti vaida kumuvhunjisa, ngo kudaro, wakavavhunja kuti: “Imwimwi muri kuvhunjisana ngocenyu ngokuti ndamuvhunja kuti: ‘Mukati mo mukuvo mushomani amucazondivoni, asi munozondivonazve mukati mo mukuvo mushomani?’ 20 Ndinomuvhunja zvokadi kuti imwimwi munozocema* no kucumba, asi nyika inozodakara; imwimwi munozocamwa, asi kucamwa kwenyu kunozocinja kuita mudakaro. 21 Mwanakaji paanonga ecida kubara, anohwajihwa ngokuti nguva yake yokubara inonga yaguma, asi paanobara mwana, iyena aacarangarijizve matambujiko ngo ndava yo mudakaro waanawo wo kubara mwana mu nyika. 22 Na imwimwivo, wari makacamwa; asi inini ndinozomuvonazve, mwoyo yenyu inozodakara. Apana anozomutorera mudakaro wenyu. 23 Pa njiku yondhoyo amuzondivhunjisi ciri cese. Ndinomuvhunja zvokadi kuti: Kudari mukazokumbira ciri cese kuna Baba ngo zina rangu, munozocipuwa. 24 Wari, imwimwi amuto mukakumbira ciri cese ngo zina rangu. Kumbiranyi munozopuwa kuti muzare ngo mudakaro.
25 “Ndamuvhunja zviro izvi ngo kuezanisira. Icazoguma nguva yokuti andizobhuizve na imwimwi ngo kuezanisira, asi ndinozonasa kumujekesera pambhene ngo pamusoro pa Baba. 26 Pa njiku yondhoyo munozokumbira kuna Baba ngo zina rangu. Andiripi kunanga kuti ndinozomukumbirira. 27 Baba vanomuda ngokuti imwimwi makandida motenda kuti ndakaviya inga muimiriri wa Mwari. 28 Ndakaviya pa nyika inga muimiriri wa Baba. Wari ndiri kuvha pa nyika, ndoenda kuna Baba.”
29 Vajiji vake vakati: “Wari muri kuvereketa zvakajeka mucikaiti ngo kuezanisira. 30 Wari toziva kuti munoziva zviro zvese, apacina mundhu anodikana kumuita muvhunjo. Nga izvi, tinotenda kuti makavha kuna Mwari.” 31 Jesu wakavadavira kuti: “Wari mozvitenda? 32 Izwanyi! Inozoguma nguva, iyona yatoguma, pamunozoparajika umwe na umwe wenyu woenda kanyi kwake mondisiya ndega. Inini andiripi ndega ngokuti Baba vana inini. 33 Ndamuvhunja zviro izvi kuti imwimwi muve no runyararo ngo ndava yangu. Munozotambujika mu nyika, asi cunganyi! Inini ndanyisa nyika.”