Nduyo
Ndumbo. Nduyo yo vana va Koraa. Ku mutungamiriri; no Maimbiro a Maharati.* Inoimbhwa ngo kusiyanisa izwi. Masikiri* a Emani wo Zera.
88 Jehovha Mwari wo ruponeso hwangu,
Comasikati ndinocema,
Cousiku ndinoguma pamberi penyu.
2 Mukumbiro wangu ngaugume kwamuri,
Sheamijanyi njeve yenyu, muzwe kudeketera kwandiri kuita ndecikumbira besero.
3 Ngokuti upenyu hwangu wakazara ngo matambujiko,
Upenyu wangu uri phedo kuti uende mu Guva.*
4 Inini ndiri kuverengwa pakati po vandhu vaya vari kwenda mu guva;
Inini ndava mundhu acina simba,
5 Ndakasiiwa pakati po vandhu vakafa
Ndakadari inga mutembo jadihwa mu guva
Jicikarangarihwizve ndimwi
Jakavhiswa mu nyara jenyu.
6 Makandidira mu rindi rakajika maningi,
Mu ndau jino cidima no mu rindi guru rakajikisisa.
7 Ushungu hwenyu uri kundiremera,
Imwimwi munonditambuja ngo mavimbi enyu ano simba. (Sera)
8 Imwimwi makatora vandhu vandinozivana navo, movadira ndhambo na inini;
Mondiita kuti ndive ciro cakashata pamberi pavo.
Wari ndakasungwa nee andikwanisi kutiza.
9 Majiso angu aacavoni ngo ndava yo matambujiko angu.
Jehovha Mwari wangu, inini ndinomudanija njiku jese;
Pandinoita mukumbiro ndinotambanuja nyara jangu kwamuri.
10 Kureva kuti mungaitira mushamaiso vandhu vakafa?
Vaya vacina simba vari mu rufu, vangamuka kuti vamusimbe here? (Sera)
11 Kureva kuti rudo hwenyu hucikacinji hunozoziviswa mu guva?
Kugondeka kwenyu, kunozoziviswa mu ndau yokuparaja* here?
12 Kureva kuti mushamaiso jenyu jinozozivika mucidima?
Kana ururami hwenyu hunozozivika mu nyika yakakanganika?
13 Jehovha Mwari wangu, inini ndiciri kumucemera ndecikumbira kubeswa,
Mangwanani ese mukumbiro wangu unoguma pamberi penyu.
14 Jehovha Mwari wangu, ngenyi muri kundiramba?
Ngenyi munondivigira kumeso kwenyu?
15 Kuvhira udoko hwangu,
Ndiri kutambujika, ndiri phedo no kuda kufa;
Andicazivi zvokuita ngo pamusoro po zviro zvakashata zvamuri kutendera kuti zvinditambuje.
16 Ushungu hwenyu unobwaka unondikhuvaza;
Zviro zvenyu zvinothyisa zviri kundiparaja.
17 Zvinonditendeneja inga kumwa njiku jese;
Zvinondifungira mu mativi ese.
18 Makatora shamwari jangu no vadoni vangu movaendesa ndhambo;
Wari uno cidima ndicona mudoni wangu.