Jobe
1 Mu nyika yo Uzi, mainga no mwanarume umweni waidanijwa Jobe.* Wainga mundhu wakarurama, acina ndava.* Iyena waithya Mwari no kunyenya zvakashata. 2 Jobe wakabara vana vanomwe vorume no vana vatatu vokaji. 3 Iyena waingazve no mavhuta anokwana kuita 7.000 no kamera jinokwana kuita 3.000 no n’gombe* jinokwana kuita 1.000 pomwe no mbongoyo jokaji jinokwana kuita 500. Waingazve no vashandi vakawanda, zvoita kuti ave no nduma pakati po vandhu vese vaigara kumavhazuva.
4 Vana vake vainga no cirovejeso co kuita mabuso pamuzi pavo.* Vaikokavo hambzaji javo ndhatu kuti vahe najo no kumwa vhinyu. 5 Pakupera ko njiku jese jovaiita mabuso, Jobe waivadanija kuti avacenese. Iyena waimuka co mangwanani matete, woitira umwe na umwe wavo mupiro jo kupiswa, ngokuti wairangarira kudari: “Dangani vana vangu vakashaisha, no kutuka Mwari mu mwoyo mwavo.” Izvi ndizvona zvaiitwa ndi Jobe mukuvo wese.
6 Yakazoguma njiku yokuti vana va Mwari* wo cokwadi, vakaenda pamberi pa Jehovha, Sathana wainga aripovo.
7 Perapo Jehovha wakavhunjisa Sathana kudari: “Uri kuvha kwapi?” Sathana wakadavira Jehovha kudari: “Ndiri kuvha kofamba-famba mu nyika.” 8 Perapo Jehovha wakavhunjisa Sathana kudari: “Wavona here mushandiri wangu Jobe? Akuna mundhu umweni wakatojana na iyena pasi pese. Iyena imundhu wakarurama nee aana ndava.* Anothya Mwari no kunyenya zvakashata.” 9 Waro Sathana wakadavira Jehovha kudari: “Kunanga kuti Jobe anothya Mwari biresi here? 10 Amuzivi kumutendeneja ngo mupfimbiji kuti ingwarire iyena no nyumba yake no zviro zvake zvese here? Imwimwi makakomborera basa ro nyara jake. Mushambi wake, unofukija nyika yese. 11 Asi tambanujanyi nyara jenyu, muvhise zvese zvaanazvo, imwimwi munozovona kuti anozomutuka pamberi penyu kamare.” 12 Perapo Jehovha wakavhunja Sathana kudari: “Vonai! Zviro zvese zvaanazvo, zviri munyara mwako, asi iwewe audikani kumupsasa.” Ngo kudaro, Sathana wakabuda pamberi pa Jehovha.
13 Pa njiku yokuti vana vorume va Jobe no vana vake vokaji vaiha no kumwa vhinyu ku muzi ko hama yavo yo dangwe, 14 pakaguma mushandiri wa Jobe womuvhunja kudari: “N’gombe jainga jecirima, no mbongoyo jaihava phedo pajo. 15 Waro Vashebha vatihwisa vojitora, perapo ivona vaurayavo vashandiri venyu ngo banga. Ndini ndasara basi kuti ndimuvhunje zviro izvi.”
16 Paainga acavereketa, mushandi umweni wa Jobe wakaguma, wonanga kudari: “Muriro wavha kuna Mwari wambhwera, wopisa* mavhuta no vashandiri venyu, vopera kufa. Ndini ndasara basi kuti ndimuvhunje zviro izvi.”
17 Paainga acavereketa, mushandi umweni wa Jobe wakaguma, wonanga kudari: “Vakaradhiya vakaronga zvikwata zvitatu, voguma vokumbza makamera vopinda nawo. Ivona vaurayazve vashandiri venyu ngo banga. Ndini ndasara basi kuti ndimuvhunje zviro izvi.”
18 Paainga acavereketa, mushandi umweni wa Jobe wakaguma, wonanga kudari: “Vana venyu vorume no vokaji vainga veciha no kumwa pamuzi wo hama yavo yodangwe. 19 Ngo civhumbu, kwavhunguza zibepo raivha ngo mu bani, rovhunguza zvikina zvirongomuna zvo nyumba, iyona yowira vana venyu, vofa. Ndini ndasara basi kuti ndimuvhunje zviro izvi.”
20 Ngo kudaro, Jobe wakamuka wopara vhuji rake, womwesa zvokusimira zvake, wowa pasi wogwadama eciti: 21 “Ndakabuda mitu mu ndani ya mai wangu,
Ndinozohwirirazve mitu.
Jehovha wakandipa, Jehovha watora.
Zina ra Jehovha ngarienderere mberi recikujwa.”
22 Pa zvese izvi, Jobe aazivi kushaisha nee aazivi kupumbha Mwari kuti waita ciri cese cakashata.