2 Timoti

1 Inini Pauro, mupostori wa Kristu Jesu ngo kuda ka Mwari, mukuzwirana no cigondiso co upenyu hunozoviya ngo ndava ya Kristu Jesu, 2 ndiri kutarira Timoti mwana wangu anodiwa:

Ivai no unyasha hucikaezaniswi, pena no runyararo hunovha kuna Mwari Baba na Kristu Jesu, Mambo wedu.

3 Ndinobonga kuna Mwari, wandinoitira basa rakacena inga zvakaitwa ngo majicekuru angu pomwe no hana yakacena, andikanganwi kukuceukija mu mukumbiro jangu jo kudeketera usiku no masikati. 4 Pandinoceukija musoji jako, ndinova no cisuwo* co kukuvona, kuti ndizare ngo mudakaro. 5 Ndinorangarira rutendo hwako huciripi hokucengejera, hwakatanga na mbiya wako Roidhe na mai wako Eunise, ndinotenda kuti iwewe unahwovo.

6 Ngo kudaro, ndinoda kukuceujira kuti ukhwindijire, inga muriro, cipo cowakapuwa ndi Mwari pa ndakakucanjikira nyara jangu. 7 Mwari aazivi kutipa mujimu wo kuthya, asi wakatipa mujimu wo simba, wo rudo no wo murangariro wakanaka. 8 Ngo kudaro ucapseruka ngo kuita ucapupu ngo pamusoro pa Mambo wedu kana ngo pamusoro pangu inini, musungwi ngo ndava yake, asi, wecigonda simba ra Mwari, ucathya kutambujika ngo ndava yo masoko akanaka. 9 Iyena wakatiponesa no kutidanija kuti tive vakacena, kuciripi ngo ndava yo mabasa edu, asi ngo ndava yo cidisiso cake no unyasha hucikaezaniswi. Unyasha hwondhohwo takahupuwa ngo pamusoro pa Kristu Jesu, kuvhira kare no kare, 10 asi wari hwakakhombijwa pakaviya Muponesi wedu, Kristu Jesu. Iyena wakapfujura rufu perapo wozivisa ruvheneko hwo upenyu hucikavori ngo pamusoro po masoko akanaka. 11 Inini ndakagajwa kuti ndive mucumaeri, mupostori no mujijisi wo masoko aya.

12 Ndizvona zvinondiitisa kuti nditambujikevo ngo zviro izvi, asi andipseruki. Ngokuti ndinoziva Wiya wandinotenda no kuthemba kuti anokwanisa kuviga zviya zvondakamupa mbhera pa njiku yondhoyo. 13 Rambai wakabatisisa ndhungamiriro yo masoko aya akacena* o wakazwa ndini, pomwe no rutendo no rudo hwakabatana na Kristu Jesu. 14 Korondhai utaka hwakanaka uhu hwawakapuwa ngo mujimu mucena, uri mukati mwedu.

15 Unozviziva kuti vese vari mu Aziya vakandifuratira, kubatanijavo Figero na Hermogene. 16 Mambo ngaaitire unyasha Oneziforo no muzi wake, ngokuti ndiyena wakandivangisa kazinji acikapseruki ngo njinga jangu. 17 Asi, paainga ku Roma, iyena wakandipsanga maningi mbhera wondiwana. 18 Mambo ngaaite kuti awane unyasha hunovha kuna Jehovha* pa njiku yondhoyo. Iwewe unoziva mabasa ese aakaita mu Efeso.