2 Timoti
4 Inini ndinokuvhunja pamberi pa Mwari na Kristu Jesu, anozotonga vapenye no vakafa, paanozova Mambo wo Umambo: 2 Cumaerai soko ra Mwari, zviitei ngo kukasika pa nguva yakanaka no pa nguva inonesa, pangirai, ngwajai, vangisai, kamisai no kusengerera kwese weciva mujijisi wakanaka. 3 Ngokuti inozoguma nguva yokuti avazocungiriri jijiso yakacena,* asi mukuzwirana no zvido zvavo, vanozopsaka vajijisi vanovavhunja zvinodakajisa njeve javo. 4 Vanozoreesa njeve javo ku cokwadi, vopurutana ngano jo kunyepa. 5 Asi iwewe, ivai wakarinda pa zviro zvese, cijikirai mu matambujiko, itai basa ro mucumairi wo masoko akanaka, itai ushoni mushando wako.
6 Inini ndiri kuduruhwa inga cipo co vhinyu no nguva yo kusujunuhwa kwangu iri kuguma. 7 Ndakahwa hondo yakanaka, ndakaita muphikizano mbhera ku magumo, ndakararama mukuzwirana no rutendo. 8 Kuvhira wari, ndavigihwa junguja ro ururami randinozopuwa ndi Mambo, mutongi wakarurama, pa njiku yondhoyo. Aazopi inini basi, asi anozopavo vaya vari kuimira kuviya kwake.
9 Itai zvaunokwanisa kuti uviye kuno ngo kukasika. 10 Ngokuti Dhema wakanditiza ngo ndava yo kudisisa zviro zvo nyika* ino, iyena wakaenda ku Tesaronika, Kresente wakaenda Garatiya, Tito woenda Dharimatiya. 11 Wandinaye kuno ndi Ruka basi. Viyai na Marko kuno, ngokuti iyena anozondibesera maningi mu basa randinoitira Mwari. 12 Asi, ndakatuma Tikiko kuti aende Efeso. 13 Paunoviya kuno, ndivisirei nguvo yo kufuka mbhepo yandakasiya ku Trowadhe na Karpo. Torai muphukutu, maningi-ningi yo matovo iya.
14 Areshandre munyungurusi wo utare, wakandikhuvaza maningi. Jehovha* anozomuhwirijira mu kuzwirana no mabasa ake. 15 Iwewevo bhasopai naye, ngokuti wakazonda maningi masoko edu.
16 Pa ndakatanga kujijivirira, apana wainga ku divi rangu, asi vese vakanditiza, asi Mwari ngaavaregerere. 17 Mambo wakandibesera no kundipa simba, kuti masoko akanaka anase kucumaihwa ngo njiyo yangu, kuti vandhu vo majinja ese vamazwe. Ndakaponeswa pa muromo wo mbhondoro. 18 Mambo anozondisujunura mu ushati hwese no kundiponesa kuti ndiende ku Umambo hwake hwo mugore. Iyena ngaakujwe mbhera narini, kwenda no kwenda. Ameni.
19 Tambisai Priska na Akira no ukama hwese hwa Oneziforo.
20 Erasto wakasara ku Korinte, asi ndakasiya Trofimo ku Mireto ecihwaja. 21 Itai zvaunokwanisa kuti uviye kuno cipepo cicito cikatanga.
Uri kutambiswa ndi Eubhuru, ndi Pudhente, ndi Rino, ndi Kraudhiya no hama jese jiri kukutambisavo.
22 Mambo ngaave no maitiro amunotatijira. Unyasha hwake hucikaezaniswi ngauve na imwimwi mwese.