1 Vatesaronika

1 Inini Pauro na Sirivhano pamwepo na Timoti, ndiri kutarira ku ungano yo Tesaronika, yakabatana pamwepo na Mwari Baba na Mambo Jesu Kristu:

Ivanyi no unyasha hucikaezaniswi pamwepo no runyararo.

2 Itusu tinobonga Mwari mukuvo wese, patinobhuya ngo pamusoro penyu mu mukumbiro jedu. 3 Mukuvo wese tinoceukija mabasa enyu akagondeka, kushanda kwenyu ko rudo, no kucungirira kwenyu ngo ndava yo vetero yamunayo muna Mambo wedu Jesu Kristu, pamberi pa Mwari wedu na Baba. 4 Ngokuti itusu tinozviziva hama jinodiwa ndi Mwari, kuti iyena wakamusana. 5 Ngokuti masoko akanaka atinocumaera, aazivi kumugumira ngo masoko basi, asi ngo simba ra Mwari pamwepo no mujimu mucena, tinocokwadi cakavanga inga zvamunoziva mararamire atakaita kuti timubesere. 6 Imwimwi makava vatevejeri vedu, movazve vatevejeri va Mambo, ngokuti makaashira soko mecitambujika maningi no kudakara kunovha ku mujimu mucena. 7 Zvoita kuti muve muezaniso ku vatendi vese vo mu Masedhoniya no mu Akaya.

8 Imwimwi amuzivi kundhandhanisa soko ra Jehovha* mu Masedhoniya no mu Akaya basi, asi mu ndau jese. Ngo kudaro, mundhu wese ari kuzwa ngo pamusoro po rutendo hwenyu kuna Mwari, zvoita kuti titame zvizinji zvokuvereketa. 9 Ngokuti, ivona kamare, vanoenderera mberi vecibhuya ngo pamusoro po matangiro atakaita kubhuya na imwimwi, no matendeukire omakaita kwenda kuna Mwari, mecivha ku zvithombi zvenyu kuti mushandire Mwari anopona no wocokwadi, 10 kuti muvetere Mwana wake anovha kudenga, wakamuswa ko vakafa, Jesu, uwo anozotiponesa pa ushungu hunozoviya.