Varoma
10 Hama, zvandinoda kamare ngo mwoyo wese ndecideketera mu mukumbiro kuna Mwari, ngo zvokuti ivona vaponeswe. 2 Ndinovaitira ucapupu hwokuti ivona vanovangisira maningi mu basa ra Mwari, asi avazviiti ngo zivo yakarungama. 3 Ngo ndava yo kutama kwavo kuziva ururami hwa Mwari, vecipsaka ururami hwavo, ivona avazwiri ururami hwa Mwari. 4 Ngokuti Kristu ndiyena magumo o Mutemo, kuti vese vanotenda vave no ururami.
5 Mosi anotara ngo pamusoro po ururami hunowanika ngo Mutemo eciti: “Mundhu anoita zviro izvi anozopona ngo ndava yazvo.” 6 Ngo pamusoro po ururami hunowanika ngo rutendo, Matahwa anoti: “Ucadonanga ngo mumwoyo mako kuti: ‘Ndiyani anozoenda kudenga?’ kuti aende koderusa* Kristu. 7 ‘Ndiyani anozoenda mu rindi rakajikisisa?’ kana kuti, ndiyani anozoenda koomusa Kristu ku vakafa?” 8 Waro Matahwa aya aida kunangenyi? “Soko riri phedo na iwewe, pa muromo pako no mumwoyo mako”; kuda kureva “soko” ro rutendo, ratiri kucumaerari. 9 Kudari ukazivisa pambhene ngo muromo wako kuti Jesu ndi Mambo, wecitenda mu mwoyo mako kuti Mwari wakamumusa ko vakafa, iwewe unozoponeswa. 10 Ngokuti mundhu anotenda ngo mwoyo kuti ave mururami, asi anozivisa pambhene ngo muromo kuti aponeswe.
11 Matahwa anoti: “Akuna mundhu anomutenda anozonyangajwa.” 12 Ngokuti apana musiyano pakati po Vajudha no Vagiriki. Mambo wo vese ndi umwe basi, anopfumisa vese vanomudanija. 13 Ngokuti “mundhu wese anodanija zina ra Jehovha* anozoponeswa.” 14 Waro vanomudanijisa kudini vacizivi kumutenda? Vangatendesa kudini mundhu wo vacizivi kuzwa ngo pamusoro pake? Vangazwisa kudini pacina mundhu anocumaera? 15 Vangacumaeresa kudini vacizivi kutumwa? Inga zvakatahwa kuti: “Kuseja kwakadini ko soka jo vatokotesi vo masoko akanaka o zviro zvakanaka!”
16 Ngo kudaro, asipi vese vakazwira masoko akanaka. Ngokuti Isaya wakati: “Jehovha,* ndiyani wakatenda zvatainanga?” 17 Ngokuti kutenda kunoviya pasure po kuzwa. Soko rinozika pakacumaehwa ngo ari wese ngo pamusoro pa Kristu. 18 Asi inini ndinovhunjisa kuti: “Kunanga kuti ivona avazivi kumazwa masoko aya? Andizvopi. Zvokadi, “masoko aya akazika mu nyika yese, mbhera ku magumo o nyika.” 19 Ndovhunjisazve kuti: Vaiziraeri vainga vacingazvizivi? Pa kutanga Mosi wakati: “Inini ndinozomuitisa kuti muve no ushanje* ku vandhu vaciripi vo jinja ro Vaiziraeri; ndinozomuita kuti munyangajwire jinja ricina hwiru.” 20 Asi Isaya wakava no cicunge, wonanga kuti: “Ndakawanika ngo vandhu vainga vacikandipsaki; ndozivika ngo vandhu vainga vacikandivhunjisi.” 21 Iyena wakananga ngo pamusoro po Vaiziraeri kuti: “Ndakatambanuja nyara jangu njiku yese ku vandhu vacikazwiri no vakavanga musoro.”