Jona No Hove Huruwane

VONAI mwanarume ari mukumwa. Ari kutambujika maningi, andizvopi? Hove iyo iri kuda kumumija! Unomuziva kuti ndiani mwanarume uwu? Zina rake ndi Jona. Ngatende tivone kuti wakanghwinisa kudini mu cineso cakashatisisa kudari.

Jona ndi muporofita wa Jehovha. Nguva shomani muporofita Erisha naafa Jehovha wakabvunja Jona kuti: ‘Endai ku dhorobha guru ro Ninivha. Ushati wo vandhu kondhoyo waguma pa kukurisisa, zve ndinoda kuti uyende koovereketa navo ngo ndava yazvo’.

Asi Jona aadi kwendeyo. Ngo kudaro, wapakira piketi iri kwenda ku divi rakafuratira Ninivha. Jehovha aazivi kudakajihwa ndi Jona ngo kutiza kwake. Ngo kudaro Iyena waitisa bepo guruwane. Irona rakavanga zvokuti piketi iri pa ngozi yokuda kundondomera. Vafambisi vo piketi vari kuthya maningi zve vacemera zvimwari zvavo kuitira besero.

Pa kupejisira Jona wakavabvunja kuti: ‘Ndinonamata Jehovha, Mwari wakasika denga no pasi. Zve ndiri kutiza zvaakandibvunja Jehovha kuti ndiite.’ Ngo kudaro Vafambisi vo piketi vakamubvunjisa kuti: ‘Tinodikana kukuitenyi kuti bepo rinyarare?’

Jona wakananga kuti: ‘Ndikhandirenyi mu jombe zve irona rinozonyararazve.’ Vafambisi vo piketi avacaida kuita zvondhozvo, asi bepo parakaguma pa kuvangisisa kamare vakapejisira ngo kuwisira Jona mujombe. Ciriporipoco bepo rakaima zve jombe rakanyararazve.

Jona paandondomera mukumwa, hove huruwane yamumija. Asi iyena aazivi kufa. Njiku ndhatu no usiku utatu iyena ari mu ndani mo hoveyo. Jona wakasuruvara maningi ngo kutama kuzwira Jehovha zve woenda ku Ninivha. Unozviziva zvicinyi zvaakaita?

Jona wakaita mukumbiro kuna Jehovha kuitira kubesehwa. Perapo Jehovha wakaita kuti hove iruce Jona ku muthundu. Pa masure pazvo Jona anoenda ku Ninivha. Izvi azvitijijisi kuti zvinosisira maningi kuita zvirizvese zvinotibvunja Jehovha here?