Shandisanyi Ushoni Nguva Yenyu mu Mushando

Zvapupu zva Jehovha zvakapeja nguva jinokwana kuita 1.945.487.604 mu mushando mu gore ro basa 2014​—civoniso cakajeka co kuti takasungadi kamare kuramba takabatikana mu basa ra Jehovha. (Ndu. 110:3; 1 Kor. 15:58) Zvecivoneka kuti nguva yasara i “doko,” zvinokwanisika here kushandisa nguva yedu inosisira mu mushando kuti tibhuye no vandhu vakawanda?​—1 Kor. 7:29.

Kunasa kushandisa ushoni nguva yedu mu mushando zvinoda kukwanisa kucinja zvecidiwa. Inga muezaniso, kudari nguva jese munopeja nguva imwe kana kupindirija mu maitiro amwe o kucumaera mucikavereketi no ari wese, mwaizoita nasiriro kuti muwane vandhu vazinji zve muverekete navo here? Mugariro unosiana ku ndau no ndau. Asi, mazano anotevera angamubesera kushandisa ushoni nguva yenyu kuti mutame ‘kuhwa no mbhepo.’​—1 Kor. 9:26.

• Ucapupu hwo Muzi ngo Muzi: Ko makore mazinji, vacumaeri vazinji varoveja kutanga njiku yavo mu mushando ngo kucumaera muzi ngo muzi. Asi, zvecivoneka kuti vandhu vazinji vanonga vecishanda co masikati, ngenyi amueji kucumaera muzi ngo muzi comadeko kana majiisa, apo vandhu vanonga vari pa muzi vakazorora havo? Ucapupu wo muzvitaka no mu ndau jinotengesehwa zviro, ndiwona ungaburira co masikati.

• Ucapupu hwo Pambhene: Zvimeza pomwe no zvikarinya zvinodikana kugajikwa mu ndau jinokhirihwa maningi ngo vandhu mukati mo ndima yo ungano. (Vonanyi Mushando Wedu wo Umambo wa Nyaonga 2013, pheji 5 mu ciputukezi.) Kudari uminye-minye wo vandhu ukapunguka pa ndau yainga yakagajwa kuitira ucapupu wo pambhene, Cikwata co Basa co Ungano cingasunga kuti cikarinya kana cimeza ciana cinodikana kucinjwa coenda koodihwa pa ndau ino uminye-minye wo vandhu.

• Kuita Hwiririro zve Jijo jo Bhaibheri: Zvinokwanisika kuronga kuita hwiririro jenyu pomwe no jijo jo Bhaibheri pa nguva yo kuti maitiro amweni o mushando anonga acikabudiriri ushoni here? Inga muezaniso, kudari mushando wo muzi ngo muzi unobudirira ushoni ngo mu Sabudu comangwanani, azvicaizoita here kuitisa jijo yenyu co masikati kana mu majiisa? Pakuita hwiririro, azvicaizoita here kuti vacumaeri vakovaniswe kuti vave zvikwata zvidoko kuitira kuti vakwanise kuengejera mushando wavo?

I zvokadi kuti tingaverenga nguva yatinopeja tiri mu mushando, asi mudakaro wedu unoengejeka patinobudirira ushoni. Mukavona kuti kushandisa maitiro ari yese mu mushando akubudiriri ushoni pa nguva yakati kuti, ejanyi kushandisa maitiro amweni. Itanyi mukumbiro kuna Jehovha, “muno wo munda,” kuti amupe ndhungamiro kuti mushandise ushoni nguva yenyu mu mushando.​—Mat. 9:38.