Ngenyi Zina ra Jehovha—Rinosisira Maningi Kuna Jesu?

1-2. (a) Jesu wakaitenyi pa usiku acito afa? (b) Muvhunjo japi jatinozovona mu cijijo cino?

AINGA aamadeko o usiku hwo Mucina, mu njiku 14 ya Nisani, mu gore ra 33 Jesu na Aviya. Jesu wainga aaphedo no kutengeswa, kutongehwa rufu, kutakwa no kuurawa. Iyena wainga apera kurarira mu nyumba yo mudenga no vapostori vake vakagondeka. Pasure pokurarira uku, Jesu wakaeneka vapostori vake ngo magama anovangisa. Pamukuvo mushomani vandhu vese vacito vabuda mu nyumba iya, Jesu wakaima padoko oita mukumbiro waisisira maningi. Mupostori Johani wakatara ngo pamusoro po mukumbiro uwu mu cipauko 17.

² Mukumbiro wa Jesu unotivonesenyi ngo pamusoro po kuneseka kwaainga nako pamukuvo wiya? Mukumbiro uwu unokhombijisa kudini zviro zvinosisira zva Jesu mukati mo basa rake pasi pano? Ngatende tibhuisane ngo mupinguro jo muvhunjo iji.

“NDAKAVAZIVISA ZINA RENYU”

3. Jesu wakanangenyi ngo pamusoro po zina ra Jehovha, nokutizve waida kurevenyi? (Johani 17:​6, 26)

³ Pamukumbiro wake Jesu wakati: “Ndakavazivisa zina renyu.” Tinozviziva kuti izvi zvaisisira kuna Jesu ngokuti iyena wakazvinanga ko vhaza mbiri. (Verenganyi Johani 17:​6, 26.) Iyena waida kurevenyi? Kureva kuti iyena wakavavhunja zina rokuti avacairiziva? Vajiji va Jesu vainga Vajudha, ivona vaiziva zina ra Jehovha. Zina iri rinowanika ko vhaza jinokwana kuita 7.000 mu Matahwa o Cihebheru. Jesu aacaijijisepi basi kuti zina ra Mwari ndi Jehovha asi waijijisavo revo yaro. Jesu wakajijisa vandhu kuti zina ra Mwari raibatanija zvidisiso zvake, mabasa ake, mugariro jake zvokuti apana na umwe hake waizokwanisa kuzvisanangura mu njira yaakaitaro.

4-5. (a) Zina ro ari wese ringaitisa kudini kuti rive rinosisira kwatiri? Ipanyi muezaniso. (b) Mu njira yapi vateveri va Jesu vakaguma pakuziva zina ra Jehovha?

⁴ Kuitira kuezanisira, amborangariranyi basi kuti umwe mukuru anozwi Dhavhidhi wo ku ungano kwenyu ndi medhiko. Imwimwi maakuziva hama iyi ko makore akawanda. Asi imwimwi njiku imweni munoenda kovona kuti muno ndhendha inoda kuraphwa. Imwimwi munotohwa ngokukasika moendeswa ku cipitari kuno shandiraro hama yondhoyo, iyona inoshandisa uzivi hwayo hwokurapa kuti iponese upenyu hwenyu. Kureva kuti zina ro hama iyi ringava no revo huru kwamuri? Ngozvokadi kuti hina. Hama Dhavhidhi avaciripizve hama yaamusharuka yamunoziva, asi ivona ndi medhiko wakaponesa upenyu hwenyu.

⁵ Ngo njira yakaezana, vateveri va Jesu vainga voziva zina ra Jehovha. Zina iri rakava rinosisira kwavari ngokuti Jesu wakanasa kuvabesera kuziva zinero. Ngenyi tingananga izvi? Ngokuti Jesu wakakhombija undhu hwa Baba wake mu zviro zvese zvaaibhuya no kuita. Ngo kudaro, vapostori vakanasa ‘kuziva’ Jehovha ngokupurukira jijiso ja Jesu, cimwenizve no kuvona manera aaitaja vandhu.—Johani 14:9; 17:3.

“NGO NDAVA YO ZINA RENYU, ZINA RAMAKANDIPA”

6. Jehovha wakapekejesa kudini Jesu zina Rake? (Johani 17:​11, 12)

⁶ Pa mukumbiro wake, Jesu wakakumbirira vajiji vake eciti: “Vavonererenyi ngo ndava yo zina renyu, zina ramakandipa.” (Verenganyi Johani 17:​11, 12.) Izvi zvinoda kureva kuti Jesu waizozivikanwa inga ndi Jehovha? Haiwa. Rangariranyi kuti pamukumbiro wake Jesu wakabhuya ngo zina ra Jehovha eciti: “Ngo ndava yo zina renyu.” Ngo njira iyi, zina ra Jehovha arizivi kuva zina ra Jesu pacake. Jesu waida kunangenyi paakananga kuti zina ra Mwari raakapuwa? Pakutanga, Jesu wainga muimiriri no kubhuya zvaiivhunjwa ndi Jehovha. Iyena wakaviya ngo zina ra Baba wake no kuita mabasa o simba ngo zina iri. (Johani 5:43; 10:25) Kunja kwa izvi, zina ra Jesu rinoreva kuti “Jehovha Muponesi.” Hina, zina ra Mwari rainga rakabatana maningi no zina ra Jesu.

7. Ngenyi Jesu waizobhuya ngo zina ra Jehovha? Ipanyi muezaniso.

⁷ Inga muezaniso, muimiriri angaenda kobhuya eciimirira zina ro mutongi. Ngo kudaro, masoko o muimiriri uwu anoita inga abhuiwa ngo mutongiwo. Mu njira yakaezana, Jesu waimirira zina ra Jehovha paaibhuya no vandhu ecivazivisa zina Rake.—Mateu 21:9; Ruka 13:35.

8. Ngenyi Jehovha wakananga kuti Jesu waiita zvese ngo zina rake pikija acito aviya pasi pano? (Ekisodho 23:​20, 21)

⁸ Mu basa rake inga Soko, Jesu wainga muimiriri wa Jehovha no kupekeja masoko no ndhungamiriro ku zvisikwa zvese zvo kumujimu no zvo pasi pano. (Johani 1:​1-3) Jesu ndiyena wainga ngirozi ya Jehovha yaakatuma kwenda kotaja Vaiziraeri mu zvipare. Paaivhunja Vaiziraeri kuti vaidikana kuzwira ngirozi iya, Jehovha wakati: “Zvese zvainoita inozviita ngo zina rangu.”a (Verenganyi Ekisodho 23:​20, 21.) Zina ra Jehovha rainga riri muna Jesu ngokuti waimirira Jehovha, cimwenizve ndiyena wainga ari mukuru pakucenesa zina ra Baba wake.

“BABA, KUJANYI ZINA RENYU”

9. Zina ra Jehovha raisisira kudini kuna Jesu? Sananguranyi.

⁹ Inga zvatapera kuvona, pikija Jesu paainga acito aviya pasi pano, zina ra Jehovha raisisira maningi kwaari. Iyena paainga pasi pano, wakakhombija ngo zvese zvaakaita kuti zina ra Jehovha raisisira maningi kwaari. Phedo no kumbhiri ko mushando wake, Jesu wakati: “Baba, kujanyi zina renyu.” Baba wake vakamudavira pa mukuvo wondhowo kamare ngo izwi guru recivha kudenga veciti: “Ndakarikuja, ndinozorikujazve.”—Johani 12:28.

10-11. (a) Jesu wakakujisa kudini zina ra Jehovha? (Vonanyi foto.) (b) Ngenyi zina ra Jehovha rinodikana kuceneswa no kujivirihwa?

¹⁰ Jesu wakakujavo zina ra Baba wake. Kuitisa kudini? Njira imwe yaakaita ndiyona izvi, ngo yo kuvonesa mugariro jinoshamaisa ja Baba wake ngo zviito ku vamweni. Ngo kudaro, pano zvakawanda zvaibatanijwa pakukujwa ko zina iri. Jesu wakakhombija kuti Jehovha wainga akaita zviro zvakanaka nokutizve zina rake rakacena.b Jesu wakakhombija kuti izvi zvaisisira maningi ku vateveri vake paakavajijisa kuita mukumbiro wo kuezanisira. Iyena wakati: “Baba wedu muri kumatenga, zina renyu ngariceneswe.”—Mateu 6:9.

¹¹ Ngenyi zina ra Jehovha rinodikana kuceneswa no kujivirihwa? Ngokuti mu munda wo Edheni, Sathana Dhiyabho wakashora no kunyepera Jehovha. Iyena wakananga kuti Jehovha ndi munyepi, cimwenizve wainga ecinyima Adhamu na Evha ciro cimweni cakanaka maningi. (Genesisi 3:​1-5) Ngokuita izvi, Sathana wakavonesa kuti Jehovha aacaitepi zviro mu njira yaushoni. Zvecivoneka kuti Sathana wakanyepera Jehovha, vandhu vaizorangarira kuti Jehovha ndi Mwari wakashata. Pakufamba ko nguva, mu njiku ja Jobe, Sathana wakabhuya kuti vaya vanoshandira Jehovha, vanozviita ngo ndava yo zvakanaka zvavanowana zvecivha Kwaari. Muvengi uwu wakanangazve kuti apana mundhu anokwanisa kwenderera mberi ecishandira Jehovha kudari akasongana no muejo. (Jobe 1:​9-11; 2:4) Ngo kudaro, paidikana nguva kuitira kuvonesa kuti ndiyani munyepi, Jehovha kana kuti Sathana.

“NGOKUTI NDINOPA UPENYU HWANGU”

12. Jesu wainga akanasiririka kuitenyi ngo ndava yo rudo hwaainga nahwo no zina ra Jehovha?

¹² Ngo ndava yo rudo hwake kuna Jehovha, Jesu waida kuita zvese zvaaikwanisa kuti acenese no kujivirira zina ra Jehovha. Jesu wakananga kudari: “Ngokuti ndinopa upenyu hwangu.” (Johani 10:​17, 18) Zvokadi, iyena wainga akanasiririka kuti afe ngo ndava yo zina ra Baba wake.c Vandhu vaviri vokutanga vainga vakakwana Adhamu na Evha vakasiya Jehovha, voenda ku divi ra Sathana. Mukusiyana, Jesu wainga akanasiririka kuti aviye pasi pano ngo ndava yo rudo hwake kuna Jehovha. Jesu wakazwira Jehovha mu zvese zvaakaita no zvaakavereketa. (Vahebheru 4:15; 5:​7-10) Iyena wakaenderera mberi wakagondeka, mbhera kufa pa mutanda wokutambujikira. (Vahebheru 12:2) Ngo njira iyi iyena wakavonesa rudo hwake kuna Jehovha no kuzina rake.

13. Ngenyi Jesu wainga mundhu kwaye kuitira kuvonesa kuti Sathana wainga munyepi? (Vonanyi foto.)

¹³ Pacina kukana-kana, Jesu wakavonesa kuti Sathana ndiyena munyepi kusiyapo Jehovha. (Johani 8:44) Jesu wainasa kuziva Jehovha kupinda ari wese hake wakamborarama. Nokwainga kuno ciri cese cokadi cakabhuiwa ndi Sathana ngo pamusoro pa Jehovha, Jesu waizociziva. Asi Jesu wakaenderera mberi akavanga pakujivirira ukuru-kuru hwa Jehovha no zina rake. Pikija pamukuvo umweni zvakavoneka inga kuti Jehovha wainga amusiya, Jesu wainga akanasiririka kuti afe kusiyapo kuramba Baba wake vano rudo.—Mateu 27:46.d

“ININI . . . NDAPEJA KUITA BASA RAMAKANDIPA”

14. Jehovha wakakomboreresa kudini kugondeka ka Jesu?

¹⁴ Pamukumbiro waakaita pa usiku hwake hwokupejisira, iyena wakati: “Inini . . . ndapeja kuita basa ramakandipa.” Iyena waithemba kuti Jehovha waizomupfupa ngo ndava yokuva kwake akagondeka. (Johani 17:4) Cimwenizve, Jesu wainasa kuthemba Baba wake. Jehovha aazivi kutendera kuti Jesu arambe ari mu guva. (Mabasa o Vapostori 2:​23, 24) Iyena wakamusa Jesu no kumupa cigaro cakakhwirira kudenga. (Vafiripi 2:​8, 9) Pakufamba ko nguva, Jesu wakatanga kutonga inga Mambo wo Umambo hwa Mwari. Zvicinyi zvinozoithwa ngo Umambo uhu? Jesu wakapa mupinguro wo muvhunjo uwu paakajijisa vajiji vake kuti vakumbire kudari: “Umambo hwenyu ngahuviye. Kuda kwenyu [Jehovha] ngakuitwe pasi pano, inga kumatenga.”—Mateu 6:10.

15. Ngozvapi zvinozoithwa ndi Jesu?

¹⁵ Kumbejiyo, Jesu anozohwisana no vavengi va Mwari no kuparaja vandhu vanoita zvakashata pa hondo yo Armagedhoni. (Apokaripsi 16:​14, 16; 19:​11-16) Perapo, Sathana anozokhandihwa mu “rindi rakajikisisa” maacikazokwanisi kuita ciri cese umo makaezana no rufu. (Apokaripsi 20:​1-3) Jesu anozoviisa runyararo no kuita kuti vandhu vave vakakwana mukati mo Kutonga kwake ko Ciuru co Makore. Iyena anozomusa vandhu vakafa. Anozoita kuti nyika yese ive paradhiso. Jehovha anozokwanirisa cidisiso cake.—Apokaripsi 21:​1-4.

16. Ngozvapi zvinozoitika kumbhiri ko Kutonga ko Ciuru co Makore?

¹⁶ Zvicinyi zvatinovetera kuti zviitike kumbhiri ko Kutonga ko Ciuru co Makore? Cishaishi no kutama kukwana ko vandhu azvizowanikizve. Vandhu avazodikanizve kukumbira kuregerehwa zvishaishi zvavo vakacijikira pa muripo. Ivona avazodizve vo 144.000 kuti vave vapiri vavo nee Jesu inga Mupiri Mukuru kuti vakwanise kuva no ushamwari na Jehovha. Cimwenizve, “Rufu, muvengi wo kupejisira, hunozoparajwa.” Makuva anozova acina ciro. Vakafa vanozomuswa kuti vararamezve. Vese pasi pano vanozova vandhu vakakwana.—1 Vakorinte 15:​25, 26.

17-18. (a) Zvicinyi zvinozoitika pa kupera ko ciuru co makore? (b)  Jesu anozoitenyi ukaguma mukuvo wokupejisira wo kutonga kwake? (1 Vakorinte 15:​24, 28) (Vonanyi foto.)

¹⁷ Ngozvapizve zvinozoitika kumbhiri ko Kutonga ko Ciuru co Makore? Pa divi iri, panozoitika ciro cinosisira maningi. Shwiro inobatanija kuceneswa ko zina ra Jehovha inozopera. Kuitisa kudini? Mu munda wo Edheni, Sathana wakavonesa kuti Jehovha ndi munyepi nokutizve aatongi vandhu ngo rudo. Kuvhira pondhopo, zina rake riri kuceneswa nga vaya vanomukuja no kumureremeja. Ngo kudaro, pakupera ko kutonga ko ciuru co makore zina ra Jehovha rinozoceneswa mukuperera. Jehovha anozonasa kukhombija ku vese kuti iyena ndi Baba vano rudo vokudenga.

¹⁸ Kumbhiri ko Kutonga ko Ciuru co Makore, vese vanozoziva kuti zvakananga Sathana ngo pamusoro pa Jehovha zvainga zviri zvokunyepa. Jesu anozoitenyi paunozoguma mukuvo wo kupejisa kutonga kwake? Kureva kuti iyena anozotevejera muezaniso wa Sathana no kupandukira Jehovha? Haiwa. (Verenganyi 1 Vakorinte 15:​24, 28.) Jesu anozohwirija Umambo kuna Baba wake. Iyena anozojidira pasi po Umambo hwa Jehovha. Mukusiyana na Sathana, Jesu wakanasiririka kuti ahwirije zvese ngo ndava yo rudo hwake kuna Jehovha.

19. Zina ra Jehovha rinorevenyi kuna Jesu?

¹⁹ Azvitishamaisi kuvona kuti Jehovha wainga akanasiririka kuitira kupekeja Jesu zina Rake. Jesu wakavonesa kuva muimiriri wakakwana wa Baba wake. Jesu anovona kudini zina ra Baba wake? Kuna Jesu zina ra Baba wake rinosisira maningi kupinda ciri cese haco. Iyena wainga akanasiririka kuti afe ngo ndava yo zina iri. Iyena anozovazve akanasiririka kuitira kuhwirija zvese kuna Jehovha kumbhiri ko Kutonga Kwake ko Ciuru co Makore. Tingatevejeresa kudini muezaniso wa Jesu? Tinozovona mupinguro wo muvhunjo uwu mu cijijo cinotevera.