MUSORO WO KUJIJA WO 18
Ngativangisane Ngocedu Pamusongano jo Ungano
‘Ngatirangarirane ngocedu no . . . , kuvangisana ngocedu.’ —VAHEBHERU 10:24, 25.
NDUMBO 88 Itanyi kuti Ndizive Makwanja Enyu
ZVATICAJIJAa
1. Ngenyi tinopa mupinguro pa musongano?
NGENYI tinoenda ku musongano? Maningi-ningi, kuitira kukuja Jehovha. (Nduyo 26:12; 111:1) Cimwenizve, tinoendazve ku musongano kuti tivangisane ngocedu mu nguva jino jo kunesa. (1 Vatesaronika 5:11) Patinomusa mukono kuti tipe mupinguro, tinonga tecibesera kuti zviro zviviri izvi zvikwanirisike.
2. Ngojapi mukana jatinajo kuti tipe mupinguro pa musongano jedu?
2 Sumana jese tino mukana jo kupa mupinguro pa musongano jedu. Inga muezaniso, pa musongano wo kupera ko sumana, tino mukana wo kupa mupinguro jedu panonga peciithwa Jijo yo Murindiri. Pa musongano wo pakati po sumana, tingapavo mupinguro jedu pa divi ro Upfumi hwo Kumujimu, Jijo yo Bhaibheri yo Ungano kana pa mativi amweni anoithwa ngo kubhuisana.
3. Ngozvapi zvineso zvatingava nazvo patinoda kupa mupinguro, asi Vahebheru 10:24, 25, ingatibesera kudini?
3 Tese tinoda kukuja Jehovha no kuvangisa hama no hambzaji jedu. Asi patinonga tecipa mupinguro, tingava no zvineso. Tinganeseka kuti tipe mupinguro kana tingatoda kupa mupinguro asi totama kukhombijwa ko vhaza jakawanda inga zvotaida. Waro zvicinyi zvingatibesera? Tingawana mupinguro pa karata yakatara Pauro ku Makristu o Cihebheru. Paakatara ngo pamusoro po kusisira ko kusonganira, iyena wakananga kuti tinodikana ‘kuvangisana ngocedu.’ (Verenganyi Vahebheru 10:24, 25.) Patinozwisisa kuti vamweni vari pa musongano vangavangiswa ngo magama atingananga anovonesa rutendo hwedu, zvinozotiita kuti tide kupa mupinguro. Kudari tikatama kukhombijwa kuti tipe mupinguro ko vhaza jakawanda, tingadakara ngokuti vamweni vari kukwanisa kupa mupinguro javo.—1 Pedhru 3:8.
4. Ngozvapi zviro zvitatu zvatinozovona pa jijo iyi?
4 Pa jijo iyi, tinozovona kuti tingaitisa kudini kuti tivangisane ngocedu mu ungano doko ino vandhu vashoma vanopa mupinguro. Perapo, tinozovona kuti tingaitisazve kudini kuti tivangisane ngocedu mu ungano huru ino vandhu vazinji vanomusa mukono kuti vape mupinguro. Pejisire, tinozovona manera atingaita kuti tidakare ngo mupinguro jedu jinovangisa vamweni.
VANGISANANYI MU UNGANO DOKO
5. Tingaitisa kudini kuti tivangise vamweni mu ungano ino vandhu vashoma?
5 Mu ungano ino vandhu vashoma kana pa gurupu, apana vandhu vakawanda vakangapa mupinguro kuti hama inongaro yeciitisa diviro ivakhombije. Nguva jimweni, iyena angatodikana kuvetera mbhera mundhu amuse mukono kuti ape mupinguro. Zvingatoita kuti musonganoo uvoneke inga kuti audakaji. Zvondhozvo azvivangisi. Ngozvapi zvamungaita? Ivanyi no cido co kumusa mukono wenyu mukuvo wese. Mukaita kudaro, munozoita kuti vamweni vadevo kuita zvakafanana.
6-7. Tingaitisa kudini kuti titame kuthya maningi patinoda kupa mupinguro?
6 Waro mungaitenyi kudari munothya kupa mupinguro? Vazinji vanojizwavo kudaro. Kuti mukwanise kuvangisa hama no hambzaji jenyu, zvaizova zvaushoni kuita zvese zvamunokwanisa kuti muwane manera okupeja kuthya kwenyu kuti mukwanisevo kupa mupinguro. Mungazviitisa kudini izvi?
7 Mungabesereka ngo mazano akabudiswa mu Murindiri munganani jokare.b Inga muezaniso, nasiriranyi ushoni. (Mazwi Akangwara 21:5) Pamunonasa kuziva zvinodaro kujijwa, munozojizwa makasujunuka kuti mupe mupinguro. Kusiyapo zvondhozvo, ipanyi mupinguro jakafupika. (Mazwi Akangwara 15:23; 17:27) Kupa mupingiro jakafupika kunozomubesera kuti mutame kuthya maningi. Mupinguro wakafupika, kangaije unobatanija rinya imwe kana mbiri, unozobesera kuti hama no hambzaji jikwanise kuzwisisa zviri kunangwaro, kusiyapo kupa mupinguro wakareba unobatanija mafundo akawanda. Pamunopa mupinguro wakafupika ngo magama enyu kamare, munonga mecikhombija kuti imwimwi manasirira ushoni nokutizve muri kuzwisisa zviri kujijwaro.
8. Jehovha anovona kudini kuvangisira kwedu?
8 Waro, ngozvapi zvamungaita kudari imwimwi makaeja kushandisa mazano anangwari, moenderera mberi mecithya pa kupa mupinguro? Ivanyi no cokwadi co kuti Jehovha anoreremeja kuvangisira kwamuri kuita kuti muite zvonazvo. (Ruka 21:1-4) Kuita zvizinji azvirevi kujivangirija kuti muite zvamucikakwanisi. (Vafiripi 4:5) Temanyi civaringo co zvamunoda kuita, mozviita kamare no kukumbira kuti muve no mwoyo wakathiva. Pakutanga mungaita izvi ngo kupa mupinguro wakafupika.
VANGISANANYI MU UNGANO HURU
9. Cineso capi cingavepo patinonga mu ungano ino vandhu vakawanda?
9 Kudari mu ungano mwenyu muno vacumaeri vakawanda, mungava no cineso cimweni. Kangaije hama no hambzaji jakawanda jinomusa mukono kuti jipe mupinguro, zvoita kuti pamunonga mecimusa, motama kukhombijwa. Inga muezaniso, hambzaji Dhaniyera vanodakarira maningi kupa mupinguro pa musongano.c Ivona vanovona izvi inga divi ro kunamata kwavo, manera okuvangisa vamweni no manera okuvangisa rutendo hwavo ku zviya zvavanojija mu Bhaibheri. Asi povakacinja voenda ku ungano ino vacumaeri vakawanda, ivona avacaipazve maningi mupinguro, kana vaipa kamwe kana kutotama kupa mupinguro mbhera pakupera ko musongano. Ivona vakati: “Ndakanyangajwa maningi. Ndakajizwa inga kuti ndaruza makomborero makuru. Pazvinoitika pa vhaza jakawanda, unotanga kurangarira kuti vari kuzviita ngo cabomo.”
10. Ngozvapi zvamungaita kuti muwane mukana wokupa mupinguro?
10 Makambovavo no mazwiro akavari na hambzaji Dhaniyera? Kudari makambojizwa kudaro, mungatova no cido co kuda kuramwa, mogara basi mecipurukira zviri kunangwaro. Mucaregera kupa mupinguro. Waro mungazviitisa kudini? Zvaushoni maningi kunasirira mupinguro jakawanda kuitira musongano umwe nga umwe. Kudari mukatama kukhombijwa kuti mupe mupinguro pa kutanga ko jijo, munozova no mukana jakawanda jo kupa mupinguro musongano paunonga weciithwa. Pamunonga mecinasirira Jijo yenyu yo Murindiri, rangariranyi kuti ndima imwe nga imwe yakabatana papi no musoro uri kujijwaro. Mukaita izvi, kangaije munozova no zviri zvese zvo kunanga musongano paunonga weciithwa. Kusiyapo zvondhozvo, munganasirira kuti mupe mupinguro pa ndima jinobhuya zvokadi zvo Bhaibheri zvinonesa kusanangura. (1 Vakorinte 2:10) Ngenyi? Ngokuti vandhu vashoma vangada kupa mupinguro pa ndima iji. Waro kudari mukashandisa mazano ese aya, popera musongano jakawanda mucikapi mupinguro jakawanda, ngozvapi zvamungaita? Mungabhuya no hama inodaro kuitisa divi musongano ucito watanga, monanga muvhunjo wamunoda kudavira.
11. Vafiripi 2:4 inotivangisa kuti tiitenyi?
11 Verenganyi Vafiripi 2:4. Mupostori Pauro wakafemehwa kuti avangise Makristu kuti asotesese zvinodiwa ngo vamweni. Tingashandisa kudini mbhangiro iyi musongano paunonga weciithwa? Ngo kuceukija kuti vamweni vanodavo kupa mupinguro inga itusu.
Inga zvamunotendera kuti vamweni vabhuyevo pamunonga mecibhuisana, tenderanyivo kuti vamweni vapevo mupinguro javo pamusongano (Vonanyi ndima 12)
12. Ngoyapi njira yakanakisisa maningi yo kuvangisa vamweni pa musongano? (Vonanyi foto.)
12 Amborangariranyi izvi basi. Pamunonga mecibhuya no shamwari jenyu, imwimwi maizobhuya maningi zvoita kuti ivona vave no mukana mushoma jo kubhuya? Zvokadi kamare haiwa. Munoda kuti ivona vabhuyevo. Mukufananavo, pa musongano tinoda kuti vandhu vakawanda vape mupinguro javo. Kunasa kunanga, njira imwe yakanakisisa maningi yo kuvangisa hama no hambzaji jedu ngo yo kuvapa mukana wo kuvonesa rutendo hwavo ngo kupa mupinguro. (1 Vakorinte 10:24) Ngatende tivone kuti tingazviitisa kudini izvi.
13. Tingaitisa kudini kuti vandhu vazinji vari pa musongano vave no mukana wo kupa mupinguro?
13 Njira imwe yatingazviita ndiyona, ngo kuita kuti mupinguro jedu jive jakafupika. Izvo zvinoita kuti vamweni vawane mukana wo kupavo mupinguro. Vakuru no vacumaeri vamweni vano ruzivo vangagaja muezaniso pa kuita izvi. Pikija mukapa mupinguro wakafupika, mucadokwakwatija mafundo akawanda. Kudari mukakwakwatija zvese zvinonangwa pa ndimeyo, vamweni avazowani cokunanga. Inga muezaniso, pa ndima iyi panangwa mazano maviri, kupa mupinguro wakafupika no kutama kukwakwatija mafundo akawanda. Kudari imwimwi muri mundhu wokutanga kukhombijwa kuti mupe mupinguro pa ndima iyi, azvicaizova zvaushoni kunanga basi fundo rimwe?
Ngopapi pamunodikana kusana kutama kumusa mukono musongano paunonga weciithwa? (Vonanyi ndima 14)f
14. Ngozvapi zvinozotibesera kuti titeme civaringo co kutama kumusa maningi mukono? (Vonanyi foto.)
14 Shandisanyi ungwaru paya pamunokhombijwa kuitira kuziva kuti mungamusa mukono kangana kuti mupe mupinguro. Tikamusa mukono ko vhaza jakawanda, tingaita kuti hama iri kuitisaro diviro ijizwe icivangirijwa kutikhombija, pikija kuti vamweni avato vawana mukana wo kupa mupinguro. Izvo zvinozoita kuti vamweni vatame kuvangisira pa kumusa mukono.—Mucumaeri 3:7.
15. (a) Ngozvapi zvatinodikana kuita kudari tikatama kukhombijwa kuti tipe mupinguro? (b) Hama jinongaro jeciitisa divi jingakhombijisa kudini kuti jinodakarira vese? (Vonanyi bhokiso rinoti: “Pamunonga Meciitisa Divi.”)
15 Vacumaeri vakawanda pavanomusa mukono jijo painonga yeciithwa, kangaije atizowani mukana wo kupa mupinguro pa vhaza jese jataida. Nguva jimweni hama inongaro yeciitisa divi ingatokonehwa kumukhombija kuti mupe mupinguro. Izvo zvingatinyangaja, asi atidikani kurangarira kuti hameyo aitidi.—Mucumaeri 7:9.
16. Tingaitisa kudini kuti tivangise vaya vanopa mupinguro?
16 Kudari mukakonehwa kupa mupinguro pa vhaza jese jamaida, ngenyi amunasi kupurukira vamweni pavanonga vecipa mupinguro javo, musongano paunopera movasimba ngo mupinguro javaparo? Hama no hambzaji jenyu jingavona kusimba kwamunojiitaro kwecivangisa maningi inga mupinguro jamaizopa. (Mazwi Akangwara 10:21) Kusimba ndi njira imweni yatingavangisa ndiyona hama no hambzaji jedu.
NJIRA JIMWENI JO KUVANGISA VAMWENI
17. (a) Vabari vangabesera kudini vana vavo kuti vanasirire mupinguro jo mupira wavo? (b) Mukuzwirana no vhidhiyo, ngozvapi zviro zvirongomuna zvingabesera pa kunasirira mupinguro? (Vonanyi masoko o pasi.)
17 Ngoyapi njira imweni yatingavangisa ndiyona vamweni pa musongano? Kudari muri mubari, beseranyi vana venyu vanasirire mupinguro jo mupira wavo. (Mateu 21:16) Nguva jimweni, shwiro jinonesa jakadari inga zvineso zvo pa mbhuri, shwiro jinobhuya ngo pamusoro po mufambiro watinodikana kuva nawo, jingajijwa pa musongano. Asi kangaije pangava no ndima imwe kana mbiri jingashandiswa kuti vana vadoko vakwanise kupa mupinguro javo. Cimwenizve, beseranyi vana venyu vazwisise kuti ngenyi avazokhombijwi pa vhaza jese javanomusa mukono. Kuvasanangurira izvi kunovabesera kuti vatame kunyangajwa pavanovona vamweni vacikhombijwa kusiyapo ivona.—1 Timoti 6:18.d
18. Tingaitisa kudini kuti titame kujivonesa maningi patinonga tecipa mupinguro? (Mazwi Akangwara 27:2)
18 Tese tinganasirira mupinguro jinokuja Jehovha no jinovangisa hama no hambzaji jedu. (Mazwi Akangwara 25:11) Pikija nguva jimweni tingatodikana kunanga zviro zvakatiitikira, tinodikana kungwarira kuti titame kubhuya maningi ngo pamusoro pedu. (Verenganyi Mazwi Akangwara 27:2; 2 Vakorinte 10:18) Kusiyapo zvondhozvo, tinodikana kubhuya maningi ngo pamusoro pa Jehovha, Soko rake no vandhu vake. (Apokaripsi 4:11) Asi kudari muvhunjowo unoda kuti tinange zviri zvese zvakatiitikira, tingazvinanga. Umwe muezaniso unovonesa izvi ngo uri pa ndima inotevera.
19. (a) Ngozvapi zvinozoitika patinokhombija kuti tiri kudakara ngo vese vari pa musongano? (Varoma 1:11, 12) (b) Ngozvapi zvamunodakarira maningi ngo pamusoro po kupa mupinguro pa musongano?
19 Pikija apana mutemo jo kuti tingaitisa kudini kuti tipe mupinguro jedu, tese tinovangiswa kuti tiitise nane manera edu okupa mupinguro kuti tikwanise kuvangisa vamweni. Izvi zvingatoreva kutama kupa mupinguro jakawanda kana zvingatorevazve kudakara ngo mukana jatinova najo kuti tipe mupinguro no kudakarazve ngokuti vamweni vanoreremeja makomborero atinawo wari. Ngo kusotesesa zvinodiwa ngo vamweni musongano pajinonga jeciithwa, tese tinokwanisa “kuvangisana.”—Verenganyi Varoma 1:11, 12.
NDUMBO 93 Komboreranyi Musongano Wedu
a Patinopa mupinguro pa musongano tinovangisana ngocedu. Asi vamweni vanoneseka maningi kuti vape mupinguro. Vamweni vanodakajihwa maningi ngo kupa mupinguro asi vanoda kukhombijwa kuti vape mupinguro ko vhaza jakawanda. Azvinenyi kuti ngowapi mugariro wedu, ngozvapi zvatingaita kuti tese tikwanise kuvangisana? Tingaitisa kudini kuti tipe mupinguro jinoita kuti hama no hambzaji jedu, jide kuita mabasa akanaka? Musoro uwu unozosanangura izvi.
b Kuti muwane mazano amweni okuengejera vonanyi Murindiri wa janeiro wo 2019 pheji 8-13 no wo 1 wa setembro wo 2003 pheji 19-22, mu Cishona.
c Mazina amweni akacinjwa.
d Vonanyi vhidhiyo inowanika mu jw.org Iva Shamwari ya Jehovha—Nasirira Mupinguro Wako.
e Vonanyi Murindiri wo 15 wa julho wo 2013 pheji 32 no Murindiri wo 1 wa setembro wo 2003 pheji 21-22, mu Cishona.
f KUDURUJIHWA KO FOTO: Mu ungano ino vandhu vakawanda, hama yapera kupa mupinguro iri kupavo mukana vamweni kuti vape mupinguro javo.