Munovha Masoko Kuitira Co Kutarira zvo Musongano Upenyu no Mushando
© 2023 Watch Tower Bible and Tract Society of Pennsylvania
NJIKU 6-12 JA NOVEMBRO
UPFUMI HUNOVHA MU SOKO RA MWARI | JOBE 13-14
“Kudari Ariwese Akafa, Angaponabze?”
Murindiri wo 15/10/99 pheji 3 ndima 1-3
Kupsaka Kupona Mukuvo Wakareba
NYAMASI uno pikija kuti vandhu vakawanda vangaphikiza murangariro uwu, iwona wakatahwa ko makore anokwana kuita 3.500 adarika. Nguva jese vandhu vari kupsaka upenyu hwakareruka vacikahuwani, ivona vanorarama padoko basi voita harahwa perapo vofa. Ngo kudaro, pano njira jakawanda jingabesera vandhu kuti vararame mukuvo wakareba.
Mu njiku ja Jobe, Vaejipita vaiha zviro zvimweni zvaivabesera kuti vaenderere mberi vari majaha. Cimwe co zviro zvinosisira maningi caaizwa ngo vaarikimiya medhiyevhari cainga cokunasirira mutombo waizovabesera kuti vaenderere mberi vecipona ko mukuvo wakareba. Vaarikimiya vazinji vairangarira kuti goridhe ravainasirira raizovapa upenyu ucikaperi, nokutizve paratu jo goridhe javaihira jaizovaita kuti vapone makore akawanda. Vashina vazinji vokare vairangarira kuti kuita ezersisiyo, kuha zviro zvaiita kuti vatame kupunda no kurangarijisisa zvaizovabesera kuti vatame kufa.
Mwanarume umweni anozwi Juani Ponce de León, waizivikanwa ngo kupsaka kwake manera okwenderera mberi ari mujaha. Medhiko umweni wo muzana ro makore wakatara kudari mu bhuku rake: Majaha aciri mbhandhwe aidikana kungwaririhwa mu nyumba doko mu nguva yo cirimo kuti mwiha wovaifema ungwaririhwe mu mabotiri kuitira kuti uzoshandiswe inga mutombo unobesera kuti vandhu vararame makore akawanda. Kunasa kunanga, zvese izvi apana na cimwe cakabudirira.
Murindiri wo 15/4/15 pheji 32 ndima 1-2
Kudari Mumbiti Ukatemwa Ungapfikitirazve?
MUMBITI yo Muorivhi inokura yecimonyoroka-monyoroka aidakajisi kuisota kudari tikaiezanisa no mumbiti jinovezwa ku Lebhanoni. Asi mumbiti iji, jinoramba jakavanga pikija mugariro wo kunja uciripi ushoni. Zvinovoneka inga kuti jimweni jakona jinokwanisa kuita 1.000 o makore. Muji jo mimbiti iji jakajika maningi kuenda pasi zvokuti ukatemwa unokwanisa kuenderera mberi wecipfikitira.
Jobe acaikana-kana kuti kudari akafa waizoraramazve. (Job 14:13-15) Iyena ecibhuya izvi, wakashandisa muezaniso wo mumbiti jo Muorivhi kuitira kukhombija kuti iyena waithemba kuti Mwari waizomumusa. Jobe wairangarira ngo pamusoro po mumbiti paakati: “Muti uno ruvetero, ngokuti, sure ko kutemwa, unokwanisa kuponabze.” Pakupera ko cirimo nvura painozotanga kuna, mumbiti wakatemwaya ungatangazve kupfikitira. Iwona ungatanga kupfikitira kuvhira ku miji “inga muti mupsa.”—Job 14:7-9.
Murindiri wo 1/3/11 pheji 22 ndima 5
“Munozova no Madandha”
Masoko a Jobe anotijijisa cijijo cimwe cinosisira maningi ngo pamusoro pa Jehovha. Iyena anoda vandhu vakadari inga Jobe vanozvidira pasi po nyara jake kuti vatendere kutungamirihwa ndiyena. (Isaia 64:8) Jehovha anoreremeja maningi vanamati vake vakagondeka. Jehovha “anomadandha” no vandhu vaya vakafa vakagondeka. Mupsakisisi umweni wo zvo Bhaibheri wakananga kudari: “Gama iri rikasandujwa ku Cihebheru, rinoreva kuva no cido cakavanga cokuda kuvona mundhuwo.” Ngo kudaro, Jehovha aaceukiji basi vanamati vake vakafaya asi iyena ano cido cokuvamusa.
Upfumi hwo Kumujimu
Perspicaz vhorume 1 pheji 492
Marota
Marota anoshandavo kuitira kuezanisira ciro cicina mutengo mukuru kana cicikashandi. Inga muezaniso, Abhirahama wakati kuna Jehovha: “Inini ndiri bukuta no marota.” (Gn 18:27; vonanyizve Is 44:20; Job 30:19.) Jobe wakaezanisa zvakanangwa ngo shamwari jake ndhatu jo kunyepa no “marota.”—Job 13:12.
NJIKU 13-19 JA NOVEMBRO
UPFUMI HUNOVHA MU SOKO RA MWARI | JOBE 15-17
“Mucatevejera Erifazi Pamunoenda Koembezera Ari Wese”
Murindiri wo 15/9/05 pheji 26 ndima 4-5
Rambanyi Murangariro Jakashata!
Kovhaza ndhatu Erifazi ecibhuya, wakakhombija murangariro wokuti Mwari aadakari ngo zvinoithwa ngo vashandiri vake. Iyena wakavhunja Jobe kuti: “Yena anorangarija varanda vake, anoitiravo ndava ngirozi jake.” (Job 4:18) Erifazi wakazonangazve kudari ngo pamusoro pa Mwari: ‘Mwari aagondi varanda vake pikija matenga aazivi kucena pamberi pake.’ (Job 15:15) Wakanangazve kudari: “Nyakukwanisa bzese anenyi no ururami hwako?” (Job 22:3) Bhiridhadhi wakatenderanavo no mavonero aya, iyena wakati: “No mweji kamare auveneki, no nyereji kamare ajizivi kucena pa meso pa [Mwari].”—Job 25:5.
Tinodikana kujijivirira pa murangariro jakadari. Ngokuti ijona jingatiita kuti tirangarire kuti Mwari angatikumbira zviro zvaticikakwanisi. Mukhaindi uwu wo murangariro ungakhuvaza ushamwari hwedu na Jehovha. Kudari tikava no murangariro jakadari inga ndi iji, togumira pakupangihwa, tinozoitenyi? Kusiyapo kutendera mbhangiro iyi no kujidodokesa kwese, mwoyo wedu ‘unganyangajwira Mwari’ no kugara takacamwa. (Mazwi 19:3) Izvi zvingaviisa ngozi huru pakunamata kwedu Jehovha!
Murindiri wo 15/2/15 pheji 9 ndima 16
Tevejeranyi Kujidodokesa no Pena Inokhombijwa ndi Jesu
16 Pena. Kuzwira vamweni pena kunoita kuti tiverekete magama “anonyaraja vandhu vakavora mwoyo.” (1 Vat. 5:14) Zvicinyi zvatingananga kuitira kuvangisa vandhu ava? Kuvadakajisa no kukhombija kuti ngo papi patinoneseka ngo pamusoro pavo. Tovavangisa no kuvabesera kuti vavone undhu no mugariro javo jaushoni. Tingavaceukija kuti Jehovha wakavapekeja mwana wake ndiyo ndava ivona vanosisira maningi kwaari. (Joh 6:44) Tingavagondesa kuti Jehovha anoneseka ngo vashandiri vake vano “mwoyo yakakhuvazwa; anoponesa vese vakapera simba.” (Ndu. 34:19) Masoko edu angakwanisa kutondhoja vaya vanoda nyarajo.—Mazwi 16:24.
Upfumi hwo Kumujimu
Murindiri wo 15/3/06 pheji 14 ndima 11
Fundo Guru Ratinowana mu Bhuku ra Jobe
7:9, 10; 10:21; 16:22—Kureva kuti magama a Jobe aikhombija kuti aacaithemba rumuko? Masoko aya airevera zvokumbeji ko upenyu hwa Jobe. Asi iyena waida kunangenyi? Vocigarisano vake vairangarira kuti kudari akafa apana na umwe waizomuvonazve. Mu mavonero avo ivona vairangarira kuti iyena aacaizokwanisazve kuhwirira kumuzi nee aacaizotozivikazve mbhera kugumira panguva yakagajwa ndi Mwari. Asi magama a Jobe aireva kuti apana angakwanisa ega kumuka mu iba wohwirira kumuzi. Masoko o kuti Jobe waivetera kuzomuswa kumbejiyo tinomavona pana Job 14:13-15.
NJIKU 20-26 JA NOVEMBRO
UPFUMI HUNOVHA MU SOKO RA MWARI | JOBE 18-19
“Narini Ativhiri Kusiya Sangano ra Jehovha”
Murindiri wa 01/22 pheji 16 ndima 9
Zvatingajija Ngo Kucema Kwakaita Jesu
9 Mungabesera vanongaya vakasuruvara. Jesu aazivi kucema basi na Marita na Mariya, asi wakavapurukira no kuvatondhoja. Tingaitavo zvondhozvo kuna vaya vakasuruvara. Hama Dhani mukuru umweni anogara ku Austrariya, vakati: “Pandakafihwa ngo mukaji wangu, ndaida besero. Varovorani vakawanda vakaviya kondibesera usiku no masikati. Ivona vakatendera kuti ndinange manera andaijizwa, cimwenizve avacainyowejeka pandaicema. Ivona vakandibesera kuita mabasa amweni, akadari inga kusuka karu yangu, konditengera zviro no kutondibikira pandaijizwa ndicikakwanisi kuita mabasa aya. Ivona vakatoita mukumbiro na inini pa vhaza jakawanda. Vakatatija kuva shamwari yokadi ‘yakabahwa kuti iite hama pa bonezi.’”—Mazwi 17:17.
Murindiri wa 09/21 pheji 30 ndima 16
Mundhu Watinoda Paanosiya Kushandira Jehovha
16 Endereranyi mberi mecipa besero mbhuri ino mundhu wajingwaro. Ivona vanoda kutatijihwa rudo no kuvangiswa pa mugariro uwu kupinda kare. (Vah. 10:24, 25) Nguva jimweni hama jimweni jinoima kubhuya no mbhuri jino mundhu wakajingwa, zviro izvi zvinoita kuti mbhuri iji jijizwe kuti ijona jatojingwavo. Mucasiya kuti zviro izvi zviitike. Maningi-ningi majaha ano mubari umwe wakajingwa, anoda maningi kusimbwa no kuvangiswa. Hambzaji Maria avo vakavona mwamunavo vecijingwa vosiya mbhuri, vakati: “Shamwari jangu jimweni jakaviya ku muzi kwangu jotibikira no kutibesera kuita jijo yo mbhuri. Ivona vakazwa kuhwajihwa kwangu vocema na inini. Ngari yo pakatanga kuzika marehwa-rehwa akashata ngo pamusoro pangu, ivona vakandijivirira. Ivona vakandivangisa kamare.”—Var. 12:13,15.
Murindiri wo 1/9/90 pheji 22 ndima 20
Munopsaka Kukwanirisa Mabasa Makuru Here?
20 Dare ro vakuru rinodikana kuziva kuti kupangira hama yaimbonga muvonereri wo ndharaundha, mukuru wo ungano kana kuti mubeseri wo ungano, pikija akaita kusiya ega basa iri, zvingamuhwaja. Kudari iyena acizivi kujingwa vakuru vovona kuti iyena ari kuzviha mwoyo, vanodikana kumupekeja besero ngo rudo. (1 Vatesaronika 5:14) Vanodikana kubesera kuti iyena azive kuti ungano inomuda maningi. Pikija kuti apana dikano yo kumupekeja mbhangiro, apana mutemo unokhombija kuti mwanarume anojidodokesa kudari apeje mukuvo wakareba acizivi kugajwa mabasa amweni mu ungano.
Upfumi hwo Kumujimu
Murindiri wo 1/10/94 pheji 32
Soko Rakanaka Rino Simba
Ngo kudaro, Jobe paaida vangiso Erifazi no shamwari jake jimweni avazivi kumuvhunja masoko akanaka. Ivona vakapa ndava Jobe ngo ndava yo matambujiko ake vecinanga kuti iyena wakaita cishaishi ciri cese mu cifishe-fishe. (Job 4:8) Bhuku rimweni rakananga kudari: “Jobe waida kuti vandhu vamukhombijirevo unyasha. Asi masoko aaipuwa ainga o cituko. Zvokadi kamare ainga masoko aishandiswa maningi-ningi ngo vandhu vo zviara.” Jobe wakasuruvara maningi ngo masoko aakavhunjwa ndi Erifazi no shamwari jake, zvoita kuti iyena anange kudari: “Munozonditambuja mbhera rini ngo mazwi enyu?”—Job 19:2.
Atidikani kupekeja ndava mushandiri wa Jehovha nee kumuita kuti iyena aceme ngo ndava yo masoko edu aciripi o rudo. (Ezanisanyi na Deuteronòmio 24:15.) Bhaibheri rinonanga kudari: ‘Zvatinobhuya zvingaponesa kana kuphwanya upenyu hwo mundhu asi magama aushoni angatondhoja.’—Mazwi Akangwara 18:21.
NJIKU 27 YA NOVEMBRO–3 YA DEZEMBRO
UPFUMI HUNOVHA MU SOKO RA MWARI | JOBE 20-21
“Urungami Aungafakeyi Upfumi”
Murindiri wo 1/8/07 pheji 29 ndima 12
Imwimwi “Makakhupuka Kuna Mwari?”
12 Masoko a Jesu anokhombija musiyano uripo wo kukhupuka kuna Mwari no kuzviunganijira zviro zvakawanda zvo kunyama kana kuti kuva mundhu wakakhupuka. Asi Jesu apa ari kunanga kuti mu upenyu ativhiri kuvona zviro inga zvinosisira maningi kwatiri kana kudakajihwa maningi ngo zviro zvatinazvo. Mukusiyana, tinodikana kushandisa zviro zvatinazvo ngo njira yaushoni kana kuzvishandisa kuitira kuvangisa ushamwari hwedu na Jehovha. Zvokadi kamare, izvi zvinozotiita kuti tive vandhu vakakhupuka kuna Mwari. Ngenyi? Ngokuti zvinoviisa makomborero mazinji anovha kuna Jehovha. Bhaibheri rinotivhunja kudari: “Rukomborero hwa Tenji Mwari unokhupusa; kuthimwa-thimwa no kucamwa akuxandi ciro.”—Mazwi Akangwara 10:22.
Upfumi hwo Kumujimu
Murindiri wo 1/1/95 pheji 9 ndima 19
Kuhwisana na Sathana no Mabasa Ake
19 Zvinosisira maningi kuziva kuti Jobe mushandiri wa Mwari wakadikana kuhwisana no ‘murangariro jakashata’ jakaviiswa ndi Sathana ecishandisa Erifazi na Zofari. (Job 4:13-18; 20:2, 3) Jobe wakatambujika ngo ndava yo “thima” raiitihwa ngo vandhu zvoita kuti iyena ‘averekete inga benji’ ngo ndava yo “kutetemera” kwainga kwamubata. (Job 6:2-4; 30:15, 16) Erihu wakanasa kupurukira Jobe paainga ecivereketa no kumubesera kuvona uzivi una Jehovha. Mu njira yakaezana, nyamasi uno vakuru vanozwisisa ivona vanoneseka ngo matambujiko anosongana no hama no hambzaji ngo kutama ‘kuvanesa’. Kunja kwa zvondhozvo inga ndi Erihu, ivona vanodikana kunasa kuvapurukira no kusengerera kwese vozwa no kushandisa Soko ra Mwari kuti vavabesere. (Job 33:1-3, 7; Jak 5:13-15) Ngo kudaro, umwe nga umwe anosongana no zvineso zvakadari inga zvakasongana na Jobe, ‘kuthyisijihwa ngo bziroto, no kutetemereswa ngo bzivoniso’ angawana nyarajo inovha ku vakuru vecishandisa Soko ra Mwari.—Job 7:14; Jak 4:7.
NJIKU 4-10 JA DEZEMBRO
UPFUMI HUNOVHA MU SOKO RA MWARI | JOBE 22-24
“Zvingakwanisika Kuti Mundhu Ave Anosisira Kuna Mwari?”
Murindiri wo 15/9/05 pheji 27 ndima 1-3
Rambanyi Murangariro Jakashata!
Murangariro wokuti Mwari anotikumbira zvaticikakwanisi wakaezana no wokuti Mwari aatibeseri. Paakavereketa pa hwendo hwake hwo citatu, Erifazi wakaita muvhunjo wokuti: “Mundhu anokwanisa here kubesa Mwari?” (Job 22:2) Erifazi wakananga kuti mundhu apana caangabesera kuna Mwari. Mu njira yakaezana, Bhiridhadhi wakavhunjisa kudari: “Mundhu anokwanisa kudini kunanga kuti ndiri wakarurama pambeji pa Mwari? Nokuti ndiri wakacena mundhu wakabahwa ngo mwanakaji?” (Job 25:4) Mukuzwirana no murangariro uwu, Jobe wainga mundhuvo hake waizova akarurama kuna Mwari ngo njira yapi?
Nyamasi uno, vazinji vano mavonero akashata ngo pamusoro pavo. Manera avakarehwa, zvineso zvo uhomi, kukashana ko jinja kana ko ganda zvingaitisa kuti izvi zviitike. Asi Sathana no madhimoni ake vanodakarira maningi kurembesa vandhu. Mundhu anotendera kupsaswa ngo murangariro wo kuti aasisiri pa mberi pa Mwari Womasimba Ese, iyena anozova akarembejeka. Pakufamba ko nguva, iyena angatogara ndhambo na Jehovha kana kutosiya cokwadi.—Vahebheru 2:1; 3:12.
Zvineso zvo uhomi no usharuka zvingatiitisa kuti titame kuita zviro zvizinji. Zviro zvataiita mu basa ro kucumaera kare patainga majaha zvingasiyana no mukuvo watinonga taavasharuka. Sathana no madhimoni ake vanoda kuti titende kuti kuvangisira kwatinoita akudakajisi Mwari. Tinodikana kuramba murangariro wakadari.
Murindiri wo 15/2/95 pheji 27 ndima 6
Cijijo Cingatibesera Kuti Tihwisane no Zvineso
Shamwari ndhatu ja Jobe jakamurembesa ngo kubhuya murangariro jo uzivi hwajo haiwa uzivi hwa Mwari. Erifazi wakananga kuti ‘Mwari aacaithembepi vashandiri vake’ zvokadi kamare iyena aacaivona kuti Jobe wainga mururami kana kuti haiwa. (Job 4:18; 22:2, 3) Aya ndi magama anorembesa maningi kupinda ari ese hawo. Azvitikahamaji kuti no papera mukuvo mushomani Jehovha wakazopangira Erifazi no shamwari jake ngo ndava yo kushora kwavakamuita. Mwari wakati: “Amuzivi kunasa kuvereketa ndini.” (Job 42:7) Asi kucaviya zviro zvimweni zvinonyangajisa maningi.
Murindiri wo 15/4/03 pheji 14-15 ndima 10-12
Majaha Anodakajisa Mwoyo wa Jehovha
10 Inga zvinonangwa mu Bhaibheri, Sathana aazivi kutama kudakara basi ngo ndava yo kugondeka kwa Jobe asi no ko vashandiri vake vese kubatanijavo na imwimwi. Kunasa kunanga, ecibhuya ngo pamusoro po vandhu vese Sathana wakananga kudari: ‘Zvese zvaanazvo mundhu [kuciripi Jobe basi] anazvo ngo kuda kuponesa upenyu hwake.’ (Job 2:4) Muri kukwanisa kuvona manera amuri kubatanijwa pa shwiro iyi? Mukuzwirana na Mazwi Akangwara 27:11; inokhombija kuti kuno ciri cese catinokwanisa kupa Jehovha kuitira kuti iyena akwanise kudavira Sathana uwo ano mushora. Ejanyi kurangarira basi, Mutongi wo zvese ecimukokanyi kuti mupingure pa shwiro huru kupinda jese. Uwu zvingaita kuti i muthwaro nokutizve makomborero akakurisisa maningi. Munorangarira kuti munozokwanisa kutendera mukoka uwu? Jobe wakazvikwanisa. (Job 2:9, 10) Jesu no vandhu vacikaverengeki kubatanijavo no majaha vakazvikwanisavo. (Vafiripi 2:8; Apokaripsi 6:9) Imwimwi mungazvikwanisa izvi. Asi zivanyi kuti munodikana kukheta divi rimwe basi pamaviri. Kuvhira ku zviro zvamunoita imwimwi mungakhombija kuti muri kudivi ra Sathana kana kudivi ra Jehovha. Ngozvapi zvamaizokheta?
Jehovha Anoneseka Ndimwi!
11 Kureva kuti Jehovha anoneseka ngo pamusoro po zvivaringo zvamunotema? Kureva kuti vandhu vakagondeka kuna Jehovha avato vakwana kuti iyena akwanise kudavira vanomushora? Zvajeka kuti kupumbha kunoita Sathana kuti vandhu avaripi kushandira Jehovha ngo rudo ndi manyepo. Jehovha anoda kuti itusu tive kudivi rake, tibesere ukuru-kuru hwake, ngokuti iyena anoneseka ndisu. Jesu wakati: “Asipi kuda ka Baba wangu vari kudenga kuti umwe wo vana vadoko ava asvejeke.”—Mateu 18:14.
12 Izvokadi kuti Jehovha anoneseka ngo zvamunokheta. Asipi zvonazvo basi, zviito zvenyu zvinomupsasa. Bhaibheri rinovonesa kuti zviito zvaushoni no zvakashata zvo vandhu zvinopsasa maningi Jehovha. Inga muezaniso, Jehovha waigara akacamwa Vaiziraeri pavaienderera mberi ‘vecimupandukira.’ (Nduyo 78:40, 41) Ndambi yo mu njiku ja Nowa icito yatanga, “kuxata ko vandhu kwakakura” Jehovha wakaita “bundu mu mwoyo make.” (Genesi 6:5, 6) Rangariranyi kuti izvi zvinorevenyi. Kudari mukatema zvivaringo zvakashata imwimwi munozonyangaja Musiki wenyu. Izvi azvirevi kuti Mwari wakarembejeka kana anoita zviro naacikarangariri. Iyena anoneseka ndimwi nokutizve anoda kugara ushoni kwenyu. Ngo divi rimweni, mukaita zviro zvaushoni munodakajisa mwoyo wa Jehovha. Iyena aadakajihwi basi ngokuti anozokwanisa kupingura Sathana asi anodakajihwavo ngokuti anova wiya anozotipekeja zviro zvaushoni. Zvondhozvo ndizvona zvaanoda kutiitira. (Vahebheru 11:6) Jehovha Mwari ndi baba vanotida maningi!
Upfumi hwo Kumujimu
Murindiri wo 15/7/04 pheji 21-22
Kwanirisanyi Zvido Zvenyu Zvokunamata Kuti Mukuje Musiki Wenyu
Pakutanga amborangariranyi kuti Jehovha wakaitisa kudini kuti asike zviro zvese no cido cake co kusika nyika. Masoko o kuti “kwakaita madeko no mangwanani,” anovonesa kuti Jehovha wakasiyanisa zviro pamukuvo waazvisika. (Genesi 1:5, 8, 13, 19, 23, 31) Panguva imwe nga imwe acito asika ciro, iyena waitanga aziva kuti waida kuciitirenyi no urongwa wo njiku yondhoyo. Jehovha wakakwanirisa cidisiso cake co kusika vandhu. (Apokaripsi 4:11) Jobe mwanarume wainga akagondeka wakananga kudari: “[Jehovha] Bzese bzaanoda, anobziita.” (Job 23:13) Jehovha wakadakara maningi paakavona “kuti zvese zvaainga aita zvainga zvakanaka maningi.”—Genesi 1:31.
Kuti tikwanirise zviro zvatinoda tinodikana kuva no cido cakavanga cokuzvikwanirisa. Ngozvapi zvinozotibesera kuti tive no cido cakavanga kudaro? Pikija paya pokuti Jehovha wainga acito asika nyika, icito yaano zviri zvese iyena wainga ozvivona ngo ndhambo kuti kudari akapera kuzviita zvaizova zvakanaka maningi no kumupa rukujo. Mu njira yakaezana, cido catinaco cokukwanirisa zvatakagaja cinozovanga kudari tikapeja mukuvo muzinji tecirangarijisisa ngo muviyo jinozovepo no makomborero akona. Ndizvona zvakanangwa ngo hama imweni inodanijwa kuti Tony yainga no makore anokwana kuita 19. Iyona aikanganwi mudakaro woyakava nawo payakapera kuvhakacira Bheteri ro ku Europa ro Zvapupu zva Jehovha. Kuvhira pondhopo, iyona yakaenderera mberi yecirangarijisisa ngo muvhunjo wokuti: ‘Zvaizova zvakadini kudari ndikaenda koshandiravo pa ndau yakadari?’ Hama iyi aizivi kumboregera kurangarira ngo pamusoro pazvo, yakaenderera mberi yecizvirangarira. Pasure po makore akawanda, petisawu yayo yokoshandira ku Bheteri yakazodavihwa, yodakara maningi.
NJIKU 11-17 JA DEZEMBRO
UPFUMI HUNOVHA MU SOKO RA MWARI | JOBE 25-27
“Atidikani Kuva Vandhu Vakakwana Kuti Tive Takagondeka”
Perspicaz vhorume 1 pheji 1235 ndima 6
Kugondeka
Jobe. Jobe uwo wokuti kangaije wakapona pa mukuvo wakafa Josefa mbhera pa mukuvo wa Mosi, anonangwa kuti “wainga mundhu wakaperera no kururama, waithya Mwari, eciramba bzakaxata.” (Job 1:1) Vandhu pavanoramba vakagondeka zvinoita kuti Jehovha akwanise kudavira Sathana uwo wakamushoraya. Sathana wakashora Jobe pakunamata kwake Mwari ecinanga kuti iyena ari kushandira Mwari haiwa ngo mwoyo wese asi ngo ndava yo zviro zvaanazvo. Ngo njira iyi, wakaita kuti kugondeka ka Jobe kudihwe pa muejo kuitira kuvona kuti zvaingaro akananga zvaingadi izvona kana kuti haiwa. Jehovha wakamutendera kuti aende koparaja zvese zvainga na Jobe kubatanijavo no vana vake. (Job 1:6–2:3) Iyena wakananga kuti Jobe wakatendera kuruza zvese kubatanijavo no vana vake, kuti akwanise kuponesa upenyu hwake. (Job 2:4, 5) Pakupera kwa izvi Sathana wakaenderera mberi ecieja Jobe ngo kuita kuti ahwaje ndhendha inozizimusa nokuita kuti mukaji wake abhuye zvicina hwiru nokutoshandisa shamwari jake ndhatu jiya kuti jimueje (Job 2:6-13; 22:1, 5-11), madaviriro aiita Jobe aivonesa kuti iyena aacaida kusiya kuva mwanarume wakagondeka. “Ndinotokotesa uceni hwangu mbhera kufa, ndinovangirira kunanga kuti andizivi kuxaixa. Mwoyo wangu aundivereketeri ciro.” (Job 27:5, 6) Ngo kuramba kwake akagondeka zvakavonesa kuti Muvengi wa Mwari munyepi.
Murindiri wa 02/19 pheji 3 ndima 3-5
Rambanyi Makagondeka!
3 Vashandiri va Mwari vanokhombijisa kudini kugondeka? Ngo kuda Jehovha ngo mwoyo wese, inga muviyo, nguva jese tinozoita zvinomudakajisa. Vonanyi amwe masoko anonangwa ngo pamusoro po gama ro kuti kugondeka. Revo imwe inozwisisika yo mu Bhaibheri kuitira gama ro kuti, ‘kugondeka’: Ndi kukwana kana kutama pakaposeka. Inga muezaniso, vaIziraeri vaipira zvinyama kuna Jehovha zve Mutemo wainanga kuti zvinyamezvo zvaidikana kuva zvicina no pakaposeka. (Lv. 22:21, 22) Vandhu va Mwari avacaitendehwa kuita mupiro no cinyama cina mureje umwe, njeve imwe kana jiso rimwe zve avacaitodikana kupira cinyama cino ndhendha jakawanda. Zvaisisira maningi kuna Jehovha kuti cinyama cive cakakwana zve cicina pakaposeka. (Marak. 1:6-9) Tingatozwisisa kuti ngenyi Jehovha waineseka ngo pamusoro po kukwana kana ngo kutama pakaposeka. Inga muezaniso, patinotenga ciri cese, azvinenyi dangani ndi mucero, bhuku kana thurusi riri rese haro, atidi cakakura maningi kana divi raco. Tinoda ciro cakakwana zve cicina pakaposeka. Jehovha anozwavo kudaro ngo pamusoro po rudo hwedu naye no kugondeka kwedu. Kunodikana kuva kwakakwana zve kucina no pakaposeka.
4 Izvi zvinoreva kuti tinodikana kuva takakwana kuti tive takagondeka here? Haiwa, nguva jimweni tinotojizwa kuti tinoshaisha zve atizivi kukwana. Vonanyi kuti ngenyi atidikani kuva takakwana kuti tive takagondeka. Cokutanga, Jehovha aasotesesi zvishaishi zvedu. Soko Rake rinotibvunja kudari: “Mukaverenga bzixaixi, Tenji Mwari, Tenji, ndiani angararama?” (Ndu. 130:3) Iyena anozviziva kuti atizivi kukwana, tinoshaisha zve no kukova kwese anotiregerera. (Ndu. 86:5) Cocipiri, Jehovha anoziva patinogumira zve aaimiri kuti tiite zviro zvoticikakwanisi kuita. (Verenganyi Nduyo 103:12-14.) Waro, tingaviisa kudini takakwana zve ticina pakaposeka pamberi pake?
5 Ku vashandiri va Jehovha, khiya yo kugondeka irudo. Rudo hwedu na Mwari, kujipira no kugondeka kuno Baba wedu vo mugore, kunodikana kuva kwakakwana zve kucina pakaposeka. Kudari rudo hwedu unoramba wakavanga patinosongana no muejo, tinova vandhu vakagondeka. (1 Kron. 28:9; Mat. 22:37) Vonanyizve muezaniso wo Zvapupu zvitatu zvanangwaya pa kutanga. Ngenyi izvona zvakaita kudaro? Kureva kuti musikane wiya waida kusekwa kucikora, mujaha wiya waida kunyowejeka paainga ecicumaera muzi ngo muzi, kana mwanarume waingaya no mbhuri waida kuruza basa here? Zvokadi kamare, haiwa. Kusiyapo izvo, izvona zvaiziva kuti ndhungamiro ja Jehovha jakarungama zve zvaida kuita zviya zvinodakajisa Baba wazvo vo mugore. Rudo hwazvo navo, wakazvindundira kuti zvidire pakutanga zviya zvinovadakajisa. Mu njira iyi, zvakakhombija kuti izvona zvakagondeka.
Upfumi hwo Kumujimu
Murindiri wa 11/16 pheji 9 ndima 3
Takarongwa Mukuzwirana no Zviri mu Bhuku ra Mwari
3 Zviro zvakasikwa zvinokhombija kuti Jehovha ndi Mwari wakarongeka. Bhaibheri rinonanga kudari: “Tenji Mwari wakarura nyika ngo usivi hwake, wakavangisa mudenga ngo hwiru hwake.” (Mazwi 3:19) “Takazwa basi mwaungu mudoko” wo basa ra Mwari. (Job 26:14) Asi pazvishoma basi zvatinoziva zvakadari inga, maparaneta, ndhondho, zvikwata zvo ndhondho zvinozwi magaraxi zvese izvi zvinoita kuti tithembe kuti zviro zvese zvakasikwa zvakarongeka. (Ndu. 8:3, 4) Magaraxi ano zviuru zvo nyereji nokutizve jinofamba mudenga nojakarongeka. Maparaneta akagarisana no zuva anogara ecitenderera pano zuvero inga kuti ari kuzwira mutemo uri mugwanja. Masoko anoshamaisa o kuti zviro zvese zviri mudenga zvakanasa kurongeka anotibesera kuvona kuti Jehovha uwo “wakarura denga” no nyika iyena anofanera nderemejo, kuva takagondeka kwaari no kumunamata.—Ndu. 136:1, 5-9.
NJIKU 18-24 JA DEZEMBRO
UPFUMI HUNOVHA MU SOKO RA MWARI | JOBE 28-29
“Imwimwi Muno Mufambiro Wakanaka Inga wa Jobe?”
Murindiri wo 15/5/02 pheji 22 ndima 19
Khombijanyi Unyasha no Rudo kuna Vaya Vanoda Besero
19 Unyasha no rudo unonangwa mu Bhaibheri, unokhombija kuti iwona unodikana kukhombijihwa kuna vaya vano zvavanoda asi avacakwanisi kuzviita. Kuitira kuti jinja rake rienderere mberi, Abhirahama waida besero ra Bhetuweri. Kuti mutembo wake uendeswe ku Kanani Jakobe waida besero ra Josefa. Naomi kuti awane zvaaida waida besero ra Rute. Abhirahama, Jakobe na Naomi avacaizokwanisa kuita zviro izvi vacina besero ro vandhu ava. Mu njira yakaezana, nyamasi uno, unyasha no rudo unodikana kukhombijihwa kuna vaya vanoda besero. (Mazwi 19:17) Tinodikana kutevejera Jobe uwo “waibesera varombo apo vecikumbira kubeswa, no ndherera icina muthaviri,” kubatanijavo na vaya “vainga phedo no kufa.” Jobe “waidakajisavo mwoyo yo noni,” no ‘soka jo bzigono.’—Job 29:12-15.
Perspicaz vhorume 2 pheji 1193 ndima 9
Nguvo
Nguvo jingatoshandiswa pa kuezanisira zviro zvakawanda. Inga muezaniso, uniforimi inokhombija kuti mundhu uwu anovha ku sangano rapi no kuvonazve kuti anobesera divi rapi. Mukufananavo, nguvo yo kuezanisira inosananguhwa mu Bhaibheri inokhombija kuti mundhu uwu ngo wo mushovonyi, anoita basa rapi no kukhombijazve kuti ngozvapi zvinozwirana na iyena, inga zvatinovona pa muezaniso wa Jesu ngo pamusoro po nguvo yo mucadho. (Mt 22:11, 12) Pana Apokaripsi 16:14, 15, Mambo wedu Jesu Kristu anopa ngwajo yo kutama kuvata ku divi ro kumujimu, wogumira pa kurambwa inga capupu cakagondeka ca Mwari wo kadi. Izvi zvaizopseruja maningi kudari zvikaitika pa “hondo yo njiku huru ya Mwari wo Masimba Ese.”
Murindiri wo 1/2/09 pheji 15 ndima 3-4
Mazina Anorevo Here?
Atina manera okukheta zina redu patinobahwa. Asi zvinofira kwatiri kuti tinodikana kuva no mufambiro wo mushovonyi. (Mazwi Akangwara 20:11) Ejanyi kujivhunjisa kudari: ‘Jesu no vapostori no vainga no mukana vaizondipa zina rapi? Ngorapi zina raizonasa kusanangura undhu hwangu?’
Muvhunjo iji jinotiitisa kuti tinase kurangarijisisa. Ngenyi? Mambo wainga no uzivi Soromona, wakatara kudari: “Zina rakanaka riri nane kupinda upfumi hwakawanda.” (Mazwi Akangwara 22:1) Ngozvokadi kuti tikava no zina rakanaka, kana mufambiro waushoni tinozoreremejwa kumutundhu kwatinogararo. Asi cinosisira maningi ngocokuti kudari tikaita zina rakanaka pamberi pa Mwari tinozova no upfumi wo kwenda no kwenda. Kuitisa kudini? Mwari anogondesa kuti anozotara mu “bhuku ro bzicerecejo” vaya vanomuthya, no kuvapa upenyu wo kwenda no kwenda.—Marakiya 3:16; Apokaripsi 3:5; 20:12-15.
Upfumi hwo Kumujimu
Mukai! wa 7/8/00 pheji 11 ndima 3
Kunyemwerera Kunobesera
Kunyemwerera kunocinja zviri zvese? Munoceuja kunyemwerera ko ari wese kwakamupsasa kana kwakamuitisa kuti mujizwe makasujunuka? Kana kutama kunyemwerera ko mundhu kwakamuitisa kuti mujizwe mucizivi kugajana no mucikadiwi? Inga zvamavona, kunyemwerera i ciro cikuru maningi haiwa basi ku wiya anonyemwerera asi kuna vaya vanokuashira. Jobe mwanarume anonangwa mu Bhaibheri, wakananga kudari ngo pamusoro po vavengi vake: “Ndaivangisa mwoyo yo vakaremba; vecindivona ndecidakara, ivona vaiwana simba.” (Job 29:24) Manera ainga hope ya Jobe kangaije aikhombija kudakara kwaiinga nako.
NJIKU 25-31 JA DEZEMBRO
UPFUMI HUNOVHA MU SOKO RA MWARI | JOBE 30-31
“Jobe Wakaitisa Kudini Kuti Aenderere Mberi Akacena?”
Murindiri wo 15/4/10 pheji 21 ndima 8
Reesanyi Majiso Enyu ku Zvakashata
8 Makristu okadi-kadi angapsaswavo no zvido zvo majiso no zvo muviri. Asi Soko ra Mwari rinotivangisa kuti tive vanojibata kuzviya zvatinovona no kuda. (1 Vak. 9:25, 27; verenganyi 1 Johani 2:15-17.) Mugondeki Jobe waiziva kubatana ko kuvona no kuda. Iyena wakati: “Ndakaita citenderano no majiso angu kuti: andizoringisi mbhandwe.” (Job 31:1) Kuciripi basi kuita zvouhure no mwanakaji ari wese Jobe aacaitenderepi kuti ave no murangariro jakadari. Jesu wakagogomejera kuti ativhiri kurangarira zviro zvicikazivi kucena paakananga kudari: “Ariwese anoringisisa mwanakaji ngo meso o kumuemura, wapombora naye ngo mu mwoyo make.”—Mat. 5:28.
Murindiri wo 1/9/08 pheji 11 ndima 4
Mugumo “Uri Kukhwedera”
Mucito mafamba pa gwanja rondhoro, jivhunjisenyi kudari, ‘Rinozondiendesa kwapi?’ Kuima padoko kakurangarira ngo pamusoro po “mugumo” waro zvinozotibesera kuti titame kuwira mugwanja rakashata. SIDHA no ndhendha jimweni jingaviya ngo ruvatano, mimba icikavetehwi, kuvhisa mimba, kuparajana no kuva no hana inorema ndi zviro zvinogara mugwanja ra vaya vanotama kureremeja zvikwangwani. Mugumo wo gwanja ra vaya vanoita zvo ruvatano, wakanasa kujekeswa ndi Mupostori Pauro. Ivona “avazogari utaka mu Umambo hwa Mwari.”—1 Vakorinte 6:9, 10.
Murindiri wo 15/11/10 pheji 5-6 ndima 15-16
Majaha Tungamirihwanyi Ngo Soko ra Mwari
15 Ngo mavonero enyu, ngopapi paya pokuti kugondeka kwenyu kuna Jehovha kunoejwa maningi, pamunonga muri pamwepo no vamweni kana mwega? Ndizvona kuti pamunonga kucikora kana ku basa, munodikana kuva makanasiririka kuti mujivirire umujimu hwenyu. Imwimwi munova makanasiririka kuti mujivirire ushamwari hwenyu na Mwari. Pamunokanganisika kana mucikazivi kunasiririka kuitira kujingwarira ngo pazvinonga zvakareruka kuti ushamwari hwenyu na Jehovha hurembejeke.
16 Ngenyi munodikana kuva no cinangwa cokuzwira Jehovha pikija pamunonaga muri mega? Ceujanyi kuti imwimwi mungadakajisa kana kucamwisa Jehovha. (Gn. 6:5, 6; Mazwi 27:11) Zviito zvenyu zvaizopsasa Jehovha “ngokuti ndiyena anomukorondha.” (1 Ped. 5:7) Iyena anoda kuti imwimwi mupurutane kuti muve no upenyu hwaushoni. (Is. 48:17, 18) Kuiziraeri yokare, ngo kutama kwavo kuzwira ndhungamiriro ja Jehovha, ivona vakamucamwisa maningi. (Ndu. 78:40, 41) Ngo divi rimweni, Jehovha wainga no rudo wakura maningi na Dhanyeri. Ngirozi imweni yakamudana kudari, “mundhu wokudikanwa.” (Dhan. 10:11) Ngenyi? Ngokuti Dhanyeri wainga akagondeka kuna Mwari pamativi ese.—Verenganyi Dhanyeri 6:10.
Upfumi hwo Kumujimu
Murindiri wo 15/11/05 pheji 11 ndima 3
Purutananyi Ngo Mwoyo Wese
Shamwari ndhatu ja Jobe jakazwa hurukuru jake jinokwana kuita gumi. Pikija zvakadaro, Jobe wakati: “Aripo mundhu anoda kuzwa mazwi aya?” (Job 31:35) Ngenyi? Ngokuti shamwari jake jiya ajicaizwepi mu njira yokumunyaraja. Ivona avacaipsakepi kugara ushoni ka Jobe nee avacaineseka ngo pamusoro po mazwiro ake. Pacina kukana-kana, avacaikhombijepi cido cokuda kumuzwisisa. Pa mugariro uwu mupostori Pedhru anoti: “Ivanyi makabatana mu murangariro, mecihwajihwa ngo kutambujika ko vamweni, mecida hama, mecizwirana pena no kujidodokesa.” (1 Pedhru 3:8) Tingakhombijisa kudini kuti tinozwira pena vamweni? Njira imwe ngo yokuneseka ngo pamusoro po vamweni no kuzwisisa mazwiro avo. Magama anokhombija kuti itusu tinozwisisa akadari inga, “izvi kangaije zvamurembesa maningi” kana “kangaije muri kujizwa inga mucizivi kuzwisiswa,” ndi amwe manera okukhombija kuti itusu tinopurutana. Imweni njira ngo yokuphinda magama anangwaro ngo mundhuwo zvinokhombija kuti itusu tiri kuda kuzwisisa zvaari kudaro kunanga. Kupurukira no rudo azvirevi kuti itusu tiri kupurukira basi masokowo asi zvinovonesa kuti tiri kuda kuzwisisa mazwiro ano mundhuwo pikija acikaripi kunasa kumajekesa ushoni.