Mu Bhaibheri munobhuiwa maningi ngo pamusoro po Umambo hwa Mwari. Jehovha anozoshandisa Umambo hwake kuti acinje nyika ino kuti ive paradhiso. Asi icinyi Umambo hwa Mwari? Tinozvizivisa kudini kuti ihwona hwatanga kutonga? Ngozvapi zvawapera kuita? Ihwona unozoitenyi kumbejiyo? Pa cijijo ici no zvijijo zviviri zvinotevera zvinozodavira muvhunjo iji.

1. Icinyi Umambo hwa Mwari, ndiyani Mambo wo Umambo uhu?

Umambo uhu i utongi hwakagajwa ndi Jehovha Mwari. Mambo wo Umambo uhu, ndi Jesu Kristu, iyena ari kutonga kumatenga. (Mateu 4:17; Johani 18:36) Bhaibheri rinonanga kuti Jesu: “Anozova Mambo . . . mbhera narini.” (Ruka 1:32, 33) Inga Mambo wo Umambo hwa Mwari, Jesu anozotonga vandhu vese pasi pano.

2. Ndiyani anozotonga na Jesu?

Jesu aazotongi ari ega. Vandhu vanovha “ku mavhumbo ese, ndimi jese, vandhu vese no ku majinja ese . . . vanozotonga nyika” yese pamwepo na Jesu. (Apokaripsi 5:9, 10) Vandhu vangana vanozotonga na Kristu? Kuvhira Jesu paakaviya pasi pano, mamiriau no mamiriau o vandhu ari kuva Makristu. Asi kureva kuti Makristu ese anozoenda kotonga na Jesu here? Andizvopi. Vandhu vanokwana 144.000 ndivona vanozoenda kotonga na Jesu kumatenga. (Verenganyi Apokaripsi 14:1-4.) Vandhu vese vacikaiti divi rokotonga na Jesu vanozorarama pasi pano.—Nduyo 37:29.

3. Ngenyi Umambo hwa Mwari hwakanaka maningi kupinda utongi hwo vandhu?

Pikija vatongi vecieja kuita zviro zvakanaka, ivona avana simba rokuita zvese zvavanoda. Unozoguma mukuvo wokuti vatongi ava vanofakeiwa ngo vandhu vamweni vokuti kangaije avadi zviro zvakanaka ku vandhu. Asi Mutongi wo Umambo hwa Mwari, Jesu, aazofakeiwi ngo ari wese. Ngokuti Mwari “anozozisa umambo hucikazopejwi.” (Danieli 2:44) Jesu anozotonga nyika yese no kutaja vandhu vese ngo njira yakaezana. Iyena ano rudo, unyasha no ururami. Anozojijisa vandhu kuti vatajane ngo njira yakaezana, ngo rudo, unyasha no ururami.—Verenganyi Isaia 11:9.

4. Umambo hwa Mwari hunozotonga nyika yese

Jesu Kristu anosimba rakakura maningi kupinda ro mutongi ari wese wakamboveyo. Verenganyi Mateu 28:18, perapo bhuisananyi ngo muvhunjo unotevera:

• Ngowapi musiyano uripo wo simba rina Jesu pakutonga kwake no utongi hwo vandhu?

Utongi hwo vandhu hunocinjwa mukuvo wese, cimwenizve umwe nga umwe wo majimambo aya anotonga divi rimwe ro nyika. Asi tingativo kudini ngo Umambo hwa Mwari? Verenganyi Danieli 7:14, perapo bhuisananyi ngo muvhunjo jinotevera:

• Ngenyi zvakanaka kuziva kuti Umambo hwa Mwari auzoparajwi?

• Ngenyi zvakanaka kuziva kuti Umambo hwa Mwari hunozotonga nyika yese?

5. Utongi hwo vandhu hunodikana kucinjwa

Ngenyi Umambo hwa Mwari hunodikana kucinja utongi hwo vandhu? Rijanyi VHIDHIYO, perapo bhuisananyi ngo muvhunjo unotevera.

VHIDHIYO: Icinyi Umambo hwa Mwari?—Cidimbu (1:41)

• Ngoapi matambujiko anoviiswa ngo utongi hwo vandhu?

Verenganyi Mucumaeri 8:9, perapo bhuisananyi ngo muvhunjo jinotevera:

• Imwimwi munorangarira kuti Umambo hwa Mwari hunodikanadi kamare kucinja utongi hwo vandhu? Ngenyi?

6. Umambo hwa Mwari huno vatongi vanotizwisisa

Mambo wedu Jesu Kristu wakapona pasi pano inga mundhu, ndiyo ndava iyena “anokwanisa kuzwisisa kuremba kwedu.” (Vahebheru 4:15) Kusiyapo izvo, Jehovha wakakheta vo 144.000 vanarume no vanakaji vakagondeka kuti vazotonge pamwepo na Jesu. Vandhu ava vanovha “ku mavhumbo ese, ndimi jese, vandhu vese no ku majinja ese.”—Apokaripsi 5:9.

• Munojizwa kudini ngo kuziva kuti Jesu no vandhu vaanozotonga navo vanozwisisa zvineso zvedu? Ngenyi?

7. Mutemo ja Mwari jakanaka maningi kupinda jo utongi uri wese

Vatongi vanodira mutemo kuti vabesere no kujivirira vandhu. Umambo hwa Mwari unavo mutemo jawo. Verenganyi 1 Vakorinte 6:9-11, perapo bhuisananyi ngo muvhunjo jinotevera:

• Munorangariravo kudini kudari vandhu vese novaizwira mutemo wa Mwari?a

• Munorangarira kuti Jehovha anodikanadi kamare kuvhunja vandhu kuti vazwire mutemo jo Umambo hwake? Ngenyi?

• Ngo zvapi zvinokhombija kuti vandhu vacikazwiri mutemo iji vangacinja?—Vonanyi vhesi 11.

ZVOTAJIJA

Umambo hwa Mwari i utongi hwokadi kamare ihwona uri kutonga kudenga, sambiri pano unozotongavo pasi pano.

Kuhwirijira

• Mbhani vanozotonga mu Umambo hwa Mwari?

• Ngenyi Umambo hwa Mwari hwakanaka maningi kupinda utongi hwo vandhu?

• Jehovha anoda kuti vandhu vaitenyi kuti vazotongwe ngo Umambo hwake?

ZIVANYI ZVIMWENI

Vonanyi zvakajijisa Jesu ngo pamusoro po kunogara Umambo hwa Mwari.

“Umambo hwa Mwari Huri Mu Mwoyo Mako Here?” (Mu interneti)

Ngenyi Zvapupu zva Jehovha zvinokheta kubesera Umambo hwa Mwari kusiyapo kubesera utongi hwo vandhu?

Kuzvipira ku Umambo hwa Mwari (1:43)

Vonanyi zvinonanga Bhaibheri ngo pamusoro po vo 144.000 vakasaniwa ndi Jehovha kuti vazotonge na Jesu.

“Ndiyani Anozoenda Kudenga?” (Mu interneti)

Ngo zvapi zvakakhohwesa mwanakaji wainga mukadheya kuti Mwari ndiyena anozoita kuti pa nyika pave no ururami?

“A minha procura por um mundo sem injustiça” (Mukai! wa Novembro wo 2011, Ciputukezi)

Umambo hwa Mwari huri kutonga mugore. Ngo kukasika iwona unozocinja mugariro wo nyika ino. Ngatende tivone zviro zvimweni zvakanaka zvinozoithwa ngo Umambo uhu.

1. Umambo hwa Mwari hunozoitenyi kuti panyika pave no runyararo no ururami?

Jesu, Mambo wo Umambo hwa Mwari, anozopeja vandhu vakashata no utongi hwo vandhu pa hondo yo Armagedhoni. (Apokaripsi 16:14, 16) Pa zvinozoitika izvi, cigondiso co Bhaibheri cokuti: “Garirai padoko: akuzovibze no muxati” cinozokwanirisika. (Nduyo 37:10) Jesu ecishandisa Umambo hwa Mwari, iyena anozoviisa runyararo no ururami munyika yese.—Verenganyi Isaia 11:4.

2. Upenyu unozova wakadini kudari kuda ka Mwari kukazoitika panyika?

Amborangariranyi basi kurarama mu nyika yokuti vandhu vese vakarurama, vakanaka, vanoda Jehovha no kudisana ngo cavo. Ngo kudaro mu Umambo hwa Mwari, “varurami vanozoita veno vo nyika, vanozogaremo mbhera narini.” (Nduyo 37:29) Akucinazve na umwe anozonanga kuti ndiri kuhwaja. Vandhu vese vanozopona kwenda no kwenda.

3. Umambo hwa Mwari hunozoitenyi kudari vakashata vakapera kuparajwa?

Pasure po kuparajwa ko vandhu vakashata, Jesu anozotonga ko makore anokwana kuita ciuru [1.000]. Pamukuvo wondhowo, Jesu no vo 144.000 vaanozotonga navo vanozobesera vandhu panyika kuti vave vakakwana. Pakupera ko ciuru co makore, nyika yese inozova paradhiso yakaseja. Vandhu vese vanozova vakadakara ngo kuti vanonga vecizwira mutemo ja Jehovha. Jesu anozohwirija Umambo kuna Baba wake, Jehovha. ‘Zina ra Jehovha rinozoceneswa’ kupinda zvarakamboithwa kare. (Mateu 6:9, 10) Munozova no cokwadi cokuti Jehovha ndiyena Mutongi wakanaka anoneseka ngo vandhu. Jehovha anozoparaja Sathana, madhimoni no vandhu vese vanosana kupandukira utongi Hwake. (Apokaripsi 20:7-10) Zvakanaka zvese zvinozoithwa ngo Umambo hwa Mwari, kubatanija no kuva no upenyu hwakakwana, zvinozova zvo kwenda no kwenda.

NASANYI KUPSAKISISA

4. Umambo hwa Mwari hunozopeja utongi hwo vandhu

Bhaibheri rinoti: “Varipo vandhu vanotonga panyezuru po vamweni, kuti vavaxuphe.” (Mucumaeri 8:9) Jehovha anozoshandisa Umambo hwake kuti apeje kutama kururama kwese.

Verenganyi Danieli 2:44 na 2 Vatesaronika 1:6-8, perapo bhuisananyi ngo muvhunjo jinotevera:

• Jehovha na Jesu vanozoitenyi ku utongi hwo vandhu na vaya vanoubesera?

• Mecirangarira zvese zvamakajija ngo pamusoro pa Jehovha na Jesu, ngenyi mungava no cokwadi cokuti kutonga kwake kunozova kwakarurama?

5. Jesu ndi Mambo wakanaka

Ngo kuva kwake Mambo wo Umambo hwa Mwari, Jesu anozoita zviro zvakawanda zvakanaka kuti abesere vandhu panyika. Rijanyi VHIDHIYO inovonesa kuti Jesu anoda kubesera vandhu. Perapo Mwari wakamupekeja simba kuti azviite.

VHIDHIYO: Jesu Wakakhombija Zvinozoithwa ngo Umambo (1:13)

Zviro zvakaithwa ndi Jesu paainga ari pasi pano, imuezaniso wo zviro zvaanozoita inga Mambo wo Umambo hwa Mwari. Zviro zvapi zvakandandaniswa pasi apa zvamunoda kuti zviitike ngo kukasika? Verenganyi mavhesi o Bhaibheri anobhuya ngo pamusoro po makomborero aya.

6. Umambo hwa Mwari hunozoviisa kumbeji kunoshamaisa

VHIDHIYO: Zviro Zvishoma Zvinokhombija Kumbeji Kunoshamaisa (4:38)

Verenganyi Nduyo 145:16, perapo bhuisananyi ngo muvhunjo unotevera:

• Munozwa kudini ngo kuziva kuti Jehovha anozogutisa zvido zvese zvo zviro zvinopona?

ZVOTAJIJA

Umambo hwa Mwari hunozokwanirisa cidisiso cake. Unozocinja nyika kuti ive paradhiso yakazara ngo vandhu vanoita zvakanaka no kunamata Jehovha kwenda no kwenda.

Kuhwirijira

• Ngo zvapi zvinozoithwa ngo Umambo hwa Mwari kuti ucenese zina ra Jehovha?

• Ngenyi tingatenda kuti Umambo hwa Mwari unozokwanirisa zvese zvakagondeswa ngo Bhaibheri?

• Pa zvese zvakanaka zvinozoithwa ngo Umambo, ngo zvapi zvamaidakarira maningi kuti zviitike?

ZIVANYI ZVIMWENI

Pfumburanyi kuti icinyi cinodanijwa kuti Armagedhoni.

“Hondo yo Armagedhoni Icinyi?” (Mu interneti)

Psakisisanyi zviitiko zvinozoitika pa mukuvo wakadanijwaya ndi Jesu kuti “dambujiko guru.”—Mateu 24:21.

“Chii Chinonzi Kutambudzika Kukuru?” (Artigu yo mu saiti)

Mbhuri iri kurangarira iri muparadhiso no kurangarira ngo makomborero anozoveyo.

Jivonenyi Muri Muparadhiso (1:50)

Verenganyi pa musoro unoti “Ndaiva Nemibvunzo Yakawanda Yaindinetsa,” kuti muzwe ngo mwamarume umweni waipandukira utongi, wakazoziva njira inozopejwa ndiyona matambujiko.

“Bhaibheri Rinochinja Upenyu” (Murindiri, No. 1 wa Janeiro wo 2012, Cishona)