Munovha Masoko Kuitira Co Kutarira zvo Musongano Upenyu no Mushando
© 2023 Watch Tower Bible and Tract Society of Pennsylvania
NJIKU 1-7 JA JANEIRO
UPFUMI HUNOVHA MU SOKO RA MWARI | JOBE 32-33
Vangisanyi Vaya Vari Kuhwisana no Kuthimwa-thimwa
Perspicaz vhorume 1 pheji 799 ndima 2
Erihu
Erihu wainga mundhu acikakheti. Iyena aacaipekejepi zina ricikafaneri kuna ari wese. Erihu wainasa kuziva kuti inga ndi Jobe ivona vainga vakaithwa ngo bukuta nokutizve Womasimba ese ndiyena Musiki wavo. Erihu aacainga no cinangwa cokutiza Jobe, iyena waibhuya naye inga shamwari yokadi nokubhuya zviro zvaushoni ngo pamusoro pa Jobe zvokuti azvizivi kuithwa ndi Erifazi, Bhiridhadhi na Zofari.—Job 32:21, 22; 33:1, 6.
Murindiri wo 15/6/14 pheji 25 ndima 8-10
Imwimwi Munovona Vandhu Vacina Simba mu Mavonero a Jehovha?
8 Zvingazotibesera kuti tizwire pena hama no hambzaji jedu, ndi kuceukija kuti ivona vari kusongana no mugariro jakadari inga, kuhwaja, kuparajana pa mbhuri no kuvora mwoyo. Zvingaita kuti pa njiku iri yese tingazova pa mugariro wakadari inga ndi uwu. Vacito vanghwina mu nyika yavakagondeswa Vaiziraeri vaitambujikaya ku Ejipita, vakaceukijwa kuti avacaidikana ‘kuomesa mwoyo’ kuno hama jiya jainga varombo no jicina simba. Jehovha waivetera kuti ivona vazobesere varombo.—Dt. 15:7, 11; Lv. 25:35-38.
9 Kusiyapo kutonga hama jedu pa mugariro wajiri kusongana nawo unonesa, tinodikana kuvanyaraja mukuzwirana no Matahwa. (Job 33:6, 7; Mt 7:1) Vonanyi muezaniso uwu basi. Kudari mufambisi akaita asidhenti woenda kunyumba yo uhomi kureva kuti mamedhiko anotanga apsaka kuziva kuti ndiyena ano ndava kana haiwa? Haiwa, ngokukasika ivona vanoita zviri zvese kuti vamurape. Mu njira yakaezana, kudari Mukristu akava acina simba ngo ndava yo zvineso zvaari kusongana nazvo, cokutanga itusu tinodikana kumupa besero rokumujimu raanoda.—Verenganyi 1 Vatesaronika 5:14.
10 Kudari tikaima torangarira ngo pamusoro po mugariro jinonesa jinosongana no hama jedu tinopejisira ngokujivona ngo njira yaushoni. Rangariranyi ngo pamusoro po hambzaji jokuti jaanomakore akatikuti jecicungirira kuteverehwa pa mbhuri. Vamweni tingavavona inga vacina simba asi pikija zvakadaro ivona vano rutendo hwakavanga. Imwimwi pamunovona mai vanorera vega vana veciviya kumusongano sumana jese no vana vavo, amushamaisiki ngo rutendo hwavo no kucungirira kwavanoita? Waro tingati kudini no vocidoko vanoenderera mberi vari mucokwadi pikija no muejo javanosongana najo kucikora? Kudari tikanasa kusotesesa kamare vandhu ava vacinari simba tinokwanisa kuvona kuti “vakapfuma mu rutendo” kupinda vaya vari pamugariro jaushoni.—Jak. 2:5.
Murindiri wa 03/20 pheji 23 ndima 17-18
Ngoyapi Nguva Kwayo yo Kuvereketa?
17 Mwanarume wo cirongomuna wakavhakacira Jobe wainga Erihu, wainga ukama wa Abhirahama. Iyena waipurukira Jobe pamwepo no vanarume vatatu vaya povainga vecivereketa. Zvakajeka kuti wakanasa kuteya njeve zvainga zvecinangwa, ngokuti iyena wakakwanisa kukhombija usizi pa mazano aakapa kuti abesere kucinja manera okurangarira a Jobe. (Jobe 33:1, 6, 17) Caisisira maningi kuna Erihu kwainga kukuja Jehovha, haiwa iyena pacake kana mundhu umweni. (Jobe 32:21, 22; 37:23, 24) Kuvhira ku muezaniso wa Erihu tinojija kuti kuno mukuvo wo kunyarara no wo kupurukira. (Jakobo 1:19) Tinojijazve kuti patinopa mbhangiro, cinosisira maningi kwatiri ngo co kukuja Jehovha, haiwa itusu pacedu.
18 Tingakhombija kuti tinoreremeja cipo co kuvereketa ngo kutevera mazano anowanika mu Bhaibheri ngo pamusoro po mukuvo watinodikana kuvereketa no manera o kuvereketa. Muzivi Mambo Soromona wakafemehwa kutara kudari: “Izwi rakanangwa pa ngari yaro rakaita inga mucero wo ndarama no bzinemeso bzo siriva kuna wiya anorizwa.” (Mazwi Akangwara 25:11) Patinonasa kupurutana zvinonanga vamweni no kurangarira ticito tavereketa, magama edu angava inga mucero wo ndarama, anosisira no kuseja. Perapo, kusiyapo kuvereketa maningi kana padoko, magama edu anozobesera vamweni zve anozodakajisa Jehovha. (Mazwi Akangwara 23:15; VaEfeso 4:29) Aya ngo manera akanakisisa o kukhombija kubongesera ngo cipo ici cinovha ka Mwari!
Upfumi hwo Kumujimu
Murindiri wo 15/1/13 pheji 19 ndima 10
Endereranyi Mberi Mecikhwedera Phedo na Jehovha
10 Kujinasirira kunosisira maningi. Ativhiri kunyanyisa maningi pakupfujura zviro zvinokhombija kuti itusu taaharahwa. Zviro izvi zvinokhombija kuti itusu taavandhu vakura, vakareremejeka no vakaseja ngo mukati. Inga muezaniso, Bhaibheri rinonanga kudari: “Musoro uno invhi, uno junguja ro ukuru; irona rinowanika mu gwanja rakarurama.” (Mazwi 16:31) Iyi ndiyona njira yaanotivona ndiyona Jehovha, tinodikana kujivona ngo njira yondhoyo. (Verenganyi 1 Pedhru 3:3, 4.) Kureva kuti zvaizova zvoungwaru kuita operasau kana kuraphwa ngo njira jimweni jinodira pa ngozi upenyu hwedu basi kuti tishamaise vandhu? “Mudakaro unovha kuna Jehovha” cinyuke co cokwadi nokuseja ko mukati azvinenyi ngowapi mupira wedu kana zvineso zvo uhomi zvatiri kusongana nazvo. (Nee. 8:10) Basi mu nyika imbza ndimona matinozova no upenyu hwakakwana no kuva mujaha. (Job. 33:25; Is. 33:24) Mbhera pamukuvo wondhowo kukhombija uzivi no rutendo hwakavanga zvinozotibesera kuti tienderere mberi tiri phedo na Jehovha nokuita zvese zvatinokwanisa azvinenyi no mugariro jatiri kusongana najo.—1 Tim. 4:8.
NJIKU 8-14 JA JANEIRO
UPFUMI HUNOVHA MU SOKO RA MWARI | JOBE 34-35
Paya Pokuti Upenyu Unovoneka Inga Ucizivi Kurungama
Murindiri wo 1/19 pheji 8 ndima 1
Ngohwapi Undhu Hwa Jehovha?
Mwari mukuvo wese anoita zvakarurama. Bhaibheri rinoti: “Mwari aaiti bzakaxata kamare! Nyakukwanisa bzese aaxaixi.” (Job 34:10) Matongero a Jehovha akarungama ndiyo ndava mutari wo Nduyo wakati: “Munotonga vandhu ngo urungami.” (Nduyo 67:4) Apana mundhu angakwanisa kucengeja Jehovha ngokuti “Mwari anovona mwoyo.” (1 Samueli 16:7) Jehovha mukuvo wese anoziva kuti ngocapi cokwadi, matongero ake akarungama mukuvo wese, kunja kwa zvondhozvo, Jehovha ari kuvona kutama kurungama no ushati uri kuitika mu nyika. Iyena anogondesa kuti sambiri pano “vakaxata vanozojingwa mu nyika.”—Mazwi Akangwara 2:22.
Murindiri wa 04/17 pheji 10 ndima 5
Zvicinyi Zvinozoitika pa Kuviya ko Umambo Hwa Mwari?
5 Jehovha acazoitenyi? Wari uno, Jehovha ari kupa mukana vandhu vakashata kuti vacinje. (Isaia 55:7) Pikija hazvo, nyika ino yakashata iri kuda kuparajwa sambiri pano, vandhu vakashata avato vatongwa. Waro zvicinyi zvinozoitika kuno vaya vacikadi kucinja no vanobesera mugariro uno wo zviro mbhera pa damujiko guru? Jehovha wakagondisa kuti waizobvisa vandhu vese vakashata pasi pano. (Verenganyi Nduyo 37:10.) Nyamasi uno, vazinji vari kukwanisa maningi kuviga zviito zvavo zvakashata, ngo kuita kudaro, kazinji avapanicwi ndizvona. (Jobe 21:7, 9) Asi Bhaibheri rinoticeukija kudari: “Ngokuti majiso [a Mwari] anovona maitiro o vandhu vese; anorindira kufamba kwavo kwese. Akuna cidima nokuti bvute rakapsipa po vangakwanisa kufindara vaxaixi.” (Jobe 34:21, 22) Ngo kudaro akuna manera o kuvanda kana kufindara pamberi pa Jehovha. Iyena anovona zvese zviri kuita vashati. Armagedhoni ikapera, tinozosota pavaianja kugara, asi atizovavoni. Vanonga vaparajwa mbhera narini!—Nduyo 37:12-15.
Murindiri wa 05/21 pheji 7 ndima 19-20
Munozokhugunyika ngo Ndava ya Jesu Here?
19 Muri kuvona cineso condhoco nyamasi? Hina. Vandhu vazinji nyamasi uno vanokhugunyika ngokuti vanotivona ticikanghwiniri mu zvouporitika. Ivona vanorangarira kuti itusu taidikana kuvhota. Asi itusu tinozviziva kuti kudari tikasana mundhu kuti ave mutongi wedu, tinonga teciramba Jehovha. (1 Samueli 8:4-7) Vandhu vanorangarira kuti itusu taidikana kuvaka zvikora, zvipitari kuti tikwanise kubesera vandhu. Asi ivona vanokhugunyika ngokuti itusu takabatikana pa basa rokucumaira, haiwa kuda kueja kutonga zvineso zvo nyika ino ngo kukasika.
20 Tingaitenyi kuti titame kukhugunyika? (Verenganyi Mateu 7:21-23.) Basa redu guru ngo rokucumaira masoko akanaka inga zvatakavhunjwa ndi Jesu. (Mateu 28:19, 20) Nakamwe atidi kuphingaijwa ngo pamusoro po zvouporitika no shwiro jo nyika ino. Itusu tinoda vandhu no kuneseka ngo zvineso zvavo. Asi njira yakanaka yokubesera vo pacigarisano vedu ngo yo kuvajijisa ngo pamusoro po Umambo hwa Mwari no kuvabesera kuti vave no ushamwari na Jehovha.
Upfumi hwo Kumujimu
Murindiri wa 04/17 pheji 29 ndima 3
Kujipira Kwenyu Ngakuviise Rukujo kuna Jehovha!
3 Umwe mujaha waidanijwa Erihu, wainga ecipurukira mabhuyo a Jobe no vanarume vatatu avo. Paakapera, Erihu wakabvunjisa Jobe kudari ngo pamusoro pa Jehovha: “Kudari iwewe uri mururami, unomupa cinyi, caanoaxira mu nyara jako?” (Jobe 35:7) Erihu waiejavo kunanga kuti kuvangisira kwedu pa kushandira Mwari akushandi here? Haiwa. Jehovha aazivi kumuvereketera inga zvaakaita ku vanarume vatatu vaya. Erihu waibhuya fundo rakasiana. Wainanga kuti Jehovha aazokonehwi ciri cese ngo kuti atizivi kumunamata. Iyena wakakwana. Apana cotinoita cingamuita kuti akhupuke kana kumupa simba. Zvokadi kamare, mugariro uriwese kana kukwanisa kuri kwese kotinako kunobva kuna Mwari, zve anovona kuti tiri kuzvishandisa kudini.
NJIKU 15-21 JA JANEIRO
UPFUMI HUNOVHA MU SOKO RA MWARI | JOBE 36-37
Ngenyi Imwimwi Mungathemba Cigondiso ca Jehovha co Upenyu Ucikaperi?
Murindiri wo 1/10/15 pheji 13 ndima 1-2
Zvinokwanisika Kuziva Mwari?
MWARI APANA PAAKATANGIRA APANA PAANOGUMIRA: Bhaibheri rinojijisa kuti Mwari ariyo “kubvira kare, mbhera narini ndimwi Mwari.” (Nduyo 90:2) Ngo magama amweni Mwari apana paakatangira apana paakagumira. Mu mavonero o vandhu “uwandu hwo makore ake ahuverengeki.”—Job 36:26.
Munobesereka kudini ngokuziva izvi: Jehovha anomugondesa kumupa upenyu ucikaperi kudari mukamuziva inga shamwari. (Joh 17:3) Aticaizokwanisepi kuthemba no cigondiso na cimwe haco kudari iyena nainga aciripi wokwenda no kwenda. Basi “Mambo acina magumo” ndiyena waizokwanisa kukwanirisa cigondiso cakadari.—1 Timoti 1:17.
Murindiri wa 05/20 pheji 22 ndima 6
Munobongesera ngo Zvese Zvaushoni Zvamakapuwa ndi Jehovha Here?
6 Kumwa inowanika pa nyika ngokuti paraneta yedu airipi ndhambo kana phedo no zuva. Kudari paraneta yedu noyainga phedo no zuva, kumwa yese yo pasi pano, yaizovira zve yaizopejisira ngo kuoma zvokuti apacaizova no upenyu. Kudari paraneta yedu no yainga ndhambo padoko no zuva, kumwa yese yaizobatana yoita buwe zve nyika yaizozara ngo kumwa yo mapuwe. Zvecivoneka kuti Jehovha wakadira nyika pa ndau payo, kumwa iri mu nyika inokwanisa kuita kuti pave no upenyu. Zuva rinopisa kumwa yo mu jombe no kumwa inowanika pa nyika zve kumwa iyi, inoita buruusi yoenda koita makore. Pa gore, mutengo unokhwedera kuita 500.000 kirometro kubhiko wo kumwa, unoita buruusi. Kumwa iyi, inogara pa atomosfera ko gumi ro njiku isati yana kana kuita kumwa yo mapuwe. Kuvha iponapo, inohwirirazve mu jombe kana pa nyika zve inoramba icindodaro. Jehovha wakaita izvi kuti kumwa igare indoripo pa nyika. Izvi zvinovonesa kuti Jehovha ano uzivi no simba.—Job. 36:27, 28; Muc. 1:7.
Murindiri wa 10/22 pheji 28 ndima 16
Vangisanyi Vetero Yenyu
16 Vetero yedu yo kuva no upenyu ucikaperi ndi cipo cinoshamaisa cinovha kuna Mwari. Tiri kuvetera no cidaka-daka cese kuva no kumbeji kunodakajisa. Izvi zvinozoitikadi kamare. Vetero yedu inoshanda inga nanga yecitibesera kuti tikwanise kucungira zvineso zvatinosongana nazvo, kuteverehwa no rufu. Inoshandazve inga kapaseti ngo kutijivirira ku murangariro jakashata kuti tikwanise kuramba kuita zvakashata asi toda kuita zvakanaka. Vetero yedu yakacijikira mu Bhaibheri inotiita kuti tive no ushamwari wo phedo na Jehovha, yokhombija kuti iyena anotida maningi. Kudari vetero yedu ikaenderera mberi yakavanga, tinozova no makomborero mazinji.
Upfumi hwo Kumujimu
Perspicaz vhorume 1 pheji 522 ndima 1
Kubhuisana
Kareko, ku ndau jinobhuiwa mu Bhaibheri, masoko no murangariro zvaiita kuvhunjwa mundhu ngo mundhu asi ngo njira jakasiana-siana. Kazinji, masoko ozviitiko zvo nguva jese o mundharaundhemo aitobhuiwa ngo muromo kamare (kana ngo kuita kubhuisana). (2 Sam 3:17, 19; Job 37:20) Vandhu vaivhakanja kazinji vaiperekeja majimambo, vainanga masoko o ndau jimweni jo ndhambo pavaiima muzvitici zvo mundharaundhemo kuti vawane zvokuha, kumwa no zviro zvimwenivo zvaidiwa. Ku ndau yo ku Parestina, ngo ndava yo kusiana kwayo kamare no Azia, Afrika no Europa, yaiambukiwa maningi ngo karavhana jaienda no kuvia ku ndau jakasiana-siana. Ngo kudaro, vagari vo mundau iyi vaikwanisa kuwana masoko mazinji ngo pamusoro po zviitiko zvikuru zvo mu nyika jimweni jo ndhambo. Masoko o munyikemo no o nyikanja, kazinji aiwanika maningi kubazari ro mudhorobhemo.
NJIKU 22-28 JA JANEIRO
UPFUMI HUNOVHA MU SOKO RA MWARI | JOBE 38-39
Imwimwi Munopsaka Mukuvo Kuti Murangarijisise Ngo Pamusoro po Zviro Zvakasikwa?
Murindiri wa 08/21 pheji 9 ndima 7
Munozovetera Kuti Jehovha Aite Ciri Cese Here?
7 Bhaibheri parinobhuya ngo manera Jehovha wakasika nyika, irona rinonanga kuti wakagaja “ukuru hwayo,” wocira “maambo ayo” no kucira “buwe ro kuvaka.” (Jobe 38:5, 6) Atee wakatora nguva kuti avone basa raakaita. (Gn. 1:10, 12) Rangariranyi mazwiro akava no ngirozi pojaivona zviro zvese zvipsa zvakasika Jehovha. Ijona jaidakara maningi. Ngo ndava yazvo ijona jakatanga ‘kubwa-bwaijira nyara.’ (Jobe 38:7) Ngozvapi zvatinojija apa? Kwakapera zviuru no zviuru zvo makore Jehovha ecisika nyika, ndhondho no zviro zvese zvinopona. Asi Jehovha paakavona zvese zvaakasika, iyena wakati: “Bzainga bzakanaka.”—Gn. 1:31.
Murindiri wa 08/20 pheji 14 ndima 2
Rumuko Unokhombija Rudo, Uzivi no Kusengerera ka Mwari
2 Pokutanga, Jehovha wakasika mundhu kuti ashande naye: Jesu, Mwana wake. Ecishandisa Jesu, “bziro bzese bzakaruhwa,” kubatanijavo zviuru no zviuru zvo ngirozi. (Vak. 1:16) Kuna Jesu wakava mudakaro mukuru maningi kuva no cidakajiso co kushanda na Babake. (Mazwi 8:30) No ngirozivo jainga no mathangwe okudakara. Ijona jakakwanisa kuvona ngo phedo Jehovha na Jesu, vacishanda ngo simba kuti varure nyezuru no pasi. Waro ngirozi jakaitenyi? Ijona “jaiimba” nyika poyaisikwa, pacina kukana-kana ijona jakaenderera mberi jeciita izvo Jehovha paaipejisa kusika ciro cimwe nga cimwe. Zvinovoneka inga kuti ngirozi jakadakara maningi pojakavona ciro cokupejisira kusikwa pa nyika: Vandhu. (Job. 38:7; Mazwi 8:31) Zviro zvese zvakasikwari zvinokhombija rudo no uzivi hwa Jehovha.—Ndu. 104:24; Var. 1:20.
Murindiri wa 03/23 pheji 17 ndima 8
Jijanyi Zvakawanda ngo Pamusoro pa Jehovha Kuvhira ku Zviro Zvakasikwa
8 Tingathemba Jehovha. Jehovha wakabesera Jobe kuti azive kuti iyena angamuthemba. (Job. 32:2; 40:6-8) Pa mabhuyo aakaita na Jobe, Jehovha wakananga zviro zvakasiyana-siyana zvaakasika, zvakadari inga ndhondho, makore no mbheni. Iyena wakabhuyavo ngo pamusoro po zvinyama, zvakadari inga nyati no haci. (Job. 38:32-35; 39:9, 19, 20) Zviro zvese izvi zvakajijisa Jobe kuti Jehovha ndi Mwari ano simba, rudo no uzivi. Pasure po mabhuyo aya, Jobe wakatanga kuthemba Jehovha mu njira yokuti aazivi kumboitazve. (Job. 42:1-6) Mukufananavo, patinojija ngo zviro zvaakasika, tinovona kuti Jehovha ano uzivi no simba kupinda ari wese hake. Iyena anokwanisavo kupeja zvineso zvedu zvese i anoda kuita zvondhozvo. Kuziva izvi kungatibesera kuti timuthembe maningi.
Upfumi hwo Kumujimu
Perspicaz vhorume 2 pheji 199 ndima 2-3
Mupi wo Mutemo
Jehovha Ndiyena Wakadira Mutemo. Kunasa kunanga, Jehovha ndiyena ega basi wakaita mutemo. Ndiyena wakaita mutemo jinotungamirira zvakasikwa, zvisikwa zvicikafemi kana zvicina upenyu (Job. 38:4-38; Ndu. 104:5-19) no zvinyama. (Job. 39:1-30) Inga cicikwa ca Jehovha, mundhu anodikanavo kuzwira mutemo ja Jehovha zvecivonekas kuti mundhu ndi cisikwa cinokwanisa kuva no uzivi, kurangarira no kunamata Mwari. Izvi zvinovonesa kuti mundhu anodikana kuzwira mutemo ja Mwari ngo pamusoro po mugariro jakanaka. (Var 12:1; 1 Vak 2:14-16) Kusiyapo izvo, zvisikwa zvinopona kumatenga zvinodikanavo kuzwira mutemo ja Mwari.—Ndu 103:20; 2 Ped 2:4, 11.
Apana cinoita kuti mutemo jakadira Jehovha jitame kushanda. (Je 33:20, 21) Tikasota kudenga, tinovona kuti mutemo ja Mwari jakanaka maningi kamare zvokuti mu ndau jimweni jino masiyentista ano uzivi ngo pamusoro po mutemo ja Mwari, vanokwanisa kuziva ngo cokwadi cese kufamba-famba kunoita zuva, mapraneta no zviro zvimweni zvakasikwa zvo kudenga pa masegundo manganani basi. Wiya anoda kuita zvakasiyana no zvinonanga mutemo iji anotambujika maningi. Ngo njira yakaezana, mutemo ja Mwari ajicinjiki kana kuita zvakasiyana no zvajinonanga, nee apana anotendehwa kujicinja. Mutemo iji ngo jokadi kamare kudari inga mutemo jinotungamirira zvisikwa zvicikafemi, pikija mundhu anotama kuzwira aangakhawiswi ngo kukasika. “Mwari aaungwiswi. Zvaanosima mundhu, ngo zvaanozokotora.”—Vag 6:7; 1 Tim 5:24.
NJIKU 29 YA JANEIRO–4 YA FEVEREIRO
UPFUMI HUNOVHA MU SOKO RA MWARI | JOBE 40-42
Zvijijo Zvatinowana Kuvha ku Zvakaitika na Jobe
Murindiri wo 15/10/10 pheji 3-4 ndima 4-6
“Ndiyani Wakaguma Pakuziva Murangariro wa Jehovha?”
4 Patinonga tecirangarijisisa ngo pamusoro po mabasa a Jehovha tinodikana kuita ubhasopa kuti titame kutonga Mwari mu mavonero edu. Murangariro uwu unobhuiwa pa masoko a Jehovha akatahwa pana Nduyo 50:21: “Unorangarira kuti ndinoezana newe?” Ko makore anodarika 175 muzivi umweni wo Bhaibheri wakati: “Vandhu vanoeja kutonga Mwari vecirangarira kuti Mwari ari ndhambo no mutemo javanovona kuti ngo jaushoni kwavari.”
5 Tinodikana kuva no ubhasopa kuti titame kuita kuti murangariro wedu ngo pamusoro pa Jehovha ukwajane ku zviya zvatinovona inga kuti zvakanaka no zvakashata. Ngenyi izvi zvinosisira? Patinonga tecijija Bhaibheri tingavona zviito zvimweni zva Jehovha inga zvicikazivi kurungama mukuzwirana no mavonero edu acikazivi kukwana. Mu njiku jo kare Vaiziraeri vakavavo no murangariro wakadaro voguma pakurangarira kuti Jehovha aacaivatajepi. Jehovha wakazovavhunja kudari: “Asi imwimwi munoti: “Bzaanoita Tenji asipi bzakarurama!” Ndibzo, izwanyi, vo nyumba yo vaIsraeli: Bzondinoita inini, bzakaposeka, here? Ngo kusiana, asipi maitiro enyu akaposeka?”—Ezek. 18:25.
6 Zvingatibesera kuti titize murau wokutonga Jehovha ngo ndava yo mavonero edu, ngo zvokuzwisisa kuti mavonero edu ano paanogumira nokutizve kazinji akaposeka. Jobe wakadikana kujija cijijo ici. Pamukuvo wese uwu wokuti Jobe waitambujika iyena wakahwisana nokutama vetero nokuva mundhu wairangarira ngozvake basi. Jobe wainga acikarangaririzve kuzviro zvinosisira. Jehovha ngo rudo hwese wakabesera kuti Jobe ave no mavonero akanaka. Jehovha wakaita kuna Jobe muvhunjo jinokwana kuita 70, iyena aazivi kukwanisa kudavira ne umwe, zvecikhombija kuti kuzwisisa kwake kwainga no pakunogumira. Asi Jobe wakadavira no kujidodokesa kwese ocinja mavonero ake.—Verenganyi Job 42:1-6.
Murindiri wa 06/17 pheji 25 ndima 12
Rambanyi Makasotesesa pa Shwiro Huru
12 Mavereketere akashandisari Jehovha apa aacaingepi o kukharamusa here, zvecivoneka kuti Jobe wainga atambujika maningi? Haiwa, nee Jobe aazivi kuzvivona kudaro. Jobe wakazwisisa no kureremeja mbhangiro ya Jehovha. Wakatonanga kudari: “Ndatenderuka, ndokhauya mu bukuta no marota.” (Job. 42:1-6) Mufana umweni waidanijwa Erihu wainga akambobeserazve Jobe kucinja murangariro wake. (Job. 32:5-10) Jobe naapurukira mbhangiro yo rudo ya Jehovha, wocinja mavonero ake, Jehovha wakaita kuti vamweni vazive kuti waidakajihwa ngo kugondeka ka Jobe.—Job. 42:7, 8.
Murindiri wa 06/22 pheji 25 ndima 17-18
‘Imiranyi Tenji Mwari’
17 Jobe ndi umwe basi wo vashandiri va Jehovha wakaenderera mberi akacunga no kuvanga paaisongana no zvineso zvakasiyana-siyana. Pa karata yake ku Vahebheru, mupostori Pauro wakanangavo ngo vazinji vamweni vaakadanija kuti “njama huru yo zvapupu.” (Vah. 12:1) Ivona vakasonganavo no muejo jakasiyana-siyana. Asi vakaenderera mberi vakagondeka kuna Jehovha. (Vah. 11:36-40) Kunanga kuti kucungirira kwavo no kushanda kwavo ngo simba kwakava kwabiresi? Haiwa. Pikija avazivi kukwanisa kuvona kukwanirisika ko zviprofita zva Jehovha mu upenyu hwavo, ivona vakaenderera mberi vecivetera Jehovha. Zvecivoneka kuti ivona vaiziva kuti vainga vandhu vaitendehwa ndi Jehovha, vainga no cokwadi cokuti vaizovona kukwanirika ko zvigondiso zvake. (Vah 11:4, 5) Muezaniso wavo ungativangisa kuti tienderere mberi tecivetera Jehovha.
18 Tiri kupona mu nyika yo kuti iri kuvha mukushata kwenda mukushatisisa. (2 Timoti 3:13) Sathana ari kwenderera mberi ecieja vandhu va Jehovha. Pikija no zvineso zvatinozosongana nazvo kumbejiyo, ngatiteme civaringo cokushandira Jehovha no simba rese, tecithemba kuti “vetero yedu iri kuna Mwari anopona.” (1 Timoti 4:10) Ceukijanyi kuti makomborero akaashira Jobe anovonesa kuti “Jehovha wakazara ngo pena no usizi.” (Jakobo 5:11) Tingaendereravo mberi takagondeka kuna Jehovha tecithemba kuti iyena “anopfupa vanomupsaka ngo mwoyo wese.”—Verenganyi Vahebheru 11:6.
Upfumi hwo Kumujimu
Perspicaz vhorume 1 pheji 831 ndima 3
Kushohwa
Jobe wainga mundhu wakarurama no akagondeka pikija no kushohwa kwaaithwa. Jobe wakazova no mavonero akashata oguma pakushaisha no kuzopangihwa. Erihu wakananga kudari ngo pamusoro pake: “Makambovona mundhu acina nyoa, inga Jobe uu? Yena anomwa bzituko inga anomwa kumwa.” (Job. 34:7) Jobe wakajiinikira maningi pacake otanga kuvona inga kuti wakarurama maningi kupinda Mwari. (Job. 35:2; 36:24) Kushohwa kwaiithwa no “shamwari” jake ndhatu waivona inga kuti waishohwa ndiyena haiwa Mwari. Izvi tingazviezanisa no mundhu anotendera kushohwa nokureruswa inga zvocibarihwe wogumira pakuzvidakarira inga madakarire anoita mundhu paanomwa kumwa. Pakufamba ko nguva Mwari wakazosanangurira Jobe (pakupejisira) kuti vashori vaya, zvocokwadi vainga vecibbhuya manyepo ngo pamuso pa Mwari. (Job 42:7) Mu njira yakafanana, Jehovha wakavhunja muporofeta Samweri Vaiziraeri pavaida mambo kuti: “Ngokuti avarambi iwewe, vanoramba inini, ngokuti avadibze kuti ndivatonge.” (1 Sam 8:7) Jesu wakati kuno vajiji vake: “Munozonyenywa ngo majinja ese [haiwa ngo ndava yenyu asi] ngo ndava yo zina rangu.” (Mt 24:9) Kurangarira ngo pamusoro pa izvi kunozobesera Mukristu kuti akwanise kucungirira kushohwa kwaangaithwa nokuzova akanasiririka kuti azoashire mupocero wake ngo ndava yo kugondeka kwake.—Ruk 6:22, 23.
NJIKU 5-11 JA FEVEREIRO
UPFUMI HUNOVHA MU SOKO RA MWARI | NDUYO 1–4
Kuita Divi ro Umambo Hwa Mwari
Murindiri wa 09 21 pheji 15 ndima 8
“Ndinozozungunyisa Nyika Jese”
8 Vandhu vanomavona kudini masoko aya? Vazinji avamadakariri. (Verenganyi Nduyo 2:1-3.) Nyika aizivi kugajana. Ivona vanoramba kutongwa ndi Mambo wakagajwa ndi Jehovha. Kwavari masoko o Umambo atinocumaera asipi “masoko akanaka.” Atee vatongi vamweni vari kurambisa basa iri ro kucumaera! Pikija vamwe vo vatongi ava vanonanga kuti vanoshandira Mwari, ivona avadi kusiya cigaro covanaco. Ngo kudaro, inga vatongi vo mu njiku ja Jesu, ivona vanokhombija kuti avadi kubesera utongi hwa Jesu ngo kuhwisa vateveri vake vakagondeka.—Mabasa o Vapostori 4:25-28.
Murindiri wa 04/16 pheji 29 ndima 11
Rambanyi Mucina Komakapeamira mu Nyika Yakaparajana
11 Kudisisa upfumi. Kudari tinobatisisa maningi zvotinazvo, tiri kuzvidira pa ngozi yo kuphwanya kutama kwedu kotapeamira potinowanana no muejo. Ruti, wo Marawi, wakavona zvapupu zvakawanda zviciphwanya kutama kwazvo kotapeamira pozvaiteverehwa mu gore ro 1970. Iyena ari kuceuja kuti: “Azvicaikwanisepi kuregera upenyu hwazvo hwo kugarisika. Zvapupu zvimweni zvakaenda ku ushoko na itusu, pa mukuvo wakazotevera zvazoita divi ro shwiro jo zvomatongehwo o nyika, zvohwirira kanyi ngo kuti azvacaidepi kurarama upenyu hwo unonesa wo pa ndau yo vaingairo vakadihwa.” Mukusiana, vazinji vo vandhu va Mwari vakaramba vacina kovakapeamira pikija vaenga pa urombo kana vakaruza zvese zvovaenga nazvo.—Heb. 10:34.
Upfumi hwo Kumujimu
Perspicaz vhorume 2 pheji 689 ndima 1
Maushwa Kana Mabwabwa
Citeme cidoko cinojivirira mbhumbha yo zviro zvakadari inga, tirigu, mupunga no sevadha. Mabhuku amweni anobhuya ngo pamusoro po Bhaibheri, ecinangira ngo pamusoro po mabwabwa kana maushwa okuezanisira anonga ecikhombija maitiro okare okupombhonyora. Pakupera kukotora, mabwabwa aya kana maushwa zviro zvokuti azvicaishandiswepi pikija zvaijivirira mbhumbha inosisira maningi izvona zvainga zviro zvicikasisiri. Cainga citatijo caushoni kuitira zviro zvakareruka, zvicikasisiri no zvicikadiwi, caisiyaniswa no zviro zvaushoni perapo zvosvejwa.
Cokutanga, kupombhonyora kwaaita kuti mbhumbha isiyane no mabwabwa. Ngo kudaro, patinonga tecirusa ushwa unotohwa ngo mbhepo inga bukuta. (Vonanyi KURUSWA.) Kunasa kunanga izvi zvinoezanisira manera Jehovha anovhisa vapanduki pakati po vandhu vake no ku vaya vanovateverera. (Job 21:18; Ndu 1:4; 35:5; Is 17:13; 29:5; 41:15; Oz 13:3) Umambo hwa Mwari unozokwiya-kwiya vavengi vawo nokuvaita zviro zvidoko inga maushwa anopeperuswa no mbhepo.—Dan 2:35.
Mabwabwa acikasisiri weya anounganijwa pamwepo opiswa kuti atame kuviiswazve no mbhepo ova anobatanazve no zviro zvinosisira. Mu njira yakaezana, Johani Mubhabhatiji wakananga ngo pamusoro po kuparajwa ko maceci o manyepo no murusi Jesu Kristu anozounganija tirigu “asi iyena anozopisa makoto ngo muriro ucikajimiki.”—Mt 3:7-12; Ruk 3:17. Vonanyi KUPOMBHONYORA no MAUSWA KANA MABWABWA.
NJIKU 12-18 JA FEVEREIRO
UPFUMI HUNOVHA MU SOKO RA MWARI | NDUYO 5–7
Endereranyi Mberi Makagondeka Pikija no Zviito Zvo Vamweni
Murindiri wa 03/21 pheji 15 ndima 7-8
Kuverenga Bhaibheri Kungamubeseresa Kudini Kuti Munyise Zvineso?
7 Makambonyangajiswa ngo shamwari kana mundhu wo pa mbhuri yenyu here? Kudari zvakamuitikira, ciro cingamubesa ngo cokujija ngo zvakaitikira Mambo Dhavhidhi, mwana wake Abhusaromi, paakamunyangajisa no kueja kuva mambo.—2 Samueli 15:5-14, 31; 18:6-14.
8 (1) Itanyi mukumbiro. Mucirangarira zviri kuitikaro na imwimwi, vhunjanyi Jehovha manera omakashaisha kutajwa. (Nduyo 6:7-10) Nanganyi kamare zvamuri kudaro. Perapo, kumbiranyi Jehovha kuti amubese kuwana ndhungamiriro ingamubesera kuti mueje kuhwisana no cineso condhoco.
Murindiri wa 07/20 pheji 8-9 ndima 3-4
Ivanyi no Ghwinyiso Rokuti Muno Cokwadi
3 Rutendo hwedu auvhiri kuva wakacijikira pa rudo hwo ciKristu uri pakati po vandhu va Mwari. Ngenyi? Amborangariranyi basi hama iri mu ungano kangaije iri mukuru kana piyona yoita cishaishi cikuru. Kana umwe wo mu ungano yenyu wo munyangajisa kana hama yosiya kutenda yonanga kuti atina cokwadi, maizoitenyi? Kunanga kuti maizokhugunyika, mosiya kushandira Jehovha here? Zvinosisira maningi kuceujira zviro izvi: Kuva no rutendo takacijikira pamusana po vamweni kuciripi pa ushamwari hwedu na Jehovha, rutendo hwedu auzovi wakavanga. Mazwiro amunova nawo ngo pamusoro pa Jehovha no vandhu vake anozomundundira kuti musakurire rutendo mbhera pakati kuti. Asi ciro cimweni cinosisirazve maningi, ngo co kunasa kujija Bhaibheri, kuzwisisa zvamunojijaro no kupsakisisa kuti muve no cokwadi co kuti zvamuri kujijaro ngo pamusoro pa Jehovha ndizvona. Imwimwi munodikana kujikhohwesa kuti Bhaibheri rino cokwadi ngo pamusoro pa Jehovha.—VaRoma 12:2.
4 Jesu wakabhuya ngo pamusoro po vandhu vaizoashira cokwadi ngo “kudakara,” asi vaizoruza rutendo hwavo pavaizoejwa. (Verenganyi Mateu 13:3-6, 20, 21.) Zvingaita kuti ivona avazivi kuzwisisa kuti kutevera Jesu kunobatanija kuhwisana no zvineso. (Mateu 16:24) Kangaije ivona vairangarira kuti upenyu hwo muKristu aucaizova no matambujiko kana kuti Mwari aacaizotendera kuti ivona vasangane no zvineso. Asi mu nyika iyi icizivi kukwana, tese tinozosongana no zvineso. Cinjo jimweni jinotiitikira mu upenyu hwedu, jinotiita kuti tiruze mudakaro pa mukuvo wakati kuti.—Nduyo 6:6; Mucumaeri 9:11.
Upfumi hwo Kumujimu
Perspicaz vhorume 2 pheji 1004 ndima 5
Guva
Pana Varoma 3:13; mupostori Pauro anobhuya ngo pamusoro pa Nduyo 5:9, eciezanisira dokoriro ro vandhu no vacengeji inga “makuva akashama.” Kudari inga makuva akashama akanasiririka kuti azajwe no vandhu vakafa pomwe no ushati, dokoriro ravo rakashama kuitira mabhuyo anoendesa ku rufu nokuita kuti vandhu vave vashaishi.—Ezanisiranyi na Mt 15:18-20.
NJIKU 19-25 JA FEVEREIRO
UPFUMI HUNOVHA MU SOKO RA MWARI | NDUYO 8-10
“Ndinozomukuja Jehovha Mwari Wangu”!
Murindiri wa 08/21 pheji 3 ndima 6
Reremejanyi Ndau Yenyu mu Mbhuri ya Jehovha
6 Jehovha wakanasirira muzi unosisira maningi kwatiri. Acito warura vandhu, Jehovha wakanasirira nyika kuti vandhu vagaremo. (Jobe 38:4-6; Jeremia 10:12) Zvecivoneka kuti Jehovha wakanaka maningi no kukova, iyena wakasika zviro zvakawanda zvakanaka kuti itusu tidakare. (Nduyo 104:14, 15, 24) Iyena wakatora mukuvo acirangarira ngo zviro zvainga aita, “wakabzivona kuti bzakanaka.” (Genesi 1:10, 12, 31) Iyena wakareremeja mundhu ngo kumuita “kuti atonge panyezuru po” zvisikwa zvake zvese zvinoshamaisa zvo pasi pano. (Nduyo 8:7) Mwari waida kuti zvisikwa zvake zvakakwana zvidakajihwe kwenda no kwenda. Waro imwimwi nguva jese munobonga Jehovha ngo basa ramakapuwari?
Murindiri wa 05/20 pheji 23 ndima 10
Munobongesera ngo Zvese Zvaushoni Zvamakapuwa ndi Jehovha Here?
10 Njira imwe yatingakhombija kuti tinobongesera ngo cipo co kukwanisa kuvereketa, ngo yokusanangurira vandhu vese vanotenda zvouphindu-uphindu, kuti ngenyi itusu tinotenda kuti Mwari ndiyena wakasika zviro zvese. (Nduyo 9:2; 1 Pedru 3:15) Vandhu vanobesera zvitendhwa izvi, vanonanga kuti nyika no upenyu azvizivi kuruhwa. Kudari tikashandisa mafundo manganani atapera kuvona pa jijo iyi, tinozojivirira Baba vedu vo kudenga no kusanangurira vese vanotipurukira kuti ngenyi tino cokwadi cokuti Jehovha ndi Musiki wo denga no nyika.—Nduyo 102:26; Isaia 40:25, 26.
Murindiri wa 04/22 pheji 7 ndima 13
Imwimwi Muri “Muezaniso . . . pa Kuvereketa” Here?
13 Imbanyi ngo mwoyo wese. Ciro cinosisira maningi patinoimba ndumbo jedu jo umwari pa musongano, ngo co kukuja Jehovha. Hambzaji imweni inodanijwa Sara aijivoni inga mundhu anokwanisa ushoni kuimba. Iyona inoda kukuja Jehovha ngo kuimba ndumbo. Kuti ikwanise kuita izvi, yakavona zvecibesera maningi kutanga kujijira ndumbo noiri kumuzi kwayo inga manera ainoita pakunasirira mativi amweni o musongano. Iyona inojijira ndumbo iji no kueja kuvona kuzwirana ko masoko o ndumbo no zvinoda kuzojijwa pa musongano. Iyona yakati: “Izvi zvakandibesera kuti ndibatikane pa masoko haiwa pa kukwanisa kwangu kuimba.”
Upfumi hwo Kumujimu
Perspicaz vhorume 1 pheji 664 ndima 2
Cikunwe
Mu njira yokuzanisira zvinovoneka kuti Mwari anoita mabasa akadari inga kutara Gumi ro Mupango pa mapuwe o matabwa ecishandisa ‘zvikunwe’ (Ex 31:18; Dt 9:10) wakaita mushamaiso (Ex 8:18, 19) no kusika matenga (Ndu 8:3). ‘Zvikunwe’ zva Mwari zvaibata basa zvecirevera mujimu mucena kana simba, inga zvinonangwa pana Genesi ngo pamusoro po zvisikwa apa panonanga kuti mujimu wa Mwari ndi (simba) raitenderera pa nyezuru po kumwa. (Gn 1:2) Ngo kudaro, Matahwa o Cigiriki anotipekeja zwisiso yo muezaniso, zwisiso yaushoni ngo pamusoro po muezaniso waithwari. Bhuku ra Mateu rinosanangura kuti Jesu waigogomera madhimoni ngo ‘mujimu wakacena wa Mwari’ Ruka anotivhunja kuti izvi zvaitika ngo “cikunwe ca Mwari.”—Mt 12:28; Ruk 11:20.
NJIKU 26 YA FEVEREIRO-3 YA MARÇO
UPFUMI HUNOVHA MU SOKO RA MWARI | NDUYO 11-15
Rangariranyi Muri mu Nyika Imbza ya Mwari Ino Runyararo
Murindiri wo 15/5/06 pheji 18 ndima 3
Zvatinowana pa Divi Rokutanga ro Bhuku ra Nduyo
11:3—Ngozvapi zvinothemba vandhu zvinozoparajwa? Aya ndi matangiro anobesera vandhu, mutemo, mupango no kururama. Pavanotama kuzwira mupango mugariro wavo unoshatisisa apazowaniki kururama. Pamugariro jakadari “mururami” anodikana kuthemba kamare Mwari.—Nduyo 11:4-7.
Murindiri wo 16/4 pheji 11
Zvinokwanisika Kuzova no Nyika Icikana Uphanga?
Bhaibheri rinonanga kuti sambiri pano Mwari anozopeja uphanga. Nyika yakashata nyamasi uno iri kuvetera “njiku yo kutongwa no kuparajwa ko vandhu vakashata.” (2 Pedhru 3:5-7) Akucazovizve no vandhu vakashata vanozotambuja vamweni. Ngenyi tingava no cokwadi cokuti Mwari ano cido cukuda kupeja uphanga?
Bhaibheri rinonanga kuti Mwari “anonyenya vaya vanodisa kujipa.” (Nduyo 11:5) Iyena anodakarira runyararo no urungami. (Nduyo 33:5; 37:28) Ndiyo ndava iyena aazotenderi kuti vandhu vakashata varambe varipo mbhera narini.
Murindiri wa 08/17 pheji 6 ndima 15
Muri Kuda Kuvetera ngo Kusengerera Here?
15 Ngenyi Dhavhidhi wakava no cido co kuvetera? Iyena wakatipa mupinguro mu nduyo yondhoyo yaakabvunjisa karongomuna kuti, “mbhera rini?” Iyena wakati: “Ngo cangu, ndinogonda rudo hwenyu! Mwoyo wangu unodakara ngo ruponeso hwenyu. Ndinozoimbira Tenji Mwari ngo ndava yo bzakanaka bzaakandiitira. Ndinozorijira zina ra Tenji Mwari Mukuru-kuru!” (Nduyo 13:6, 7) Dhavhidhi waizviziva kuti Jehovha anomuda zve mukuvo wese anozogondeka kwaari. Wairangarira ngo mukuvo waakabesehwa ndi Jehovha kare zve waivetera mukuvo wokuti Jehovha waizopeja zvineso zvake. Dhavhidhi waizviziva kuti zviri nane kuvetera makomborero a Jehovha.
Umambo hwaMwari Huri Kutonga! Cipauko 22 pheji 232 ndima 2
Umambo Hunoita Kuda kwaMwari Panyika
16 Kupona pacina camuri kuthya. Kukwanirisika ko nguva doko kunonangwa pana Isaia 11:6-9, kunozoitika. Vanarume, vanakaji no vana vese vanozova vakajiviririka pacina cavanothya pasi pano. Panonga pacina nee mundhu nee cinyama cinothyisa. Rangariranyi kumbeji pamunonga mecivona nyika ino inga muzi wenyu, pamunonga mecisambirira mu murambo, kutamba mujombe, kukhwira matundhu no kusika-sika musora mucina camuri kuthya. Cimwenizve, paunonga waausiku imwimwi amuzothyizve. Magama anowanika pana Ezekieli 34:25, anozokwanirisika, okuti vandhu va Mwari ‘vanozogara mu bani ngo kugarisika, vovata mu makwaxa avo.’
Upfumi hwo Kumujimu
Murindiri wo 15/9/13 pheji 19 ndima 12
Imwimwi Makacinjwa?
12 Zvinosuruvarisa kuziva kuti tiri kupona no vandhu vakanangwaya ndi mupostori Pauro. Zvingaita kuti ivona vanorangarira kuti kupona vecitevejera mutemo ngo zvokare. Majiporosori no vabari vakawanda vanomurangariro wokuti vana vavo vangapona veciita zviya “zvavanoda”. Kwavari zvese zvakanaka apana zvakashata. Nee vandhu vazinji vanonanga kuti vanonamata vanorangarira kuti vano rusujunuko wokuita zviro zvavanoda zvavanovona kuti zvakanaka nokutizve vanorangarira kuti avadikani kuzwira mupango ja Mwari. (Ndu. 14:1) Murangariro uwu ungava cikhugu kuno Makristu ocokwadi nyamasi uno. Ivona vakatama kuita bhasopa vanozovavo no mavonero akafanana pa shwiro yokunamata. Vangaguma pakutama kuzwira ndhungamiriro jatinopuwa mu ungano kana kugunun’una no ndava yo zviro zvavanonga vacikadakariri. Vakagumira pakuva no mavonero acikaripi aushoni ngo pamusoro po Bhaibheri parinobhuya ngo pamusoro po mabungaijo, njira yaushoni yokushandisa interneti no jijo yo pamusoro-soro.