Jesu Anobhabhatijwa

Papera mweji mutandhatu kubvira Johani Mubhabhatiji paakatanga kucumaera. Jesu, waano 30 o makore, woenda kuna Johani ku murambo wo Jorodhani. Ngenyi? Aacaiendepi kopasiarivo hake nee aacaiendepi kovona kuenderera mberi ka Johani. Asi Jesu waida kuti Johani amubhabhatije.

Asi Johani aacaizvitendepi, woti: “Inini ndini ndinotojanira kubapatizwa ndiwe, iwewe woza kondiri?” (Mateu 3:14) Atingashori zvakaitari Johani. Iyena anozviziva kuti Jesu i Mwana anosisira wa Mwari. Mucakanganwa kuti Johani wakaphuka ngo mudakaro paainga ari mundani ma mai vake, Maria ano mimba ya Jesu paakabvakacira Erizabheti, make Johani. Tinogwinyiso kuti Johani wakazozviverengehwa ndi make.

Johani anozviziva kuti rubhabhatijo hwaanoita ngo hwo vandhu vano khauya mu zvishaishi zvavo. Asi Jesu aana zvishaishi. Pikija Johani wairamba, Jesu waindovangirira kuti Johani azviite eciti: “Ndiregerei wari, ngokuti bzinofanera [kukwaniriswa] kudaro urungami hwese.”—Mateu 3:15.

Ngenyi Jesu ari kuda kubhabhatijwa? Ngo kuti rubhabhatijo hwa Jesu asipi hwo kuda kukhauya kuzvishaishi, asi hunotatija kuti iyena ari kujipira kuti aite kuda ka Baba vake. (Vaheberi 10:5-7) Jesu waishanda inga muvezi asi wari wazokwana mukuvo wo kuti atange no mushando wake waakagajwa ndi Baba vake vokudenga vomutumira pasi pano. Munorangarira kuti Johani ari kuvetera ciro cipsa caizoitika pa kubhabhatija Jesu here?

Vonanyi zvakananga Johani basi: “Wiya wakandituma kobapatiza ngo kumwa wakandibvunja kuti: Wiya wo unozovona eciderukihwa ngo Mujimu unomata panyezuru pake, ndi yena anobapatiza ngo Mujimu Mucena.” (Johani 1:33) Ngo kudaro Johani waivetera kuti mujimu mucena uviye panyezuru po mundhu waaizobhabhatija. Ngo kudaro, Jesu paakabuda mu kumwa Johani aazivi kukahamara paakavona ‘mujimu wa Mwari wecibzuka inga njiva, womata panyezuru pa Jesu.’—Mateu 3:16.

Kunja kwa izvi, Jesu paainga ecibhabhatijwa, Johani wakavona ‘gore recizauka kovari.’ Izvi zvaida kurevenyi? Kangaije zvaida kureva kuti Jesu paainga ecibhabhatijwa, iyena wakarangarira upenyu hwake hwo kudenga inga mwana wo kumujimu wa Jehovha. Iyena anoceukijavo zvokadi yaakajijiswa ndi Mwari acito aviya pasi pano.

Kunja kwa izvi, Jesu paakabhabhatijwa, pakazika izwi ro kudenga reciti: “Nga uu mwana wangu anodikana, wiya anondidakajisa.” (Mateu 3:17) Izwi iri ngo raani? Asipi izwi ra Jesu ngo kuti iyena wainga ana Johani pondhopo. I izwi ra Mwari. Waro zvajeka kuti Jesu ndi Mwana wa Mwari, kuciripi kuti iyena ndi Mwari pacake.

Zvinodakajisa ngo zvo kuti Jesu ndi Mwana wo kunyama wa Mwari pasi pano inga zvainga zvakaita mundhu wo kutanga Adamu. Pakupera kudurujira rubhabhatijo hwa Jesu, Ruka mujiji wakatara kudari: “Ngari yakaamba Jesu kujijisa, wainga ano makore anokhwedera makumatatu, wainga mwana wa Josefa, kudari ngo murangariro wo vese. Josefa wainga mwana wa Heli . . . mwana wa Davidi, . . . mwana wa Abrahama, . . . mwana wa Noa, . . . mwana wa Adamu, Adamu wainga mwana wa Mwari.”—Luka 3:23-38.

Zvecivoneka kuti Adhamu wainga “mwana wa Mwari” kasike i mundhu, Jesu waingavo mwana wa Mwari. Asi paakabhabhatijwa, Jesu wakangwina mu ushamwari hupsa na Mwari. Iyena wakava Mwana wo kumujimu wa Mwari. Ngo kudaro Jesu wainga azokwana kuti ajijise zvokadi ya Mwari pomwe no kutatija gwanja ro ku upenyu ucikaperi. Jesu ari kutanga upenyu hwaanozopira inga mupiro kuti apokonyore vandhu vano zvishaishi.