Munobva Masoko Kuitira Co Kutarira zvo Musongano Upenyu no Mushando
NJIKU 4-10 JA MARÇO
UPFUMI HUNOBVA MU SOKO RA MWAR | VAROMA 12-14
“Zvinoda Kurevenyi Kukhombija Rudo hwo ciKristu”
(VaRoma 12:10) Disananyi ngo cenyu ngo rudo hwo ukama, mecitungamirirana kudisana.
it-1 60
Rudo
Rudo inga hama (Gr., phi·la·del·phiʹa, zvinoreva, “rudo kuna hama”) unodikana kuvepo pakati po zvihwa zvese zvo ungano yo ciKristu. (Rom 12:10; Heb 13:1; vonanyi 1 Ped 3:8.) Ngokudaro, ushamwari no vo paungano unodikana kuva wo phedo no phedo, wakavanga, zve waushoni inga wo mbhuri kamare. Pikija zvihwa zvo ungano zvaakukhombija rudo inga hama, zviri kuvangiswa kuzviita mu njira yakakurisisa.—1 Tes 4:9, 10
Gama ro ciGiriki rokuti phi·loʹstor·gos, ‘kuva no rudo,’ rinoshandiswa pakunangira mundhu ano ushamwari wo phedo no umweni inga anopona naye. Rimwe gama rinobatanijwa pa manangiro aya, sterʹgo, rinoshandiswa kazinji ricinangira rudo wo cibarihwe, inga vandhu vo pa mbhuri. Mupostori Pauro wakavangisa maKristu kuti asakurire vara rondhoro. (Rom 12:10) Pauro wakanangazve kuti mu njiku jokupejisira vandhu vaizova “vacina rudo no unyaxa” (Gr., aʹstor·goi) zve kuti vandhu ava vanofanera kufa.—2 Tim 3:3; Rom 1:31, 32.
(VaRoma 12:17-19) Mucadohwirijira ariwese ngo uxaixi hwake. Psanganyi kuitira bzauxoni vandhu vese. 18 Kudari bzikakwanisika, itanyi simba kuti mugarisike no vandhu vese. 19 Vokudihwa vangu: Mucatongana ngo cenyu. Veteranyi runya hwa Mwari, ngokuti bzakatahwa kuti: “Kuhwirijira uxaixi kuri kwangu. Ndini kamare muhwirijiri,” anonanga Tenji.
w09 15/10 8 ¶3
“Mugarisike no Vandhu Vese”
3 Verenganyi VaRoma 12:17. Pauro wakasanangura kuti atidikani kunyenya vaya vanotinyenya. Kushandisa zano iri kunobesera maningi-ningi ku vaya vanogara no mbhuri jiciripi zvapupu. MuKristu anodikana kutiza muejo wo kuda kuhwirijira paanoitihwa zvakashata no waakarovorana naye. Apana cakanaka cinoviya ngo ‘kuhwirijira cakashata ngo cakashata.’ Mukusiyana, kuita izvi kunonyanyisa mugariro.
w07 1/7 24-25 ¶12-13
“Mucadohwirijira Ariwese ngo Uxaixi Hwake”
12 Zano rinotevera ra Pauro ngo pamusoro po kugarisana no vatendi no vacikatendi rinoti: “Mucadohwirijira ariwese ngo uxaixi hwake.” Izvi zvinoitika basi kudari mundhu akaita zvaakananga, zvokuti: “Rambanyi uxaixi.” Kuitisa kudini mundhu waizonanga kuti anoramba ushaishi kana zvakashata, kudari ecihwirijira vamweni ngo zvakashata? Kuita izvo kwaizosiyana no kuva no rudo ‘ucikacengejeri.’ Pauro wakati: “Psanganyi kuitira bzauxoni vandhu vese.” (VaRoma 12:9, 17) Tingazviitisa kudini izvi?
13 Pauro paakatara karata yake ku vaKorinto, iyena wakananga ngo pamusoro po kuteverehwa kwaisongana no vapostori. Iyena wakati: “Ngokuti takaitwa vanyenywi ku nyika yo pasi, ku ngirozi no vandhu. . . . Tikatukwa, tinosimba. Tikateverehwa, tinovangirira. Tikarevehwa, tinoembejera.” (1 VaKorinto 4:9-13) Mu njira yakaezana, maKristu ocokwadi, nyamasi uno ari kuvoniwa ngo vandhu vo nyika yese. Vaya vakatitendeneja pa vanovona zviro zvaushoni zvatinoita pikija patinoteverehwa, vangada kupurukira masoko edu atinocumaera.—1 Pedru 2:12.
(VaRoma 12:20, 21) Ngo kusiana, mukorore wako akava no njara, mupei bzokuha, akava no nyota, mupei kumwa. Ngokuti, pakuita ibzo, unounganija masimbe akabwaka pa musoro pake. 21 Ucadonyiswa ngo uxaixi. Kaveta nyisai uxaixi ngo kuita bzauxoni.
w12 15/11 29 ¶13
Regererananyi Umwe Kuna Umweni
13 Nguva jimweni mungarangarira kuti mungakwanisa kubesera mundhu anonga amushaishira kuti azwisise maponero o ciKristu. Mupostori Pauro wakatara kuti: “Ngo kusiana, mukorore wako akava no njara, mupei bzokuha, akava no nyota, mupei kumwa. Ngokuti, pakuita ibzo, unounganija masimbe akabwaka pa musoro pake. Ucadonyiswa ngo uxaixi. Kaveta nyisai uxaixi ngo kuita bzauxoni.” (Rom 12:20, 21) Kudari mukava no unyasha pa munoitihwa zvakashata, munozokwanisa kubesera mundhu ano mugariro wakashata kuti ave mundhu wakanaka. Kudari mukakhombija kuzwisisa, kuzwira pena—mundhu anonga amushaishira, munozokwanisa kumubesera kujija cokwadi co Bhaibheri. Pacinenyi no zvaanoita, kunasa kumutaja kunomupa mukana kuti arangarire ngenyi muri kumuitira zvakanaka.—1 Ped 2:12; 3:16.
Kupsakisisa Upfumi hwo Kumujimu
(VaRoma 12:1) Hamadoni: Ndinomupota ngo unyaxa hwa Mwari, kuti mupire muviri yenyu inga muphaxo unopona, wakacena no unodakajira Mwari; nga uu muphaxo womwiha.
Tingakhetesa Kudini Mabungaijo Akanaka?
5 Ciro cese camunoita mu upenyu hwenyu, cinobatanijwa pa kunamata kwenyu Jehovha. Mu karata yake ku vaRoma, Pauro wakashandisa rimwe gama rakavanga kuitira kubesera vanamati doni vake vazwisise kusisira ko cokwadi ici. Iyena wakavabvunja kudari: ‘Kuti mupire muviri yenyu inga mupiro unopona, wakacena no unodakajira Mwari; basa rakacena no simba renyu ro kurangarira.’ (VaRoma 12:1, Shanduro yeNyika Itsva) Muviri wenyu unobatanija murangariro wenyu, mwoyo wenyu zve simba renyu ro muviri. Zvese izvi, munozvishandisa pakushandira Mwari. (Marco 12:30) Pauro wakanangira basa rondhoro ro mwiha-wese kuva mupiro. Gama iri rino ngwajo imwe yakafishika. Pasi po Mutemo wa Mosi, mupiro wakaremara, wainyenywa ndi Mwari. (VaLevi 22:18-20) Mukufanana, kudari mupiro wo kumujimu wo muKristu ukava wakasvipa ngo maitiro ari ese, iwona unozorambiwa ndi Mwari. Izvi zvingaitikisa kudini?
6 Pauro wakananga kudari kuno maKristu o ku Roma: “Mucadopira muviri wenyu ku uxaixi.” Iyena wakavabvunjazve kuti ‘vauraye maitiro o nyama.’ (VaRoma 6:12-14; 8:13) Acito atara karata iyi, iyena wakapa muezaniso munganani jo “maitiro o nyama” ondhowo. Ngo pamusoro po kuva kwedu vacizivi kukwana, iyena wakananga kudari: “Muromo yavo yakazara ngo uxori.” “Murenje yavo inogogomesesa, kuti ipopomese ngazi.” [‘Akuna kumuthya Mwari pamberi po majiso avo,’ Baiberi Mazwi Akacena aMwari]. (VaRoma 3:13-18) MuKristu angakhuvaza muviri wake kudari akashandisa “muviri” kana kuti mativi o muviri wake mukuita zviro izvi zvakashata. Inga muezaniso, nyamasi uno kudari muKristu, akavona ngo cabomo kana ngo cakwenye zviro zvakashatisisa zvakadari inga zvo umitu-mitu kana zvo ugevenga izvi zvaizova ‘kupira [majiso ake] ku uxaixi’ zve zvaizosvipisa muviri wake wese. Kunamata kwese kwaangaita kungava mupiro ucikazivi kucena zve akudavihwi ndi Mwari. (Deuteronòmio 15:21; 1 Pedru 1:14-16; 2 Pedru 3:11) Mbzakadi, tinoripa mutengo wakakura maningi ngo kukheta mabungaijo akashata.
(VaRoma 13:1) Umwe nga umwe ngaapurukire vatongi vo nyika. Ngokuti akuna utongi ucikabvi ka Mwari. Vatongi vese, bzakadi vakadihwa ndi Mwari.
w08 15/6 31 ¶4
Fundo Guru Ratinowana mu Bhuku ra VaRoma
13:1—Mu njira japi vatongi “vakadihwa ndi Mwari”? Vatongi “bzakadi vakadihwa ndi Mwari” ngokuti vanotonga ngo kutendehwa ndi Mwari, zve kuno zviitiko zvimweni zvakanangwa ndi Mwari ku utongi. Izvi zvinokhombijwa ngo zvakanangwa ngo Bhaibheri ngo pamusoro po vatongi vakawanda.
NJIKU 11-17 JA MARÇO
UPFUMI HUNOBVA MU SOKO RA MWARI | VAROMA 15-16
“Psakanyi Jehovha Kuitira Kucungirira no Kunyarajwa”
(VaRoma 15:4) Bzese bzakatahwa kare bzakatahwa kuti tijije, kuti tivetere, ngo ndava yo kuvangirira no runyarajo bzinobva mu Matahwa.
“Riranyi na Vaya Vanorira”
11 Zvakatahwa ngo pamusoro po kusuruvara kukuru kwakava na Jesu ngo kufa kwa Razaro, ndi rimwe basi ro mativi anotondhoja ari mu Soko ra Mwari. Izvi azvitikahamaji, ngokuti “Bzese bzakatahwa kare bzakatahwa kuti tijije, kuti tivetere, ngo ndava yo kuvangirira no runyarajo bzinobva mu Matahwa.” (Rom 15:4) Kudari makasuruvara, munowanavo kutondhojwa kunodakajisa kunowanika mu matahwa inga anotevera:
▪ “Tenji Mwari ari phedo no mwoyo yakakhuvazwa; anoponesa vese vakapera simba.”—Ndu 34:18, 19.
▪ “Apo kuthimwa-thimwa kunoengejeka kondiri, maembejero enyu anondidakajisa.”—Ndu 94:19.
▪ “Tenji wedu Jesu Kristu, na Mwari Baba wedu, wakatidisa no kutipa unyarajo hucikaperi no ruvetero hwauxoni ngo unyaxa, ngaamuse mwoyo yenyu; amuvangise.”—2 Tes 2:16, 17.
(VaRoma 15:5) Mwari wo kusengerera no wo kunyaraja ngaamupe simba ro kudisana ngocenyu, inga bzaakaita Kristu Jesu.
“Kuvangisira Ngakupeje Basa Rako”
5 Psakanyi Jehovha kuti amuvangise. Jehovha ndi “Mwari wo [kuvangisira, Shanduro yeNyika Itsva] no wo kunyaraja.” (Rom 15:5) Iyena anozwisisa haiwa basi zvineso zvatinosongana nazvo, asi anozwisisavo zvinoviiswa ngo mugariro wedu, mazwiro edu pikija zvinoviiswa ngo ndava yo marurihwe atakaita mu ndani ticito tabahwa. Ngo kudaro, ndiena anokwanisa kamare kutinasirira kuti tikwanise kuvangisira. Bhaibheri rinonanga kuti: “Anoita bzo vanoda vaya vanomuthya, anozwa kukhuwa kwavo, no kuvaponesa.” (Ndu 145:19) Waro, Mwari anozodavirisa kudini mukumbiro jedu kuitira kutivangisa kuti tivangisire?
(VaRoma 15:13) Mwari wo ruvetero ngaamuzaje ngo rudakaro hwese no kugarisika, kuti ruvetero hwenyu humwaxaixike, ngo simba ro Mujimu Mucena.
w14 15/6 14 ¶11
“Unozodisa Jehovha Mwari Wako”
11 Jehovha ‘anopa vetero inotizaja ngo mudakaro no runyararo.’ (Rom 15:13) Vetero iyi yatinopuwa ndi Mwari inotiita kuti ticungirire muejo wo rutendo. Vakazojwa vanoramba ‘vakagondeka mbhera kufa vanozopuwa junguja ro uhomi kudenga.’ (Ap 2:10) Vaya vano vetero yo kupona pasi pano vakava vakagondeka vanozoashira makomborero acingaperi mu paradhiso. (Ruka 23:43) Tinojizwa kudini ngo kuzwa izvi? Tinozwa mudakaro no runyararo, kubatanija no rudo kuna Jehovha Mupi wo ‘zvipo zvese zvakanaka no zvakakwana’ here?—Jak 1:17.
Kupsakisisa Upfumi hwo Kumujimu
(VaRoma 15:27) Vakarangarira bzakanaka bzokadi, ngokuti vano gava na ivona; ngokuti vonyikanja kudari no vanokovaniswa ndivona bzipo bzo mwiha, vanodikanavo kuvabesa ngo bzo pasi.
w89 1/12 24 ¶3
“Muejo Wokadi wo Rudo Hwedu”
Zvokadi kamare hama javo jo Majinja jaidikana kundundihwa kuita cinjo mu mugariro wavo wakashata. Kusiyapo izvo, vainga no “gava” no maKristu o ku Jerusarema. Asipi ku Jerusarema kwakacumaehwa masoko akanaka ku vo Majinja here? Pauro wakati: “Kudari maKristu o ciJudha akakovana upfumi hwavo wo kumujimu no vo Majinja, vo Majinja vano mutoro wakajeka wo kukovana zvinodikana zvavo zvokunyama.”—VaRoma 15:27, A Bíblia na Linguagem de Hoje.
(VaRoma 16:25) Kuna wiya ana simba ro kumuvangisa mu Vangeri rangu no mu mazwi a Jesu Kristu-ndibzona ruziviso hwo cixamaiso cainga cakavigwa mu kunyarara nyika icito ikaruhwa,
it-3 320 ¶2
Kuziva no Kunanga Zvokumbeji
Mesia kana Kristu, waizova Mbeu yakagondeswa waizoita kuti vandhu vese vakarurama no mbhuri jese jo pasi vakomborehwe. (Gal 3:8, 14) “Mbeu” yakatanga kunangwa pakupera kupandukira mu Edheni asi Abheri acito abahwa. (Gn 3:15) Izvo zvakaitika mu makore 4,000 cicito cakavoneswa “cixamaiso cainga cakavigwa” ngo kunasa kukhombijwa ko “mbeu” yo Umesia. Ngokudaro, ‘cakaramba cakanyarara ko nguva yakareba.’—Rom. 16:25-27; Ef 1:8-10; 3:4-11.
NJIKU 18-24 JA MARÇO
UPFUMI HUNOBVA MU SOKO RA MWARI | 1 VAKORINTO 1-3
“Muri Mundhu wo Kunyama Kana Mundhu wo Kumujimu?”
(1 VaKorinto 2:14) Mundhu anoteveja nyama aaxiri bzinobva ku mwiha wa Mwari. Mbzabiresi kwaari, aakwanisi kubzizwa, ngokuti bzinozika ngo hwiru hwo mujimu basi.
Kuva Mundhu wo Kumujimu Zvinoda Kurevenyi?
4 Ngoapi marangaririre o mundhu wokunyama? Mundhu wokunyama anotora murangariro wo ku nyika, uwo unobatanija zvido zvo umbau. Pauro wakasanangura murangariro uwu inga “mujimu unofambisa vana vanotama kupurukira.” (Ef 2:2) Murangariro uwu unopsasa vandhu vazinji kuti vatevejere—vaya vakavatendeneja. Ivona vanoita basi zviya zvavanovona kuva zvakanaka kwavari, vacina basa no ndhungamiro ja Mwari. Mundhu wokunyama, kana ano murangariro wo kunyama, anorangarira kazinji ngo pamusoro po zviro zvokunyama zve kazinji anovona kuti cigaro cake, mare, kana zvinodiwa zvake zvinosisira maningi kupinda ciro cimweni haco.
5 Mundhu wokunyama kazinji anoita zviya zvinodanijwa ngo Bhaibheri kuva “mabasa o nyama.” (Gal 5:19-21) Mu karata ya Pauro kuno maKristu o ku Korinto, wakananga zviro zvimweni zvinoithwa ngo vandhu vo kunyama. Wakananga kuti vandhu vakadaro vanotora rutivi pa kutama kuzwana, vanoeja kuparajanisa vandhu, vanovangisa vamweni kuti vapandukire, vanoendesa vamweni ku banje, avareremeji vanotungamirira zve vanoita kuti kuha no kumwa kuve kunosisira maningi mu upenyu hwavo. Mundhu wo kunyama aacungiriri paanoejwa kuita cakashata. (Mazwi 7:21, 22) Judha wakananga kuti mundhu wo kunyama waizotoruza mujimu wa Jehovha.—Juda 18, 19.
(1 VaKorinto 2:15, 16) Kaveta mundhu ano mujimu anovona bzese, aatongwi ngo ariwese. 16 Mbzakadi: Ndiani anoziva murangariro wa Mwari, kuti akwanise kumujijisa? Waro, itisu tino murangariro wa Kristu.
Kuva Mundhu wo Kumujimu Zvinoda Kurevenyi?
6 Mukusiana no mundhu wokunyama, mundhu wo kumujimu anonasa kurangarira ngo pamusoro po ushamwari hwake na Mwari. Iyena pacake anotendera kutungamirihwa ngo mujimu mucena wa Mwari no kuvangisira kuti atevejere Jehovha. (Ef 5:1) Iyena anovangisira kuti ajije marangarire anoita Jehovha no kuvona zviro mu mavonero a Jehovha. Mwari ariyodi kamare kwaari. Mukusiana no mundhu wokunyama, mundhu wo kumujimu anoreremeja ndhungamiro ja Jehovha mu mativi ese o upenyu hwake. (Ndu 119:33; 143:10) Iyena aaiti “mabasa o nyama” asi anoeja kusakurira “mucero wo mujimu, [Shanduro yeNyika Itsva].” (Gal. 5:22, 23) Kuti tisanangure ngo pamusoro po revo yo kuva no murangariro wo kumujimu, rangariranyi ngo kuezanisira uku basi: Mundhu anokwanisa ushoni kuita nyagoso anonangwa kuti anoziva nyagoso, zve mundhu anoreremeja kunamata kwake Mwari anonangwa kuti ano murangariro wo kumujimu.
Kuva Mundhu wo Kumujimu Zvinoda Kurevenyi?
15 Tingatevejeresa kudini Kristu? 1 VaKorinto 2:16, inosanangura kuti tinodikana kuva no “murangariro wa Kristu.” VaRoma 15:5, Shanduro yeNyika Itsva, inoticeukija kuti tive no ‘murangariro wakaezana no wainga na Jesu Kristu.’ Kuti tive inga ndi Kristu, tinodikana kujija ngo manera aairangarira, aizwa no aiita zviro. Jesu wakaneseka maningi ngo pamusoro po ushamwari hwake na Mwari kusiapo ngo ciro cimweni. Ngokudaro, kuva inga ndi Jesu zvinotiita kuti tive inga ndi Jehovha. Ngo iyo ndava zvinosisira maningi kujija kurangarira inga zvakaita Jesu.
Kupsakisisa Upfumi hwo Kumujimu
(1 VaKorinto 1:20) Ngo wapi muzivi? Ngo wapi mujijisi? “Ngo rapi gorokoto ro nyika yo pasi ino? Mwari aazivi kupengesa uzivi hwo nyika yo pasi ino, kani?
it-3 480 ¶1
Uzivi
Ngokudaro, nyika mu uzivi wayo yakaramba nasiriro ya Mwari ngo pamusoro pa Kristu; vatongi vayo, pikija vainga vakuru vo nyika, asi vainga ‘vakakohomera Mambo o goja.’ (1 Kor 1:18; 2:7, 8) Asi Mwari, wakavona kuti uzivi wo vazivi vo nyika wainga wo biresi, ecinyoweja vazivi ngo kushandisa zva vaivona kuti: “upenji hwa Mwari,” kubatanija no vandhu vo vaivona kuti vainga ‘mapenji, vakaremba, vacikashandi’ kuti vakwanirise cidisiso Cake. (1 ko 1:19-28) Pauro wakaeujira maKristu o ku Korinto kuti: “uzivi hwo pasi pano, [no] hwo majimambo o pasi pano” waizoparajwa; ngokudaro, uzivi uu aucaita divi ro masoko o umwari o vapostori. (1 ko 2:6, 13) Iyena wakaeujira maKristu o ku Korosi kuti atame kucengejwa “ngo majijisiro abiresi [phi·lo·so·phiʹas, kunangira rudo kuno uzivi] no okucengeja, o hwiru, anoteveja maponero o vandhu.”—Kol 2:8; ezanisanyi no mavhesi 20-23.
(1 VaKorinto 2:3-5) Ndakamugumira inga mundhu wakaremba no anothya, wakazara ngo kutetemera. 4 Mazwi angu, nokuti utokotesi hwangu, abzicaingepi kuvereketesa kwo kuda kukonesa vandhu. Bzainga bzitatijo bzo mwiha no simba ra Mwari, 5 kuti kutenda kwenyu kutame kucijikira ngo uzivi hwo vandhu, kaveta kucijikire ngo simba ra Mwari.
w08 15/7 27 ¶6
Fundo Guru Ratinowana mu Bhuku ra VaKorinto
2:3-5. Paaicumaera ku Korinto, ku cine ro uzivi no jijo ya biresi yo ciGiriki, Pauro kangaije waineseka kuti waizokwanisa kukhohwesa vapurutani vake. Asi iyena aazivi kutendera kuti kutama simba kwake no kuthya kumuphingaije pa mushando wake waainga wakapuwa ndi Mwari. Mu njira yakaezana, atidikani kutendera kuti maponero aticikazivi kurovejana nawo atiphingaije kucumaera masoko akanaka o Umambo hwa Mwari. Inga zvakaitwa ndi Pauro tingakwanisa kupsaka besero ra Jehovha.
NJIKU 25-31 JA MARÇO
UPFUMI HUNOBVA MU SOKO RA MWARI | 1 VAKORINTO 4-6
“Mbijo Padoko Inokukumusa Upfu Hwese”
(1 VaKorinto 5:1, 2) Bziri kurevehwa, vese vanovereketa ngo ndava yo upombo hunoitwa pakati penyu; upombo hwokuti, no vonyikanjavo avahuiti: Aripo anovatana no mukaji wa baba wake. 2 Imwimwivo mobzimba ngo theka, mucikacamwisisi kani, kuti muiti wabzo abviswe komuri?
(1 VaKorinto 5:5-8) mundhu uwo ngaapuwe ka Sathana, atambujwe muviri, mwiha wozokwanisa kuponeswa pa njiku ya Tenji. 6 Mucajikuja! Amubzizivi kuti mbijo padoko inokukumusa upfu hwese, kani? 7 Regeranyi mbijo yo kare, muve upfu hupsa, ngokuti muri mukate mucina mbijo. Ngokuti Kristu, bvuta redu ro Paskwa, wakapihwa 8 Ngokudaro, ngatitambe rudakaro, asi ngo mbijo yo kare, nokuti ngo mbijo yo uxaixi no yo uxori, kaveta ngo mukate ucina mbijo mu uceni no bzokadi.
(1 VaKorinto 5:13) Vonyikanja vanozotongwa ndi Mwari. Muxaisi [mushaishi] uwo mubvisenyi pakati penyu.
it-2 116
Mbijo
Mupostori Pauro wakashandisa kuezanisira kwakaezana paakabvunja ungano yo ciKristu ku Korinto kuti ibvise mwanarume wainga no mugariro wakashata, ecinanga kuti: “Amubzizivi kuti mbijo padoko inokukumusa upfu hwese, kani? Regeranyi mbijo yo kare, muve upfu hupsa, ngokuti muri mukate mucina mbijo. Ngokuti Kristu, bvuta redu ro Paskwa, wakapihwa.” Iyena wakakhombija pambhene zvaaida kunanga ngo “mbijo”: “Ngokudaro, ngatitambe rudakaro, asi ngo mbijo yo kare, nokuti ngo mbijo yo uxaixi no yo uxori, kaveta ngo mukate ucina mbijo mu uceni no bzokadi.” (1 Kor 5:6-8) Pauro wakashandisa revo yo Dhiri ro Mukate Ucina Mbijo yo ciJudha, vaiteveja kamare mabuso o Paskwa. Kudari inga mbijo padoko inokukumusa upfu hwese, ngokudaro ungano yaizova yakasvipa pamberi pa Jehovha kudari noyakatama kubvisa mwanarume wainga no mufambiro wakashata. Ivona vaidikana kuita ciito kuti vabvise “mbijo” pakati pavo, kudari inga vaIziraeri avacaidikana kugara no mbijo pamuzi pavo peciitwa dhiri.
it-3 545
Sathana
Zvinoda kurevenyi ‘kupekeja mundhu ka Sathana kuti atambujwe muviri’?
Pauro wakatarira ungano yo ku Korinto ecivajijisa kuti vangaitenyi no mwanarume wainga akaita cishaishi no mukaji wa baba wake, iyena wakati: “mundhu uwo ngaapuwe ka Sathana, atambujwe muviri.” (1 Kor 5:5) Wainga mutemo wo kubvisa mwanarume uu mu ungano no kutama kushamwarijana naye. (1 Kor 5:13) Kumupekeja ka Sathana kwaizomuitisa kuti ave kunja ko ungano no kunyika yokuti Sathana ndiyena mwari no mutongi. Mwanarume uu wakatojana no “mbijo padoko” pa “upfu hwese,” wainga “muviri,” kana mundhu wo kunyama mu ungano; zve ngo kubvisa mwanarume uu wakashata mu ungano ino murangariro wo kumujimu kwaizoparaja “muviri” pakati payo. (1 Kor 5:6, 7) Mu njira yakaezana, Pauro wakapa ka Sathana Himeneu na Arishandre, ngo kuti ivona vainga vasia rutendo no hana yakanaka zve rutendo wavo wainga wakapera.—1 Tim 1:20.
(1 VaKorinto 5:9-11) Ndakamutarira kare, kuti mucatenderana no vapombori. 10 Andicainangepi vapombori vese vo nyika ino, nokuti vanyimi, mbava no varombereri vabiresi, ngokuti maizobuda kamare ku nyika yo pasi. 11 Bzo ndakamutarira mbzakuti mureerane na vaya vanodanwa hama, vova vapombori, vanyimi, varombereri vobiresi, vocirevo, varejeri, mbava: mucaha na ivona na kamwe.
Idanyi Vaya Vanodiwa ndi Mwari
Panguva jimweni, tinokumbihwa kuti tigure ushamwari no vaya vainga vari umwe wo ungano. Izvi zvinoitika kudari umwe mundhu akaphwanya mutemo wa Mwari otama kukhauya wojingwa, kana kuti umwe akaramba gonda ngo kujijisa zvokunyepa kana akajijinga ega mu ungano. Soko ra Mwari rinotibvunja kuti tinodikana ‘kureerana’ [kana kutama kushamwarijana] no vandhu avo waro. (Verenganyi 1 VaKorinto 5:11-13; 2 Johani 9-11) Zvingava zvinonesa kusia mundhu wo kuti kangaije wainga shamwari yedu kana kuti wainga ukama hwedu. Kunanga kuti, tinozoramba takavanga pakudira pakutanga kutendeseka kwedu kuna Jehovha no mutemo jake jakarungama here? Ceukijanyi kuti Jehovha anoreremeja maningi kutendeseka no kuzwira.
Kupsakisisa Upfumi hwo Kumujimu
(1 VaKorinto 4:9, Shanduro yeNyika Itsva) Ngokuti ndinovona kuti Mwari wakatidira itisu vapostori mu ndau yokupejisira, inga vandhu vakatongehwa kufa, ngokuti takaitwa ciro cinoshamaisa co pa ndau yo mabuso ku nyika no ngirozi no ku vandhu.
w09 15/5 24 ¶16
Ngirozi—“Mujimu yo Basa Rinoitihwa Vandhu Vese”
16 MaKristu anonga eciejwa anova ‘ciro cinoshamaisa co pa ndau yo mabuso kuno ngirozi.’ (1 Kor 4:9) Ngo mudakaro wese, ngirozi jinovona zviito zvedu zvokutendeseka zve jinodakara apo mushaishi paanokhauya. (Ruka 15:10) Ngirozi jinovona mufambiro wakanaka wo vanakaji vo ciKristu. Bhaibheri rinokhombija kuti: ‘mwanakaji anodikana kusimira mu musoro, citatijo co kupurukira; ngo ndava yo ngirozi.’ (1 Kor 11:3, 10) Hina, ngirozi jinodakara pajinovona vanakaji vo ciKristu no vashandiri vamweni va Mwari vecitenderana no zvinonangwa ngo sangano zve vecizvidira pasi po vanonga vari pamusoro po urongwa wa Mwari. Kuzwira uku, ciceukijo kuitira vana vo kudenga va Mwari.
(1 VaKorinto 6:3) Amubzizivi kuti tinozotonga ngirozi, kani? Bzikuru-kuru bziro bzo pasi!
it-2 674
Mutemo
Mutemo kuno Ngirozi. Ngirozi jakakwirira kupinda vandhu, jiri pasi po mutemo no mupango wa Mwari. (Heb 1:7, 14; Ndu 104:4) Jehovha wakapa mupango muvengi wake Sathana no kumurambija. (Job 1:12; 2:6) Migeri arkanjo wakaziva no kureremeja Jehovha inga Mutongi Mukuru apo paakananga ecihwisana na Dhiabho kuti: “Tenji ngaakukamise!” (Juda 9; ezanisanyi na Zak 3:2.) Wokukujwa Jesu Kristu ano ngirozi jese jakadihwa pasi po simba rake ndi Jehovha Mwari. (Heb 1:6; 1 Ped 3:22; Mt 13:41; 25:31; Fil 2:9-11) Ngokudaro, ngo mupango wa Jesu, kwakatumwa ngirozi kuna Johani. (Ap 1:1) Pa 1 VaKorinto 6:3 mupostori Pauro wakabhuya ngo hama jo kumujimu ja Kristu inga jakagajwa kutonga ngirozi, ngokuti ivona vanozotora rutivi pakutongwa ko mujimu jakashata.
© 2018 Watch Tower Bible and Tract Society of Pennsylvania