Jehovha ndi Mwari wo Rudo
“Mwari, rudo.”—1 JO. 4:8, 16.
NDUMBO: 18, 91
MUNGADAVIRA HERE?
Rudo hwa Mwari unopsasa kudini kumbeji ko vaya vano mwoyo wakarungama zve vanozwira?
Jehovha wakakhombijisa kudini rudo kuno vashaishi?
Zvicinyi zviri kuitwa ngo Umambo hwa Mesia zvinomukhohwesa kuti iyi inasiriro ya Mwari yo rudo kuitira vandhu vese?
1. Ngo wapi mugariro wa Mwari unopinda jese, zve kuziva zvondhozvo kunomuita kuti muzwe kudini ngo pamusoro pake?
BHAIBHERI, Soko ra Jehovha rakafemehwa, rinotibvunja kudari: “Mwari, rudo.” Irona arinangi basi kuti rudo ndi umwe wo mugariro ja Mwari jinoshamaisa asi “Mwari, rudo.” (1 Jo. 4:8) Rudo i mugariro wake unopinda jese, uwo unosisira maningi. Jehovha aana rudo basi—iyena ndi muezaniso wakaperera wo rudo. Mudakaro wakadini watinawo ngo kuziva kuti Musiki wo pasi no mudenga no wo zviro zvese zvinorarama ndi Mwari wo rudo! Zvese zvaanoita zvinotungamirihwa ngo rudo.
2. Ngo zvapi zvatinogondiswa ngo rudo hwa Mwari? (Vonanyi pikica yokutanga.)
2 Rudo hwakavanga zve hwo kunaka mwoyo huna Mwari kuno zvisikwa zvake, hunotigondisa kuti zvidisiso zvake zvese kuitira mbhuri yo vandhu zvinozokwanirisika ngo maitiro akanaka zve zvicazoviisa mabesero kuno vese vanozova pasi po utongi hwake. Inga muezaniso, ngo ndava yo rudo hwaanahwo, Jehovha “wakasana njiku yo kuzotonga nyika yo pasi ngo urungami hwake, ngo mundhu wakasanwa ndiyena,” Jesu Kristu. (Mait. 17:31) Itusu tingathemba kuti izvi zvicaitika. Kuno vakanaka mwoyoma no vanozwira, kutonga zvakanaka, kucazoita kuti kumbeji kuve no makomborero okadi zve no acikaperi.
I NDHOROVONDHO YAPI YAKATATIJWA?
3. Munorangarira kuti upenyu waizova wakadini kudari Mwari acizivi kuda vandhu?
3 Rangariranyi kuti upenyu waizova wakadini kudari Mwari acizivi kuva no rudo kuno vandhu vese. Itusu tinodikana kusotesesa basi ngo pamusoro po ndhorovondho inosuruvarisa yo nyika no utongi wo vandhu, pakutonga ka mwari ano ushungu zve acina rudo, Sathana Dhiabho. (2 Kor. 4:4; 1 Jo. 5:19; verenganyi Apokalipsi 12:9, 12.) Izvi zvinotikhombija kuti kushata kwakadini kwaizowanika kumbeji, kudari dendenejwa ro nyika raizoshanda, pacina kutungamirihwa ngo rudo hwa Mwari.
4. Ngenyi Jehovha wakasiya kuti utongi hwake hwakarungama upandukihwe?
4 Paakapandukira utongi hwa Jehovha, Dhiabhu wakandundiravo varovorani vo kutanga kuti vaite zvondhozvo. Iyena wakaphikiza citendehwa no kurungama ka Mwari inga Mukuru wo mugore no pasi. Ngo kudaro, Sathana vakananga kuti matongero ake aizova akanaka kupinda o Musiki. (Gn. 3:1-5) Pikija Jehovha wakasia kuti Sathana aeje kuvonesa divi rake pa shwiro iyi, kusiya kondhoko kwainga ko nguva shomani. Ngo ndava yo uzivi hwake hukuru, Jehovha wakapa nguva inokwana kuti zvinase kuvoneka pambhene kuti matongero ake ngo akanaka kupinda amweni ese. Magariro anosuruvarisa o vandhu, anokhombija kuti nee vandhu nee Sathana avakwanisi kutipa utongi hwakanaka unotiviisira zvatinoda.
5. Ndhorovondho yo vandhu iri kuvonesenyi kamare?
5 Mukati mo 100 ro makore basi akapera, vandhu vanodarika 100 ro zviuru vakaurawa ngo hondo jo majinja. Nyamasi uno, magariro o nyika ari kundoramba ecinyanya kushata. Izvi ngaizvona kamare zvainga zvakanangwa ngo Soko ra Mwari kuti zvaizoitika mu “njiku jokupejisira,” jo mugariro uno wo zviro apo “vakaxata no vanyepi vanozoenda mberi no uxaixi.” (2 Tim. 3:1, 13) Ndhorovondho yo vandhu iri kutisiya ticikakani-kani kugondeka ko masoko aya o mu Bhaibheri o kuti: “Ndinoziva [Jehovha], kuti mundhu asipi mune wo gwanja rake; kuti ecifamba aakwanisi kusana gwanja raanoda!” (Jr. 10:23) Hina, Jehovha aazivi kusika vandhu kuti vakwanise kana vave no citendehwa co kuita zviro zvavo vacina besero rake.
6. Kusia ka Mwari kuti ushati uvepo ko nguva yakati kuti kuno cinangwa cenyi?
6 Kusiya kwake Mwari kuti ushati urambe uripo ko cimukuvo, akushandi basi pa kuda kuvonesa kuti utongi hwo vandhu ahubeseri, asi kunoshandavo kuitira cidisiso ca Mwari co kumbeji. Ikona kunotipa ucapupu wo kwenda-no-kwenda unovonesa kuti matongero a Mwari ndiwona basi anokwanisa kubudirira. Pasure pa Jehovha kupeja ushati zve oparaja vayani vanouiita. Kudari pakabudirira ari wese anodazve kuphikiza matongero a Jehovha o rudo, akuzovizve no dikano yo Mwari aasiye kuphikiza uko kuvepo. Mwari anozokwanisa kushandisa zvakaitikira vandhu, inga thangwe kuti akasike kubvisa vapandukivo ngo kukasika, kuitira kuti ushati utamezve kumera muji ngo papsa.
JEHOVHA WAKAKHOMBIJA RUDO HWAKE
7, 8. Ngo api makwanja amweni mazinji Jehovha aanovonesa ndiwona rudo hwake?
7 Rudo hukuru hwa Jehovha unovoneka ngo maitiro akasiyana-siyana. Inga muezaniso, vonanyi mashamaisire o mu denga no pasi. Mudenga muno magalásia (zviuru zvo zvikwata zvo ndhondho no maparaneta), rimwe nga rimwe rawo rino mabhirioni mazinji o ndhondho no maparaneta. Mu cikwata co ndhondho no maparaneta cinodanijwa Via-Láctea cinowanika nyika yatiri kuraramari, ndimona munowanika imwe yo ndhondho inozwi zuva; kudari aticainga no zuva, mushovo wo upenyu pasi pano, azvicaizowanikepo. Zvisikwa zvese izvi, zvinovonesa kuti Jehovha ndi Mwari zve iyena ano mugariro jakadari inga, simba, uzivi zve rudo. Hina, mugariro ja Mwari, ‘izvo zvaari zvicikavoneki, riri simba rake risikagumi no kuva kwake Mwari, zvinonasa kuvoneka kubvira pakasikwa nyika, ngo kuti zvinozwisiswa, panovonekwa zviro zvakaizwa, zvokuti, avana co kuzvipembeja naco.’—Rom. 1:20, Shanduro yeNyika Itsva.
8 Pasi pano, Jehovha wakasika zviro zvese kuitira kubesera zvisikwa zvake zvakasikihwa kuti zvirarame pasi pano. Kuno vandhu, iyena wakasika munda wainga paradhiso kuitira vandhu wovapekeja murangariro pomwe no muviri jakakwana jaikwanisa kuraramemo kwenda no kwenda. (Verenganyi Apokalipsi 4:11) Kusiapo izvo, “ena anopa bzokuha bziro bzese bzaakasika, ngokuti rudo hwake ahuzoperi.”—Ndu. 136:25.
9. Kusiyapo rudo, nguva jimweni Jehovha anokhombijenyi, zve ngenyi?
9 Jehovha paaijikhombija pacake kuva Mwari wo rudo, iyena wakakhombijavo kuzonda zviro zvakashata. Inga muezaniso, pana Nduyo 5:4-6, panoti: “Amuripi Mwari anodakajwa ngo bzakaxata . . . Munonyenya vaiti vese vo bzakaxata.” Ipona panoengejera peciti: “Mundhu anopopomeja ngazi no mucengeji [Jehovha] Mwari anomurasa [kana kumuzonda].”
SAMBI-SAMBI USHATI UCAPERA
10, 11. (a) Jehovha anozoitenyi kuno vandhu vakashata? (b) Jehovha anozopfupisa kudini vandhu vakanaka mwoyo?
10 Zvecivoneka kuti Jehovha ndi Mwari wo rudo zve anozonda zvakashata, iyena ano cidisiso co kupeja ushati pasi pano pomwe no mudenderejwa rese ro nyika, apo shwiro yo kuphikizwa ko utongi hwake painonga yatongwa ngo maitiro anomukwanira. Soko ra Mwari rinogondisa kudari: “Vaxati vanozobvitwa, vanogonda Jehovha Mwari vanozoita veno vo nyika. Garirai padoko: akuzovibze no muxati; unozopsaka paaigara, auzomuwanibze . . . Vavengi va [Jehovha] Mwari vanozofota inga maruva o mu bani, vanozopfukuta inga usi.”—Ndu. 37:9, 10, 20.
11 Ngo divi rimweni, Soko ra Mwari rinogondisazwe kudari: “Varurami vanazoita veno vo nyika, vanozogaremo mbhera narini.” (Ndu. 37:29) Varurami vondhovo “vanozodakara ngo kunyarara kwakaperera.” (Ndu. 37:11) Izvi zvinokwanirisika ngo kuti Mwari wedu wo rudo nguva jese anoita zviana zvinoita kuti vashandiri vake vakagondeka vagare ushoni. Bhaibheri rinotibvunja kudari: “Anozopukusa misoji yo mu meso mavo. Akucazovi no kufa nokuti mariji, kurira nokuti kuhwaja. Ngokuti bzokare bzakapinda.” (Ap. 21:4) Kumbeji kwakadini kunoshamaisa kunovetehwa ngo vese vaya vanoreremeja kamare rudo hwa Jehovha zve vanomuzwira inga Mutongi wedu!
12. Ndiani angavoniwa kuva ‘mundhu wakaperera [kana acina ndava]’?
12 Soko ra Jehovha rinotibvunja kudari: “Ringisisa mundhu wakaperera [kana acina ndava], sotesesai mundhu wakarungama: ngo kuti kumagumisiro kwo mundhu uwo waro kuno kunyarara. Asi vapauki vanozourawa pamwepo: Kupejisira ko vakashata kuri kuurawa.” (Ndu. 37:37, 38, Baiberi Mazwi Akacena aMwari) “Mundhu wakaperera [kana acina ndava]” anoguma pa kuziva Jehovha no Mwana wake, zve no kuzwira kwese anoita kuda ka Mwari. (Verenganyi Johani 17:3.) Mundu wondhowo anobatisisa ngo mwoyo wese zviri pana 1 Johani 2:17, apo panoti: “Nyika yo pasi no madisiro ayo bzinopera. Kaveta ndiyani anoita kuda ka Mwari, anogara acingaperi.”—Ndu. 37:34.
CIITO CUKURU CA MWARI CO RUDO
13. Ciito capi cikuru co rudo cakaita Jehovha kuitira kubesera vashaishi?
13 Pikija tiri vandhu vacikazivi kukwana, itusu tingakwanisa ‘kutevera gwanja ra Jehovha.’ Itusu tingakwanisavo pacedu kamare kuva no ushamwari hwo phedo naye ngo ndava yo ciito cake cikuru co rudo. Iyena wakatipa muripo wo kujipira wa Jesu Kristu, wofunungura gwanja kuti vandhu vanozwira vasujunuhwe ku cishaishi no ku rufu wakagahwa utaka kubva ka Adhamu. (Verenganyi VaRoma 5:12; 6:23.) Jehovha waithemba zvakaperera kuna Mwana wake umwe ega, uwo wainga akavonesa kugondeka kwaari ko mukuvo ucikaverengeki, paainga ari mugore. Atikani-kani kuti, ngo kuva kwake Baba vano rudo, Mwari wakahwajihwa maningi ngo ndava yoo zviro zvicikazivi kurungama zvakatihwa, Jesu paainga ari pasi pano. Asi, Jesu no kugondeka kwese wakabvikira ukuru-kuru hwa Mwari zve wakavonesa kuti mundhu wakakwana anokwanisa kuramba akagondeka kuna Jehovha pasi pikija pa muejo jakakura.
14, 15. Rufu hwa Jesu hwakakwanirisenyi?
14 Zvokadi kamare Jesu wakaramba akagondeka, zve wakabviikira ukuru-kuru hwa Jehovha, wofa inga mushandiri wakagondeka wa Baba wake. Kubonga kwakadini kwatinodikana kuva nako, ngo kuziva kuti, ngo rufu hwake Jesu wakaripavo mutengo waidiwa kamare kuitira kuripira vandhu vese, zve wakafunungura gwanja kuitira upenyu mu nyika imbza ya Mwari! Mupostori Pauro wakakhombija kuti i rudo hwakadini wakakhombijwa ndi Jehovha na Jesu, paakananga kudari: “Potainga ticina simba, Kristu wakafira vaxaixi, pa nguva inodikana. Mbzakadi, bzinonesa kuwanika ndiani anofira mururami; angawanika ndiani anofira mundhu wakarurama. Kaveta Mwari anotatija rudo hwaanahwo na itisu ngokuti, mukuvo wo tainga vaxaixi, Kristu wakatifira.” (Rom. 5:6-8) Mupostori Johani wakatara kudari: “Rudo hwa Mwari hwakavoneswa kudaro kotiri: Mwari wakatumira nyika yo pasi Mwana wake umwe ega, kuti tirarame ndi yena. Rudo nga uhu: Asipi itisu takada Mwari. Kaveta yena wakatida wotitumira Mwana wake, kuti bzifujuhwe bzixaixi bzedu.”—1 Jo. 4:9, 10.
15 Ngo pamusoro po rudo hwa Mwari kuno vandhu vese, Jesu wakati: “Mwari wakadisa nyika yo pasi [vandhu vanotenda kusujunuhwa], kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.” (Jo. 3:16) Rudo hwa Mwari kuno vandhu wakakura zvo kuti iyena aazivi kuramba kupa zvakanaka zvake, azvinenyi kuti zvakamunesa zvakadini. Rudo hwake ngo wo kwenda no kwenda. Itusu tinozoramba tecindouvona basi. Mupostori Pauro wakatara kudari: “Hina. Inini ndinobziziva bzakadi kuti rufu nokuti kupona, ngirozi nokuti majimambo, bza nyamasi nokuti bza mangwana, masimba, urebu nokuti kujika, nokuti bzisikwa bziribzese abzikwanisi kutiparajanisa ku rudo hwa Mwari, mwa Kristu Jesu Tenji wedu.”—Rom. 8:38, 39.
UMAMBO HURI KUTONGA WARI
16. Icinyi Umambo hwo Umesiya, zve Jehovha wakapa ani kuti atonge Umambo wondhowo?
16 Rudo hwa Mwari kuno vandhu vese, unovoneka pa nasiriro yaakaita kuitira Umambo wo Umesiya. Jehovha wakadira umambo uhu mu nyara jo Mwana wake, uwo ano rudo no vandhu vese zve anokwaniriswa kamare kuti atonge. (Mazwi 8:31) Pa kumuswa kwavo, vaya vanozotora utaka pamwepo na Jesu, avo vanokwana kuita 144.000, vanonga vano zivo yavo ngo pamusoro po upenyu hwo vandhu. (Ap. 14:1) Umambo wainga musoro mukuru wo jijiso ja Jesu, zve iyena wakajijisa vajiji vake kuti vaite mukumbiro veciti: “Baba wedu muri nyezuru, zina renyu ngarikojeswe, Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mt. 6:9, 10) Kukwanirisika ko mukumbiro ijo kunozoviisa makomborero mazinji kuno vandhu vanozwira!
17. Siyanisanyi matongero a Jesu no matongero o vandhu vari vashaishi.
17 Matongero a Jesu akasiyana zvakadini no matongero o vandhu, ao anoitisa kuti zviuru zvo vandhu zvife ngo hondo! Zvokadi, Jesu anotaja ushoni vatongwi vake zve anokhombija mugariro ja Mwari, maningi rudo. (Ap. 7:10, 16, 17) Jesu wakananga kudari: “Izanyi kondiri mwese makaremba, munoremehwa kukuru. Inini ndinozomuzoroja. Thwaranyi kanga yangu. Jijanyi ndini. Ngokuti ndini wakapfava no wokuthiva mwoyo, ngokudaro munozowana kuzorora mu mwiha menyu. Ngokuti kanga yangu yakapfava, muthwaro wangu wakareruka.” (Mt. 11:28-30) Cigondiso cakadini cinokhombija rudo!
18. (a) Umambo hwa Mwari uri kuitenyi kubvira powakagajwa? (b) Zvicinyi zvaticazovona pa musoro unotevera?
18 Ciphorofita co Bhaibheri cinokhombija kuti Umambo hwa Mwari hwo mugore wakagajwa Jesu paakatanga kuvepo mu gore ra1914. Kubvira pondhopo, kuri kuunganijwa vokusarira, avo vanozotonga pamwepo na Jesu mugore zvekuri kuunganijwavo “uzinji hukuru” wo vandhu avo vanozopokonyoka pa kuperako mugariro uno wo zviro, perepo vonghwiniswa mu nyika imbza. (Ap. 7:9, 13, 14) Mbungano huru iyi yawanda zvakadini wari? Zvicinyi zvinodiwa kuno vaya vanotora rutivi pa cikwata ici? Musoro unotevera unozopopora mubvunjo iji.
[Pikica pa pejhi 21]
Ngo rudo, Mwari wakajipira kuti atumire Mwana wake pasi pano (Vonanyi ndima 13)