Kunanga Kuti Maferiyadho Ese Anodakajisa Mwari?

Jehovha anoda kuti tive vandhu vakadakara no kuvavo no mukuvo wokumbozorora vecibungaija. Asi kureva kuti maferiyadho ese anodakajisa Mwari? Tingakhombijisa kudini kuti tinoda Jehovha pa shwiro iyi?

1. Ngenyi maferiyadho mazinji aadakajisi Jehovha?

Kangaije mungashamaisika ngo kuziva kuti, maferiyadho mazinji akacijikira pa jijiso jicikazwirani no zvinonanga Bhaibheri, kana kuti jakabatana no zviara zvomanyepo. Maferiyadho aya kangaije akacijikira pa zviro zvomujimu kana pa murangariro wokuti mwiha wo mundhu aufi. Maferiyadho amweni akavha pa shwiro yo kutenda maninji. (Isaia 65:11) Jehovha anovhunja vanamati vake kuti: “Budanyi pakati pavo . . . regeranyi kupsasa zviro zvicizivi kucena.”—2 Vakorinte 6:17.a

2. Jehovha anozwa kudini ngo pamusoro po maferiyadho anokuja vandhu?

Jehovha anotingwaja kuti titame kuwira pamurau wo ‘kugonda mundhudoni.’ (Verenganyi Jeremia 17:5.) Maferiyadho amweni akaithwa kuitira kukuja masoca no vatongi. Maferiyadho amweni ngo okuceukija nyika kana kuti njiku yavakatanga kutonga. (1 Johani 5:21) Amweni ngo okukuja zvomatongehwe o nyika kana masangano anojivirira zvitendehwa zvo vandhu. Imwimwi munorangarira kuti Jehovha anojizwa kudini patinoenda ku maferiyadho anokuja vandhu kana masangano anovangisa zviro zvicikazwirani no kuda kwake?

3. Ngo zvapi zvinoithwa pa maferiyadho amweni zvinoita kuti ticadakajisa Mwari?

Bhaibheri rinorambisa ‘kudhakwa, kuita mabuso akanyanyisa, [no] kumwa maningi doro.’ (1 Pedhru 4:3) Pa maferiyadho amweni vandhu vanoita zviro vacikajibati, no kuita zviro zvicizivi kucena. Kuti tive shamwari ja Jehovha, tinodikana kutiza mushovo uwu wo mufambiro ucizivi kucena.

NASANYI KUPSAKISISA

4. Mucaceukija maferiyadho acikadakajisi Jehovha

Verenganyi Vaefeso 5:10, perapo bhuisananyi ngo muvhunjo jinotevera:

• Ngo zvapi zvatinodikana kutanga tapsakisisa ticito tikaceukija maferiyadho?

• Ngoapi maferiyadho anonyanya kuzivika kwamunogararo?

• Munorangarira kuti maferiyadho ondhowo anodakajisa Jehovha?

Inga muezaniso, makambozvivhunjisa kuti Mwari anovona kudini ngo kuceukija njiku yo kubahwa? Bhaibheri arinangi naumwe hake mushandiri wa Jehovha wakaceukija njiku yake yo kubahwa. Vandhu vaviri vakaceukija njiku javo jo kubahwa vanonangwa mu Bhaibheri vainga vacikashandiri Jehovha. Verenganyi Genesi 40:20-22 na Mateu 14:6-10. Perapo bhuisananyi ngo muvhunjo jinotevera:

• Ngozvapi zvakaitika pa kuceukijwa uku ko njiku jokubahwa?

• Mukuzwirana no zviitiko zvataverenga mu Bhaibheri, munorangarira kuti Jehovha anojizwa kudini ngo kuceukija njiku yo kubahwa?

Asi imwimwi kangaije mungajivhunjisa kudari: ‘Kureva kuti kuna Jehovha zvino musiyano kuceukija njiku yangu yo kubahwa kana feriyadho imweni icikazwirani no zvinojijisa Bhaibheri?’ Verenganyi Exodo 32:1-8. Tevere, rijanyi VHIDHIYO no kubhuisana ngo muvhunjo jinotevera.

VHIDHIYO: Maferiyadho no Mabuso Acikadakajisi Mwari (5:07)

• Ngenyi tinodikana kuva no cokwadi co zviro zvinodakajisa Jehovha?

• Tingazviitisa kudini?

Tingazvizivisa kudini kuti feriyadho iyi aidakajisi Jehovha?

• Kureva kuti iyona yakacijikira pa jijiso jicikazwirani no zvinonanga Bhaibheri? Psakisisanyi ngo kwakavharo feriyadho yondhoyo.

• Kureva kuti iyona inokuja vandhu, masangano no nyika? Panyezuru po zvese, itusu tinokuja Jehovha no kuthemba kuti iyena anokwanisa kupeja zvineso zvese zviri munyika.

• Kureva kuti maferiyadho ondhowo anozwirana no zvinonanga Bhaibheri kuti zvakanaka here? Tinodikana kuenderera mberi tino mufambiro wakanaka.

5. Beseranyi vamweni kuti vareremeje zvamunotenda

VHIDHIYO: Ivanyi no Nderemejo pa Munosanangura Zvamunotenda (2:01)

Verenganyi Mateu 7:12, perapo bhuisananyi ngo muvhunjo jinotevera:

• Mukuzwirana no vhesi iyi, kureva kuti imwimwi maizoeja kuvangirija ukama hwenyu kuti usiye kuceukija maferiyadho?

• Mungakhombijisa kudini ku ukama hwenyu kuti pikija amucaceukiji feriyadho, izvi azvinangi kuti amucavareremeji no kuvada?

6. Jehovha anoda kuti tidakare

Jehovha anoda kuti tive no nguva yakanaka no ukama hwedu no shamwari. Verenganyi Mucumaeri 8:15, perapo bhuisananyi ngo muvhunjo unotevera:

• Vhesi iyi inokhombijisa kudini kuti Jehovha anoda kuti tidakare?

Jehovha anoda kuti vandhu vake vabungaije no kuva no mukuvo wakanaka vari pamwepo vese. Rijanyi VHIDHIYO kuitira kuvona kuti izvi zvinovoneka kudini pa magungano edu o nyika jese.

VHIDHIYO: Kuashira Varendo pa Magungano o Nyika Jese (5:40)

Verenganyi Vagaratiya 6:10, perapo bhuisananyi ngo muvhunjo jinotevera:

• Kureva kuti tinodikana kuwanika pa maferiyadho kuti tiitire zvakanaka vandhu vamweni?

• Ngo zvapi zvinomuita kuti mudakare: Kuvangirijwa kuti mupe cipo ngo ndava yo feriyadho kana kupa ngo kuda kwenyu?

• Zvapupu zvakawanda zvinoita zvimabuso no kupekeja zvipo vana vavo vacikaimiri njiku yakatemehwa. Kudari imwimwi muno vana, ngozvapi zviro zvinosisira zvamungavaitira?

ZVOTAJIJA

Jehovha anoda kuti tive no mukuvo wakanaka no ukama no shamwari jedu. Asi iyena aadi kuti ticeukije maferiyadho acikamudakajisi.

Kuhwirijira

• Muvhunjo japi jingatibesera kuziva kuti feriyadho iyi aidakajisi Jehovha?

• Tingabeseresa kudini ukama hwedu no shamwari kuziva kuti ngenyi itusu aticeukiji maferiyadho?

• Tinozvizivisa kudini kuti Jehovha anoda kuti tidakare no kubungaija?

ZIVANYI ZVIMWENI

Vonanyi maferiyadho amweni acikaithwi ngo Makristu.

“Ngenyi Zvapupu zva Jehovha Azviceukiji Njiku Jimweni jo Kuzorora?” (Mu interneti)

Vonanyi zviro zvirongomuna zvinokhombija kuti kuceukija njiku yo kubahwa akudakajisi Jehovha.

“Ngenyi Zvapupu zva Jehovha Azvireremeji Njiku Yokubahwa?” (Mu interneti)

Vonanyi manera mujaha anoda Jehovha angamudakajisa pa mukuvo wo feriyadho.

Iwewe Unosisira Kuna Jehovha (11:35)

Zviuru no zviuru zvo Makristu zvakakheta kutama kuceukija khisimuso. Imwimwi munovonavo kudini ngo zvavakaitari?

“Vakawana Chimwe Chinhu Chiri Nani Kupfuura Krisimasi” (Murindiri, No. 1 wa Dezembro wo 2012, Cishona)