CIJIJO 46
Ngenyi Munodikana Kujipira Kuna Jehovha no Kubhabhatijwa?
Cisungo cinosisira maningi mu upenyu catinodikana kuita, ngo co kujipira kuna Jehovha. Tinojipira kuna Jehovha ngo kuita mukumbiro, tecimuthembesa kuti tinozonamata iyena basi, nokuti kuda kwake kunozova pakutanga mu upenyu hwedu. (Nduyo 40:9) Tevere, tozobhabhatijwa. Patinobhabhatijwa tinotatija kuno vandhu kuti tazvipira kuna Jehovha. Cisungo ici co kujipira kuna Jehovha cinocinja upenyu wo mundhu. Zvicinyi zvinotora kuti mundhu ateme civaringo cakadari?
1. Zvicinyi zvinoita kuti mundhu ajipire kuna Jehovha?
Kujipira kwedu kuna Jehovha kunondundihwa ngo rudo. (1 Johani 4:10, 19) Bhaibheri rinoti: “Idai Jehovha Mwari wako ngo mwoyo wako wese, upenyu hwako hwese, murangariro wako wese no simba rako rese.” (Marko 12:30) Tinotatija kuti tinoda Mwari, haiwa basi ngo magama, asi ngo mabasa. Inga muezaniso, kudari varovorani vanodisanadi kamare, ivona vanosunga kucadha. Ngo manera amwewo, rudo watinahwo kuna Jehovha unotindundira kuti tijipire kwaari no kubhabhatijwa.
2. Ngoapi makomborero anogondesa Jehovha kuno vashandiri vake vakabhabhatijwa?
Pamunobhabhatijwa munova divi ro mbhuri yakadakara ya Jehovha. Munozovona rudo hwake mu njira jakasiyana-siyana, cimweni munokhwedera phedo na Mwari. (Verenganyi Malakia 3:16-18.) Kusiyapo kuva na Jehovha inga Baba, munozova no hama no hambzaji mu nyika yese, vanoda Jehovha pomwe na imwimwi. (Verenganyi Marko 10:29, 30.) Zvakajeka kuti mucito mabhabhatijwa, munodikana kuita mudanyu jiri jese. Munodikana kujijira ngo pamusoro pa Jehovha, kujijira kumuda no kuva no rutendo kuno mwanake Jesu. Pa kupejisira, munodikana kupira upenyu hwenyu kuna Jehovha. Mukaita izvi perapo mobhabhatijwa, munozova no mukana wokupona kwenda no kwenda. Soko ra Mwari rinoti: “Rubhabhatijo hunomuponesa nyamasi.”—1 Pedhru 3:21.
NASANYI KUPSAKISISA
Vonanyi kuti ngenyi zvinosisira kuti imwimwi mujipire kuna Jehovha no kubhabhatijwa.
3. Tese tinodikana kusana watinoda kushandira
Mu mukuvo wo Vaiziraeri, vamweni vairangarira kuti vanganamata Jehovha, ngo divi rimweni vecinamata cimwari cavo caidanwa Bhaari. Asi Jehovha wakatuma muporofita Eriya kuitira kuvavhunja kuti zvavainga veciita zvakashata. Verenganyi 1 Majimambo 18:21, perapo bhuisananyi ngo muvhunjo uwu:
Vaiziraeri vaidikana kutema civaringo capi?
Inga Vaiziraeri, itusu tinodikana kusana watingashandira. Verenganyi Ruka 16:13, perapo bhuisananyi ngo muvhunjo iji:
Vamweni vanorangarira kuti vanganamata Jehovha pomwe no zviro zvimweni pa nguva yondhoyo. Ngenyi izvi azvikwanisiki?
Tingatatijisa kudini Jehovha kuti tinoda kushandira iyena basi?
4. Rangariranyi ngo rudo una Jehovha kwamuri
Jehovha wakatipa zvipo zvizinji zvinodakajisa. Zvicinyi zvatingamupavo? Rijanyi VHIDHIYO.
Ngojapi njira jimweni jaanovonesa ndijona Jehovha kuti anomuda? Verenganyi Nduyo 104:14, 15 na 1 Johani 4:9, 10, perapo bhuisananyi ngo muvhunjo iji:
Ngozvapi zvipo zvinovha ka Jehovha zvinosisira maningi kwamuri?
Zvipo izvi zvinomuita kuti mujizwe kudini?
Patinoashira cipo cataida maningi, izvo zvinotiita kuti tibonge mundhu watiparo. Verenganyi Deuteronòmio 16:17, perapo bhuisananyi ngo muvhunjo unotevera:
Pamunorangarira ngo zvipo zvese zvomakapuwa ndi Jehovha, zvicinyi zvamunodakarira kumuitira?
5. Kujipira kuna Jehovha kunoviisa makomborero akawanda
Vazinji vanorangarira kuti kuva no nduma, basa raushoni kana mare yakawanda, zvinovaviisira mudakaro. Kureva kuti ndizvonadi? Rijanyi VHIDHIYO, perapo bhuisananyi ngo muvhunjo jinotevera.
Pikija kuti Andreya waidakarira kutamba bhora, ngenyi iyena wakaguma pa kusiya?
Iyena wakasana kujipira kuna Jehovha, kuciripi ku bhora. Munorangarira kuti iyena wakatema civaringo caushoni? Ngenyi?
Mupostori Pauro acito ava Mukristu, wainga no zvese kuti ave mundhu ano nduma. Iyena wakajijira mutemo wo Cijudha ngo mujijisi anozivika maningi. Asi Pauro wakasiya zvese sure wova Mukristu. Kureva kuti iyena wakazvidemba? Verenganyi Vafiripi 3:8, perapo bhuisananyi ngo muvhunjo jinotevera:
Ngenyi Pauro wakananga kuti zviya zvaakaita paainga acito wava Mukristu waizvivona inga “svina”?
Ngozvapi zvaakawana ngo kusiya basa rainga no nduma?
Munorangarira kuti upenyu hwenyu unozova waushoni kudari mukasana kushandira Jehovha? Ngenyi munorangarira kudaro?
Pauro paakava Mukristu, wakawana zvizinji kupinda zvaakasiya sure
VANDHU VAMWENI VANOTI: “Ndinozviziva kuti zvandiri kujijari izvokadi, asi adidi kupira upenyu hwangu kuna Mwari.”
Mu mavonero enyu, ngenyi munorangarira kuti zvinosisira kujipira kuna Jehovha?
ZVOTAJIJA
Rudo hunotindundira kuti tipire upenyu hwedu kuna Jehovha no kubhabhatijwa.
Kuhwirijira
Ngenyi Jehovha anofanera kunamathwa no kudiwa ndisu?
Ngoapi makomborero anogondesa Jehovha kuno vashandiri vake vakabhabhatijwa?
Maidakarira kujipira kuna Jehovha?
ZIVANYI ZVIMWENI
Vonanyi kuti ngenyi umwe muimbi wainga acikavhiri pomwe no mutambi wo bhora ro nyara vakasunga kupira upenyu hwavo kuna Jehovha.
Vocidoko Anovhunjisa Kuti—Ndinozoitenyi mu Upenyu Hwangu?—Kurangarira Zvakaitika (6:54)
Vonanyi zviro zvimweni zvinotiita kuti tijipire kuna Mwari.
“Nei Uchifanira Kuzvitsaurira Kuna Jehovha?” (Murindiri wa 15 Janeiro wo 2010, Cishona)
Pa vhidhiyo yo mumbo iyi, vonanyi mudakaro una vaya vajipira kuna Jehovha.
Verenganyi musoro uwu unoti: “Tinomboraramirei?” muvone zvakabesera mwanakaji umweni kuti anase kusana zvinosisira.
“Bhaibheri Rinochinja Upenyu” (Murindiri, No. 1 wa Novembro wo 2012, Cishona)