Ivanyi Makagondeka pa Zviro Zvese

Mundhu wese anoda kuva no shamwari jakagondeka. Munjira yakaezana, Jehovha anodavo shamwari jakagondeka. Asi kuva mundhu wakagondeka mu nyika yokuti vandhu vazinji avazivi kugondeka azvizivi kureruka. Pikija zvakadaro, ngenyi zvakanaka maningi kuva takagondeka mu zviro zvese?

1. Ngorapi thangwe rinosisira maningi rinotiita kuti tive vakagondeka?

Kudari tiri mundhu wakagondeka, tinokhombija kuti tinoda no kureremeja Jehovha. Amborangariranyi izvi basi: Jehovha anoziva zvese zvatinorangarira no kuita. (Vahebheru 4:13) Iyena anovona patinokheta kuva takagondeka. Iyenazve anodakara maningi kudari tikagondeka kwaari. Soko rake Bhaibheri rinotivhunja kuti: “Ngokuti Tenji Mwari anonyangajihwa ngo wakaxata mwoyo, anoda ngo mwoyo wese varurami.”—Mazwi Akangwara 3:32.

2. Tingaitisa kudini kuti tive takagondeka njiku jese?

Jehovha anoda kuti ‘tinange bzokadi kuna umwe nga umwe wedu.’ (Zakaria 8:16, 17) Zvinoda kunangenyi izvi? Izvi zvinoda kunanga kuti atidikani kunyepa kana kucinja cokwadi patinobhuya no vabari vedu, vadoni vokubasa, hama no hambzaji jo mu ungano no vatongi. Mundhu wakagondeka aabi, nee aapoti vamweni ngo sure. (Verenganyi Mazwi Akangwara 24:28 na Vaefeso 4:28.) Mundhu wakagondeka anoshaba mushabo yese. (Varoma 13:5-7) Ngo manangire amweni, “itusu tinoda kuva takagondeka pa zviro zvese.”—Vahebheru 13:18.

3. Ngenyi zvakanaka kuva takagondeka?

Kudari tikava vandhu vakagondeka, vandhu vamweni vanozotithemba. Ngo njira iyi, tinobesera kuti mu ungano muve no mugariro wo kuthembana inga mbhuri imwe yokadi. Kusiyapo izvo, tinozova no hana yakacena. Kugondeka kwedu kungaitazve kuti “jijiso ya Mwari Muponesi wedu ikujwe,” no kuita kuti vamweni vadevo kujija ngo pamusoro pa Jehovha.—Tito 2:10.

NASANYI KUPSAKISISA

4. Kugondeka kunodakajisa Jehovha

Verenganyi Nduyo 44:22 na Malakia 3:16, perapo bhuisananyi ngo muvhunjo jinotevera:

• Mumavonero enyu, ngenyi atidikani kurangarira kuti tingakwanisa kufisha zvokadi?

• Imwimwi munorangarira kuti Jehovha anojizwa kudini paya pamunosana kuvereketa zvokadi, pikija pazvinonga zvecinesa?

5. Ivanyi anothembeka mukuvo wese

VHIDHIYO: Zvicinyi Zvingatiita Kuti Tidakare?—Kuva no Hana Yakacena (2:32)

Verenganyi Vahebheru 13:18, perapo bhuisananyi ngo pamusoro pokuti, mungaitisa kudini kuti muve makagondeka . . .

• kuno mbhuri yenyu.

• kubasa kana kucikora.

• pa mugariro jimweni.

6. Kugondeka kunobeserazve itusu

Ngo zvokadi kuti kugondeka kungaviisa zvineso zvimweni. Pakufamba ko nguva, tinozovona kuti kugondeka ndiyona njira yakanaka. Verenganyi Nduyo 34:13-17, perapo bhuisananyi ngo muvhunjo unotevera:

• Upenyu hwedu hungacinjisa kudini kudari tikava vandhu vakagondeka?

1. Mukaji no mwamuna vakagondeka vanovangisa mucadho wavo

2. Vashandi vakagondeka vanothembwa ngo majipatarau avo

3. Vandhu vakagondeka vanoreremejwa ngo vatongi

ZVOTAJIJA

Jehovha anoda kuti shamwari jake jive jakagondeka pa zviro zvese zvajinonanga no kuita.

Kuhwirijira

• Ngo japi njira jimweni jatingakhombija ndijona kuti takagondeka?

• Ngenyi atidikani kurangarira kuti tinokwanisa kuviga cokwadi?

• Ngenyi munoda kuva anothembeka mukuvo wese?

ZIVANYI ZVIMWENI

Vabari vangajijisa kudini vana vavo kuti vave vanothembeka?

Iva Anovereketa Cokwadi (1:44)

Ngenyi zvakanaka kuita zvatakagondesa?

Itanyi Zvamakagondesa Kuti Muashire Makomborero (9:09)

Vonanyi kuti ngenyi tinodikana kupagari mushabo pikija icikanasi kushandiswa.

“Mitero Unofanira Kuibhadhara Here?” (Murindiri, No. 1 wa Setembro wo 2011, Cishona)

Ngozvapi zvakaita kuti mwanarume umweni wainga acizivi kugondeka acinje upenyu hwake?

“Ndakadzidza kuti Jehovha ane ngoni uye anoregerera” (Murindiri, No. 1 wa Maio wo 2015, Cishona)