Hät groote wërd stramblijwe

WAT IS STRAMBLIJWE?

Wee stramblijwt däit ni soo licht nålåte wen slimhëte upkåme daue. Man däit lëre stramblijwe mitm tijd, mit dat wat wij beleewe daue. Soo as air kind lëre däit gåe, bloos nå feel måls henfale, air mësch lërt wosoo leewe, bloos nå swårhëte oiwerståe.

WOWEEGEN HÄT GROOTE WËRD STRAMBLIJWE?

Stramblijwe däit dijn kind helpe sich beeter drëgt krijge mit dai problems wat upkåme daue wen dai groot wart. Wek kiner waite ni wat sai måke schåle wen sai forkërd daile måke, wen problems upkåme urer wen sai formånt ware. Andrer daue glijk nålåte. Åwer hät groote wërd dat sai forståe daue dat:

• Ale daue forkërd daile måke. (Tiago 3:2)

• Dai problems daue taum dat leewend tauhööre. (Eclesiastes 9:11)

• Taum lëre is nöörg formånt ware. (Provérbios 9:9)

Stramblijwe däit dijn kind helpe sich beeter drëgt krijge mit dai problems wat upkåme daue.

WOO DIJN KIND INLËRE STRAMBLIJWE?

Wen dijn kind wat forkërd mökt.

SPRUCH FONE BIJBEL: “Lijkerst wen dai gerecht soiwen måls henfült, hai däit werer upståe.” (Provérbios 24:16)

Help dijn kind dai daile onglig forståe. Dau man’s andenke dat dijn kind ni gaud gåe däit ine schaul. Kan sin dat dai maine däit dat nischt onglig måkt krijgt un nutst nischt sich anstrenge.

Taum dijn kind inlëre stramblijwe, help em andenke an wat dai måke kan taum beeter gåe ine schaul. Soo däit dai lëre wat dat dai måke mut un nij ais sich selwst beduure.

Duu dörst ni dai daile int raich bringe taum dijn kind, åwer em helpe saie wosoo dat int raich bringe. Duu kast tau em fråge: “Wat kast duu måke taum beeter forståe dat wat’s duu ine schaul lëre däist?

Wen slechte daile passijre.

SPRUCH FONE BIJBEL: “Jij waite ni woo juuch leewend morgen is.” (Tiago 4:14)

Kair wät woo dat leewend morgen is. Wee hüüt rik is, kan morgen ales forlaire. Wee hüüt gesund is, kan morgen krank sin. Dai Bijbel sägt: “Dai flinksche daue ni ümer dat loopen gewine, un dai starke daue ni ümer dat kämfen gewine . . . weegen dai tijd un dat wat wij ni luure kümt oiwer ale dai.” (Eclesiastes 9:11)

Is wår dat’s duu ales måke wilst wat’s duu kast taum dijn kind behüüte. Åwer dijn kind behüüte for al problems wat ine leewend upkåme, is ni mööglig.

Wen dat gild knap is urer åne arbëd blijwe, sin daile wat dijn kind nog ni onglig forståe däit. Åwer duu kast em mithelpe in andrer daile soo as wen dai strijre däit mit air amigo urer wen air fründ doodblijwt.a

Wen dijn kind formånt wart.

SPRUCH FONE BIJBEL: “Horg dai belërung . . . den warst duu klauk.” (Provérbios 19:20)

Air kind formåne bedüürt ni dat’s duu säge däist dat dai stråwe däist urer dai uutschimpe däist, bedüürt dat’s duu eer belërungs giwst un eer helpe däist air dail int raich bringe urer in air dail beeter ware.

Wen’s duu dijn kind inlëre däist dai formånen anneeme, dat is gaud for juuch bëd. Air papa wat John hit, sägt: “Wen’s duu ümer dai kiner een problems int raich bringe däist, dai daue nij ais lëre wosoo sich dårmit drëge. Un dai papa un mama ware een kiner helpe bruuke, ümer wen air problem nåm anerd kåme däit un dit däit dai gans familg schåre.”

Wosoo kast duu dijn kind helpe dai formånen anneeme? Is ji gåen fon woo dai formånen heer kümt, fone schaul urer fon irgends ain anerd stel, säg ni dat dai formånen ungerecht is. Ståts dit, help dijn kind an dit denke:

• “Woweegen mainst duu dat’s dij formånt häwe?”

• “Wosoo kast duu beeter ware?”

• “Wat kast duu måke anerd mål wen’s dij formåne daue?”

Dau andenke: Dai formånen daue dijn kind hüüt helpe un uk in em sijn gans leewend lang.