Oos gemaind ine ganse wild hät kain religioonschefs wat loon krijge. Soo as in der airste kristen eer tijd, dai ülster wat beraid sin, ware uutsöcht ‘taum God sijn gemaind uppasse’. (Atos 20:28) Dës ülster sin klauk kërls mit starke gloobe wat nå foirgåe ine gemaind un passe dai schåp up, ‘ni mit lijb up dat fordainen wat ni reäl is, åwer mit lust’. (1 Pedro 5:1-3) Wat måke sai taum oos helpe?

Sai daue oos behüüte un uppasse. Dai ülster lenke un helpe dat dai gemaind sich an Jehovaa hült. Sai waite dat God eer dëse amt oiwergeewt hät wat nöörg is un sai stele sich ni as here oiwer dai gemaind, åwer sai helpe oos dat wij oos gaut befijne un fruir häwe. (2 Coríntios 1:24) Soo as air schåpuppasser sij best mökt taum jërer ainsig for sijne schåp, dai ülster forsuike jërer braurer un swester ine gemaind kenelëre. — Provérbios 27:23.

Sai daue oos inlëre wosoo God sijne wile måke. Jërer week, dai ülster daue dai forsamlunge ine gemainde foirwärds drijwe taum oose gloobe stärke. (Atos 15:32) Dës reäls kërls koine uk nåmåkt ware dat sai mit oos upm preegarbëd sin, un daue oos up feel årts taum preegen inlëre.

Sai geewe jërer ainsig fon oos koråsch. Taum oos helpe stark im gloobe blijwe, dai ülster ine gemaind daue oos t’huus besuike urer ine Köönigrëchsaal taum oos hülp un troost fone Bijbel anbaire. — Tiago 5:14, 15.

Nog dat sai dai gemaind helpe, dai mëste ülster häwe sijne arbëd un sijn famijlg. Sai muite sich tijd tau dit ales neeme. Dës bruirers wat soo feel arbëre sin oos ëren wërd. — 1 Tessalonicenses 5:12, 13.

• Wat fone amt häwe dai ülster ine gemaind?

• Wosoo wijse dai ülster dat sai sich mit jërer ainsig bekümre?

Dai Bijbel fortelt oiwer twai grups kristlig kërls wat uppasse nå dat wat dai gemaind bruuke däit: ‘ülster un hülpsdijners’. (Filipenses 1:1) Mëst ümer, sin feel fon dës bruirers in jërer gemaind. Wosoo daue dai hülpsdijners oos helpe?

Sai helpe dai ülster. Dai hülpsdijners, soo gaut dai jüngster as dai üler, häwe starke gloobe, daue sich anstrenge taum gaure arbëd måke un sin reäl. Sai måke der arbëd wat nöörg is ine gemaind dag for dag, un wat mut måkt sin. Dat erlaubt dat dai ülster beeter måkt krijge eene amt taum inlëren un soo as schåpuppasser.

Sai måke nutslige arbëd. Wek hülpsdijners sin uutsöcht soo as stelewijsers taum gaut upneeme al dai wat upt forsamlunge kåme. Andrer daue nåkijke nå dat musik speelen un mikrofon, dai buiker un hefte uutdailen, dai reeken fone gemaind måke un dai gëgend taum preege der bruirers un swesters fone gemaind oiwergeewe. Sai daue uk helpe dai Köönigrëchsaal nåarbëre. Dai ülster koine eer foordre dat sai dai helpe wat üle sin. Dai hülpsdijners sin beraid taum irgends aine arbëd måke wat eer oiwergeewt wart, un dårdoir ware sai ërt fon ale. — 1 Timóteo 3:13.

Sai sin wërd dat wij eer nåmåke soo as kristlig kërls. Dai hülpsdijners ware uutsöcht nå eer kristlig moors un starke gloobe. Wen sai bijblisch preegen upe forsamlunge måke, daue sai oose gloobe stärke. Dat sai nå foirgåe upm preegarbëd, geewe sai oos koråsch dat wij uk mër un beeter preege. Weegen dat sai beraid sin taum mithelpen, is sich dai gemaind ainig un fröölig. (Efésios 4:16) Mite tijd, dai hülpsdijners koine uk uutsöcht ware taum dijne as ülster .

• Wat fon sort kërls sin dai hülpsdijners?

• Wosoo helpe sai dat dai gemaind in ordnung bliwt?

Barnabet un dai apostel Paul sin oft ine Bijbel nent. Dës bëre kërls däire rëse un dijne as ülster wat dai gemainde im airste jårhuunerd besöchte. Woweegen? Sai däire sich wirklig mit der kristlige bruirers un swesters bekümre. Paul hät sägt hai wul trööggåe un dai bruirers un swesters besuike taum saien wosoo as dat mit eer güng. Hai wäir beraid taum huunerde kilomëter rëse taum eer koråsch geewe. (Atos 15:36) Dit is dai wünsch for dai ülster wat hüüt dai gemainde besuike.

Sai geewe oos koråsch. Jërer fon dës ülster besöcht wënsig 20 gemainde un bliwt ain week in jërer ain, twai mål upt jår. Wij koine groote profijt häwe fon dat wat dës bruirers un eer fruuges beleewt häwe, wen sai forfrijgt sin. Sai daue sich anstrenge taum kenelëre soo dai klaine as dai groote un daue gërn mit oos t’hoopgåe upm preegarbëd un up oos bijbelsstuune mitkåme. Dës ülster wat dai gemainde besuike, t’hoop mit der ülster fone gemaind, måke besuiken wat koråsch giwt. Dai måke lustig bijblisch preegen upe forsamlunge un kongressen taum oose gloobe stärke. — Atos 15:35.

Sai bekümre sich mit ale. Dai ülster wat dai gemainde besuike daue sich bekümre dat dai gemainde im gloobe stark blijwe. Sai forsamle sich mit der ülster un hülpsdijners taum saien wosoo as dai gemaind foirwärdsgët un geewe nutslig formånen dat sai eene amt gaut måke. Sai helpe dai pionijrs dat sai beeter preege koine un wile gërn dai kene wat anfänge upt forsamlunge kåme un waite wosoo sai foirwärdsgåe im gloobe. Dës bruirers, wat ümer beraid sin taum mithelpe un wile gërn mit oos t’hooparbëre, daue sich anstrenge for oos ale. (2 Coríntios 8:23) Wij muite eene gloobe un anbeeren tau God nåmåke.— Hebreus 13:7

• Woweegen häwe wij ülster wat dai gemainde besuike?

• Wosoo kan eer besuiken dij profijt geewe?

Nå aim groote unweerer, Jehovaas Tüügen daue glijk anfänge an arbëren taum eer bruirers un swesters helpe wat dat trufe hät. Dit anstrengen däit wijse dat groot lijb wat wij forneeme air upm andrer. (João 13:34, 35; 1 João 3:17, 18) Wosoo wart dës hülp geewt?

Wij geewe gild mit fraiwile. As dat ain groot hungersnood geewt hät in Judeia im airste jårhuunerd, dai kristen in Antioquia häwe gild tau eer bruirers un swesters schikt. (Atos 11:27-30) Neemlig soo, wen wij waitend krijge dat oos bruirers un swesters up aine stel ine wild nood doirsete, den schike wij gild mit fraiwile doir oos gemaind taum hülp geewe tau dai wat ine groote nood sin. — 2 Coríntios 8:13-15.

Wij geewe nustlig hülp. Dai ülster fon der gëgend woo dat groot unweerer passijrt is, suike jërer ainsig fone gemaind taum sich sicher sin of dai ale gaut sin. Grup kërls wat hülp ine nood geewe kijke nå of dår eeten, drinkwåter, antreken, stel taum blijwen un hülp fon dokters is. Feel Jehovaas Tüügen wat feele arbëd måken forståe, daue sich anbaire taum up dai stel woo dat passijrt is hengåe. Dår daue sai arbëre taum hülp ine nood geewe urer hüüser un Köönigrëchsaals wat foråst sin werer nåbuuwe. Dai ainigkët wat wij häwe as ain gemaind un beleewen wat wij kreege häwe doir t’hooparbëren helpe oos dat wij rasch wat måke. Nog dat wij ‘oos famijlg im gloobe’ helpe, wij geewe uk der andrer lüür hülp wen wij dat koine, nog wen dai fon andrer religioone sin. — Gálatas 6:10.

Wij geewe eer troost fone Bijbel uk hülp dat sai sich beeter forneeme. Uphaupt dai wat dat unweerer doirset häwe, muite beschöönt ware. In soo’n tijd, koine sai stärkt ware for Jehovaa, ‘God fon al troost’. (2 Coríntios 1:3, 4) Wij daue mit lust fortele oiwer dat wat dai Bijbel der lüür wat traurig sin forspreeke däit un daue dai sicherhët anbaire dat God sij Regirung al dat unglük, wat waidåg un nood bringe däit, almökt. — Apocalipse 21:4.

• Wosoo krijge Jehovaas Tüügen soo rasch hülp geewt in aim unweerer?

• Wat fon troost fone Bijbel koine wij geewe tau dai wat leewig bleewe sin?

Bits airer fon sijn dood, Jësus hät fortelt mit fair fon sijn jüngers: Peter, Tiago, João un André. As hai foiruutsägt hät oiwer dai saichen wen hai al im himel regijre däir ine letste dåg, Jësus hät ain fråg måkt woo wij andenke muide: ‘Wee is wirklig dai reäl un forständig sklav, dai wat sij her oiwer al sijn huusdijner oiwergeewt hät, taum eer ine richtige tijd geewe wat sai bruuke?’ (Mateus 24:3, 45; Marcos 13:3, 4) Jësus, as ‘her’ fon sijn jüngers, däir eer sicherhët geewe dat hai aine ‘sklav’ uutsuike däir taum eer ümer geewe ales wat sai brüükte taum stark im gloobe blijwe ine letste tijd. Wee is dës sklav?

Hai is ain klain grup fon Jësus sijn jüngers wat uutsöcht sin taum mit em im himel regijre. Dës ‘sklav’ is dai Grup Kërls wat Jehovaa sijne arbëd lenkt. Hai däit beraide ine richtige tijd, ales wat Jehovaas Tüügen bruuke taum eene gloobe stärke. Dat is bloos dai reäl sklav wat oos giwt wat wij bruuke ine richtige tijd. — Lucas 12:42.

Hai giwt ales wat God sijn famijlg bruukt. (1 Timóteo 3:15) Jësus hät dem sklav der groote amt oiwergeewt taum lenke der arbëd hijr upe ër fon Jehovaa sijn gemaind: fon eer sachen sorge, der preegarbëd nåkijke un däit oos inlëre doir dai gemainde. Taum oos geewe wat wij bruuke un wonair, dai ‘reäl un forständig sklav’ giwt oos ales taum oose gloobe stärke doir dai buiker un andrer wat wij upm preegarbëd benutse, un nog dat wat in oose forsamlunge un kongressen inlërt wart.

Dai sklav is reäl tau dai wårhëte fone Bijbel un tau sijne amt taum dai gaure nijges preege; un forständig up klauk årt soo as hai sorge däit fon ales wat besägen hät mit Kristus sijne wile hijr upe Ër. (Atos 10:42) Jehovaa däit dëse arbëd seegne dat dai gröter wart un mit feel taum oose gloobe stärke. — Isaías 60:22; 65:13.

• Wem hät Jësus oiwergeewt taum sijne jüngers geewe wat sai bruuke taum eene gloobe stärke?

• Wosoo is dai ‘sklav’ reäl un forständig?

Im airste jårhuunerd, wek ‘apostels un ülster in Jerusalem’ däire dijne as grup kërls wat Jehovaa sijne arbëd lenke däir taum uutsuiken måke wat müst måkt sin tau al dai gemainde fon dai wat uutsöcht wäire taum mit Kristus im himel regijre. (Atos 15:2) Sai kaime oiwerain mit dat uutsuiken doir dai hülp fone Bijbel un dem hailig gaist. (Atos 15:25) Neemlig soo wart dat hüüt måkt.

God däit dai benutse taum sijne wile måke. Wek uutgesöchte bruirers taum mit Kristus im himel regijre sin dai Grup Kërls wat Jehovaa sijne arbëd lenkt. Sai daue genau God sij Woord uunersuike un forståe sich gaut drëge mit dai daile dag for dag un mit ales wat wij bruuke im gloobe. Sai daue sich jërer week forsamle taum uutsuiken måke wat dai wildbraid famijlg im gloobe bruukt. Soo as im airste jårhuunerd, inlëren fone Bijbel ware geewt doir braiws uk doir dai ülster wat dai gemainde besuike un andrer. Dat helpt mit dat God sij folk sich ainig is soo as sai denke un in ales wat sai måke. (Atos 16:4, 5) Dës Grup Kërls däit ales beraide wat wij bruuke im gloobe, driwt der preegarbëd fon God sij Regirung un däit nåkijke dat uutsuiken fon dai bruirers wat amts krijge.

Hai löt sich mit God sijn hailig gaist lenke. Dës Grup Kërls söcht belërung fon dem Alehöögst wat recht taum regijren hät, Jehovaa, un fon dem Her fone gemaind, Jësus. (1 Coríntios 11:3; Efésios 5:23) Dai wat tau dës Grup Kërls tauhööre maine sich ni as schefs fon God sij folk. Sai, un al dai uutgesöchte kristen, ‘gåe dem Schåp’, Jësus, ‘nå kan sin woo hai hengët.’ (Apocalipse 14:4) Dës Grup Kërls giwt feele wërd dat wij fon eer un eene arbëd beere.

• Wee däir tauhööre tau dem grup kërls wat Jehovaa sijne arbëd im airste jårhuunerd lenke däir?

• Wosoo däit dai Grup Kërls wat Jehovaa sijne arbëd hüüt lenkt belërung fon God suike?

Betel is air hebräisch nåme wat bedüürt ‘God sij Huus’. (Gênesis 28:17, 19) Dës nåme is passend taum uutdüüre wosoo dai stele sin, wat benutst ware for Jehovaas Tüügen ine ganse wild, taum der preegarbëd mithelpe un lenke. Dai Grup Kërls wat Jehovaa sijne arbëd lenkt dijnt in Betel fon Nova York Staad, Nord-Amerika (NA), un fon dår däit hai dai arbëds fon andrer Betels in feel gëgende nåkijke. Dai wat up dëse stele dijne, sin soo as ain famijlg: arbëre un wåne t’hoop, eete t’hoop un lëre dai Bijbel t’hoop. Dårweegen, sin sai kent as dai famijlg fon Betel. — Salmo 133:1.

Ain stel as kain anert woo dai leewe un t’hooparbëre as ain famijlg. Dai kristlig kërls un fruuges wat in al dai Betels dijne, häwe sich anbåre taum God sijne wile al tijd oiwer måke un mithelpe ales wat besägen hät mit God sij Regirung. (Mateus 6:33) Kair fon eer krigt loon, åwer ale krijge ain stel taum wånen, eeten un ain klain hülp mit gild taum eer aigen forbruuken. Jërer ainsig mökt aine fon dëse arbëds: in arbëdstuuwe, koiken, eetstuuw, stele taum updrüken måke, woo dai buiker inbuune ware, rëgenmåken, tüügwaschstel, nåarbëren un soo wijrer.

Ain stel woo feele arbëd is wat der preegarbëd fon God sij Regirung mithelpe däit. Dat oiwerst fon jërer Betel is dat dai wårhët fone Bijbel nå al dai lüür kümt. Dit heft däit dat wijse. Dai Grup Kërls wat Jehovaa sijne arbëd lenkt, hät dai sreewe un nåkeeke. Nådem is dai doir komputadoors schikt woore tau feel grups wat dai nåsrijwe in andrer språke ine ganse wild, un is updrükt woore in drükmaschijne wat sër drel arbëre in wek Betels un dun, is dai schikt woore tau mër as 110 duusend gemainde. Solang as dai arbëd måkt wart taum irgends air bauk un heft måke, dai famijlge fon Betel daue groot hülp geewe tau dem oiwerste arbëd: der preegarbëd fone gaure nijges. — Marcos 13:10.

• Wee arbërt in Betel un wat wart eer geewt?

• Wat fone ijlige arbëd wart for jërer Betel mithulpe?

Dai bruirers un swesters in Betel måke feel sort arbëd. Sai daue der preegarbëd nåkijke fon ain urer mër gëgende. Eer arbëd kan sin in grups wat dat nåsrijwen up andrer språke måke, in hefte updrüken, in buiker inbijnen, in buiker un hefte weglegen, in films måke un wat upgrawret wart taum höören urer andrer daile nåkijke ine gëgend.

Ain Grup Kërls fon Betel in eer gëgend däit dai arbëd nåkijke. Dai Grup Kërls wat Jehovaa sijne arbëd lenkt, däit oiwergeewe dat nåkijken fon jërer Betel taum ain grup kërls in eer gëgend mit drai urer mër ülster wat gaut beraid sin. Dës grup kërls sägt beschaid der Grup Kërls wat Jehovaa sijne arbëd lenkt oiwer dat foirwärdsgåen fon preegarbëd in sijn urer andrer gëgende wat dai oiwersich hät un oiwer irgends ain problëm wat amin passijre kan. Dat helpt der Grup Kërls wat Jehovaa sijne arbëd lenkt won daile uutsuike wat in dai näigste buiker un hefte, forsamlunge un kongressen muide inlërt ware. Dai Grup Kërls wat Jehovaa sijne arbëd lenkt däit ümer bruirers schike taum dai Betels besuike un taum dai Grups Kërls in Betel fon eer gëgend belërung geewe oiwer up wat fon årt sai eene amt gaut måke koine. (Provérbios 11:14) Ain forsamlung woo wij ale up luure, mit ain bijblisch preeg wat måkt wart fon dem braurer fon Nord-Amerika Betel, is beraid taum der koråsch geewe wat wåne ine gëgend woo dai Betel is.

In jërer gëgend wart der gemainde mithelpen geewt. Bruirers wat der amt oiwersich häwe in Betel erlaube dat nijge gemainde upmåkt ware. Sin uk andrer bruirers wat dai arbëds nåkijke fon pionijrs, dai wat schikt woore sin taum in eer urer anert gëgend preege, un dai ülster wat dai gemainde besuike wat dijne ine gëgend woo dai Betel is. Sai daue beraide kongressen un Köönigrëchsaals buuwen un nåkijke dat dai buiker un hefte nå dai gemainde kåme. Ales wat in aine Betel måkt wart, däit mithelpe dat dai preegarbëd gaut in ordnung is. — 1 Coríntios 14:33, 40.

• Wosoo däit dai Grups Kërls fon Betel in eer gëgend mithelpe dai Grup Kërls wat Jehovaa sijne arbëd lenkt?

• Wat hät ain Betel oiwersich in eer gëgend?

Taum dai ‘gaure nijges’ up dai best årt bekandmåke in ‘al land, rass, språk un folk’, måke wij buiker un andrer in mër as 750 språke. (Apocalipse 14:6) Wosoo krijge wij dëse groote arbëd måkt? Ine ganse wild, grups srijwers un fon feel wat dat nåsrijwen måke in andrer språke, ale Jehovaas Tüügen, daue dårtau helpe.

Dai airst sriwt wart måkt up dai englisch språk. Dai Grup Kërls wat Jehovaa sijne arbëd lenkt, däit nåkijke der arbëd in dai stel in Betel fon Nord-Amerika woo dat srijwen måkt wart. Dår häwe dai oiwersich dai srijwers uutsuike fon wat in Betel fon Nord-Amerika dijne un in wek Betels in andrer gëgende. Dat wij grups srijwers ine ganse wild häwe däit oos erlaube fortele oiwer feel moors fon jërer gëgend un soo oos buiker un andrer daue der lüür up al stele gefale.

Dai sriwt wart schikt tau dai wat dat in andrer språke nåsrijwe. Nådem dat dai sriwt beraid un trecht is, wart dai doir komputadoors schikt tau dai grups wat dat nåsrijwe in andrer språke ine ganse wild un sai daue dat nåkijke. Dai daue sich anstrenge taum richtig wöör uutsuike wat klår låte wat dai englisch sriwt säge däit un den daue sai dai nåsrijwe in eer aigen språk. — Eclesiastes 12:10.

Doir komputadoors wart dai arbëd dreler måkt. Air komputadoor krigt ni måkt der arbëd fon srijwers un nåsrijwers in andrer språke. Lijkerst soo, eer arbëd kan dreler måkt ware wen sai dai komputadoor benutse taum upsuiken måke. Jehovaas Tüügen häwe eer aigen hülp doir komputadoor måkt, wat MEPS hit, wat tʹhooppasst mit sriwte in huunerde språke. Doir dem, wart dai sriwt mit bijler un afmålen in ordnung måkt taum updrüken.

Woweegen daue wij oos sër anstrenge taum in soo feel andrer språke nåsrijwe? Weegen is Jehovaa sij wile ‘dat al sort lüür rert ware un taum dat genau kenen fone wårhët kåme.’ — 1 Timóteo 2:3, 4.

• Wosoo ware oos buiker un andrer måkt?

• Woweegen ware oos buiker un andrer in soo feel språke nåsreewe?

Oos gemaind ine ganse wild däit måke un uutdaile al jår feel miljone Bijbels, buiker, hefte un andrer ån wat fon eer foordre. Wij daue Köönigrëchsaals un Betels in jërer gëgend buuwe un nåarbëre. Wij daue mithelpe mit gild ale wat in Betels arbëre un wat schikt ware taum in eer urer anert gëgend preege un geewe uk hülp ine nood wen unweerer passijrt. Amin däist duu dij fråge: ‘Wosoo wart dat ales betålt?’

Wij daue nischt fon oose arbëd foordre, daue kair gehalt forlange un kair gild samle. Nog dat oos preegarbëd feel koste däit, wij daue kair gild forlange. Soo as dai twait numer fon oosem heft Wat Bekandmökt, wat måkt woore is mër as huunerd jåre trööguut, wij glööwe dat Jehovaa oos helpe däit un dårweegen daue wij ‘ais nij foordre dat dai lüür oose arbëd betåle’ — un nij ais häwe wij dat måkt! — Mateus 10:8.

Oos arbëd wart betålt mit gild wat fraiwilig geewt wart. Feel lüür daue oose arbëd wërd geewe taum dai Bijbel inlëre un geewe mit fraiwile gild taum mithelpe. Dai aigen Jehovaas Tüügen geewe mit fruir eer tijd, kraft, gild un andrer daile taum mithelpe dat God sij wile upe ganse Ër måkt wart. (1 Crônicas 29:9) In Köönigrëchsaals un up oos kongressen, ale koine mit fraiwile gild rinermåke in dai klaine kasten wat dår tau sin. Kan uk gild geewt ware doir oos stel in internet, jw.org. Mëst ümer, dat gild wat dår geewt wart kümt fone gewöönlige lüür, soo as dai arm witfruug wat Jësus låwt hät dat sai uut een wile un mitm härts twai klain kopersgild in der kaste fom Godeshuus rinermåkt hät. (Lucas 21:1-4) Soo, jërer ainsig kan dai moor häwe taum ‘wat besijt lege’ taum geewen ‘soo as jërer sich in sijn härts innåme hät’. — 1 Coríntios 16:2; 2 Coríntios 9:7.

Wij häwe kaine twijbel dat Jehovaa bijbliwt der eer härts anstööte wat ‘em ëre wile mit eer daile mit groote wërd’ taum der arbëd fon sij Regirung mithelpe dat em sij wile måkt wart. — Provérbios 3:9.

• Up wat fon årt is oos gemaind ine ganse wild aners as dai andrer religioone?

• Wosoo wart dat gild benutst wat mit fraiwile geewt wart?

Soo as dai nåme Köönigrëchsaal maint, God sij Regirung is dat oiwerst fone Bijbel wat dår inlërt wart — woo Jësus mëst oiwer preegt hät. — Lucas 8:1.

Sin stele fone wår religioon. Is fon dår woo dai preegarbëd fon dai gaure nijges fon God sij Regirung up dai stel in ordnung hule wart. (Mateus 24:14) Dai Köönigrëchsaals sin ni oiwerain, wek sin gröter un wek sin kläner. Åwer ale sin gewöönlig, feel fon eer ware benutst for mër as ain gemaind. Ine letste jåre, sin feel duusende Köönigrëchsaals buuwt woore (wënsig fijw upe dag) taum up der neemlige srijd gåe soo as dai gemainde gröter ware. Wosoo wart dat måkt? — Mateus 19:26.

Dat buuwen wart betålt mit gild wat mit fraiwile geewt wart wat dårtau upbewårt wart. Dit gild wat mit fraiwile geewt wart, wart schikt nå Betel in dai gëgend dat dai gemainde gild häwe taum Köönigrëchsaals buuwe urer nåarbëre.

Dai wat buuwe, daue sich mit fraiwile anbaire, åne loon, wat feel sort arbëd måke. In feel gëgende, giwt dat Grups wat Köönigrëchsaals Buuwe. Grups dijners wat dat buuwen måke un dai wat sich mit fraiwile anbaire gåe fon ain gemaind nåne andrer in dat neemlig land un sogår up wijtaf stele, taum mithelpe Köönigrëchsaals buuwe. In andrer gëgende Jehovaas Tüügen wat der arbëd forståe, wart oiwergeewt dat buuwen un nåarbëren fone Köönigrëchsaals up ain uutgesöcht gëgend nåkijke. In ale arbëdsplatse, feel wat der arbëd gaut måken forståe, fon dai gëgend, daue mit fraiwile arbëre, åwer dai mëste wat der arbëd måke sin dai bruirers un swesters fon der gemaind up dai stel. Jehovaa sij hailig gaist un dat härtslig anstrengen fon sij folk måke dat ales richtig giwt. — Salmo 127:1; Colossenses 3:23.

• Woweegen haite oos stele taum Jehovaa anbeere Köönigrëchsaals?

• Wodoir krijge wij Köönigrëchsaals ine ganse wild buuwt?

Jërer Köönigrëchsaal fon Jehovaas Tüügen wist God sijne hailige nåme. Dårweegen, is dat tau oos air hailig arbëd un däit tauhööre tau oos anbeeren dai Köönigrëchsaal rëgen, in ordnung un in gaure stand hule. Ale koine helpe.

Help rëgenmåke nå dai forsamlung. Nå jërer forsamlung, bruirers un swesters måke mit lust dai Köönigrëchsaal rasch rëgen dat dai int ordnung bliwt. Ais upt week wart dai genau rëgenmåkt. Air ülst urer air hülpsdijner kijkt der arbëd nå un mëst ümer däit hai ain list mit daile taum måken benutse. Kümt up an wat taum måken is, jërer ainsig mökt wat soo as: uutfeege, upwische urer rëgenmåke mitm stowsuuger, stow afwische, stuil int raich stele, banëros uutschüüre, luuke un spëgels rëgenmåke, drek ruuterdråge, buuten üm dai Köönigrëchsaal rëgenmåke un der blaumegåre behanle. Wënsig ais upt jår, wart air dag upwårt taum ales genau rëgenmåke. Dai kiner koine uk mithelpe, soo daue sai lëre oos stel taum Jehovaa anbeere wërd geewe. — Eclesiastes 5:1.

Dau dij anbaire taum nåarbëren helpe. Jërer jår wart ain genau nåkijken buuten un inwards fone Köönigrëchsaal måkt. Doir dit nåkijken, wart ümer nåarbëren måkt dat dai Köönigrëchsaal im gaure stand bliwt un soo wart kair gild unnüter gastijrt. (2 Crônicas 24:13; 34:10) Ain rëgen Köönigrëchsaal un im gaure stand is ain stel mit wërd taum oose God anbeere. Dat wij helpe bij dëse arbëd, daue wij oos lijb wijse up Jehovaa un up dai stel woo wij em anbeere. (Salmo 122:1) Un dat giwt aine gaure tüüge for dai nåwerslüür. — 2 Coríntios 6:3.

• Woweegen dörwe wij ni lijdlig sin mit oose stel taum Jehovaa anbeere?

• Wat wart måkt taum dai Köönigrëchsaal rëgen hule?

Wist duu gërn upsuiken måke dat dij kenen fone Bijbel gröter wart? Wist duu mër lëre oiwer aine spruch fone Bijbel urer oiwer aine mësche, stel urer dail wat ine Bijbel maint is? Häst duu dij al frågt of God sij Woord dij helpe kan mit aim kopbreeken wat’s duu amin häst? Den, dau dai buikerstuuw fone Köönigrëchsaal benutse.

Dai hät gaure hülps taum upsuiken måke. Kan sin dat’s duu ni häst al dai bijblisch buiker un hefte fon Jehovaas Tüügen in dijne språk. Åwer dai nijgste buiker un hefte sin in dai buikerstuuw fone Köönigrëchsaal. Amin sin dår uk feel andrer Bijbels, air gaur wöörbauk uk andrer buiker taum upsuiken måke wat sich gaut dårtau passe. Duu kast dai buikerstuuw benutse foir un nå dai forsamlunge. Kan sin dat dår ain komputadoor anmåkt is mit Watchtower Library (Buikerstuuw fon Torre de Vigia). Dat is ain hülp in komputadoor woo feel fon oos buiker un hefte in sin, hät uk ain licht hülp taum suiken måke taum ain tem, air woord urer aine spruch fone Bijbel upsuike.

Is ain hülp tau dai wat preege hät in der Forsamlung wat Leewent un Preegarbëd hit. Dai buikerstuuw fone Köönigrëchsaal kan sër dij helpe dat’s duu dij beraid krigst tau dijn preege. Dai ülst wat dai Forsamlung Leewent un Preegarbëd nåkijke däit, hät dai buikerstuuw oiwersich. Hai bekümert sich dat dai nijgste buiker un hefte dårin sin un gaut in ordnung sin. Duu kast em foordre urer dem wat dai Bijbel dij inlëre däit dat sai dij helpe fijne wat’s duu bruuke däist. Åwer wart ni erlaubt air bauk mit nå huus neeme. Un, is sicher, sër gaut uppasse mit dai buiker un dår nischt rinersrijwe.

Dai Bijbel däit uutdüüre, taum ‘God sij kenen’ fijne, muite wij beraid sin taum dat suike ‘soo as forsteeken rijkhëte’. (Provérbios 2:1-5) Dai buikerstuuw fone Köönigrëchsaal kan dij helpe dat suiken anfänge.

• Wat fon hülps taum upsuiken måke sin in dai buikerstuuw in dijn Köönigrëchsaal?

• Wee kan dij helpe dai buikerstuuw gaut benutse?

Jësus Kristus hät tau sijne jüngers sägt: ‘Låt juuch licht schijne foir der lüür, dat sai al juuch gaure arbëds saie un geewe herligkët tau juuche Fåter wat im himel is.’ (Mateus 5:16) Dårtau, daue wij dai nijge daile benutse, sogår dai internet. Oos stel in internet, jw.org, is dai stel wat erlaubnis hät taum dai wårhët oiwer Jehovaas Tüügen eene arbëd un gloobe wijse. Wat kan man in dai stel fijne?

Antwoore fone Bijbel tau dai frågen wat dai lüür mëst waite wile. Duu kast dai antwoore tau wek fon der frågen fijne. Soo as dai bijblisch bläärer Mag dai Traurigkëit Ais Al Ware? un Koine dai Doore Werer Upståe?, wat al leest ware koine in oose stel in internet in mër as 600 språke. Duu kast uk dai Tradução do Novo Mundo in mër as 130 språke leese un feel buiker un hefte wat dij helpe dai Bijbel forståe, soo’s dat bauk O Que a Bíblia Realmente Ensina? un dai nijgste A Sentinela un Despertai! (Wat Bekandmökt un Wåkt Up!). Feel fon dëse buiker un hefte koine in oos stel in internet leest un höört ware urer kast dai häwe in dijn celular un andrer in MP3 taum höören, in PDF urer EPUB taum leesen. Duu kast sogår wek bläärer updrüke ine andrer språk tau aim wat dat gërn wil. In oose stel in internet sin buiker un hefte wat måkt woore sin soo as films wënsig in 20 saichen språke. Duu kast uk in dijn celular un andrer häwe Bijbel leesen soo’s ain geschicht, bijblisch speelen taum höören un fain lijrer taum tijdfordrijw.

Dai wårhët oiwer Jehovaas Tüügen. Ware uk rinermåkt dai nijge beschaids un films oiwer oos wildbraid arbëd, daile wat passijre wat Jehovaas Tüügen angåe un oos anstrengen taum hülp ine nood geewe. Duu kast uk beschaids oiwer dai kongressen wat nog måkt ware fijne un wosoo mit dai Betels in andrer gëgende fortele.

Soo, kan dai licht fone wårhët bet an dat ën fone Ër schijne. Up al stele upe Ër dai lüür ware oiweral hulpe. Wij daue beere dat ‘Jehovaa sij woord rasch foirwärdsgët’ ine ganse wild tau God sijn herligkët. — 2 Tessalonicenses 3:1.

• Wosoo däit oos stel in internet jw.org mër lüür helpe dai wårhët fone Bijbel lëre?

• Wat wist duu gërn in oos stel in internet suike?