Feel lüür gåe ni mër int kirche weegen sai ware ni trööst un krijge kain genau antwoore tau eer frågen. Wat is den aners up dai forsamlunge fon Jehovaas Tüügen? Wat warst duu dår saie?

Lüür wat sich lijbe un bekümre sich air mitm andrer. Im airste jårhuunerd, dai kristen wäire ainig t’hoop ine gemainde un däire forsamlunge hule taum God anbeere, dai Bijbel lëre un air dem andrer koråsch geewe. (Hebreus 10:24, 25) Dat sai t’hoop wäire up ain schöön stel woo lijb wäir, fornaime sai sich dat sai tauhööre däire tau ain wår famijlg: eer bruirers un swesters im gloobe. (2 Tessalonicenses 1:3; 3 João 14) Wij daue eer nåmåke un forneeme dai neemlig fruir.

Dai hülp taum dai wårhëte fone Bijbel lëre un dårnå leewe. Soo as ine früüsche tijd, kërls, fruuges un kiner daue sich ale t’hoop forsamle. Kërls wat beraid sin benutse dai Bijbel taum oos helpe dat wij waite wosoo dai wårhëte fone Bijbel dag for dag någåe. (Deuteronômio 31:12; Neemias 8:8) Ale koine eene gloobe doir dat milen un dat singen wijse. — Hebreus 10:23.

Dijne gloobe an God stärke. Dai apostel Paul hät tau aine gemaind sägt: ‘Ik häw forlang taum juuch saie . . . dat wij air dem andrer koråsch geewe, jërer ainsig doir der gloobe wat dai anert hät, soo as juuch gloobe, soo uk mijne.’ (Romanos 1:11, 12) Der ümgang upe forsamlunge mit oose bruirers un swesters stärkt oose gloobe un hült oose wile taum air kristlig leewent häwe.

Duu büst härtslig nöögt taum up ain fon oose forsamlunge kåme un saie for dij selwst wat in dësem kapitel stët. Dai doire sin up tau ale! In dai forsamlunge wart nischt betålt un kair gild samelt.

• Wosoo daue oos forsamlunge dai någåe fone früüsche tijd?

• Wosoo kan oos dat helpe upt forsamlunge kåme?

Lijkerst wen wij uk gåe muite doir dichte wald urer slecht weerer doirsete, wij daue ni låte t’hoopkåme in oos kristlige forsamlunge. Woweegen daue Jehovaas Tüügen sich soo anstrenge taum mit eer kristlig bruirers un swesters t’hoop sin, nog wen sai uk swårhëte im leewent doirsete un muir sin nå aim arbëdsdag?

Dat is gaut for oos. As Paul fortelt hät oiwer der ümgang mit der lüür fone gemaind, hai hät sägt wij muite ‘air oiwer der andrer denke’. (Hebreus 10:24) Dës wöör bedüüre ‘genau sich bekümre’. Dat wist dat wij oos anstrenge muite taum oos bruirers un swesters gaut kenelëre. Dat is ain hülp taum oos mit dai andrer bekümre. Dat wij dai andrer kristlige famijlge kenelëre, krijge wij waitend dat wek fon eer swårhëte doirset kreege häwe wat bijnå soo sin as oos un dat sai oos helpe koine dat neemlig måke.

Dat giwt oos groot fründe. In oose forsamlunge, sin wij t’hoop mit gaur lüür wat mër sin as bloos bekand lüür. In anert tijd daue wij oos uk mit eer forsamle taum gaur tijdfordrijw häwe. Wosoo is dës ümgang gaut tau oos? Wij lëre air dem andrer mëre wërd geewe, un dat mökt dat lijb mang oos gröter. Dårweegen sin wij ümer beraid taum oos bruirers un swesters helpe wen sai problëms häwe. (Provérbios 17:17) Dat wij oos mit dai bruires un swesters fon oose gemaind t’hoophule, daue wij wijse dat wij oos bekümre air mit dem andrer. — 1 Coríntios 12:25, 26.

Wij daue dij taureere dat’s duu gaur ümgang häst mit lüür wat God sijne wile måke. Duu däist soo’ne ümgang fijne mang Jehovaas Tüügen. Dau ni erlaube dat dij nischt forbaire däit dij t’hoophule mit oos.

• Woweegen is soo gaut t’hoop sin upe forsamlunge?

• Wonair wist duu gërn oos gemaind kenelëre?

As dai airste kristen sich forsamle däire, sai däire singe, beere, leese un lëre dai Hailig Sriwt up ain gewöönlig årt. (1 Coríntios 14:26) Dat neemlig fijnst duu hüüt up oose forsamlunge.

Dat inlëren is fone Bijbel un nutslig dag for dag. Al sunåwent urer sündag, däit jërer gemaind sich forsamle taum ain Bijblisch Preeg hööre wat ine halwe stuun hule wart. Dës bijblisch preeg däit uutdüüre wosoo dai Hailig Sriwt nutslig is tau oos leewent un stimt hen tau oose tijd. Wij ale ware taureert taum dai sprüch in oose aigen Bijbel mitleese. Nå der bijblisch preeg, dat heft Wat Bekandmökt wart hule un lërt in aine stuun, woo ale fraihët häwe taum sich mile. Wart benutst air artikel taum lëren fon dat heft Wat Bekandmökt, wat oos helpt nå der bijblisch formånen leewe. Dat neemlig lëren wart måkt in mër as 110 duusende gemainde ine ganse wild.

Wij krijge hülp dat wij beeter inlëre koine. Dai week oiwer, daue wij uk ain forsamlung hule wat Oos Kristlig Leewent un Preegarbëd hit. Wat in dës forsamlung inlërt wart is fon dai Apostila da Reunião Vida e Ministério (Leewent un Preegarbëd – Moonatsheft), wat wij jërer moonat krijge. Dai forsamlung wart in drai stüke måkt. Dat airst is Daile mit Groote Wërd fon God sijn Woord, wat oos helpt beeter kene air stük fone Bijbel wat dai bruirers un swesters fone gemaind al t’huus leest häwe. Dat twait stük hit Måk dij Best upm Preegarbëd. In dës forsamlung, wek bruirers un swesters daue wijse wosoo wij beeter oiwer dai Bijbel mit dai lüür fortele koine. Nådem, air braurer giwt formånen oiwer wosoo wij beeter leese un inlëre koine. (1 Timóteo 4:13) Taum letste, dat stük wat Oos Kristlig Leewent hit, däit oos helpe dag for dag leewe nå dai wårhëte wat dai Bijbel inlërt. Is uk air stük bij mit frågen un antwoore, wat grötermökt wat wij fone Bijbel forståe.

Wen’s duu up ain fon oose forsamlunge kümst, åne twijbel däist dij bewuunre woo gaut as oos inlëren fone Bijbel is. — Isaías 54:13

• Wat kast duu up dai forsamlunge fon Jehovaas Tüügen hööre?

• Up wat fon for oose forsamlunge wist duu gërn kåme?

Häst duu al dai bijler in dit heft saie wosoo Jehovaas Tüügen sich gaut antreke taum up dai forsamlunge gåe? Woweegen daue wij oos bekümre taum oos gaut beklëre un uutsmüke?

Taum oose God ëre. Is wår dat God wijrer süüt as oos dat låte däit. (1 Samuel 16:7) Åwer, wen wij oos forsamle daue taum God anbeere, oos härtslig wünsch is em un oos bruirers un swesters ëre. Wen wij as müste for aine juijs upm gericht kåme, sicher däire wij nåkijke wat wij oos antreke däire weegen wij daue sijne amt achte. Up dai neemlig årt soo, as wij oos antreke un uutsmüke taum dai forsamlunge däit wijse dat wij ëre ‘der Juijs fone ganse ër’, Jehovaa God, un dai stel woo wij em anbeere. — Gênesis 18:25.

Taum wijse dai wårhëte fone Bijbel wat oos leewent lenke. Dai Bijbel foordret dat dai kristen sich ‘mit anständigkët un gaure forstand’ antreke. (1 Timóteo 2:9, 10) ‘Anständigkët’ bedüürt sich ni mit tüüg antreke wat formoost is, un sihëkig un wat der körper wist. Un nog, ‘gaure forstand’ häwe, helpt oos fain tüüg uutsuike wat in ordnung sin urer wat ni formoost sin. Dës wårhëte fone Bijbel erlaube nog dat jërer ainsig uutsuike kan wat em gefale däit. Åne wöör, koine wij ‘oose Rerer sij inlëren uutsmüke’ un ‘oose God ëre’ doir oos fainhët un gaure schik. (Tito 2:10; 1 Pedro 2:12) Dat wij oos gaut antreke tau oose forsamlunge, koine wij dai lüür helpe up ain gaur årt denke oiwer wosoo as wij Jehovaa anbeere.

Dau ni erlaube dat dij tüüg dij forbaire däit nå dai Köönigrëchsaal kåme. Oos tüüg bruukt ni düür un ni tau fain sin, åwer mut rëgen un fornünftig sin.

• Woweegen muite wij oos gaut beklëre taum God anbeere?

• Wat fon wårhëte fone Bijbel lenke oos beklëren un uutsmüken?

Wen’s duu dai Bijbel lëre däist mit Jehovaas Tüügen, kan sin dat’s duu dij beraide däist tau jërer lëren wat inlërt wart. Taum mër profijt häwe, wäir gaut dat neemlig foirheer måke wen’s duu up ain forsamlung ine gemaind gëst. Is feel beeter tau dij wen’s duu dës gewoonhët häst.

Dau uutsuike woo un wonair lëre. Won stuun is dij dat ruig an? Glijk morgens tijg, fom arbëd urer spårer åwents wen dai kiner al slåpe? Nog wen’s duu ni up lang tijd lërt krigst, dau dij tijd neeme dårtau un streng dij an dat dij nischt dai tijd forstööre däit. Set dij up ain ruig stel un dau al dat forstöören uutlijgre soo as der radium, televison un telefon. Beere airer as duu lëre däist, mökt dij kopbreeken fom dag wëniger un helpt dij taum God sij Woord lëre. — Filipenses 4:6, 7.

Mark dai antwoore un beraid dij taum dij milen. Airste, dau dai daile oiweral oiwerkijke. Denk an der titel fom artikel urer kapitel, dau grüüwle wosoo jërer uunertitel t’hooppasst mit dës tem. Denk uk oiwer dai bijler un frågen taum nådenken wat dai oiwerste daile wijse. Un den lees jërer paragraaf un fijn dai antwoort tau der fråg. Suik un lees dai bijbelssprüch wat maint sin un dau andenke wosoo dai dës daile bijståe. (Atos 17:11) Wen’s duu dai antwoort fijne däist, strijk dai urer mark wek oiwerste wöör wat dij helpe dai antwoort ine forsamlunge geewe. Den, wen’s duu wist, kast dijn hand hoog hule, un ain kord antwoort in dijn aigen wöör geewe.

Wen’s duu dai nijge daile lërst wat jërer week ine forsamlunge inlërt ware, däist duu mër forståen taureekne tau dijn ‘rijkhët’ fon dat wat’s duu fone Bijbel wätst. — Mateus 13:51, 52.

• Wat fon gewoonhët kast duu häwe taum dij beraide tau dai forsamlunge?

• Wosoo kast duu dij beraide taum dij mile upe forsamlunge?

Fone früüsche tijd an, wil Jehovaa dat dai famijlge sich ain tijd ruuterneeme taum t’hoop sin un dårdoir eene gloobe un ainigkët stark måke. (Deuteronômio 6:6, 7) Dårweegen daue Jehovaas Tüügen sich ain tijd jërer week ruuterneeme mit sijn famijlg taum God anbeere, fortele up ain härtslig årt oiwer daile fone Bijbel wat passend sin tau dat wat sai bruuke. Wen’s duu uk alaine wåne däist, dës tijd kan benutst ware taum näig an God kåme. Duu kast uutsuike wat’s duu laiwer lëre wist in dijn bijbelstuun.

Dat is ain tijd taum näig an Jehovaa kåme. ‘Kåmt näig an God, un hai kümt näig an juuch.’ (Tiago 4:8) Wij daue Jehovaa beeter kene wen wij lëre soo as hai is un wat hai mökt doir dat wat sreewe is in sij Woord. Ain licht årt taum ain bijbelstuun ine famijlg anfänge, is wek for dai tijd ruuterneeme taum dai Bijbel luur leese, amin någåe dat leesen fone Bijbel tau jërer week fone forsamlung Kristlig Leewent un Preegarbëd. Jërer ainsig fone famijlg kan wek sprüch leese, un den koine ale dåroiwer fortele un saie wat jërer ainsig lërt hät.

Dat is ain tijd taum ale ine famijlg t’hoop sin. Kërls un fruuges, papa, mama un kiner, sin sich ainig wen sai dai Bijbel lëre as ain famijlg. Dat mut ain fröölig un ruig tijd sin, wat jërer ainsig luure däit. Dai papa un mama koine artikels uutsuike wat nöörg sin tau jërer kind, amin fon A Sentinela un Despertai! (Wat Bekandmökt un Wåkt Up!) urer fon oose stel in internet, jw.org. Kan fortelt ware oiwer ain problëm wat dai kiner ine schaul hat häwe un wosoo sai dat doirsete koine. Anert dail wat kan måkt ware is TV JW kijke (in internet stel tv.jw.org) un nåheer fortele wat jërer ainsig lërt hät. Feel famijlge uiwe uk gërn dai lijrer wat sunge ware ine forsamlunge un nå der bijbelstuun amin kan man wat eete.

Dës schöön tijd jërer week benutse taum Jehovaa anbeere helpt jërer ainsig ine famijlg fruir häwe taum God sij Woord lëre, un hai däit dat anstrengen sër seegne. — Salmo 1:1-3.

• Woweegen daue wij oos tijd ruuterneeme tau dai bijbelstuun ine famijlg?

• Wosoo koine dai papa un mama måke dat dës tijd ain fruir is tau jërer ainsig ine famijlg?

Woweegen sin dës lüür soo fröölig? Sai sin up ain fon oos kongressen. Soo as God sijn dijners ine früüsche tijd — wat inlërt wäire taum drai groot kongressen upt jår hule —, daue wij uk oos kongressen mit groot forlang luure. (Deuteronômio 16:16) Jërer jår häwe wij drai groot forsamlunge: twai kongressen mit aine dag un ain kongress mit drai dåg. Wosoo helpe oos dai?

Sai stärke oos kristlig wildbraid famijlg. Soo as dai israeliten sich frööge däire taum Jehovaa låwe ‘up groot kongressen’, gåe wij uk gërn t’hoop taum Jehovaa up dëse groote forsamlunge anbeere. (Salmo 26:12, noot; 111:1) Dës forsamlunge erlaube oos dat wij Jehovaas Tüügen fone andrer gemainde un sogår fone andrer gëgende kenelëre. Dai mirdagstuun daue wij dår upe stel wat eete, un soo is licht nijg grootfründe måke. (Atos 2:42) Up dai, forneeme wij selwst dat lijb wat oos gans wildbraid famijlg mit bruirers un swesters ainig hült. —1 Pedro 2:17.

Sai helpe oos foirwärdsgåe im gloobe. Dai israeliten hare feel profijt fon der groote forsamlunge dat sai dai ‘wöör fone Hailig Sriwt forståe däire’. (Neemias 8:8, 12) Wij daue uk dat bijblisch inlëren feele wërd geewe wat wij up oose kongressen krijge. Jërer tem kümt fone Bijbel. Doir dai bijblische preege un fain foirstelen, daue wij lëre wosoo God sijne wile in oos leewent måke. Oos gloobe wart stark wen wij hööre der andrer eer fortelen wosoo sai foirwärdsgåe in eer kristlig leewent nog dat sai feel doirsete in dës swår tijd. Up dai kongressen mit drai dåg, foirstelen geewe der geschichte fone Bijbel leewent un daue oos gaut inlëre wosoo wij dårnå leewe koine. Up jërer kongress, lüür wat wijse wile dat sai sich tau God anbåre häwe, ware tauwt.

• Woweegen sin dai kongressen fröölig forsamlunge?

• Woweegen is gaut tau dij up ain kongress kåme?

Bits airer fon sijn dood, hät Jësus sägt: ‘Dës gaure nijges fon God sij Regirung ware preegt upe ganse bewånend ër, taum tüüge geewe tau al dai gëgende un den kümt dat ën.’ (Mateus 24:14) Åwer wosoo wöör dës preegarbëd ine ganse wild måkt? Doir Jësus sijn årt taum preegen nåmåke wat hai låte hät as hai upe Ër wääst is. — Lucas 8:1.

Wij forsuike mit dai lüür fortele in eer hüüser. Jësus hät sijn jüngers inlërt taum dai gaure nijges huus bij huus preege. (Mateus 10:11-13; Atos 5:42; 20:20) Dai wat preege däire im 1. jårhuunerd hare sijn aigen gëgend taum preegen. (Mateus 10:5, 6; 2 Coríntios 10:13) Neemlig soo, wart oos preegarbëd hüüt in ordnung hule, un jërer gemaind krijgt ain stel taum preegen. Dit erlaubt dat wij Jësus sijn ordnung horge taum ‘preege un gans genau tüüge geewe’. — Atos 10:42.

Wij daue oos anstrenge taum mit dai lüür fortele up jërer stel woo dai sin. Jësus hät weese wosoo dat måke as hai preegt hät up stele woo lüür wäire, soo as dicht am meer urer bijne wåterkwele wat jërer benutse däir. (Marcos 4:1; João 4:5-15) Soo as Jësus, wij daue oiwer dai Bijbel mit der lüür fortele up jërer stel woo sai sin: upe ruu, ine hanelstele, upm plats taum spatsijren urer doir telefons. Ümer wen passend is, daue wij uk oiwer oose gloobe fortele tau oos nåwerslüür, tau dai wat mit oos t’hoop arbëre un lëre ine schaul un fründe. Weegen al dit anstrengen, miljone lüür ine ganse wild koine ‘dai gaure nijges taum reren’ hööre. — Salmo 96:2.

Denk an aine mësche woo’s duu gërn mit fortele wist oiwer dai gaure nijges fon God sij Regirung un wat dai tau dem bedüüre. Dau dëse beschaid fon hofnung ni bloos tau dij forwåre. Dau oiwer dat fortele soo rasch as gët!

• Wat fon ‘gaure nijges’ muite preegt ware?

• Wosoo daue Jehovaas Tüügen Jësus sij preegen nåmåke?

Dat woord “pionijr” mëst ümer bedüürt air wat nijg gëgende upsuike däit un mökt der weeg up tau andrer lüür. Wij koine säge dat Jësus air pionijr wäir, weegen hai is upt Ër schikt woore taum aine beschaid preege wat der lüür eer leewent rere däit un hät der weeg upmåkt taum reren. (Mateus 20:28) Hüüt, Jësus sijn jüngers daue em nåmåke dat sai eer mëst tijd benutse taum ‘jüngers måke’. (Mateus 28:19, 20) Wek daue mithelpe in dat wat wij pionijrarbëd nene.

Air pionijr is air wat mëst tijd oiwer preege däit. Al Jehovaas Tüügen daue dai gaure nijges preege. Åwer wek häwe eer leewent inricht taum dijne as pionijrs, un dai daue 70 stuune jërer moonat arbëre upm preegarbëd. Dårtau, dai mëste arbëre bloos der halwe dag oiwer. Andrer ware uutsöcht taum dijne as al tijd pionijrs, woo mër Jehovaas Tüügen nöörg sin taum God sij Regirung preege. Dai gastijre 130 stuune urer nog mër jërer moonat upm preegarbëd. Dai pionijrs sin fröölig mit air gewöönlig leewent, un forlåte sich dat Jehovaa eer ümer geewe däit wat sai bruuke. (Mateus 6:31-33; 1 Timóteo 6:6-8) Feel, wat ni ümer pionijr sin koine, wen dat tau eer passt, daue sai dijne as hülpspionijrs un preege 30 urer 50 stuune upt moonat.

Dai pionijr mökt dat weegen sij lijb up God un dai lüür. Soo as Jësus, wij hüüt forspoire dat dai lüür dat inlëren oiwer God un sijne wile sër bruuke. (Marcos 6:34) Åwer wij häwe dat kenen wat eer nuu helpe kan, un ain sicher hofnung geewe tau dai tijd wat nog kümt. Weegen dat lijb wat dai pionijr hät oiwer dai näigster, däit dai feel fon sijne tijd un kraft geewe taum andrer helpe dai gaure nijges kenelëre. (Mateus 22:39; 1 Tessalonicenses 2:8) Dat mökt sijne aigen gloobe stark, un kümt nog näiger an Jehovaa un giwt em mër fruir. — Atos 20:35.

• Forstëst duu uutdüüre wat air pionijr mökt?

• Woweegen suike wek uut pionijr sin?

Al feel tijd lang, Jehovaas Tüügen geewe feele wërd dat inlëren fone Bijbel. Wart anbåre air inlëren wat uphaupt beraid is tau dai wat dijne as pionijrs im preegarbëd fon God sij Regirung, dat sai dat upt best årt måke. — 2 Timóteo 4:5.

Schaul fon dem Pionijrarbëd. Wen dai air jårlang pionijr wääst is, dem wart dai nöögt taum ain schaul måke söss dåg lang in ain Köönigrëchsaal. Dës schaul is taum dai pionijr helpe näig an Jehovaa kåme, dat sij preegarbëd oiweral beeter wart un reäl bijblijwe in sijn arbëd.

Schaul for dai wat God sij Regirung Preege. Dës schaul wat in twai moonats måkt wart, is taum dai pionijrs beraide wat al mër beleewt häwe un wat mit fraiwile uut eer wånstel ruutertreke un dijne woo mër hülp bruukt. Sai gåe nå dai årt taum preegen fon dem grötst ‘Pionijr’ wat hijr upe Ër dijnt hät, Jësus Kristus, as wen jërer for eer säge däir: ‘Hijr bün ik! Schik mij.’ (Isaías 6:8; João 7:29) Wijt wegtreke amin däit tauhööre air gewöönlig leewent anware. Dai moors, dat weerer un dat eeten sin amin gans aners as sai gewoont sin. Kan sin dat sogår nöörg is ain nijg språk lëre. Dës schaul helpt bruirers un swesters wat ni frijgt häwe un forfrigt sin, fon 23 bet 65 jåre, taum kristlig moors beeter måke wat for eer sër nöörg sin dat sai beeter Jehovaa un sijn gemaind mithelpe.

Bijbelschaul fon Gilead tau dai wat schikt sin taum preege. In hebräisch språk, ‘Gilead’ bedüürt ‘hoope stain taum tüüge geewe’. Fom inwijgen an in 1943, mër as 8 duusende wat uutlërt sin in dës schaul, sin schikt woore taum preegen ‘bet dat wijrst stük fone ër’ un dat hät wat gaures ruutergeewt. (Atos 13:47) As oos bruires un swesters wat uutlërt wäire in dai Gileadschaul nå Peru kåme sin, wäir kain gemaind in dat land. Hüüt sin dår mër as duusend gemainde. Dat sai anfunge häwe an preegen in Japão, wäire dår ni tëgen Jehovaas Tüügen. Hüüt sin feel mër as 200 duusend. Dai schaul wat fijw moonats lang in Gilead måkt wart, is taum God sij Woord gans genau lëre. Al tijd pionijrs, dai wat al schikt woore sin taum in aine gëgend preege, bruires un swesters fon Betel, urer dai ülster wat dai gemainde besuike koine nöögt ware tau dës schaul. Dår krijge sai düchtig inlëren tau dem wildbraid arbëd stärke un sicherhët geewe.

• Woo tau is dai Schaul fon dem Pionijrarbëd?

• Wee kan dai Schaul for dai wat God sij Regirung Preege måke?