KAaefeso
5 Onkee ano holeleni Kalunga, mu li oyana aaholike, 2 nokutsikila okukala mu na ohole ngaashi wo Kristus a kala e tu* hole, nokwa igandja omolwetu* onga eyambo li li ezimba lya nika nawa kuKalunga.
3 Ne aantu aayapuki, onkee ano inashi opala mokati keni mu uvike omilalo dha nyata,* kehe shoka inaashi yogoka, olwiho, 4 eihumbato tali sitha ohoni, oohapu dha nika uugoya, omashendjo guugoya, iinima, mbyoka itaayi opalele, ihe pehala lyaashono, kaleni hamu pandula Kalunga. 5 Oshoka ne yene omu shi shi nawa kutya omuntu, ngoka ha yi momilalo dha nyata,* omuntu, ngoka e na eihumbato inaali yogoka, nenge omunalwiho, ngoka a faathana nomulongeli gwiikalunga, ita ka thigulula nando Uukwaniilwa waKalunga, moka Kristus ta pangele.
6 Inamu etha mu pukithwe nando okomuntu noohapu dhowala, molwaashoka omolwiinima mbyoka, Kalunga ota ka geela mboka ihaaya vulika. 7 Onkee ano inamu ya holela; 8 oshoka nale omwa li momilema, ihe ngashingeyi, omu li muuyelele, sho mwa hangana nOmuwa. Tsikileni okweenda* ongoyana yuuyelele, 9 oshoka uuwanawa kehe, uuyuuki noshili, oyo iiyimati yuuyelele. 10 Kaleni hamu konakona kutya iinima yini tayi opalele Omuwa. 11 Ethii po okulonga iilonga yomomilema, kaayi na oshilonga; pehala lyaashono, yi anekeni pomutenya. 12 Oshoka iinima mbyoka haya ningi meholamo, otayi sitha nokuli ohoni okutumbulwa. 13 Iinima ayihe otayi hololwa* puuyelele, niinima ayihe ya hololwa oya ninga uuyelele. 14 Onkee ano okwa tiwa: “Penduka, ngoye, ngoka wa kotha, nokuyumuka kuusi, opo wu minikilwe kuuyelele waKristus.”
15 Onkee ano itonateleni lela, kaamu ende ngaashi omagoya, ihe ongaashi aanandunge. 16 Longitheni nawa ethimbo lyeni,* molwaashoka omasiku omawinayi. 17 Omolwoshinima shoka, inamu kala ngaashi omagoya, ihe kaleni hamu konakona mu mone kutya ehalo lyaJehova olini. 18 Shimwe ishewe, inamu kolwa komaviinu, oshoka ohaku ningitha omuntu kaa katuke pandunge,* ihe tsikileni okuudhithwa nombepo ondjapuki. 19 Hokololelathaneni omapisalomi, nokutanga Kalunga nomaimbilo gopambepo; imbileni Jehova omaimbilohambelelo momitima dheni. 20 Kaleni aluhe hamu pandula Kalunga, Tate yetu, omolwaayihe, medhina lyOmuwa gwetu Jesus Kristus.
21 Kehe gumwe na kale ha vulika kumukwawo, omolwokusimaneka* Kristus. 22 Aakulukadhi naya kale haya vulika kaasamane yawo, ngaashi haya vulika kOmuwa, 23 molwaashoka omusamane oye omutse gwomukulukadhi gwe, ngaashi owala Kristus e li omutse gwegongalo, ndyoka li li olutu lwe, noku li omuhupithi gwalyo. 24 Ngaashi owala egongalo hali vulika kuKristus, aakulukadhi nayo naya vulike kaasamane yawo miinima ayihe. 25 Aasamane, kaleni mu hole aakulukadhi yeni, ngaashi wo Kristus e hole egongalo nokwa igandja omolwalyo, 26 opo a vule oku li yapula, noku li yoge nomeya, ano noohapu dhaKalunga, 27 opo egongalo li kale lya yogoka koshipala she, lya yelithwa, lyaa na okapethili kasha, nenge egonyoto, nenge sha shilwe sha fa mpoka.
28 Aasamane naya kale ye hole aakulukadhi yawo, ngaashi ye hole omalutu gawo. Omulumentu, ngoka e hole omukulukadhi gwe, oku ihole wo ye mwene, 29 oshoka kaku na nando omulumentu e tonde olutu* lwe mwene, ihe ohe lu palutha noku lu sila oshimpwiyu, ngaashi owala Kristus he shi ningile egongalo, 30 molwaashoka otu li iilyo yolutu lwe. 31 “Omolwoshinima shoka, omulumentu oku na okuthiga po he nayina e ta imanga kumwe* nomukulukadhi gwe, naayehe yaali otaya ningi omuntu gumwe.”* 32 Oshiholekwa shika oshiyapuki osha simana. Otandi popi kombinga yaKristus nosho wo yegongalo. 33 Onkee ano kehe gumwe na kale e hole omukulukadhi gwe, ngaashi i ihole ye mwene. Kakele kaashono, omukulukadhi na kale a simaneka noonkondo omusamane gwe.