Omapulo ngoka haga pulwa olundji kaantu mboka ye na ohokwe

Ngele Kalunga omunahole, omolwashike mbela he etha uukolokoshi u kale po?

KALUNGA okwe etha uukolokoshi u kale po, naantu omamiliyona kombanda yevi ohaye u longo owina. Pashiholelwa, ohaya hingi iita, ohayu umbile aanona oomboma, ohaya hanagula po evi nohaye etitha oondjala. Aantu omamiliyona ohaya hili omakaya nohaya kwatwa kokankela yokomapunga, ohaya yono ondjokana nohaya mono omikithi hadhi taandele pamilalo, ohaya longitha sha pitilila oalkoholi e taya kwatwa kuuvu wehuli, nosho tuu. Aantu ya tya ngaaka inaya hala shili uukolokoshi auhe u hule po. Oya hala owala okugeelwa molwawo oko ku kuthwe po. Uuna taya teya shono ya kuna, ohaya lili taya ti: “Omolwashike shi na okuningilwa ndje?” Nohaya pe Kalunga uusama, ngaashi Omayeletumbulo 19:3 taga ti: “Uugoya womuntu ye mwene tau [yono] ondjila ye, nokwa tsa ondumbo nOmuwa omomwenyo gwe.” Ando Kalunga oku hulithe po okulonga uukolokoshi kwawo, ando otaya nyenyeta molwashoka inaya manguluka we oku wu longa!

Etompelo enene molwashike Jehova e etha uuwinayi u kale po, olyo okugandja eyamukulo keshongo lyaSatana. Satana Ondiaboli okwa ti kutya Kalunga ita vulu okutula aantu kombanda yevi mboka pethimbo lyomamakelo taya ka kala shili ya dhiginina muYe. (Job 1:6-12; 2:1-10) Jehova okwe etha Satana a kale po opo a mone ompito okuulika ngele eshongo lye oli li ngaa mondjila. (Eksodus 9:16) Satana ota tsikile okweeta ngashingeyi ooyaye, okupilula ko aantu kuKalunga, manga ta kambadhala okuulika ngele eshongo lye oli li ngaa mondjila. (Ehololo 12:12) Ihe Job okwa kala a kakatela uudhiginini we. Jesus osho wo a ningi. Aakriste yashili osho taya ningi ngashingeyi.—Job 27:5; 31:6; Mateus 4:1-11; 1 Petrus 1:6, 7.

Onda hala okwiitaala shi na ko nasha neviparadisa moka aantu taya ka kala nomwenyo sigo aluhe, ihe osho ngaa mbela tashi ka kala ngawo shili?

Osho shi li ngawo paMbimbeli. Otashi monika sha fa itaashi vulu okwiitaalwa molwashoka owala aantu uuwinayi ya kala ye u shi nale uule womathelemimvo ogendji noonkondo. Jehova okwa shiti evi nokwa lombwele aantu ye li udhithe naalumentu naakiintu aayuuki mboka taya ka sila oshimpwiyu iimeno niinamwenyo noku li gamena li kale tali monika nawa pehala lyoku li hanagula po. (Tala epandja 12 no 17.) Oparadisa ndjoka yu uvanekwa kashi shi oshidhigu noonkondo oku yi itaala, shila onkalo ndjoka yi li po ngashingeyi yinikitha oluhodhi oyo ombwinayi noonkondo okutsikila okukala po. Oparadisa otayi ke yi pingena po.

Ongiini mbela tandi vulu okuyamukula aantu mbono taya sheke taya ti kutya Ombimbeli oyo ongano noitayi tsu kumwe nuunongononi?

Eitaalo momauvaneko ngaka kali shi omaitaalela. “Eitaalo ohali zi mokuuva.” Ngele omuntu to konakona Oohapu dhaKalunga, uunongo wadho ohau ningi wa yela kungoye neitaalo lyoye ohali koko.—Aaroma 10:17; Aaheberi 11:1.

Uunongononi wokulafulula iikulunima yi na ko nasha nOmbimbeli otau koleke oshindji shuulela wondjokonona yOmbimbeli. Uunongononi woshili otau tsu kumwe nOmbimbeli. Ooshili tadhi landula odha kala mOmbimbeli okuza nale manga dha li inaadhi monika kaalongwantu yuuyuni: elandulathano lyokutungwa kwevi, kutya evi oli li ongonga, kutya olya tengelela pokuma pwaa na sha, nonokutya uudhila ohau tembuka okuza kehala limwe nokuya kulilwe.—Genesis, ontopolwa 1; Jesaja 40:22, KB; Job 26:7; Jeremia 8:7.

Omahunganeko ngoka ga gwanithwa otagu ulike kutya Ombimbeli oya nwethwa mo kuKalunga. Daniel okwa hunganeke komeho yethimbo edhikopo nokuteka po kwomapangelo omanankondo guuyuni, nosho wo ethimbo sho Messias te ke ya nota ka dhipagwa. (Daniel, ontopolwa 2, 8; 9:24-27) Omahunganeko omakwawo ogi ipyakidhila okugwanithwa nena, ngoka tagu ulike ethimbo lyetu li li “omasiku omahugunina.” (2 Timoteus 3:1-5; Mateus, ontopolwa 24) Oshi li itaashi wapa opo omuntu a kale e na ontseyo yokutseya shoka tashi ka ningwa komeho. (Jesaja 41:23) Opo u mone uuyelele oundji, tala omambo The Bible—God’s Word or Man’s? na Is There a Creator Who Cares About You?, ga nyanyangidhwa kuJehovah’s Witnesses.

Ongiini mbela tandi vulu okwiilonga okuyamukula omapulo kombinga yOmbimbeli?

Ou na okukonakona Ombimbeli nokutedhatedha shoka wa lesha mo, nopethimbo opo tuu mpoka pula ombepo yaKalunga yi ku wilike. (Omayeletumbulo 15:28; Lukas 11:9-13) Ombimbeli otayi ti: “Ngele ku na ngoka gwomune ta pumbwa oondunge, oye ne dhi indile kuKalunga, ngoka ha gandjele ayehe nuuhokwe, ye iha nyenyeta, oye note dhi pewa.” (Jakob 1:5) Opu na wo iileshomwa yokukonakona Ombimbeli moka tatu vulu okukonga omayele. Olundji aantu oya pumbwa ekwatho lyayalwe, ngaashi sho Filippus a li a konakona nOmweetiopia. (Iilonga 8:26-35) Oonzapo dhaJehova ohadhi ningi omakonakonombimbeli oshali pomagumbo gaantu mboka ye na ohokwe. Kala wa manguluka okupula ekonakono lya tya ngaaka.

Omolwashike mbela aantu oyendji haya pataneke Oonzapo dhaJehova nohaya ti kutya inadhi konakona nangame?

Euvitho lyaJesus olya li lya patanekwa, nokwa ti kutya aalanduli ye otaya ka patanekwa wo. Sho yamwe ya li ya kumithwa kelongo lyaJesus, aapataneki yopalongelokalunga oya yamukula nongeyo taya ti: “Nane wo omwa hongololwa? Oku na tuu nando gumwe gwomaakuluntu e mu itaala, nenge gumwe gwomaafarisayi?” (Johannes 7:46-48; 15:20) Oyendji mboka taya ti kutya Oonzapo inadhi konakona nangoye, kaye na sho ye shi nenge oye na okayoya. Oonzapo nadhi konakone nangoye, e to tala mwene ngele euvoko lyoye lyokuuva ko Ombimbeli otali indjipala nenge hasho.—Mateus 7:17-20.

Omolwashike Oonzapo hadhi talele po aantu mboka ye na omaitaalo gawo?

Moku shi ninga otaya landula oshiholelwa shaJesus. Ye okwa yile kAajuda. Aajuda oya li ye na eitaalo lyawo, ihe momikalo odhindji oya kala ihaaya dhiginine we Oohapu dhaKalunga. (Mateus 15:1-9) Iigwana ayihe oyi na omaitaalo goludhi lwontumba nolwongandi, kutya nduno oongono tagi iti ogopaKriste nenge oongoka kaage shi gopaKriste. Osha simana noonkondo opo omalongo gaantu ga kale taga tsu kumwe nOohapu dhaKalunga mwene, noonkambadhala dhOonzapo oku ya kwathela ye shi ninge odho euliko lyohole yokuhola yakwawo.

Oonzapo odhi itaala mbela kutya eitaalo lyadho olyo owala li li mondjila?

Kehe gumwe ngoka a tala ko eitaalo lye olyo oshinima sha kwata miiti, oku na okudhiladhila kutya olyo eitaalo ndyoka li li mondjila. Ando okwa li hasho, ando omolwashike mbela e li mulyo? Aakriste otaya kumagidhwa taku ti: “Konakoneni ayihe, ne mu dhiginine shoka oshiwanawa.” (1 Aatessalonika 5:21) Omuntu oku na okushilipaleka ngele shoka i itaala otashi shilipalekwa mOmanyolo, oshoka oku na owala eitaalo lyashili limwe alike. Aaefeso 4:5 otaye shi koleke, mpoka taya popi taya ti kutya “Omuwa ogumwe, neitaalo limwe [neninginitho, NW] limwe.” Jesus ina tsa kumwe netaloko lyonena kutya oku na oondjila odhindji nenge omaitaalo ogendji ngoka agehe taga fala kehupitho. Pehala lyaashono okwa ti: “Osheelo shiyaka oshishona nondjila ndjiyaka ya thinana, otayi fala komwenyo, naashona yowala mboka taye yi mono.” Oonzapo dhaJehova odhi itaala kutya odhe yi mona. Ando okwa li hasho, ando odha ka konga eitaalo lilwe.—Mateus 7:14.

Odhi itaala mbela kutya odho owala tadhi ka hupithwa?

Aawe. Aantu omamiliyona mboka ya li ko momathelemimvo ga piti mboka ya li kaaye shi Oonzapo dhaJehova, otaya ka yumuka notaya ka mona ompito yokukala ishewe nomwenyo. Aantu oyendji mboka ye na omwenyo ngashingeyi otaya vulu natango okukala ya gama kombinga yoshili nuuyuuki manga “uudhigu uunene” inau tameka, e taya ka hupithwa. Kakele kaashono, Jesus okwa ti katu na okupangulathana. Tse ohatu tala kombanda; Kalunga oha tala momutima. Oha tala nuukeka e ta pangula nohenda. Epangulo okwe li gandja miikaha yaJesus, hayetu.—Mateus 7:1-5; 24:21; 25:31.

Omayambidhidho gopashimaliwa ga tya ngiini ga tegelelwa ga gandjwe kwaamboka haya kala pokugongala kwOonzapo dhaJehova?

Shi na ko nasha nomayambidhidho gopaimaliwa, omuyapostoli Paulus okwa ti: “Kehe ngoka na gandje ngaashi omwenyo gwe tagu mu lombwele, hanuundjamukudhi nenge kethiminiko; oshoka Kalunga e hole ngoka ta gandja nenyanyu.” (2 Aakorinto 9:7) PIinyanga yUukwaniilwa nopomahala giigongi yOonzapo dhaJehova, ihapu umbwa nando oongalo. Uuketha ohau tulwa pomahala tago opalele mpoka kehe gumwe ngoka e na ehalo okugandja omayambidhidho ta vulu oku shi ninga. Kapu na ngoka ha kala e shi kutya yalwe oya tula mo shi thike peni nenge ngele oya tula mo sha. Yamwe otaya vulu okugandja oshindji ye vule yakwawo; yamwe otashi vulika itaaya vulu okugandja nando osha. Jesus oku ulike shoka shi li etaloko lyu uka sho a ti sha kombinga yoshiketha shomayambo motempeli muJerusalem nokombinga yaamboka ya gandja omayambidhidho: Okuvula kwomuntu okugandja nosho wo ombepo moka ta gandja oyo tayi ti sha, hamwaalu gwoshimaliwa.—Lukas 21:1-4.

Ngele onda ningi gumwe gwomOonzapo dhaJehova, mbela otandi ka tegelelwa ndi uvithe ngaashi dho hadhi shi ningi?

Uuna omuntu wu udha ontseyo yokutseya Oparadisa yokevi yu uvanekwa kohi yUukwaniilwa waKristus, oho kala wa hala oku yi tseyithila yalwe. Nangoye osho to ka kala wa hala okuninga. Oyo onkundana ombwanawa.—Iilonga 5:41, 42.

Oshi li omukalo gwa simana okuulika kutya ngoye omulongwa gwaJesus Kristus. MOmbimbeli, Jesus okwi ithanwa “onzapo ondhiginini nomunashili.” Sho a li kombanda yevi, okwa li u uvitha ta ti: “Uukwaniilwa wegulu owa hedha popepi,” nokwa li a tumu aalongwa ye ya ninge sha faathana. (Ehololo 3:14, NW; Mateus 4:17, KB; 10:7, KB) Konima yethimbo Jesus okwa lombwele aalanduli ye ta ti: “Indeni ano, ka ningeni aantu [yomiigwana ayihe, NW] aalongwa yandje . . . noku ya longa.” Okwa li wo a hunganeke kutya manga ehulilo inaali ya, ‘onkundana ndjika ombwanawa yuukwaniilwa otayi ku uvithwa mevi alihe ekaliwa yi ningile iigwana ayihe uunzapo.’—Mateus 24:14, NW; 28:19, 20.

Opu na omikalo odhindji dhokuuvitha onkundana ombwanawa ndjika. Okukundathana nookuume naatseyikile olundji ohaku gandja ompito yoku shi ninga. Yamwe ohaye shi ningi okupitila mokunyola oontumwafo nenge mokudhenga ongodhi. Yalwe ohaya tumu iileshomwa mopoosa yi na uuyelele mboka taya dhiladhila unene tuu kutya aatseyikile otaye ke u hokwa. Molwaashoka inadhi hala okupitilila po gumwe, Oonzapo ohadhi yi egumbo negumbo netumwalaka ndika.

Ombimbeli oyi na ehiyo ndika lyohole tali ti: “Ombepo [nomuyalekwa] otaa ti: Ila! Naangoka tu uvu, na tye: Ila! Naangoka a si enota, ne ye, naangoka a hala, na taambe omeya gomwenyo omagano.” (Ehololo 22:17) Okulombwela yalwe kombinga yEviparadisa nomayambeko gayo osho oshinima shi na okuningwa nehalo ewanawa, tashi zi komutima gu udha ehalo okutseyitha onkundana ndjika ombwanawa.

Otu na uushili kutya ou na omapulo galwe kombinga yOonzapo dhaJehova nomalongo gadho. Tashi vulika iinima yilwe tayi vulu okweeta oontamanana. Otwa hala okuyamukula omapulo goye. Moshileshomwa shika kamu na ehala olindji, onkee ano tatu ku lombwele u ga pule Oonzapo dhopune. Oto vulu oku shi ninga pokugongala kwadho pIinyanga yUukwaniilwa nenge uuna tadhi ku talele po pegumbo lyoye. Nenge oto vulu okutuma omapulo goye koJehovah’s Witnesses, to longitha yimwe yomoondjukithi ndhoka dhi li pevi ndjoka yi li popepi nangoye.