Oshitopolwa 2
Ongiini to vulu okwiilonga oshili kombinga yaKalunga?
1, 2. Ethaneko lini tali ulike kutya omuthikampango gwokutokola iinima yopalongelokalunga ogwa pumbiwa?
ONGIINI mbela tatu vulu okutseya Kalunga? Mbela osha pumbiwa tu konakone omalongo agehe gomalongelokalunga ogendji? Shika itashi wapa. Nokuli nando otwa li tatu vulu oku shi ninga, ando ongiini mbela tatu tseya kutya elongo lini li li mondjila?
2 Dhoshili, molwashoka opu na omalongo ogendji gi ili nogi ili kombinga yaKalunga, otwa pumbwa omukalo gwokutseya shoka shoshili, omuthikampango ngoka aantu taya vulu okuzimina. Oku shi thaneka: Natu tye kutya pomalandelo otapu tsuwa oompata kombinga yuule woshitetela shoshiyata. Omulandithi ota ti kutya oshiyata oshi na oometa ndatu, ihe omulandi ota dhiladhila kutya oshishona. Mbela oompata otadhi vulu okukandulwa po ngiini? Omokuyeleka oshiyata shono noshimetitho.
3. Omolwashike Ombimbeli ya nyolelwa?
3 Opu na mbela oshimetitho nenge omuthikampango gwokutokola iinima yopalongelokalunga? Eeno, osho Ombimbeli. Kalunga okwa nyolitha Ombimbeli opo aantu shaampono ya vule okwiilonga oshili kombinga ye. Oombimbeli omamiliyona omayuvi odha li dha nyanyangidhwa. Oya tolokwa ya gwana po nenge muutopolwa, momalaka ge vulithe 2 100. Konyala kehe gumwe ota vulu okulesha oshili kombinga yaKalunga melaka lye mwene.
4. Ombimbeli oyi na uuyelele uni?
4 Ombimbeli oyo omagano ge na ondilo ga za kuKalunga. Otayi yelitha iinima mbyoka ando inaatu vula nando oku yi tseya. Otayi tu lombwele kombinga yaamboka ye li mehala lyopambepo. Otayi holola omadhiladhilo gaKalunga, uuntu we nelalakano lye. Otayi popi nkene a kala naantu oomvula omayuvi dha piti. Otayi popi iinima mbyoka tayi ka ningwa monakuyiwa. Notayi tu ulukile nkene tatu vulu okumona ondjila ndyoka tayi fala komwenyo gwaaluhe.
Molwashike to vulu okwiitaala Ombimbeli
5. Oshiholelwa shini tashi ulike kutya Ombimbeli otayi tsu kumwe nuunongononi?
5 Opu na omatompelo ogendji kutya omolwashike tatu vulu okwiitaala kutya Ombimbeli oyo shili Oohapu dhaKalunga. Etompelo limwe olyo kutya Ombimbeli otayi tsu kumwe nuunongononi. Methimbo lyonale, aantu muuyuni auhe oya li ya dhiladhila kutya evi olya thikama kusha. Pashiholelwa, muAfrika lyokUuninginino, aantu nale oya li yi itaala kutya evi olya ambidhidhwa keyoka lyi igonya, li na oondja 3 500 kombanda yevi noondja 3 500 kohi yevi. Ihe metsokumwe nuunongononi, omunyoli gwOmbimbeli ngoka a nyola oomvula dhi vulithe 3 500 dha piti okwa ti kutya Kalunga “evi ote li tengelelekele pokuma [pwaa] na sha.”—Job 26:7.
6. Euliko enenenene lini tali ulike kutya Ombimbeli oya za kuKalunga?
6 Euliko enenenene kutya Ombimbeli oya za shili kuKalunga olyo kutya oya hunganeka aluhe oshili shi na ko nasha nonakuyiwa. Mepingathano naahunganeki yopantu, Kalunga oku shi shili onakuyiwa; shaashono a popya ohashi ningi aluhe shoshili.
7. Omahunganeko gamwe gOmbimbeli geni ga li ga gwanithwa methimbo lya piti?
7 Omahunganeko gOmbimbeli omathele oga li ga gwanithwa methimbo lyonale. Pashiholelwa, oomvula 700 dha tetekele, Ombimbeli oya popile oshili ya ti kutya Jesus ota ka valelwa moshilando Betlehem, naashika osho sha ningwa. (Mika 5:1; Mateus 2:3-9) Kakele komahunganeko galwe ogendji kombinga yaJesus, Ombimbeli oya hunganeke wo kutya ye ota ka valwa komukadhona nolwahugunina ota ka gwaalekwa niisilveri 30. Omahunganeko ngoka nago wo oga gwanithwa. Dhoshili, kapwa li omuntu ta vulu okuhunganeka iinima mbyoka!—Jesaja 7:14; Sakaria 11:12, 13; Mateus 1:22, 23; 27:3-5.
8. Omahunganeko gamwe gOmbimbeli ogeni taga gwanithwa nena, notagu ulike shike?
8 Omahunganeko ogendji gOmbimbeli oge li taga gwanithwa methimbo lyetu. Mpaka opu na gamwe gomugo:
“Oshigwana tashi tsu ondumbo noshigwana oshikwawo [miita], noshilongo tashi tsu ondumbo noshilongo oshikwawo, nohaku ningi omakakamo omadhigu gevi nomalega golukayu komikunda nomikunda, nuulumbu.”—Lukas 21:10, 11.
‘Uulunde otau ka kala wa lunda.’—Mateus 24:12.
“Omasiku omahugunina . . . aantu taa ka kala nokwiihola noye na uuhalu weliko, . . . ihaa vulika kaakuluntu, . . . aakaaneidhiliko, omaligi, aatondi yuuwanawa, . . . aatuwalali, aaholiihulo komeho gaKalunga.”—2 Timoteus 3:1-5.
Mbela ito zimine kutya iinima mbika otayi ningwa nena? Uushili nuulela womahunganeko gOmbimbeli otau ulike kutya Ombimbeli kayi shi embo lyowala. Oyo Oohapu dhaKalunga dha nwethwa mo!—2 Timoteus 3:16.
Mbela Ombimbeli oya lundululwa?
9, 10. Oshike tashi ulike kutya Kalunga ine etha aantu ya lundulule Ombimbeli?
9 Natu tye ando ou li mwene gwofabilika yontumba nowa tulila po aaniilonga yoye omusholondondo gwoompango kekatha lyomatseyitho. Ngele omutondi gumwe okwa lundulula shoka wa nyola, mbela oto ka ninga shike? Mbela ito ko opaleka shono sha lundululwa? Komukalo gwa faathana, Kalunga iha pitike aantu ya lundulule oshili yOohapu dhe, Ombimbeli.
10 Mboka ya kambadhala okulundulula omalongo gOohapu dhaKalunga inaye shi pondola. Ngele tatu yelekanitha Ombimbeli ndjoka tu na nena nOmbimbeli yonale, otatu mono kutya odha faathana. Shika otashi ulike kutya Ombimbeli inayi lundululwa muule woomvula dha piti.