Ontopolwa 8

Opu na yalwe ye tu vule

ONDI na uushili kutya oto shi zimine kutya opu na yalwe ye tu vule muunene nomoonkondo. Mbela oto ti olye omunene e tu vule?— OJehova Kalunga. Ongiini kombinga yOmwana, Omulongi Omunene? Mbela naye oku tu vule?— Osho lela, oku tu vule.

Jesus okwa li a kala pamwe naKalunga megulu. Okwa li Omwana gwaKalunga gwopambepo nenge tu tye omuyengeli. Mbela Kalunga okwa li a shita ishewe aayengeli yalwe nenge oyana yopambepo?— Eeno, okwa li a shita aayengeli omamiliyona ogendji. Aayengeli mboka oye tu vule wo noye na oonkondo ye tu vule.—Aahebeli 1:7; Daniel 7:10.

Mbela oto dhimbulukwa edhina lyomuyengeli ngoka a li a popi naMaria?— OGabriel. Okwa li a lombwele Maria kutya okanona ke ota ka kala Omwana gwaKalunga. Kalunga okwa li a tula omwenyo gwOmwana gwopambepo moshivalelo shaMaria opo Jesus a vule okuvalwa e li okanona kombanda yevi.—Lukas 1:26,27.

Mbela oshikumithalonga shoka owe shi itaala? Owi itaala mbela kutya Jesus okwa li a kala pamwe naKalunga megulu?— Jesus okwa ti kutya okwa li a kala pamwe naye. Mbela Jesus okwa li e shi tseya ngiini? Jesus sho a li omushona, otashi vulika Maria a li e mu lombwele shoka sha li sha popiwa kuGabriel. Otashi vulika Josef naye wo a li e mu lombwele kutya Kalunga oye He gwolela.

Sho Jesus a ninginithwa, Kalunga okwa li a popi nokuli okuza megulu ta ti: “Nguka oye Omumwandje.” (Mateus 3:17) Uusiku wa tetekele eso lye, Jesus okwa li a galikana a ti: “Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.” (Johannes 17:5) Eeno, Jesus okwa li a pula a shune megulu opo a ka kale ishewe pamwe naKalunga. Ongiini shoka tashi vulika?— Ongele owala Jehova Kalunga e mu ningi ishewe omuntu gwopambepo ihaa monika, nenge omuyengeli.

Ngashingeyi onda hala oku ku pula epulo lya simana. Mbela aayengeli ayehe oya li aawanawa? Oto dhiladhila ngiini?— Petameko aayengeli ayehe oya li aawanawa. Osha li ngawo molwaashoka Jehova oye e ya shita, naashihe shoka a shita oshiwanawa. Ihe gumwe gwomaayengeli okwa ningi omwiinayi. Mbela shika oshe ende ngiini?

Opo tu mone eyamukulo, otu na okutala kehokololo li na ko nasha nethimbo sho Kalunga a shiti omulumentu nomukiintu gwotango, Adam naEva. Aantu yamwe ohaya ti kutya ehokololo kombinga yawo oli li owala ongano. Ihe Omulongi Omunene okwa li e shi kutya olyoshili.

Sho Kalunga a shiti Adam naEva, okwe ya tula moshikunino oshiwanawa mehala hali ithanwa Eden. Osha li oparka nenge oparadisa. Oya li taya vulu okukala ye na aanona oyendji, uukwanegumbo uunene nokukala mOparadisa sigo aluhe. Ihe oya li ye na okwiilonga oshiilongomwa shimwe sha simana. Oshiilongomwa shoka ooshoka twa kundathana nale kombinga yasho. Natu tale ngele otatu shi dhimbulukwa.

Jehova okwa lombwele Adam naEva kutya otaya vulu okulya iiyimati ayihe mbyoka ya hala komiti dhomoshikunino. Ihe opwa li omuti gumwe ngoka kaaya li ye na okulya kugo. Kalunga okwe ya lombwele kutya oshike tashi ka ningwa po ngele oya li ko. Okwa ti kutya otaya ‘ka sa shili.’ (Genesis 2:17) Ano oshiilongomwa shini Adam naEva ya li ye na okwiilonga?—

Osha li oshiilongomwa shevuliko. Eeno, opo tu kale nomwenyo otu na okuvulika kuJehova Kalunga. Kasha li owala sha gwana Adam naEva ya popye kutya otaya ka vulika kuye. Oya li ye na oku shi ulika okupitila mwaashoka haya ningi. Ando oya vulikile kuKalunga, ando oyu ulike kutya oye mu hole noya hala a kale Omupangeli gwawo. Nokungawo, ando oya vulu okukala nomwenyo sigo aluhe mOparadisa. Ihe mbela osha li tashi ku ulika shike ngele oya li ko komuti?—

Osha li tashi ku ulika kutya kaya li ya pandula shili iinima mbyoka Kalunga e ya pa. Mbela ando omo wa li, ando owa vulika ngaa kuJehova?— Petameko Adam naEva oya li haya vulika. Ihe konima yethimbo gumwe ngoka e ya vule okwa li a pukitha Eva. Okwe mu ningitha a kale inaa vulika kuJehova. Omuntu ngoka oye lye mbela?—

Ombiimbeli otayi ti kutya eyoka olyo lya li lya popi naEva. Ihe owa tseya kutya eyoka ihali popi. Ano osha li she ende ngiini opo li popye naEva?— Omuyengeli oye a li e li ningitha li kale lya fa olyo tali popi. Ihe osha yela kutya omuyengeli oye a li ta popi. Omuyengeli okwa li a tameke okudhiladhila iinima iiwinayi. Okwa li a hala Adam naEva ye mu longele. Omuyengeli ngoka okwa li a hala ya ninge iinima mbyoka te ya lombwele. Okwa li a hala ondondo yaKalunga.

Kungawo, omuyengeli omwiinayi okwa tula omadhiladhilo ga puka momadhiladhilo gaEva. Okwa popi okupitila meyoka a ti: ‘Kalunga ine mu lombwela oshili. Itamu si ngele omwa li komuti ngoka. Otamu ka kala aanandunge mwa fa Kalunga.’ Mbela ando ongoye, ando owi itaale shoka sha popiwa kewi ndyoka?—

Eva okwa tameke okukala a hala oshinima shoka Kalunga a li inee shi mu pa. Okwa li oshiyimati shokomuti ngoka a li i indikwa. Opo nduno okwa pe wo Adam. Adam ka li itaala shoka sha popiwa keyoka. Ihe okwa li a hala okwoopalela Eva, pehala lyokwoopalela Kalunga. Onkee ano, naye okwa li komuti ngoka.—Genesis 3:1-6; 1Timoteus 2:14.

Mbela oshilanduliko osha li shike?— Adam naEva kaya li we ya gwanenena, oya tameke okukulupa e taya si. Molwaashoka oya li inaaya gwanenena, aanona yawo ayehe nayo oya li inaaya gwanenena nokonima yethimbo oya tameke okukulupa e taya si. Kalunga ka li a popya iifundja. Opo tu kale nomwenyo, otwa pumbwa okuvulika kuye. (Aaroma 5:12) Ombiimbeli otayi tu lombwele kutya omuyengeli ngoka a fundju Eva ohi ithanwa Satana Ondiaboli, naayengeli yalwe mboka ya ningi aawinayi ohayi ithanwa oompwidhuli.—Jakob 2:19; Ehololo 12:9.

Mbela ngashingeyi owu uvite ko kutya omolwashike omuyengeli omwaanawa ngoka a shitwa kuKalunga a ka ninga omwiinayi?— Omolwaashoka okwa tameke okudhiladhila iinima iiwinayi. Okwa li a hala okukala a simana. Okwa li a tseya kutya Kalunga okwa lombwela Adam naEva ya mone aanona nokwa hala ya kale haye mu longele. Ondiaboli oya li ya hala okuningitha kehe gumwe a kale ihaa vulika kuJehova. Onkee ano, ohayi kambadhala okutula omadhiladhilo omawinayi momadhiladhilo getu.—Jakob 1:13-15.

Ondiaboli otayi ti kutya kapu na ngoka e hole Jehova shili. Otayi ti kutya ngoye nangame katu hole Kalunga nonokutya inatu hala shili okulonga shoka te tu lombwele. Otayi ti wo kutya ohatu vulika owala kuJehova ngele iinima tayi tu endele nawa. Mbela oyi li mondjila? Mbela osho tu li ngawo?

Omulongi Omunene okwa ti kutya Ondiaboli omufundja. Sho Jesus a vulika kuJehova, oku ulike kutya oku mu hole shili. Jesus ina vulika owala kuKalunga uuna sha li oshipu kuye. Okwa kala aluhe ha vulika nokuli nuuna aantu yalwe ye shi ningi oshidhigu kuye okuvulika. Okwa li u ulike uudhiginini kuJehova sigo okeso lye. Osho molwaashono Kalunga e mu yumudha a kale nomwenyo sigo aluhe.

Ano oto ti kutya olye omutondi gwetu omunenenene?— Eeno, oSatana Ondiaboli. Mbela oho vulu oku mu mona?— Aawe. Ihe otu shi shi kutya oko e li nonokutya oku tu vule noku na oonkondo e tu vule. Ihe nando ongaaka, olye e vule Ondiaboli?— OJehova Kalunga. Onkee ano, otu shi shi kutya Kalunga ota vulu oku tu gamena.

Lesha kombinga yaangoka tu na okulongela: Deuteronomium 30:19, 20; Josua 24:14, 15; Omayeletumbulo 27:11 nosho wo Mateus 4:10.

[Ethano pepandja 47]

Maria naJosef otashi vulika ya li ya lombwele Jesus shike?

[Ethano pepandja 48]

Ongiini Adam naEva ya li taya vulu okukala nomwenyo sigo aluhe mOparadisa?

[Ethano pepandja 50]

Olye a li ta ningitha eyoka li popye naEva?

[Omathano pepandja 50]

Oshike sha li sha ningilwa Adam naEva sho inaaya vulika kuKalunga?