Uuyuni mbuka owu uka peni?
Omaupyakadhi ga kwata miiti nosho wo iiningwanima tayi halutha oya ninga oonkundana dhakehe esiku muuyuni auhe. Shika osha hala okutya shike mbela?
EGAMENO LYOPAUMWENE: Oomboma otadhi topa momahala gomalandithilo. Aalongisikola naanasikola otaya yahwa mosikola. Aanona otaya yakwa po manga aavali yawo kaaye shi wete. Aakiintu naalumentu aakokele otaya yugwa iinima yawo omutenya gu tsa.
ONKALO YOPALONGELOKALUNGA: Oongeleka otadhi ambidhidha oongundu ndhoka tadhi kondjithathana miita. Aawiliki yopambepo otaya pangulwa omolwedhipago lyopamihoko. Aapristeli otaya ningilile mo aagundjuka pamilalo; oongeleka iinima mbyoka otadhi yi holeke. Okuya kongeleka okwa shuna pevi; omatungo goongeleka otaga landithwa po.
OMUDHINGOLOKO: Omakuti otaga tetwa po molwokuninga oongeshefa. Iiheke otayi kewa po koohepele opo dhi mone iikuni. Omeya gomevi oga nyatekwa noga nika oshiponga nokunuwa. Okuyula oohi okwa yonwa kondoya ndjoka hayi zi moofabulika nosho wo komikalo dhimwe dhopashinanena dhokuyula oohi. Enyateko lyombepo otali sitha oshimpwininika.
UUHUPILO: Iiyemo yomuntu kehe yaakalimo yomuAfrika kuumbugantu waSahara oya kundanwa yi thike konyala po N$3 500 komumvo. Olwiho lwaawiliki yomahangano otalu etitha okuteka po kwoongeshefa, shoka tashi thigi aantu omayovi kaaye na iilonga. Okukengelela otaku ningitha aapunguli yiimaliwa ya kanithe iimaliwa ayihe mbyoka ya pungula monkalamwenyo yawo.
OMPUMBWE YIIKULYA: Aantu 800 000 000 lwaampono muuyuni auhe ohaya ka lala aluhe nondjala.
IITA: Aantu ye vulithe po 100 000 000 oya kanitha oomwenyo dhawo omolwiita methelemimvo eti-20. Opu na iilwitho yopalute ya gwana okuhanagula po aantu ayehe e tapu hupu natango oyindji nokuli. Opu na iita yopashigwana. Uukulo otau ende tau kwata ko uuyuni auhe.
OMIKITHI DHOLUKWAU NOMIKITHI DHILWE: Egwililila lyaSpania olya dhipaga aantu 21 000 000 mo 1918. Ngashingeyi oAIDS oya ninga “omukithi omuhanaguli noonkondo mondjokonona yaantu.” Okankela nuuvu womutima oye eta oluhodhi muuyuni auhe.
Ino tala owala konkundana yimwe ayike. Mbela iiningwanima mbyoka otayi ningwa mpaka naampeyaka? Nenge oyi li oshitopolwa shiiningwanima mbyoka tayi ningwa muuyuni auhe mbyoka yi na shoka tayi ti lela?
[oshimpungu/Ethano pepandja 5]
Mbela Kalunga oku na ko ngaa nasha natse shili?
Molwashoka aantu oyendji oya gwilililwa po kiiningwanima tayi halutha nenge kokukanitha iinima yawo nosho wo kokusilwa aaholike yawo, otayi ipula kutya omolwashike Kalunga ihaa katuka onkatu a kelele iinima ya tya ngaaka.
Kalunga oku na ko nasha natse shili. Oha gandja ewiliko li shi okwiinekelwa nepepelelo lyashili ngashingeyi. (Mateus 11:28-30; 2 Timoteus 3:16, 17) Okwa ninga omalongekidho okuhulitha po sigo aluhe elongitho lyoonkondo, omikithi neso. Omasiloshimpwiyu ge ngoka otagu ulike kutya iha sile owala oshimpwiyu aantu yoshigwana shimwe ashike, ihe oha sile oshimpwiyu aantu yomiigwana ayihe, yomomihoko adhihe noyomomalaka agehe.—Iilonga 10:34, 35.
Mbela tse otu na ko ngaa nasha naKalunga? Mbela ou shi kutya Omushiti gwegulu nevi oye lye? Edhina lye olye? Elalakano lye olyashike? Omapulo ngoka ote ga yamukula mOmbimbeli. Moka ote tu lombwele kutya oonkatu dhini ta katuka opo a hulithe po elongithonkondo nosho wo omikithi neso. Opo tu mone mo uuwanawa, oshike mbela twa pumbwa okuninga? Otwa pumbwa okwiilonga kombinga ye nosho wo yomalalakano ge. Ongiini tatu vulu okutegelela okumona uuwanawa momasiloshimpwiyu ge ngele inatu itaala muye? (Johannes 3:16; Aaheberi 11:6) Osha pumbiwa wo tu vulike kiitegelelwa ye. (1 Johannes 5:3) Mbela ou na ngaa ohokwe onene yoku shi ninga?
Opo tu uve ko kutya omolwashike Kalunga e ethela oonkalo dhonena dhi kale po, otu na okuuva ko ompata ya simanenena. Ombimbeli otayi yi fatulula. Ompata ndjoka oya popiwa kutya oyo shike pepandja 15 lyoshileshomwa shika.