Ontumwafo ya za kOlutuwiliki

Kwaangoka e hole Jehova:

Jesus okwa ti: “One otamu ka tseya ihe oshili, noshili otayi ke mú mangulula.” (Joh. 8:32) Oohapu ndhika itadhi tu ladhipike tuu! Eeno, otashi wapa okutseya oshili, nokuli ‘nomomasiku ngaka gahugunina’ moka iifundja yi li apuhe. (2 Tim. 3:1, OB-1954) Mbela oto dhimbulukwa sho wa tameke okwiilonga oshili ndjoka yi li mOohapu dhaKalunga? Kasha li tuu she ku nyanyudha!

Nonando osha simana noonkondo okukala tu na ontseyo yashili noku yi lombwela aluhe yalwe, osha simana wo okwiihumbata metsokumwe nayo. Opo tu shi ninge, otu na okwiikaleka mohole yaKalunga. Shika osha kwatela mo shike? Oohapu ndhoka Jesus a popi uusiku wa tetekele eso lye otadhi yamukula epulo ndika. Okwa li a lombwele aayapostoli ye aadhiginini a ti: “Ngele otamu vulika komalombwelo gandje, otamu kala mohole yandje naanaa, ngashika ngame he vulika komalombwelo gaTate nonda kala mohole ye.” — Joh. 15:10.

Ndhindhilika kutya Jesus okwa kala mohole yaKalunga mokuvulika komalombwelo gahe. Natse osho tu na okuninga kunena. Opo tu kale mohole yaKalunga, otu na okukala metsokumwe noshili mokukalamwenyo kwetu kwesiku kehe. Ongulohi oyo tuu ndjoka Jesus okwa popi a ti: “Ngashingeyi omu shi uvite ko. One aanelago, ngele tamu shi ningi.” — Joh. 13:17.

Otwi inekela lela kutya embo ndika otali ke ku kwathela okutsikila okutula miilonga oshili monkalamwenyo yoye nokungawo oto ki ikaleka ‘mohole yaKalunga wa tegelela okupewa omwenyo gwaaluhe.’ — Jud. 21.