Ehalo lyaKalunga olini?

Kalunga okwa hala tu ka kale moparadisa kombanda yevi sigo aluhe tu na ombili nenyanyu.

Ihe otashi vulika wu ipule kutya, ‘shika otashi ka ningwa ngiini?’ Ombiimbeli otayi ti kutya Uukwaniilwa waKalunga owo tawu ke eta oparadisa ndjoka, noshi li ehalo lyaKalunga opo aantu ayehe yi ilonge kombinga yUukwaniilwa mboka naashoka e tu lalakanenena.—Episalomi 37:11, 29; Jesaja 9:7.

Kalunga okwa hala tu imonene uuwanawa.

Ngaashi owala he omunahole ha kala a halela oyana uuwanawa, Tate yetu gwomegulu naye okwa hala tu ka kale twa nyanyukwa sigo aluhe. (Jesaja 48:17, 18, NW) Oku uvaneka kutya ngoka ta “longo shoka Kalunga e shi hala, ota kala e na omwenyo aluhe.”—1 Johannes 2:17.

Kalunga okwa hala tu ende momapola ge.

Ombiimbeli otayi ti kutya Omushiti gwetu okwa hala ‘oku tu nongeka shoka a hala tu longe’ opo tu vule ‘okweenda momapola e ga hogolola.’ (Jesaja 2:2, 3) Okwa gongela “oshigwana shi kale hashi ithanwa nedhina lye” nelalakano lyokukala hashi popi kombinga yehalo lye kombanda yevi alihe.—Iilonga 15:14, NW.

Kalunga okwa hala tu kale twa hangana moku mu longela.

Elongelokalunga lyaJehova lya yogoka ohali hanganitha aantu mohole yashili pehala lyoku ya topola. (Johannes 13:35) Oolye kunena taya longo aalumentu naakiintu muuyuni auhe nkene ye na okulongela Kalunga ya hangana? Otatu ku hiya wu ilonge kombinga yaashoka mokabroshure haka.