OSHILESHWA 11
Omakotampango gOmbiimbeli ohage tu etele uuwanawa ngiini?
1. Omolwashike twa pumbwa ewiliko?
Omakotampango gOmbiimbeli otaga vulu oku tu kwathela ngiini tu kale twa kotokela oonkalo ndhoka dha nika oshiponga? — EPISALOMI 36:9.
Omushiti gwetu oku na oondunge e tu vule. E li Tate yetu omunahole, oku na ko nasha natse. Ka li a lalakanena tu kale mondiipangela. (Jeremia 10:23) Onkee ano, ngaashi owala okanona okashona haka kala ka pumbwa ewiliko lyaavali yako, natse atuheni otwa pumbwa ewiliko lyaKalunga. (Jesaja 48:17, 18) Ewiliko ndyoka hatu mono momakontampango gOmbiimbeli oli li omagano ga za kuKalunga. — Lesha 2 Timoteus 3:16.
Oompango dhaJehova nomakotampango ge ohage tu longo nkene tatu vulu okukala nonkalamwenyo ya dhenga mbanda ngashingeyi noku tu ulukila nkene tatu vulu oku ka mona ondjambi yomwenyo gwaaluhe monakuyiwa. Molwaashoka Kalunga oye e tu shita, oshiwanawa tu kale hatu vulika kewiliko lye tashi zi komutima. — Lesha Episalomi 19:7, 11; Ehololo 4:11.
2. Ngele taku popiwa omakotampango gOmbiimbeli, otaku popiwa shike naanaa?
Omakotampango gOmbiimbeli ogo ekankameno hoka kwa tungilwa oshili. Omanga oompango hadhi vulu okulongithwa moonkalo dhontumba dhokondandalunde. (Deuteronomium 22:8) Otwa pumbwa okulongitha omadhiladhilo getu opo tu uve ko nkene ekotampango tali longo monkalo yontumba. (Omayeletumbulo 2:10-12) Pashiholelwa, Ombiimbeli otayi popi kutya onkalamwenyo otwe yi pewa omagano kuKalunga. Ekotampango ndyoka otali vulu oku tu wilika ngele tu li kiilonga, megumbo, nongele tu li molweendo. Ohali tu ningitha tu kale twa kotokela oonkalo ndhoka dha nika oshiponga. — Lesha Iilonga 17:28.
3. Omakotampango gaali geni ga simanenena?
Jesus okwa li a tumbula omakotampango gaali ngoka ga simanenena. Lyotango oondyoka tali popi kombinga yelalakano lyonkalamwenyo yomuntu, kutya olyo okutseya Kalunga, okukala e mu hole noku mu longela nuudhiginini. Aluhe ngele tatu ningi omatokolo otu na okukala hatu tala kekotampango ndika lyotango. (Omayeletumbulo 3:6) Mboka haya vulika kekotampango ndika ohaya kala ookuume kaKalunga, ohaya kala ye na enyanyu lyashili nohaya kala netegameno lyomwenyo gwaaluhe. — Lesha Mateus 22:36-38.
Ekotampango etiyali oondyoka tali tu kwathele tu kale tu na ekwatathano ewanawa nayalwe. (1 Aakorinto 13:4-7) Okutula miilonga ekotampango ndika okwa kwatela mo okulandula oshiholelwa shoka Kalunga e tu tulila po kombinga yankene tu na okuungaunga nayalwe. — Lesha Mateus 7:12; 22:39, 40.
4. Omakotampango gOmbiimbeli ohage tu etele uuwanawa washike?
Omakotampango gOmbiimbeli ohaga kwathele aantu momagumbo yi ilonge okukala ye na ohole ndjoka hayi ya hanganitha. (Aakolossa 3:12-14) Oohapu dhaKalunga ohadhi gamene wo aanegumbo moku ya longa ekotampango ekwawo ndyoka tali ti kutya ondjokana oyi na okukala oshinima tashi kalelele. — Lesha Genesis 2:24.
Ngele otatu landula omakotampango gOmbiimbeli otashi vulu oku tu gamena miinima yopamaliko noyopamaiyuvo. Pashiholelwa, aagandji yiilonga olundji ohaya kala ya hala okukuta aaniilonga mboka hayi iyutha komakotampango gOmbiimbeli ngaashi lyokulonga nuudhiginini nolyokukala aanashili. (Omayeletumbulo 10:4, 26; Aahebeli 13:18) Oohapu dhaKalunga ohadhi tu longo wo tu kale twa gwanenwa niinima mbyoka twa pumbwa monkalamwenyo nokukala tu hole Kalunga pehala lyokukala tu hole omaliko. — Lesha Mateus 6:24, 25, 33; 1 Timoteus 6:8-10.
Ngele ohatu iyutha komakotampango gOmbiimbeli otashi ke tu kwathela tu kale tu na uukolele. (Omayeletumbulo 14:30; 22:24, 25) Pashiholelwa, ngele otwa kala hatu iyutha kompango yaKalunga yi na ko nasha nuunkolwe ohashi tu gamene komikithi nokiiponga. (Omayeletumbulo 23:20) Jehova okwa pitika tu nwe omalovu, ihe otu na oku shi ninga pandjele. (Episalomi 104:15; 1 Aakorinto 6:10) Omakotampango ngoka Kalunga e tu pa ohage tu etele uuwanawa molwaashoka ohage tu wilike miilonga yetu nohaga wilike omadhiladhilo getu. (Episalomi 119:97-100) Ihe Aakriste yashili inaya simaneka owala omakotampango gaKalunga molwaashoka hage ya etele uuwanawa. Ohaye shi ningi molwaashoka oya simaneka Jehova. — Lesha Mateus 5:14-16.