Osho ya mono okanona kokamati!

Abraham naSara oya kala mondjokana yawo omimvo odhindji. Oya li ya thigi po egumbo lyawo ewanawa muUr, e taya ka kala metsali. Shoka kasha li sha ningitha Sara a nyenyete, molwaashoka okwa li i inekela muJehova.

Molwaashono Sara okwa li a hala okanona noonkondo, okwa lombwele Abraham ta ti: ‘Ngele omupika gwandje Hagar okwa vala okanona, otaka kala ka fa kandje.’ Konima yethimbo, Hagar okwa mono okanona. Edhina lyako oIsmael.

Konima yomimvo odhindji, sho Abraham a li e na omimvo 99 naSara 89, oya li ya talelwa po kaayenda yatatu. Abraham okwe yi ithana ye ye ya vululukwe po momuti, e te ya pe iikulya. Mbela owu shi kutya aayenda mboka oya li oolye? Oya li aayengeli. Oya li ya lombwele Abraham ya ti: ‘Omumvo tagu ya pethimbo ngandika, ngoye nomukulukadhi gwoye otamu ka kala mu na okanona okamati.’ Sara okwa li ta pulakene e li meni lyetsali. Okwi iyolele e ta ti:‘Sho nda kulupa ngeyi, ote vulu ngaa we okumona okanona?’

Omumvo gwa landula ko, Sara okwa mono okanona kokamati, ngaashi naanaa omuyengeli gwaJehova u uvaneke. Abraham okwe ka luku Isak, ndyoka tali ti “Oondjola.”

Sho Isak a li e na omimvo ntano lwaampono, Sara okwa mono nkene Ismael ta hindi Isak. Sara okwa li a hala okugamena okamwanamati, nokwa yi kuAbraham e te mu pula a laleke Hagar nomwana Ismael. Tango, Abraham ka li a hala oku shi ninga. Jehova okwe mu lombwele a ti: ‘Vulika kuSara. Ismael otandi ke mu sila oshimpwiyu, ihe mulsak omo to mono oluvalo nde lu ku uvanekele.’