Josua nAagibeon

Onkundana kombinga yaJeriko oya taandele miigwana yilwe yomuKaanan. Aakwaniilwa yaKaanan oya tokola ya kondjithe Aaisraeli. Ihe Aagibeon oya kongo po ondunge yilwe. Oya yi kuJosua, ya zala oonguwo dha kulupa. Oya ti: ‘Otatu zi kevi lyokokule, otu uvu kombinga yaJehova naayihe mbyoka e ku ningile muEgipiti nomuMoab. Uvaneka kutya ito tu ponokele notatu ka ninga aantu yoye.’

Josua okwe ya zimine nokwa tokola kee ya ponokele. Konima yomasiku gatatu, okwe shi dhimbulula mo kutya inaya za shili koshilando shokokule. Oya za koshilando shaKaanan. Josua okwa li a pula Aagibeon a ti: ‘Omolwashike mwe tu kotokele?’ Oya yamukula ya ti: ‘Otwa li twe mu tila notu shi kutya Jehova Kalunga keni ote mu kondjele. Alikana ino tu dhipaga.’ Josua okwa dhiginine euvaneko lye nokwe etha ya kale nomwenyo.

Inapu pita ethimbo ele, aakwaniilwa yatano yaKaanan naakwiita yawo oya li ya ningile Aagibeon omatilitho. Josua naakwiita ye oye ende uusiku awuhe ya ka mangulule Aagibeon. Olugodhi olwa tameke ongula onene yesiku lya landula. Aakaanan oya tameke okumatuka noshilando ashihe. Kehe mpoka ya matukile, Jehova okwa li a lokitha omamanya omanene goompawe kombanda yawo. Opo ihe Josua okwa pula Jehova a thikameke etango. Mbela omolwashike Josua a pula Jehova a thikameke etango, oshinima shoka inaashi ningwa nando onale? Omolwaashono okwa li lela i inekela muJehova. Etango inali kala lya thikama esiku alihe sigo Aaisraeli taya sindi aakwaniilwa yaKaanan nosho wo aakwiita yawo.