David naGoliat

Jehova okwa lombwele Samuel a ti: ‘Inda kegumbo lyaIsai. Gumwe gwomoyanamati oye ta ka ninga omukwaniilwa gwaIsraeli ta landula ko.’ Samuel okwa yi kegumbo lyaIsai. Samuel sho a mono omwanamati gwaIsai osheeli, okwa li ta dhiladhila kutya ‘omulumentu nguka omugundjuka oku na okukala oye a hogololwa kuJehova.’ Ihe Jehova okwa lombwele Samuel kutya haye a hogolola. Jehova okwa ti: ‘Ngame ohandi tala shoka shi li momutima gwomuntu, ihandi tala nkene ta monika kombanda.’

Isai okwe eta oyanamati yaheyali kuSamuel. Samuel okwe mu lombwele a ti: ‘Jehova ina hogolola nando ogumwe gwomuyo. Owu na po aamati yalwe?’ Isai okwa ti: ‘Ondi na po onkelo, David. Ota litha oonzi dhandje.’ Sho David e ya megumbo, Jehova okwa lombwele Samuel a ti: ‘Oye nguka nda hogolola.’ Samuel okwa tile omagadhi momutse gwaDavid, e te mu gwayeke a ninge omukwaniilwa gwaIsraeli gwomonakuyiwa.

Konima yethimbo lyontumba, Aaisraeli oya li taya kondjithathana nAafilisti. Aafilisti oya li pamwe nependafule lyedhina Goliat, tali ya kondjele. Goliat okwa kala esiku nesiku ha sheke Aaisraeli. Okwe yi igidha a ti: ‘Tuminii ndje omuntu ngoka tatu ka kondja naye. Ngele okwa sindana, otatu ka ninga aapika yeni. Ihe ngele onda sindana, otamu ka ninga aapika yetu.’

David okwe ya kontanda yetangakwiita lyAaisraeli e etele aamwahe iikulya, mboka ya li aakwiita. David oku uvu kombinga yaGoliat e ta lombwele Saul ta ti: ‘Otandi yi, ndi ka kondje naye.’ Omukwaniilwa Saul okwa ti: ‘Ihe ngoye okamatyona owala.’ David okwe mu yamukula a ti: ‘Jehova ota ka kwathela ndje.’

Saul okwa li a hala David a longithe onguwo ye yuukwiita, ihe David okwa ti: ‘Itandi vulu okukondja nda zala ehwahwa ndika.’ David okwa kutha oshuumbitho she e ta yi kokampompolonga. Okwa toola omamanya gatano gothethengele e te ga tula mokampunda ke. Opo ihe David okwa matukile kuGoliat. Omutongolume Goliat okwi igidha a ti: ‘Ila huka kamatyona ngoye! Omudhimba gwoye otandi ke gu gandja koondhila dhokegulu nokiilikama.’ David ka li a tila. Okwe mu yamukula ti igidha ta ti: ‘Oto ya, u kondjithe ndje u na egongamwele negonga, ihe ngame otandi ya kungoye medhina lyaJehova. Hatse to kondjitha, ihe oKalunga to kondjitha. Kehe gumwe e li mpaka ota ka mona kutya Jehova oku na oonkondo e vule egongamwele negonga. Ote ke mu gandja amuhe miikaha yetu.’

David okwa tula emanya koshuumbitho she, e te shi dhugadhuga noonkondo adhihe. Kekwatho lyaJehova, emanya olya dhenge Goliat mombamba yoshipala e tali ningine mo. Omutongolume okwa gwile pevi e ta si. Opo ihe Aafilisti oya fadhuka po ya ka hupithe oomwenyo dhawo. Mbela owi inekela ngaa muJehova ngaashi David?