Jerusalem tashi hanagulwa po

Iikando niikando, Aajuda oya kala nokuthiga po Jehova e taya ka longela iikalunga. Jehova okwa kala ta kambadhala oku ya kwathela uule womimvo odhindji. Okwe ya tumine aahunganeki oyendji ye ya londodhe, ihe inaya pulakena. Pehala lyaashono, oya kala taye ya sheke. Jehova okwa ningi po shike, opo Aajuda ye ethe po okulongela iikalunga? Okwa longitha Nebukadnezzar.

Omukwaniilwa gwaBabilonia, Nebukadnezzar, okwa kala nokusinda iigwana oyindji. Oshikando shotango a sindi Jerusalem, okwa kwata po omukwaniilwa Jehoiakim, omalenga ge, aakwiita ye naagandjimayele ye, e te ya fala ayehe kuBabilonia. Okwa kutha mo wo omaliko agehe motempeli yaJehova. Opo ihe Nebukadnezzar okwa ningi Sedekia omukwaniilwa gwaJuda.

Petameko, Sedekia okwa li ha vulika kuNebukadnezzar. Ihe iigwana yopopepi naahunganeki yiifundja oya lombwele Sedekia a tukululile Babilonia oshipotha. Jeremia okwe mu londodha a ti: ‘Ngele owa tsu ondumbo naBabilonia, muJuda otamu ka kala omikithi, ondjala naantu otaya ka sa.’

Konima yomimvo hetatu ndhoka Sedekia a kala ta pangele, okwa tsile ondumbo Babilonia, e ta pula etangakwiita lyaEgipiti li mu kwathele. Opo nduno omukwaniilwa Nebukadnezzar okwa tumu etangakwiita lye li ponokele Jerusalem, nolya yungu ontanda ya kundukidha oshilando. Jeremia okwa lombwele Sedekia a ti: ‘Jehova okwa ti ngele owi igandja kuBabilonia, ngoye noshilando otamu ka hupa. Ihe ngele ito shi ningi, Aababilonia otaya ka fika po Jerusalem, noto ka tulwa mondjedhililo.’ Sedekia okwa ti: ‘Itandi igandja!’

Konima yomumvo netata, aakwiita yaBabilonia oya ponokele Jerusalem e taye shi fike po. Oya fike po otempeli, oya dhipaga aantu oyendji noya tula oyendji mondjedhililo.

Sedekia okwa yi ontuku, ihe Aababilonia oye mu tidha. Oye mu kwatele popepi naJeriko e taye mu eta kuNebukadnezzar. Omukwaniilwa gwaBabilonia okwa dhipagitha oyanamati yaSedekia komeho gaSedekia. Opo nduno, okwa tsipulitha mo omeho gaSedekia e te mu tula mondjedhililo moka a ka sila. Jehova oku uvanekele Aajuda a ti: ‘Konima yomimvo 70, otandi ke mu galulila kuJerusalem.’

Oshike sha li tashi ka ningilwa aagundjuka mboka ya tulwa mondjedhililo muBabilonia? Mbela oya li ngaa taya ka kala aadhiginini kuJehova?