Enyolo kekuma

Mokweendela ko kwethimbo, Belshazzar okwa ningi omukwaniilwa gwaBabilonia. Ongulohi yimwe okwa hiya aantu eyuvi ya simanenena yomoshilongo she. Okwa lombwele aapiya ye, opo ye ete iitenga yoshingoli noyoshisiliveli niiyuma mbyoka he, Nebukadnezzar, a kutha motempeli yaJehova muJerusalem. Belshazzar naayenda ye oya nwine omaviinu miitenga mbyoka noya kala taya tanga iikalunga yawo. Ohaluka oya mono oshikaha, nosha tameke okunyola iitya kaayi shiwike kekuma lyoshinyanga shomuuwa.

Belshazzar okwa kwatwa kuumbanda. Okwi ithana oonganga, oompulile naakonekinyothi ye, e ta ti: ‘Shaa ngoka ta vulu okulesha enyolo ndika nota lombwele ndje shoka tali ti, ota ningwa elenga etitatu moshilongo.’ Oya kambadhala okufatulula iitya mbyoka, ihe oya li ya nyengwa. Yina yomukwaniilwa okwe ya mo, e ta ti: ‘Opu na omulumentu Daniel, ngoka ho, Nebukadnezzar a li ha pula e mu fatululile iinima. Ota vulu oku ku lombwela shoka iitya mbyoka tayi ti.’

Daniel okwe etwa komukwaniilwa. Belshazzar okwe mu lombwele a ti: ‘Ngele oto vulu okulesha enyolo ndika, e to lombwele ndje shoka tali ti, nena oto ka zalekwa elyenge lyoshingoli mothingo yoye noto lengwa elenga etitatu moshilongo.’ Daniel okwa yamukula omukwaniilwa a ti: ‘Kala nomagano goye. Ihe otandi ku lombwele shoka enyolo tali ti. Ho Nebukadnezzar, okwa li e na uuntsa, ihe Jehova okwe mu shonopeke. Nonando owa tseya ayihe mbika, ino simaneka nando Kalunga sho wa nwine omaviinu miitenga mbyoka ya kuthwa motempeli ye. Omolwaashoka Kalunga a tumu oshikaha shika, shi nyole oohapu ndhika: Mene, Mene, Tekel naParsin. Oohapu ndhika otadhi ti kutya Aamedia nAapersia otaya ka sinda Babilonia. Ito ka kala we omukwaniilwa.’

Ethimbo ndyono Babilonia osha li tashi monika sha fa itaashi vulu okusindika nando. Oshilando shoka osha li shi na enkolokuma lya kola, sho osha kondekwa komulonga omule gwaEufrat. Ongulohi oyo tuu ndjono, Aamedia nAapersia oya ponokele Babilonia. Omukwaniilwa gwaPersia, Kores, okwa ningi po shike? Okwa panuna mo omeya momulonga, opo aakwiita ye ya vule oku gu taaguluka sigo ya thiki pomiyelo dhoshilando. Sho ya thiki po, oya adha omiyelo dhe eguluka. Oya ponokele oshilando, e taye shi kwata ko, noya dhipaga omukwaniilwa Belshazzar. Okuza mpono Kores okwa ningi omuleli gwaBabilonia.

Omumvo Kores a ningi omupangeli, okwa tseyitha a ti: ‘Jehova okwa pe ndje oshilonga shoku mu tungila otempeli muJerusalem. Kehe gumwe gwomoshigwana she ngoka a hala okukwathela mokutungulula otempeli, okwa manguluka okuya kuJerusalem.’ Ngaashi owala Jehova u uvaneka, Aajuda oyendji oya shuna kuJerusalem, konima sho ya kala omimvo 70 muupongekwa. Kores okwa shunitha ko iitenga yoshingoli noyoshisiliveli nosho wo iiyaha mbyoka omukwaniilwa Nebukadnezzar a kuthile motempeli muJerusalem. Mbela owu wete nkene Jehova a li a longitha Kores a kwathele oshigwana she?