Omolwashike Kalunga A Kala Aluhe I Idhidhimika?
TALA koshipala sha ziyalala shokanona hoka ka sa ondjala. Tala nkene okalutu kako ka nanga nonkene okala kako ka zinda. Dhiladhila nkene ko ka pumbwa iikulya noonkondo, na tala kokayaha kaake na sha hoka ke na moshikaha shako. Yina otashi vulika ta tala nomeho ga ya momutse, oshipala she sha polimana sha ninga okathano kaa na etegameno. Kambadhala nduno okumweneka oluhodhi lwoye—eeno, kambadhala okushunitha omahodhi goye.
Oshinima shika ohashi monika olundji iikando omamiliyona moshitopolwa shoondja ookilometa omamiliyona 6 shoka hashi ithanwa Sahel notashi hepekwa kondjala. Oshi na ookilometa 4 800 sha kambakana Afrika kuumbugantu wOmbuga yaSahara, okuza kuSenegal kOmunkulofuta gwaAtlanda sigo okuEtiopia kEfuta Etiligane. Dhoshili, ondjala oshiponga wo kaantu itaaya vulu okuyalulwa miilando yilwe. Ehangano lyOnkalonawa lyUuyuni olya kundaneke kutya aantu ye thike lwopembiliyona 1,1 muuyuni auhe otaye ehama sha kwata miiti nenge kaaye na iikulya ya gwana.
Dhoshili, ondjala oyo owala oshinima shimwe tashi hepeke aantu. Aantu ohaa nyateke evi, notashi tu gumu atuhe. Oonkalelo dhopolotika odha hokwa okwaahenuuyuki nokuhinga iita hoka taku etele aantu oyendji omaupyakadhi neso. Omolwashike mbela Kalunga e ethele iinima ya tya ngeyi? Oku na ko nasha ngaa mbela natse?
Kalunga Oku Na Ko Nasha Natse!
Omushiti gwetu oku na ko nasha natse. Opu na omauliko ga gwana mwaashika nokombinga yoonkondo dhe okuninga iinima yi kale tayi longele kumwe molwuuwanawa wetu nomolwuukumwe waayihe meshito lye. Pashiholelwa, tala kefano ndyoka li li mpono lyonyiki ndjoka tayi nambele kongala yi li komuti gwiiyimati. Onyiki oya pumbwa ongala omolwomeya ngoka ya pumbwa okwiipalutha. Ihe omuti ogwa pumbwa wo uusila mboka wa humbatwa kolutu lwonyiki okuza komuti gwoludhi olwo tuu ndoka. Komukalo nguka ongala oya pewa ombuto opo yi vule okuninga oshiyimati. Hamiti adhihe dhiiyimati hadhi pewa ombuto komukalo ngoka, ihe Kalunga okwa longekidha shili elongelokumwe inaashi monika nale moshinima shika. Molwuuwanawa we ohaku imi iiyimati mbyoka hatu vulu okulya nenyanyu naambyoka iiwanawa kutse.
Onyiki yo yene oyo oshitopolwa shongundu yu unganekwa nawa yoonyiki dhi vulithe po 30 000. Dhimwe ohadhi tonatele ehila omanga dhilwe hadhi li opaleke nenge hadhi li pe ombepo. Dhilwe natango ohadhi gongele omeya goongala nuusila, hadhi palutha uuzinyo nenge dhi ye dhi ka konge oonzo oompe dhomeya goongala. Kalunga okwa longekidha iinima ngawo opo tu mone ekwatho muyo uuna oonyiki ndhoka omapenda tadhi ningi omagadhi omawanawa nohaga palutha ngoka ge na omulyo omutoye.
Onkumwe yokulongela kumwe pokati koonyiki niimeno nomokati koonyiki dho dhene oyo naanaa yimwe yomomauliko ogendji kutya Omushiti oku na oonkondo dha gwana okuningitha iinamwenyo yi longele kumwe. Dhoshili, “Kalunga ke shi Kalunga kevundakano, aawe, okombili.” (1 Aakorinto 14:33) Omolwashike ano e ethele aantu okukala nomwenyo mokwaa na uukumwe hoka kwe etele aantu oyendjiyendji iihuna? Ngele Kalunga oku na ko nasha natse, omolwashike mbela a tegelele ethimbo ele li thike mpono okwoopaleka onkalo ndjika? Dhoshili, omolwashike mbela Kalunga a kala aluhe i idhidhimika?
Oohapu dhaKalunga, Ombimbeli, otadhi yamukula omapulo ngaka. Embo ndika endhindhilikwedhi otali tu lombwele kutya Jehova Kalunga okwa kala aluhe i idhidhimika omolwetompelo ewanawa noonkondo. Etompelo ndyono olyashike mbela? Na uule u thike peni Kalunga ta kala i idhidhimika natango?