Otwa Pumbwa Ngoka Te Tu Pulakene
TSE aantu, otatu kambadhala tu mone enyanyu negwaneno monkalamwenyo. Ihe ihashi kwathele tuu nohashi hekeleke ngele pu na ngoka tatu popi naye kombinga yiimpwiyu yetu uuna tapu holoka omaupyakadhi gopaumwene!
Ndohotola George S. Stevenson ota ti: “Ngele omuntu to popi mo iinima, ohashi kwathele u thuwe po kuudhigu woye, ohashi kwathele u mone oshimpwiyu shoye sha yela mo nawa, nolundji otashi ku kwathele u mone shoka to vulu okuninga kombinga yasho.” Ndohotola Rose Hilferding okwa ti: “Tse atuhe otu na okulombwelathana omaupyakadhi getu. Otu na okulombwelathana iimpwiyu yetu. Otu na okumona kutya muuyuni omu na ngoka e na ehalo oku tu pulakena nota vulu oku tu uva ko.”
Dhoshili, kapu na omuntu ta vulu oku tu gwanithila lelalela ompumbwe ndjika. Molwethimbo lya ngambekwa nomolwiinima yilwe, aantu mboka twi inekela otashi vulika ihaaya monika uuna twe ya pumbwa unene, nenge tashi vulika hatu kakadhala nokuli okukundathana iinima yontumba nookuume ketu yopothingo.
Ihe Aakriste yashili ihaa kala nando kaaye na gumwe te ya pulakene, oshoka yo oye na aluhe ompito yokugalikana. Ombimbeli otayi tu tsu omukumo tayi shi endulula tu galikane Kalunga, Omushiti gwetu, ngoka edhina lye Jehova. Tse otwa lombwelwa tu galikane moshili, medhina lyaJesus, nometsokumwe nehalo lyaKalunga. Iinima yopaumwene oyo nokuli iinima mbyoka tatu vulu oku yi galikanena. “Uuthigona weni u tseyithileni Kalunga momagalikano,” Aafilippi 4:6 osho taye tu lombwele. Omagano omandhindhilikwedhi oge thike peni! Omunamapangelo agehe gweshito lyetu alihe oku na aluhe ehalo okutaamba ko omagalikano gaapiya ye aaifupipiki ngele ye na wo ehalo okuhedha kuye.—Epsalmi 83:18, NW; Mateus 6:9-15; Johannes 14:13, 14; 1 Johannes 5:14.
Ihe Kalunga oha pulakene ngaa shili? Yamwe otashi vulika ya kumwa ngele okupondola sha kwegalikano inaku ikwatelela owala koonkondo dhomuntu: Omuntu ota galikana, nokutula omadhiladhilo ge melandulathano, nopo nduno ote ga popi mo. Molwashoka komukalo nguka ye oku wete kutya uupyakadhi we ouni, ye ota kambadhala okumona ekandulopo tali opalele nota kala e na ko nasha nakehe shoka tashi vulika osho tashi li eta. Ngele uupyakadhi we wa kandulwa po, otashi vulika ta ti kutya oKalunga e shi ninga, ihe muushili wo wene omadhiladhilo ge noonkambadhala dhe oyo ye eta po iizemo mbyoka ya halika.
Dhoshili, aantu oyendji nena otaa dhiladhila kutya osho owala shoka egalikano lya kwatela mo. Ngoye osho wo to dhiladhila? Oonkondo dhegalikano odha ngambekwa mbela? Dhoshili, oonkambadhala dhomuntu dhopandunge nodhopanyama metsokumwe nomagalikano ge odho tadhi dhana onkandangala yi na oshilonga mokumona omayamukulo. Ihe ongiini kombinga yonkandangala yaKalunga mwene moshinima shoka? Kalunga oha pulakene ngele to mu galikana? Oha tala ko ngaa omagalikano goye ga simana, noha gandja ngaa eitulomo kwaashoka to popi noku ga yamukula?
Omayamukulo komapulo ngaka oge na oshilonga. Ngele Kalunga ita gandja eitulomo lye komagalikano getu, opo nduno egalikano oli na owala ongushu yopautseyimwenyo. Ihe ngele Kalunga ota taamba nota pulakene nohokwe kukehe limwe lyomomagalikano getu, katu na tuu okukala twa pandula noonkondo esiloshimpwiyu lya tya ngaaka! Oshi na oku tu inyengitha tu longithe esiloshimpwiyu ndika esiku kehe.
Otatu ku hiya ano u tsikile nokulesha, oshoka iinima mbika otayi ka kundathanwa moshinyolwa tashi landula.