Epipi Lyomo 1914—Omolwashike Lya Simana?

“Aaleshi yetu oye shi shi kutya otwa kala uule woomvula odhindji twa tegelela Ethimbo ndika li hule po nuupyakadhi wa kwata miiti notwa tegelela li ka tameke mbala konima yaOktoba 1914.”—Dha kuthwa moThe Watch Tower and Herald of Christ’s Presence, yaMai 15, 1911.

OKUZA mo 1879 oshifo shoka sha li sha tseyika osho The Watch Tower and Herald of Christ’s Presence (shoka ngashingeyi sha tseyika osho Oshungonangelo Tai Shiivifa Ouhamba waJehova) olundji osha li shu ulike ko 1914 ogwo omumvo omundhindhilikwedhi momahunganeko gOmbimbeli. Sho omumvo ngoka gwa hedha popepi, aaleshi oya dhimbulukithwa kutya yo otaa vulu okukala ya tegelela “ethimbo lyuudhigu wa kwata miiti.”

Uuyelele mbuka owa tseyithwa apuhe kAakriste mboka ya kankameka elondodho ndika kokuuva ko kwawo “omathimbo gaheyali” ‘nomasiku gaapagani’ ngoka ga tumbulwa mOmbimbeli.a Yo oye shi uva ko kutya uulethimbo mbuka owa li tau ka kutha oomvula 2 520—kutya wo owa tamekela oshita neumboko lyuukwaniilwa wopaDavid wonale muJerusalem nowa li tau ka hula po muOktoba 1914.b—Daniel 4:13, 14; Lukas 21:24.

MuOktoba 2, 1914, Charles Taze Russell, ngoka pethimbo ndyoka a li omupresidende gwoWatch Tower Bible and Tract Society, okwa tseyitha nuuladhi: “Omathimbo gAapagani oga hulu po; aakwaniilwa yawo oya li ye na ethimbo lyawo.” Oohapu dhe kadha li tuu dhoshili! MuOktoba 1914 megulu omwa ningwa oshiningomwa sha simana ihaashi monika komeho gaantu, shoka sha li sha guma uuyuni auhe noonkondo. Jesus Kristus, Omuthigululi gwaaluhe ‘gwoshipundi shuukwaniilwa waDavid’ okwa tameke okupangela aantu ayehe e li Omukwaniilwa.—Lukas 1:32, 33; Ehololo 11:15.

‘Ihe ngele Kristus okwa tameke okupangela mo 1914, omolwashike mbela oonkalo kombanda yevi dhi ipala ngeyi?’ tashi vulika osho to pula. Omolwashoka omutondi gwaantu ihaa monika, Satana, oko e li natango. Sigo omo 1914 Satana okwa li e na uuthemba wokuya megulu. Onkalo ndjoka oya lunduluka sho Uukwaniilwa waKalunga wa dhikwa mo 1914. “Megulu nomwa tukuluka olugodhi.” (Ehololo 12:7) Satana noompwidhuli dhe oya sindwa noyu umbilwa kevi, noshilanduliko osha li oshiponga oshinene kaantu. Ombimbeli oya hunganeke: “Yaye evi nefuta, oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.”—Ehololo 12:12.

Methelemimvo lyotango E.N., Jesus okwa tile kutya okukala po kwe ihaaku monika e li Omukwaniilwa gwokevi omupe otaku ka ndhindhilikilwa kendhindhiliko hali monika. Okwa li a pulwa: “Endhindhiliko lyokuya [“okukala po,” NW] kwoye nolyehulilo lyuuyuni olini?” Eyamukulo lye olini? “Iigwana otayi thikama okukondjithathana, niilongo otayi matukilathana, notaku ya oondjala nomakakamo gevi okiilongo niilongo. Ihe ayihe mbika etameko lyetheto lyokuvala.”—Mateus 24:3, 7, 8.

Metsokumwe naashino, iita mbyoka ya tameke mo 1914, oya li ye endele pamwe nondjala inyanyalitha, oshoka uule woomvula dhi vulithe pune opwa li inaapu holoka iikulya. Ongiini nee mbela kombinga ‘yomakakamo gevi kiilongo niilongo?’ Moomvula omilongo dha ka landula 1914 aantu ye vulithe po 350 000 oya sile momakakamo gevi ga adha pomulongo. (Tala moshimpungu.) Dhoshili, epipi lyomo 1914 olya mona “etameko lyetheto lyokuvala.” Nokuza mpono uudhigu uunene owa kala tau holoka aluhe molupe lwiiponga yopaunshitwe, ondjala niita oyindjiyindji.

Nonando ongaaka, onkundana kombinga yedhiko lyUukwaniilwa waKalunga mo 1914 oyo oonkundana ombwanawa molwashoka Uukwaniilwa mboka otau ka hupitha evi ndika kokuyonwa po. Ngiini? Otau ka kutha po omalongelokalunga agehe giifundja nogiihelele, omapangelo omanyokomi nenwethomo lyuukolokoshi lyaSatana. (Daniel 2:44; Aaroma 16:20; Ehololo 11:18; 18:4-8, 24) Natango wo otau ke eta uuyuni uupe “moka tamu ka kala uuyuuki.”—2 Petrus 3:13.

Mbala konima yIita yOtango yUuyuni, Aailongi yashili yOmbimbeli, ngaashi Oonzapo dhaJehova dha li dha tseyika, oya tameke okuyoolola uuthembahenda wawo u na ko nasha noshinima shimwe shendhindhiliko lyokukala po kwaJesus e li Omukwaniilwa. Jesus Kristus okwa hunganeke: “Evangeli ndika lyuukwaniilwa otali ku uvithilwa uuyuni auhe li ningile iigwana ayihe uunzapo, opo nduno taku ya ehulilo.”—Mateus 24:14, KB.

Okuza petameko eshona mo 1919 Oonzapo dhaJehova inadhi etha nando okuuvitha “evangeli ndika.” Shi li oshilanduliko, aantu omamiliyona miilongo yi vulithe 200 otaa gongelwa ngashingeyi ye li aapangelwa yUukwaniilwa waKalunga. Aapangelwa mbaka inaa tegelela tuu elaleko nuuyamba enene! Uukwaniilwa otau ka kutha po iita, ondjala, iilonga yomuyonena nethininiko. Otau ka sinda nokuli omikithi neso!—Epsalmi 46:10; 72:7, 12-14, 16; Omayeletumbulo 2:21, 22; Ehololo 21:3, 4.

Manga epipi lyomo 1914 inaali hula po, iilonga yeuvitho lyUukwaniilwa otayi ka adhika ya adha elalakano lyayo. “Oshoka omasiku ngoka,” Jesus osho a hunganeke, “otaku kala uudhigu uunene, inaau kala oketameko lyuuyuni sigo ongashingeyi nongaashi itau ya we. Nomasiku ngeyaka andola itaga fupipikwa, ando kaku na nando [onyama] yimwe tayi hupithwa; ihe omasiku ngeyaka otaga fupipikwa omolwaahogololwa.”—Mateus 24:21, 22.

Ino ninga epuko lya faathana naandyoka lyepipi lyomo 1914. Iinima itayi ka kala ngaashi yi li ngashingeyi. Elunduluko ekumithi oli li popepi. Ihe kwaamboka taa katuka pandunge, opu na etegameno ekumithi.

Pulakena ano koohapu dhomuprofeti gwonale: “Kongeni Omuwa, one amuhe oonakwiifupipika yomoshilongo . . . Kongeni uuyuki. Kaleni nokukonga eifupipiko. Pamwe tamu ka gamenwa mesiku lyondjahi yOmuwa.” (Sefanja 2:3, KB) Epukululo ndika otatu vulu mbela oku li gwanitha ngiini? Iinyolwa tayi landula otayi ke tu yamukulila epulo ndika.

[Omanyolo gopevi]

[Omusholondondo pepandja 7]

Omakakamo gevi pethimbo lyOomvula Omilongo Ndhoka Dha Landula 1914

Esiku: Ehala: Aasi:

Januali13, 1915 Avezzano, Italia 32 600

Januali 21, 1917 Bali, Indonesia 15 000

Februali 13, 1918 Oshitopolwa shaKwangtung, China 10 000

Oktoba 11, 1918 Puerto Rico (kuuningininontu) 116

Januali 3, 1920 Veracruz, Mexiko 648

Septemba 7, 1920 Reggio di Calabria, Italia 1 400

Desemba 16, 1920 Oshitopolwa shaNingsia, China 200 000

Marsa 24, 1923 Oshitopolwa shaSzechwan, China 5 000

Mai 26, 1923 Iran (uuzilolundume) 2 200

Septemba 1, 1923 Tokio-Yokohama, Japani 99 300

Ya kuthwa moshimpungu “Omakakamo gEvi Ga Simana gomUuyuni” membo Terra Non Firma, kuJames M. Gere naHaresh C. Shah.