Omolwashike Oonzapo dhaJehova hadhi ya aluhe kungoye?
OKUDHIGININA kwOonzapo dhaJehova okukutha ombinga muukalele wegumbo negumbo okwa tseyika nawa muuyuni auhe. Aantu yamwe otayi ipula kutya molwashike Oonzapo hadhi ya aluhe kuyo, unene tuu ngele iikando ya tetekela kaya li ye na naanaa ohokwe metumwalaka lyadho. Oontumwafo mbali dha za kuRusia otadhi kwathele okuyelitha kutya omolwashike.
Masha, omukadhona gwoomvula 19 muKhabarovsk ote shi zimine ta ti: “Okupopya oshili, nale onda li nda kambadhala noonkondo adhihe okuyanda Oonzapo dhaJehova.” Ihe konima sho a lesha iifo yontumba ya nyanyangidhwa kOonzapo, okwa lundulula iikala ye. Masha ota nyola ta ti: “Osha li shihokitha noonkondo notashi pe omuntu uuyelele, ihe sha simana noonkondo osho kutya otashi ku ningi u tale ko uuyuni shi ili. Onda tameke kashona nakashona okuuva ko kutya omolwashike aantu ya pewa omwenyo.”
Okuza moshilando shaUssuriysk, pu na ookilometa 80 lwaampono okuya kolundume lwaVladivostok, Svetlana okwa nyola a ti: “Opo owala nda tameke okulesha omasiku ga zi ko Oshungonangelo noAwake! Iifo mbika oya pumbiwa noonkondo methimbo lyetu lyongashingeyi. Ohandi nyanyukilwa iitopolwa yamo ayihe. Oyihokitha noonkondo, otayi longo sha omuntu notayi pe omuntu omayele. Tangi! Tangi unene sho mu li muuyuni mbuka notamu longo iilonga iiwanawa ya tya ngaaka noya pumbiwa.”
Oonzapo dhaJehova muuyuni auhe odha tala ko sha kwata miiti ekumagidho lyomuyapostoli Paulus ndyoka tali ti: “[Aantu] otaa uvu ngiini, ngele kaku na omuuvithi?” (Aaroma 10:14) Omolwashike oshikando tashi landula ngele Oonzapo tadhi ku talele po itoo kutha ominute dhontumba u pulakene kudho? Oto vulu wo okunyanyukilwa etumwalaka lyehekeleko ndyoka tali adhika mOohapu dhaKalunga, Ombimbeli.