Ontumwafo ya nyolelwa Noa

“NOA omuholike, onda lesha kombinga yoye lwiikando oyindji mOmbimbeli nonkene wa tungu onguluwato moka ngoye nuukwanegumbo woye mwa hupile Eyelu.”

Ontumwafo yokakadhona koomvula 15 kedhina Minnamaria osho tayi tameke ngawo, sho ka li ki inyolitha methigathano lyokunyola lyaalongwa yoomvula 14 sigo 21. Ethigathano olya li lya longekidhwa kiilonga yopoosa yokOsoomi, Ehangano lyAalongisikola yElaka lyOshisoomi nEhangano lyUunamambo wOshisoomi. Oonakwiinyolitha methigathano oya li ya pulwa ya nyole ontumwafo ya kankamena kembo lyontumba. Oya li tayi vulu okunyolelwa omunyoli gwembo ndyoka nenge gumwe ngoka a popiwa mo. Aalongi oya hogolola moontumwafo dhaalongwa yawo oontumwafo dhi vulithe 1 400 noye dhi tumine kaahogololi yaamboka ya sindana methigathano. Aahogololi mboka oya hogolola mo nduno etotwahokololo ndyoka li li dhingi, omatotwahokololo omulongo ngoka ge li pondondo ontiyali nosho wo omulongo ngoka ge li pondondo ontitatu. Minnamaria okwa li a nyanyukwa sho ontumwafo ye ya li ya tulwa mongundu ontitatu.

Omolwashike Minnamaria, omulongwa gwoomvula omulonga nasha, a nyolele ontumwafo ye kuNoa, omulumentu ngoka a li ko oomvula 5 000 lwaampono dha piti? Ota ti: “Ombimbeli oya li oshinima shotango shoka she ya momadhiladhilo gandje. Aantu mboka ya hokololwa mOmbimbeli onda li nde ya tseya nawa. Onda lesha olundji kombinga yawo nokungame oya kala ya fa konyala ye na omwenyo. Noa oye nda hogolola molwashoka onkalamwenyo ye oya li yituntula noonkondo noya li ya yooloka ko unene kuyandje.”

Ontumwafo ndjoka Minnamaria a nyolele Noa otayi hulitha noohapu ndhika: “Ou li natango oshiholelwa sheitaalo noshevuliko. Onkalamwenyo yoye otayi ladhipike ayehe mboka taya lesha Ombimbeli ya katuke meitaalo.”

Ontumwafo ndjika yomuleshi gwOmbimbeli omugundjuka otayi ulike nawa kutya Ombimbeli oyi na shili “omwenyo noonkondo” kaantu, aagundjuka naakuluntu.—Aaheberi 4:12.