Ethigululo ndyoka to vulu okwiinekela
“NGELE owa mono etseyitho mopoosa yoye okuza kugumwe ngoka ta ti kutya opu na shoka to vulu okuthigulula she ku tegelela, kala wa kotoka. Otashi vulika olya za komukengeleli ngoka a hala oku ku enda miineya.”
Olyo elondodho ndyoka lya gandjwa kehangano lyIilonga yOkutalela yOpoosa yIilongohangano mehala lyayo lyomoInternet hali ithanwa Web site. Omolwashike sha li sha pumbiwa? Molwaashoka aantu omayovi oya mona etseyitho moopoosa dhawo tali ti: ‘Omukwanezimo gwoye okwa sa nokwa thiga po sha u mu thigulule.’ Oshizemo, aantu oyendji oya tumu papoosa iimaliwa yi thike po N$210 nenge yi vulithe po ‘omolwehokololoningomwa li na ko nasha nuuthiga’ ndyoka aniwa tali yelitha mpoka uuthiga u li nankene tau monika. Ihe oya li ya yemata noonkondo, molwaashoka ayehe mboka ya tumu iimaliwa oya mono ehokololoningomwa lya faathana nokapwa li nando gumwe ngoka a mono uuthiga washa.
Oompangela dha tya ngaaka ohadhi longitha nayi omahalo gaantu gopaunshitwe okumona uuthiga. Nonando ongaaka, Ombimbeli otayi popi nawa kombinga yaamboka taya gandja uuthiga tayi ti: “Omwaanawa ota thigululitha aatekulu.” (Omayeletumbulo 13:22, OB-1986) Uushili owo kutya Jesus Kristus mEuvitho lye lyokOndundu okwa popi oohapu ndhika dha tseyika nawa nodhi holike noonkondo tadhi ti: “Aanelago oomboka aaifupipiki, oshoka oyo taa ka thigulula evi.”—Mateus 5:5, OB-1986.
Oohapu dhaJesus otadhi tu dhimbulukitha shono omukwaniilwa David gwaIsrael shonale a li a nwethwa mo a nyole omathelemimvo ga piti, ta ti: “Aaifupipiki otaa ka thigulula evi notaa ka mona uulinawa nombili.”—Epsalmi 37:11, OB-1986.
“Otaa ka thigulula evi”—kali shi tuu etimaumbwile tali nyanyudha! Mbela otatu vulu okukala nuushili kutya shino kashi li owala ompangela yiineya ya longekidhwa okwiimba aantu ya mone sha? Eeno, otatu vulu. Molwashoka evi oli li eshito lyaJehova tali kumitha, e li Omushiti naMwene gwalyo oku na uuthemba oku li gandja kwaangoka ta hogolola. Okupitila momukwaniilwa David, Jehova okwa ningi euvaneko lyehunganeko kOmwana omuholike, Jesus Kristus: “Indila ndje, ngame notandi ku pe iigwana uuthiga, evi alihe notali ningi eliko lyoye.” (Epsalmi 2:8, OB-1986) Omolwetompelo ndino, omuyapostoli Paulus okwa hokolola Jesus e li gumwe “[ngoka Kalunga] e mu ningi omuthigululi gwaayihe.” (Aaheberi 1:2) Onkee ano otatu vulu okukala neinekelo lya gwana kutya, sho Jesus a ti aaifupipiki ‘otaa ka thigulula evi,’ shika okwe shi popi nelalakano ewanawa noku na oonkondopangelo dhe eleka okugwanitha euvaneko lye.—Mateus 28:18.
Onkee ano epulo lya simana noonkondo olyo kutya: Ongiini mbela euvaneko ndika tali ka gwanithwa? Kehe mpoka tatu tala kunena, otashi monika sha fa aantu mboka kaaye na ohenda noye na uuntsa haye shi pondola notaya kutha kehe shoka ya hala. Ano aaifupipiki otaya thigilwa po shike? Niishewe evi ohali nyatekwa nayi noonkondo, noonzo dhalyo ohadhi nyokomwa kaanalwiho naamboka ihaaya dhiladhila komeho. Mbela evi otali ka kala oshinima sha gwana okuthigululwa? Otatu ku hiya u leshe oshitopolwa tashi landula ko opo u mone eyamukulo kepulo ndika nagalwe ga simana noonkondo.
[Ethano pepandja 3]
Mbela uuthiga mbuno oto ke u mona?