Okukondja noohapu omolwashike haku ehameke?
“Omalugodhi noontamanana mokati keni ohadhi zi peni?”—JAKOB 4:1.
OMUNYOLI gwOmbimbeli Jakob kakwa li u ukitha epulo ndika kaakwiita yomatanga gaRoma mboka ya li taa hingi iita yesindano pethimbo mpono, nokakwa li ta kongo uuyelele u na ko nasha naashoka tashi ningitha oogwelila dhOshijuda hadhi ithanwa Sicarii nenge Aalumentu yOomwele methelemumvo lyotango E.N. ya kondje. Jakob okwa li ta popi oompata ndhono dha kwatela mo owala aantu aashona, nando oye li owala yaali. Omolwashike? Molwashoka ngaashi owala iita, omalugodhi gopaumwene omahanaguli. Tala omahokololo gOmbimbeli ngoka taga landula ko.
Oyanamati yatatekulululwa yaJakob oya li ye tonde omumwahe Josef unene noonkondo noye mu landitha po muupika. (Genesis 37:4-28) Konima yethimbo omukwaniilwa gwaIsrael Saul okwa li a hala a dhipage David. Omolwashike? Omolwaashoka okwa li a tsila ondumbo David. (1 Samuel 18:7-11; 23:14, 15) Methelemumvo lyotango, aakiintu yaali Aakriste Eudokia naSintike, oya li ya yono po ombili yegongalo alihe omolwoontamanana dhawo.—Aafilippi 4:2.
Momathimbo opo ga piti, aantu oya li ya kandula po oompata dhawo nomalugodhi, taya longitha omagongamwele nenge oombistoli. Olundji gumwe gwomoonakukondja okwa li a dhipagwa nenge a lemanekwa uule wonkalamwenyo ye ayihe. Nena, mboka haya tamanana olundji iilwitho yawo oyo oohapu dhuutondwe ndhoka tadhi ehameke. Nonando otashi vulika inaapu tilwahi ombinzi, omaponokelo gopakana ohaga ehameke omaiyuvo nokuyona edhina lyagumwe. Olundji mboka yaa na ondjo oyo haa mono iihuna “momalugodhi” ngoka.
Tala kwaashoka sha li sha ningwa po oomvula dhontumba dha piti sho omupristeli gumwe gwaAngelikana a li a pe mukwawo uusama kutya ota longitha nayi iimaliwa yongeleka. Okunyenyeta kwawo oku uvika apuhe negongalo mono ya li haa longo olya topoka muungundu. Iilyo yimwe oya li ya tindi okuya kelongelokalunga ngele omupristeli ngoka inaaya hala oye ta kwatele komeho. Uutondwe uunene wa tya ngaaka owe ya ningitha opo ongundu yimwe yi kale yaahe na ko nasha nonkwawo ngele ye li melongelokalunga mongeleka. Oompata odha geye unene, sho omupristeli ngoka a li ta tamaneke mukwawo naye wo a li a tamanekwa omolweihumbato ewinayi lyopamilalo.
Omubisofi Omukuluntu gwaCanterbury okwa kumagidha aawiliki yopambepo mboka yaali, e ti ithana oontamanana dhawo “okankela” nosho wo “oshinima itaashi simanekitha edhina lyOmuwa Gwetu.” Momumvo 1997 omupristeli gumwe gwomuyo okwa zimine a penzelwe. Omukwawo okwa kala miilonga sigo ethimbo ndyoka a adha oomvula dhokupenzelwa pamulandu gwongeleka yawo. Ihe okwa kala ta wilike sigo okomunute gwe gwahugunina, nokwa zi ko sho a gwanitha oomvula 70 momasiku 7 gaAguste mo 2001. Oshifokundaneki The Church of England Newspaper osha ti kutya esiku ndyoka a penzelwa olya li esiku lyoshituthi “shOmuyapuki” Victricius. “Omuyapuki” Victricius okwa li lye? Okwa li omubisofi gwomethelemumvo etine ngoka a li a dhengwa molwaashoka okwa tindi okukondja e li omukwiita. Oshifokundaneki osha popi kombinga yekondjithathano li na ko nasha niikala pokati kaapristeli mboka yaali, sha ti: “Okutinda okukondja molugodhi lwopangeleka kakwa li uukwatya [womupristeli ngoka a penzelwa].”
Aapristeli mboka oya li taya vulu okuyanda okwiiyehameka yo yene nosho wo yalwe andola oya tulile miilonga omayele gAaroma 12:17, 18 ngoka taga ti: “Inamu galulila nando omuntu uuwinayi we. Lalakaneneni oombyoka yo opalela aantu ayehe. Ngele tashi wapa, one kombinga yeni, kaleni mu na ombili naantu ayehe.”
Ongiini shi na ko nasha nangoye? Ngele gumwe te ku yematitha, mbela onkone ohayi ku ningitha opo u mu kondjithe noohapu? Nenge oho henuka oohapu oonkukutu nokukala nehalo okupanga ombili naye? Ngele wa yematitha gumwe, mbela oho kala to henuka omuntu ngono nokudhiladhila kutya ngele pwa piti ethimbo ele ta ka dhimbwa shito shoka sha ningwa po? Nenge mbela oho gandja ombili nziya? Kutya nduno owa pula u dhiminwe po nenge owa gandja ombili kugumwe, okukambadhala okupanga ombili nayalwe otaku kwathele shi na ko nasha nonkalonawa yoye. Omayele gOmbimbeli otage tu kwathele opo tu kandule po omaipumomumwe ngono ga kala po ethimbo ele, ngaashi oshitopolwa tashi landula ko tashi shi ulike.