Okukonga kwaantu ombili yokomwenyo
ALBERT okwa li omulumentu e na ondjokana ombwanawa e na aanona yaali ye li nawa. Ihe okwa li e uvite monkalamwenyo ye mwa kambela sha. Sho sha li oshidhigu kuye okumona iilonga, okwa li a kutha ombinga moopolotika nokwa li a taamba ko omusinda gwuusosiale. Okwa li a ningi nokuli oshilyo shongundu yopuyo yUukomonisi hashi longo nuudhiginini.
Ihe inapu pita ethimbo ele, Albert okwa li a teka omukumo shi na ko nasha nUukomonisi. Okwe etha po ekwatathano lye noopolotika nokwi igandja thiluthilu kuukwanegumbo we. Oku wu kaleka wa nyanyukwa okwa li kwa ningi elalakano lye monkalamwenyo. Nonando ongaaka, Albert okwa li e uvite natango monkalamwenyo ye mwa kambela sha; natango ka li e na ombili yashili yokomwenyo.
Albert haye awike a li a ningilwa oshinima sha tya ngaaka. Opo ya mone shoka onkalamwenyo tayi ti, aantu omamiliyona oya kambadhala nomalongotedho, omaufilosofi nomalongelokalunga gi ili nogi ili. Miilongo yokUuninginino, ongundu yaantu hayi ithanwa omahipi yomomumvo 1960 nasha oya li ya ningile oshipotha omikalo dhopamithigululwakalo nosho wo omithikampango dhopankalathano. Aagundjuka oyo unene ya li ya kongo enyanyu naashoka onkalamwenyo tayi ti okupitila miingangamithi hayi lundulula omadhiladhilo nomaufilosofi gaalongi nosho wo maapristeli aakuluntu yongundu ndjika. Nonando ongaaka, ongundu ndjika yomahipi oya nyengwa okweeta enyanyu lyashili. Pehala lyaashono, oye etitha po aantu mboka ya pikwa kiingangamithi naagundjuka kaaye na omikalo dhopauyogoki, nokungeyi oya humitha komeho okungushuluka kwomikalo dhaantu.
Uule womathelemimvo, aantu oyendji oya kala nokukonga enyanyu okupitila muuyamba, moonkondopangelo nenge melongo. Iinima mbyoka hugunina ohayi eta eyeme. Jesus okwa ti: “Okukalamwenyo kwomuntu kombanda yevi itaku lelepekwa kowindji weliko lye.” (Lukas 12:15) Pehala lyaashono, okutokola toko okulalakanena uuyamba olwindji ohaku eta okwaahe na enyanyu. Ombimbeli otayi ti: “Mboka ya hala okuninga aayamba, otaa gwile memakelo. Oyo otaa yulwa kuuhalu uuwinayi wuugoya mboka tau ya fala moshiponga nomekano. Oshoka mohole yeliko omo tamu zi uukolokoshi auhe. Aantu oyendji sho ya lalakanene eliko, oya . . . yono po oomwenyo dhawo niimpwiyu oyindji.”—1 Timoteus 6:9, 10.
Ongiini ano omuntu ta vulu okumona ombili yokomwenyo nosho wo elalakano lyonkalamwenyo? Mbela otu na owala oku yi konga kaapu na ekwatho lyasha, sha fa okuumba noshikuti oshoodhekwa shi li momilema? Lago enene, shika hasho shi li ngawo. Ngaashi tatu ka mona moshitopolwa tashi landula, ekandulopo otali adhika mokusila oshimpwiyu ompumbwe ndjoka ya simanenena nohayi kala owala yi niwe kaantu.
[Ethano pepandja 3]
Mbela okulalakanena uuyamba, oonkondopangelo, nenge elongo otaku ku kwathele okumona ombili yokomwenyo?