Olweendo olule olwa pewa ondjambi

MOREPABLIKA yoPaudemokoli yaKongo omwa zi ehokololo lyaamwayinathana yopanyama yaali mboka ya li ya tokola okuya molweendo olule moshitopolwa shi na iita oku ka kala poshigongi shoshitopolwa “Simanekeni Kalunga” muLisala. Kakele kelongo lyopambepo nosho wo omaendathano gopaKriste ngoka ya li ya tegelela okunyanyukilwa poshigongi, oya li ya hala okumona aakalelipo ya za koshitayimbelewa shOonzapo dhaJehova muKinshasa. Molwaashoka moshilongo omwa li mu na iita yopashigwana, oya li ya kala uule woomvula inaaya mona nando ogumwe okuza koshitayimbelewa, noya li ya hala okulongitha ompito ndjoka oku shi ninga.

Aamwayinathana mboka yaali oya li ye ende mombautu okuza komukunda gwawo kuBasankusu yu uka kuLisala, olweendo lwookilometa 300 lwaampono ndoka lwa pita miiheke nosho wo momilonga mbali. Olweendo ndoka olwa li lwe ya pula iiwike itatu. Molwaashoka ayehe yaali oya li aalongi yethimbo lyu udha, gumwe miilonga yethimbo lyu udha okwa kala mo uule woomvula 3 nomukwawo uule woomvula 19, oya li ya mono uuwanawa molweendo lwawo ndoka okutaandeleka onkundana ombwanawa yUukwaniilwa. Oya li ya longitha oowili 110 lwaampono okuuvithila mboka ya li ya tsakaneke mondjila, noya li ya gandja uufo uushona 200 nosho wo iifo 30.

Momulonga oya li ye na okuhinga mokati koondjambameya nokoongandu ndhoka dha li dhu udha moshitopolwa shoka. Kaya li taya vulu okweenda momulonga uusiku, oshoka osha li sha nika oshiponga okuhinga mo nombautu ngele kwa luudha. Oya li wo ya piti pomahala ogendji mpoka aantu haya hadhwa kaakwiita.

Nonando shoka osha li olweendo olule noonkondo noluvulithi, aamwayinathana mboka oya li ya nyanyukwa okuninga oonkambadhala ndhoka. Ayehe yaali oya li ye lu pandula noonkondo noya li ya nyanyukwa okukala poshigongi muLisala. Omitima dhawo odha li dha hwama omolwoshili noya li ya tsuwa omukumo kaamwatate naamwameme mboka ya li pamwe nayo ye thike po 7 000. Konima yoshigongi, oya li ya tsakaneke ishewe omashongo ogo tuu ngoka mondjila yawo okushuna kegumbo noya li ya adha yaandjwawo ye li nawa.