Uuyuni waahe na uuyuuki

MBELA oto shi zimine kutya otu li muuyuni waahe na uuyuuki? Nopwaahe na omalimbililo oto shi zimine. Oshili oyo ndjika: Kutya nduno iitalenti yetu oyini nonkalamwenyo yetu oya longekidhwa nawa ngiini, ihatu kala tu na uushili kutya otatu kala aayamba nenge otatu shi pondola nenge otatu kala tu na iikulya nokuli. Olwindji ohashi kala ngaashi omukwaniilwa omunandunge Salomo gwonale a li a ti: “Hashikwiila shonkulungu, hamaliko [gomunandunge] nohakulengwa kwomunawino ku na sha, aawe.” Omolwashike? Omolwaashoka “ayehe otaa ka [adhika] kethimbo nokeadhiko,” osho Salomo a tsikile ko ta ti.—Omuuvithi 9:11, OB-1954.

‘Ngele aantu taya gwile ohaluka methimbo lyoshiponga’

‘Ethimbo lyoshiponga’ olundji otashi ti okukala pehala lya puka pethimbo lya puka, nolundji ohashi yonagula po omalalakano getu nosho wo omategameno getu omawanawa. Salomo okwa ti kutya otu li ‘ngashika oohi ndhoka dha yulwa konete yoshiponga nenge oondhila ndhoka hadhi yulwa koomwigo. Osho wo tse aana yaantu hatu yulwa kethimbo lyoshiponga, nge tatu gwile mo ohaluka.’ (Omuuvithi 9:12) Pashiholelwa, aantu omamiliyona ohaya longo nokwaahe na oluthuwo omapya gawo opo ya monene omaukwanegumbo gawo iikulya, ihe ohaya adhika ‘kethimbo lyoshiponga’ uuna omvula itaayi loko niikunwa yawo tayi hanagulwa po koshikukuta.

Yalwe ohaya kambadhala oku ya kwathela, ihe ekwatho ndyoka hali pewa iihakanwa ‘yethimbo lyoshiponga’ kuyalwe muuyuni olundji ohali kala lyaahe li pauyuuki. Pashiholelwa, omvula yimwe opo ya zile ko, molugodhi lwokukondjitha ondjala, “enenevi alihe [lyaAfrika] olya li lya pewa ekwatho lyoshititano shiimaliwa [oopelesenda 20] mbyoka ya li ya nuninwa Iita yomEkololo,” osho ehangano limwe enene lyokugandja omakwatho lya ti. Mbela oshi li ngaa pauyuuki sho iilongo mbyoka ya hepuluka ya kondjo miita moshilongo shimwe e tayi longitha iimaliwa oyindji lwiikando itano yi vulithe pwaambyoka ya longithwa okulotitha uuwehame nosho wo okumona iihuna hoka kwe etithwa kondjala menenevi alihe? Noshi li ngaa mbela pauyuuki pethimbo lyehepuluko lyopamaliko opo omuntu 1 gwomaantu 4 yomaakali kombanda yevi ya kale natango moluhepo olunene nenge aanona omamiliyona ya se omvula kehe komikithi ndhoka tadhi vulu okukeelelwa? Kashi li nando pauyuuki!

Ihe osha yela kutya ‘ethimbo neadhiko’ halyo owala lya kwatelwa mo ngele ‘aantu taa gwile mo ohaluka methimbo lyoshiponga.’ Elongithonkondo enyanyalithi otali pangele wo onkalamwenyo yetu nokuutha shoka tashi tu ningilwa. Shoka osha li ngawo muBeslan muAlania, poshikufuthinge shomo 2004 sho aantu omathele ya li ya dhipagelwa meipumomumwe linyanyalitha pokati kiikulo netanga lyegameno, noyendji yomuyo oya li aanona mboka ya li mesiku lyawo lyotango posikola. Nonando oshoshili kutya mboka ya si naamboka ya hupu moshiponga shoka sha li owala she ya adha ombadhilila, osheetithi sho sheneshene ‘shethimbo ndyoka lyoshiponga’ osha li eipumomumwe lyopantu.

Mbela osho tashi kala ngawo sigo aluhe?

Yamwe ngele taya popi kombinga yokwaahenuuyuuki ohaya ti: “Ihe onkalamwenyo osho owala yi li ngaaka. Osho owala ya kala ngaaka, nosho tashi kala sigo aluhe.” Otaya ti kutya aanankondo otaya ka thininika aluhe mboka kaaye na oonkondo, naayamba omolwuuwanawa wawo otaya kala nokulongitha nayi aathigona sigo aluhe. Ohaya ti kutya shoka nosho wo ‘ethimbo lyoshiponga,’ ayihe kumwe otayi ke tu guma manga owala tse aantu oko tu li.

Mbela osho ngaa shi na okukala lela ngawo? Mbela otashi ka kala tashi wapa kwaamboka haya longitha iitalenti yawo noondunge nosho wo nowino ya mone ondjambi yi li pauyuuki omolwiilonga yawo yuudhiginini? Mbela opu na gumwe ngoka ta vulu okuninga po sha shoka tashi ka eta elunduluko lyaaluhe notali kalelele kuuyuni mbuka waahe na uuyuuki? Tala shoka oshitopolwa tashi landula ko tashi ti shi na ko nasha noshinima shika.

[Edhina lyomuthaneki gwethano pepandja 3]

MAXIM MARMUR/AFP/Getty Images