Tango oya li ya tidhwa, ihe konima oya taambwa ko

OOMVULA dhontumba dha piti, Santiago nomukulukadhi gwe, Lourdes, oya li ya tembukile kondoolopa yo opala nawa yaHuillcapata muPeru, opo ye ku uvithile aantu yamo onkundana yOmbiimbeli ndjoka tayi ya pe etegameno. Ihe mbalambala omwe ya omupristeli a za kuCuzco e ta lombwele aantu ayehe mondoolopa ndjoka ya gongale. Omupristeli okwa londodha aantu kutya okukala mo kwOonzapo dhaJehova okwa li taku ke ya etela egeelo edhipagi noshikungulu oshidhigu shoka tashi ka dhipaga iimuna yawo nokuhanagula po iikunwa yawo.

Oyendji oya li ya nwethwa mo ‘kehunganeko’ ndyoka, nuule wetata lyomvula lwaampono kapwa li nando ogumwe a pitike Santiago naLourdes ya konakone Ombiimbeli pamwe nayo. Omunambelewa gumwe gwondoolopa, leitenanda ngoloneya gwedhina Miguel, okwa li a tidhile Santiago naLourdes momapandaanda noku ya dhaadhiga nomamanya. Ihe oya li aluhe hayi ihumbata momukalo gwombili nogwopaKriste.

Konima yethimbo, aantu yamwe yomoondolopa oya li ya taamba ko ekonakonombiimbeli. Nokuli Miguel, okwa li a lundulula iikala ye. Okwa li a taamba ko ekonakono okukonakona Ombiimbeli naSantiago nokwa li a hulitha po okunwa sha pitilila e ta ningi omuntu omunambili. Konima yethimbo Miguel nomukulukadhi gwe nosho wo yaali yomoyanakadhona ye oya taamba ko oshili yOmbiimbeli.

Kunena, mondoolopa ndjoka omu na egongalo lyOonzapo dhaJehova tali shi enditha nawa. Miguel okwa nyanyukwa molwaashoka ogendji gomomamanya ngoka a li a dhaadhiga nago Santiago naLourdes oga li ge ya palutha nokwa pandula aaihokani mboka omolwoshiholelwa shawo oshiwanawa shombili.

[Omathano pepandja 32]

Iikala yombili yaSantiago naLourdes (kolumoho) oya li ya kwathela Miguel (kolulyo) okulundulula omutima gwe