Mbela otwa pumbwa Mesiasa?

OTASHI vulika ho pula epulo ndika to ti: “Mbela otwa pumbwa Mesiasa?” Eeno, otashi ka kala shi li pandunge okupula ngele Mesiasa ota ka kala ta ti sha shili kungoye.

Yamwe mboka wa simaneka omadhiladhilo gawo otashi vulika taye ke ku shilipaleka kutya eyamukulo lya yela olyo: Owa pumbwa shili Mesiasa ngaashi naanaa kehe gumwe e mu pumbwa. Omunawino mompango yOshijuda methelemumvo lyotango okwa nyolele kombinga yaMesiasa a ti: “Oye tuu ngoka e li ‘Eeno’ yomauvaneko agehe gaKalunga.” Ano okwa li a tsu omuthindo esimano lyonkandangala ndjoka Mesiasa ta dhana melalakano lyOmushiti gwetu okulaleka nuuyamba iigwana ayihe yokombanda yevi. (2 Aakorinto 1:20) Onkandangala ndjoka tayi dhanwa kuMesiasa oya simanenena nomolwaashono okuya kwe kombanda yevi nonkalamwenyo ye oyo tayi pewa unene eitulomo komahunganeko gOmbiimbeli. Membo limwe lya longithilwe kaantu omamiliyona oomvula 70 dha piti, Henry H. Halley okwa tile: “Etestamendi Ekulu olya li lya nyolwa nelalakano lyokupa aantu etegameno li na ko nasha nOkuya [kwaMesiasa] noku ku palela ondjila.” Ihe mbela osha pumbiwa ngaa e ye? Omolwashike u na okwiipula shi na ko nasha nako?

“Mesiasa” otashi ti lelalela “Omugwayekwa” notashi ti shimwe ashike nuutumbulilo wa tseyika nawa “Kristus.” Mesiasa ngoka ta popiwa koEncyclopædia Britannica, Enyanyangidho lyomo-1970, e li “omuhupithi omunenenene,” okwa li e na okuya molwaashoka aaihokani yotango Adam naEva ya li ya longo iilonga itaayi simanekitha Kalunga. Oya li ya shitwa ya gwanenena ye na etegameno linyanyudha okukala nomwenyo kaagu na ehulilo mOparadisa, ihe etegameno ndyoka oya li ye li kanitha. Omuyengeli omunashipotha ngoka konima yethimbo a li a tseyika oye Satana Ondiaboli okwa li a ti kutya Omushiti gwawo okwa li e na unene oshipango nonokutya otaya ka kala ye li nawa ngele taya tokola kuyo yene shoka oshiwanawa naashoka oshiwinayi.—Genesis 3:1-5.

Eva okwa li a pukithwa nokwi itaale iifundja mbyoka. Osha yela kutya molwaashoka Adam okwa li a tala ko uukuume nomukulukadhi gwe kutya owa simana u vulithe uudhiginini we kuKalunga, okwa li a yi meyono pamwe nomukulukadhi gwe lyuunashipotha mboka wa li wa hwahwamekwa kOndiaboli. (Genesis 3:6; 1 Timoteus 2:14) Mokuninga ngawo, inaya kanitha owala etegameno lyawo lyonkalamwenyo kaayi na ehulilo moparadisa moka ya li. Oya li ya taambekidha wo uulunde noshilanduliko shawo, eso, koluvalo lwawo ndoka inaalu valwa natango.—Aaroma 5:12.

Omushiti gwetu Jehova, okwa li a tokola nziya nkene ta ka kutha po iilanduliko iiwinayi mbyoka ya li ye etithwa kiiningwanima ya landulathana mbyoka ya li ya tameke okuningwa puunashipotha. Okwa li ta ka hanganitha aantu ishewe naye okupitila mwaashoka konima yethimbo sha li sha ningi ekotampango lyomOmpango ndjoka ya li ya pewa Moses kuKalunga, sha hala okutya, omwenyo omomwenyo. (Deuteronomium 19:21; 1 Johannes 3:8) Ando ekotampango ndyoka kalya tulilwe miilonga, ando inapu kala nando ogumwe gwomoluvalo lwaAdam naEva ta vulu oku ka mona omwenyo gwaaluhe moparadisa kombanda yevi, ngaashi sha li elalakano lyOmushiti kaantu. Ano osha yela kutya Mesiasa okwa li a pumbiwa.

Sho Jehova Kalunga a pangula Ondiaboli, mehunganeko lyotango lyOmbiimbeli okwa li a ti: “Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyula omutse gwoye, ongoye noto mu tsu moshithi shompadhi ye.” (Genesis 3:15) Omulongwantu gumwe gwOmbiimbeli okwa tile kutya “ehokololo lyomauvaneko gopaMesiasa ngaashi tali popiwa kOmanyolo, otali tameke noohapu [ndhoka].” Omulongwantu gulwe gwOmbiimbeli okwa tile kutya Mesiasa oye oshilongitho shaKalunga shoka “tashi ka kutha po uupyakadhi auhe mboka we etithwa kuulunde waantu yotango,” nopethimbo opo tuu mpoka okweetela aantu omalaleko nuuyamba.—Aahebeli 2:14, 15.

Ihe otashi vulika u wete kutya aantu nena inaya lalekwa nando nuuyamba. Pehala lyaashono, aantu kaye na nando etegameno. Omolwaashoka The World Book Encyclopedia tayi ti kutya “Aajuda oyendji oya tegelela natango Mesiasa e ye” nonokutya ote ko “opaleka iinima mbyoka ya puka nota ka sinda aatondi yoshigwana.” Ihe Ombiimbeli otayi ti kutya Mesiasa okwe ya nale. Opo u mone uuyelele u na ko nasha nokutya otwa tseya ngiini kutya Mesiasa okwe ya nale, monathana nagumwe gwomOonzapo dhaJehova moshitopolwa sheni.